1-3. Ano nga bisyon an nakarawat ni Pedro, ngan kay ano nga kinahanglan naton masabtan an kahulogan hito?

 TUIG adto han 36 C.E. Nasisirakan hi Pedro han adlaw ha katrakdag samtang nag-aampo hiya ha patag nga atop han usa nga balay hirani ha dagat ha may duruongan nga syudad han Jope. Pipira ka adlaw na hiya nga bisita dinhi hini nga balay. An iya pagin andam nga umukoy dinhi nagpapakita nga baga hin waray hiya pinaurog. An tag-iya han balay nga hi Simon parahimo hin anit, ngan diri ngatanan nga Judio maruruyag pag-ukoy kaupod han sugad nga tawo. a Bisan pa hito, mahibabaro na hi Pedro hin importante gud nga leksyon mahitungod han pagin waray pinaurog ni Jehova.

² Samtang nag-aampo hi Pedro, nakakita hiya hin bisyon. An iya nakita diri gud maruruyagan han bisan hin-o nga Judio. Tikang ha langit may nagtitipaubos nga surudlan nga pariho hin tela, ngan aada hito an mga hayop nga mahugaw sumala ha Balaud. Han ginsugo hi Pedro nga mag-ihaw ngan kumaon, binaton hiya: “Waray pa gud ako kumaon hin bisan ano nga mahugaw ngan diri limpyo.” Diri la makausa kondi tulo ka beses nga ginsidngan hiya: “Ayaw na pagtawaga nga mahugaw an mga butang nga ginlimpyohan na han Dios.” (Buh. 10:14-16) Tungod han bisyon nagupong hi Pedro, pero waray la ito pag-iha.

³ Ano an iginpapasabot han bisyon ni Pedro? Kinahanglan masabtan naton an kahulogan hito, kay magtututdo ito ha aton hin importante nga kamatuoran mahitungod han panhunahuna ni Jehova ha mga tawo. Sugad nga tinuod nga mga Kristiano, diri kita makakagpamatuod hin bug-os mahitungod han Ginhadian han Dios labot la kon mahibabaro kita pagsubad han panhunahuna han Dios ha mga tawo. Basi masabtan an kahulogan han bisyon ni Pedro, aton usisahon an makapainteres nga mga panhitabo antes ngan katapos hito.

4, 5. Hin-o hi Cornelio, ngan ano an nahitabo samtang nag-aampo hiya?

⁴ Diri maaram hi Pedro nga ha adlaw antes hito ha Cesarea, nga mga 50 ka kilometro ha norte han Jope, an lalaki nga hi Cornelio nakakarawat liwat hin bisyon tikang ha Dios. Hi Cornelio, nga usa nga senturyon ha Romano nga kasundalohan, ‘debotado nga tawo.’ b Susbaranan liwat hiya nga ulo han pamilya “nga may kahadlok ha Dios pati an iya bug-os nga panimalay.” Hi Cornelio diri Judio nga proselita; usa hiya nga diri turi nga Hentil. Pero mapinairon hiya ha mga Judio nga nanginginahanglan ngan nahatag ha ira hin materyal nga bulig. Inin sinsero nga tawo “padayon nga nangangamuyo ha Dios.”—Buh. 10:2.

⁵ Han mga alas-3 han kulop, nag-aampo hi Cornelio han nakakita hiya hin bisyon diin may anghel nga nagsiring ha iya: “An imo mga pag-ampo ngan mga regalo tungod ha kalooy nagtipaigbaw sugad nga hinumdoman ha atubangan han Dios.” (Buh. 10:4) Sugad han ginsiring han anghel, nagsugo hi Cornelio hin mga tawo basi ipatawag hi apostol Pedro. Hi Cornelio, nga diri turi nga Hentil, tisulod na ha usa nga purtahan nga tubtob hito nga panahon diri pa abrido ha iya. Makakarawat na niya an mensahe han katalwasan.

6, 7. (a) Pag-unabi hin eksperyensya nga nagpapakita nga ginbabaton han Dios an mga pag-ampo han sinsero nga mga tawo nga karuyag mahibaro han kamatuoran mahitungod ha iya. (b) Ano an aton mahibabaroan ha sugad nga mga eksperyensya?

⁶ Ginbabaton ba han Dios an mga pag-ampo  han sinsero nga mga tawo yana nga karuyag mahibaro han kamatuoran mahitungod ha iya? Pansina an usa nga eksperyensya. Ginkarawat han usa nga babaye ha Albania an usa nga kopya han An Barantayan nga may artikulo mahitungod ha pagpadaku hin mga anak. c Ginsidngan niya an Saksi nga binisita ha iya balay: “Maaram ka ba nga nag-aampo ako ha Dios nga buligan ako ha pagpadaku ha akon mga anak? Ginpakanhi ka niya! Para gud ini ha akon! Ini gud an akon ginkikinahanglan!” Ini nga babaye ngan an iya mga anak nga babaye nagtikang pag-aram han Biblia, ngan ha urhi an iya bana inapi ha pag-aram.

⁷ Talagsahon la ba ini nga eksperyensya? Diri! An sugad hini nga klase hin eksperyensya pauroutro nga nahitatabo ha bug-os nga kalibotan, salit diri gud masisiring nga nahituman la ini. Kon sugad, ano an iginpapakita hito ha aton? Siyahan, ginbabaton ni Jehova an mga pag-ampo han sinsero nga mga tawo nga namimiling ha iya. (1 Hadi 8:41-43; Sal. 65:2) Ikaduha, ginigiyahan kita han mga anghel ha aton pagsangyaw nga buruhaton.—Pah. 14:6, 7.

8, 9. Ano an ginsiring han espiritu kan Pedro, ngan ano an iya ginbuhat?

⁸ Samtang nakadto ha patag nga atop ngan “nagugupong . . . hi Pedro” kon ano an kahulogan han bisyon, inabot an mga mensahero nga ginsugo ni Cornelio. (Buh. 10:17) Maruruyag ba hi Pedro pag-upod hini nga kalalakin-an ngan pagsulod ha balay han usa nga Hentil, nga tulo ka beses man hiya nga nagsiring nga diri gud hiya makaon hin mga pagkaon nga ginhuhunahuna nga mahugaw sumala ha Balaud? Gin-gamit han Dios an iya baraan nga espiritu basi ipahibaro kan Pedro an iya kaburut-on may kalabotan hini. Ginsidngan hi Pedro: “Kitaa! May tulo nga tawo nga namimiling ha imo. Salit buhát, lusad ngan upod ha ira, nga diri gud nagruruhaduha, kay ginsugo ko hira.” (Buh. 10:19, 20) An nakarawat ni Pedro nga bisyon mahitungod han surudlan nga pariho hin tela sigurado nga nag-andam ha iya nga sundon an paggiya han baraan nga espiritu.

⁹ Han nahibaroan ni Pedro nga ginsugo han Dios hi Cornelio nga ipatawag hiya, ginpasulod niya ha balay an Hentil nga mga mensahero ngan iya hira “ginpaukoy sugad nga iya mga bisita.” (Buh. 10:23a) Inin masinugtanon nga apostol nagpapahiuyon na ha mga pagbag-o basi matuman an kaburut-on han Dios.

10. Paonan-o gin-gigiyahan ni Jehova an iya katawohan, ngan ano an bangin kinahanglan naton igpakiana ha aton kalugaringon?

 ¹⁰ Tubtob yana, ginbubuligan gihapon ni Jehova an iya katawohan nga hinay-hinay nga masabtan an iya kaburut-on. (Prob. 4:18) Pinaagi han iya baraan nga espiritu, iya gin-gigiyahan “an matinumanon ngan maaramon nga uripon.” (Mat. 24:45) May mga panahon nga bangin makakarawat kita hin mga pagbag-o ha aton pagsabot ha Pulong han Dios o ha pipira nga kahikayan ha organisasyon. Maopay nga pakianhan ta an aton kalugaringon: ‘Ano an akon reaksyon ha sugad nga mga pagbag-o? Nasunod ba ako ha paggiya han espiritu han Dios hini nga mga butang?’

11, 12. Ano an ginbuhat ni Pedro pag-abot niya ha Cesarea, ngan ano nga leksyon an nahibaroan na niya?

¹¹ Han sunod nga adlaw katapos makita ni Pedro an bisyon, hiya ngan an siyam nga iba pa—an tulo nga mensahero nga ginsugo ni Cornelio ngan an “unom [nga Judio] nga kabugtoan” tikang ha Jope—kinadto ha Cesarea. (Buh. 11:12) Tungod kay ginpipinamulat ni Cornelio hi Pedro, iya na gintirok “an iya mga paryente ngan duok nga kasangkayan,” nga posible gud Hentil ngatanan. (Buh. 10:24) Pag-abot ni Pedro, may ginhimo hiya nga waray gud niya hunahunaa nga iya bubuhaton: Sinulod hiya ha balay han usa nga diri turi nga Hentil! Hi Pedro nagsaysay: “Maaram gud kamo nga supak ha balaud nga an usa nga Judio makig-upod o dumaop ha usa nga tawo nga iba an lahi, pero iginpakita ha akon han Dios nga diri ko sadang tawagon nga mahugaw o diri limpyo an bisan hin-o nga tawo.” (Buh. 10:28) Nasabtan na yana ni Pedro nga an katuyoan han bisyon nga iya nakarawat diri la para tutdoan hiya hin leksyon mahitungod ha kon ano nga mga klase hin pagkaon an puydi niya kaunon. Diri niya dapat ‘tawagon nga mahugaw an bisan hin-o nga tawo [bisan pa an usa nga Hentil].’

¹² An mga tawo nga naghuhulat kan Pedro interesado ha iya isisiring. “Aanhi kami ngatanan ha atubangan han Dios basi mamati ha ngatanan nga iginsugo ni Jehova ha imo nga igsiring,” hi Cornelio nagsaysay. (Buh. 10:33) Imadyina kon ano an imo aabaton kon makabati ka hin sugad nga mga pulong ha usa nga interesado! Nagtikang hi Pedro pagyakan pinaagi hinin mapwersa nga mga pulong: “Nasasabtan ko na gud yana nga an Dios waray pinaurog, kondi ha tagsa nga nasud an tawo nga may kahadlok ha iya ngan nagbubuhat han husto ginkakarawat niya.” (Buh. 10:34, 35) Nahibaroan na ni Pedro nga an panhunahuna han Dios ha mga tawo diri nakadepende ha ira lahi, nasyonalidad, o iba pa nga panggawas nga hitsura. Nagtikang hi Pedro pagpamatuod ha ira mahitungod han ministeryo, kamatayon, ngan pagkabanhaw ni Jesus.

13, 14. (a) Ano an iginpakita han kakombirte ni Cornelio ngan han iba pa nga mga Hentil han 36 C.E.? (b) Kay ano nga diri naton dapat hukman an mga tawo base ha ira panggawas nga hitsura?

¹³ May nahitabo yana nga waray pa gud mahitabo hadto: “Samtang nagyayakan pa hi Pedro,” an baraan nga espiritu iginbubo ngada hito nga “mga tawo han mga nasud.” (Buh. 10:44, 45) Ini la an nakarekord ha Kasuratan nga an espiritu iginbubo antes han bawtismo. Tungod kay nasabtan ni Pedro nga tigaman ini han pag-uyon han Dios, ‘nagsugo hiya nga bawtismohan hira [ito nga grupo han mga Hentil].’ (Buh. 10:48) Iginpakita han kakombirte hini nga mga Hentil han 36 C.E. nga natapos na an panahon han pagpakita han Dios hin espesyal nga pag-uyon ha mga Judio. (Dan. 9:24-27) Hini nga higayon, gin-gamit ni Pedro an ikatulo ngan ultimo nga yawi ha “mga yawi han Ginhadian.” (Mat. 16:19) Gin-abrihan hini nga yawi an purtahan basi an diri turi nga mga Hentil magin mga Kristiano nga gindihogan pinaagi han espiritu.

¹⁴ Sugad nga mga parasamwak han Ginhadian yana, maaram kita nga “an Dios waray ginpapaurog.” (Roma 2:11) Kaburut-on niya nga “matalwas an ngatanan nga klase hin tawo.” (1 Tim. 2:4) Salit kinahanglan diri gud naton hukman an mga tawo base ha ira panggawas nga hitsura. Ginsugo kita nga magpamatuod hin bug-os mahitungod han Ginhadian han Dios, ngan nag-uupod ito hin pagsangyaw ha ngatanan nga tawo, anoman an ira lahi, nasyonalidad, hitsura, o relihiyon.

15, 16. Kay ano nga an pipira nga Judio nga Kristiano nakigdiskusyon kan Pedro, ngan paonan-o niya iginsaysay an iya ginbuhat?

¹⁵ Sigurado nga karuyag gud ni Pedro isumat an nahitabo, salit kinadto hiya ha Jerusalem. Pero antes pa hiya makaabot, nabatian na han kabugtoan didto an balita nga an diri turi nga mga Hentil ‘kinarawat han pulong han Dios.’ Pag-abot gud ni Pedro, “an mga nasuporta ha pagturi nasina ha iya.” Naalarma hira kay sinulod hiya “ha balay han mga tawo nga diri turi ngan kinaon upod nira.” (Buh. 11:1-3) An isyu diri kon puydi ba magin mga sumurunod han Kristo an mga Hentil. Lugod, gin-iinsister gud hiton Judio nga mga disipulo nga kinahanglan sundon han mga Hentil an Balaud—upod na an pagpaturi—basi karawaton ni Jehova an ira pagsingba. Klaro nga an pipira nga Judio nga disipulo nakukurian pagkarawat nga natapos na an Mosaiko nga Balaud.

¹⁶ Paonan-o iginsaysay ni Pedro an iya ginbuhat? Sumala ha Buhat 11:4-16, iya ginhisgotan an upat nga ebidensya han paggiya han Dios: (1) an iya nakarawat nga bisyon tikang ha Dios (Bersikulo 4-10); (2) an sugo han espiritu (Bersikulo 11, 12); (3) an pagbisita han anghel kan Cornelio (Bersikulo 13, 14); ngan (4) an pagbubo han baraan nga espiritu ha mga Hentil. (Bersikulo 15, 16) Gintapos ni Pedro an iya pagsaysay pinaagi hin mapwersa gud nga pakiana: “Salit kon gintagan hira [tumuroo nga mga Hentil] han Dios han amo gihapon nga waray bayad nga regalo [nga baraan nga espiritu] nga iginhatag niya ha aton [mga Judio] nga natoo ha Ginoo nga hi Jesu-Kristo, hin-o ba ako para mapugngan an Dios?”—Buh. 11:17.

17, 18. (a) Tungod han ginsiring ni Pedro, ano nga desisyon an kinahanglan himoon han Judio nga mga Kristiano? (b) Kay ano nga diri pirme masayon nga matipigan an pagkaurosa han kongregasyon, ngan ano an maopay nga igpakiana ta ha aton kalugaringon?

¹⁷ Tungod han ginsiring ni Pedro, kinahanglan magdesisyon iton Judio nga mga Kristiano. Kaya ba nira wad-on an bisan ano nga ira inaabat nga diskriminasyon ngan karawaton an bag-o nga nabawtismohan nga mga Hentil sugad nga ira mga igkasi-Kristiano? An asoy nagsusumat ha aton: “Pakabati nira [han mga apostol ngan han iba pa nga Judio nga mga Kristiano] hini nga mga butang, waray na hira kumontra, ngan ginhimaya nira an Dios, nga nasiring: ‘Kon sugad, an Dios naghatag liwat ha mga tawo han mga nasud hin higayon nga magbasol basi makakarawat hira hin kinabuhi.’” (Buh. 11:18) Tungod hiton positibo nga disposisyon, natipigan an pagkaurosa han kongregasyon.

 ¹⁸ Yana liwat, bangin diri pirme masayon an pagtipig han pagkaurosa, kay an tinuod nga mga magsiringba “tikang ha ngatanan nga nasud ngan mga tribo ngan mga katawohan ngan mga pinulongan.” (Pah. 7:9) Salit ha damu nga kongregasyon, an kabugtoan iba-iba an lahi, kultura, ngan gintikangan. Maopay nga pakianhan ta an aton kalugaringon: ‘Ginwara ko na ba ha akon kasingkasing an bisan ano nga pag-abat hin diskriminasyon? Determinado ba ako nga an paagi han akon pagtratar ha akon Kristiano nga kabugtoan diri gud maimpluwensyahan han mga kinaiya hini nga kalibotan nga nagriresulta hin pagkabahin-bahin—upod na an pag-abat hin pagin labaw ha iba tungod han nasud, tribo, kultura, ngan lahi?’ Hinumdumi an nahitabo kan Pedro (Cefas) pipira ka tuig katapos han kakombirte han siyahan nga mga Hentil. Naapektohan hiya han diskriminasyon han iba salit “binulag hiya” ha Hentil nga mga Kristiano ngan kinahanglan sawayon ni Pablo. (Gal. 2:11-14) Padayon gud kita nga magbantay nga diri mabitik han diskriminasyon.

19. Kan kanay nagtikang pagsangyaw an Judio nga mga Kristiano ha Antiokia, ngan ano an nagin resulta?

¹⁹ Nagtikang ba pagsangyaw ha diri turi nga mga Hentil an mga sumurunod ni Jesus? Pansina an nahitabo ha urhi ha Antiokia han Sirya. d Damu nga Judio an naukoy hini nga syudad, ngan dinhi murayaw an pagkaurupod nira ngan han mga Hentil. Salit an Antiokia maopay nga teritoryo ha pagsangyaw ha mga Hentil. Dinhi gintikangan han pipira nga Judio nga disipulo an pagpasamwak han maopay nga sumat “ha mga tawo nga nagyayakan hin Griego.” (Buh. 11:20) Nagsangyaw hira diri la ha mga Judio nga nagyayakan hin Griego kondi pati liwat ha diri turi nga mga Hentil. Ginbendisyonan ni Jehova ito nga buruhaton, ngan “damu an nagin mga tumuroo.”—Buh. 11:21.

20, 21. Paonan-o hi Bernabe nagpakita hin pagkamapainubsanon, ngan paonan-o liwat naton maipapakita an pagkamapainubsanon ha aton ministeryo?

²⁰ Basi maataman ini nga teritoryo nga andam na ha pangani, hi Bernabe ginpakadto ha Antiokia han kongregasyon ha Jerusalem. Damu gud an interesado didto salit diri niya ito kaya nga hiya la. Hin-o pa ba an mas makakabulig ha iya labot kan Saul, nga magigin apostol ha mga nasud? (Buh. 9:15; Roma 1:5) Huhunahunaon ba ni Bernabe nga karibal hi Saul? Ha kabaliktaran, nagpakita hi Bernabe  hin pagkamapainubsanon. Hiya mismo an kinadto ha Tarso basi bilngon hi Saul ngan ig-upod pagbalik ha Antiokia para makabulig. Nagkaupod hira hin usa ka tuig ngan ginparig-on an mga disipulo ha kongregasyon didto.—Buh. 11:22-26a.

²¹ Paonan-o naton maipapakita an pagkamapainubsanon ha aton ministeryo? Ini nga kalidad nag-uupod han pagkilala han aton mga limitasyon. Kita ngatanan may iba-iba nga mag-opay nga kalidad ngan mga abilidad. Pananglitan, an iba bangin epektibo ha pagsangyaw ha diri pormal nga paagi o ha balay-balay pero nakukurian ha mga pagbalik-bisita o pagtikang hin mga pag-aram ha Biblia. Kon karuyag mo mag-uswag ha bisan ano nga bahin han ministeryo, puydi ka ba magpabulig? Kon bubuhaton mo ito, bangin magin mas mabungahon ka ngan mas malipayon ha ministeryo.—1 Cor. 9:26.

22, 23. Paonan-o iginpakita han kabugtoan ha Antiokia an ira gugma ha ira kabugtoan, ngan paonan-o ito ginbubuhat han katawohan han Dios yana?

²² Ha Antiokia siyahan nga “gintawag nga mga Kristiano an mga disipulo pinaagi han giya han Dios.” (Buh. 11:26b) Ito nga ngaran nga inuyonan han Dios angayan gud nga naghuhulagway ha mga tawo nga nagsusubad ha Kristo ha ira paagi han pagkinabuhi. Samtang nagigin mga Kristiano an mga tawo han mga nasud, ginhigugma ba han mga tumuroo nga Judio ngan Hentil an usa kag usa sugad nga bugto? Pansina an nahitabo han nagkaada duro nga gutom han mga 46 C.E. e Ha kadaan nga panahon, an mga pobre apektado gud han mga gutom kay waray hira ekstra nga kwarta o pagkaon. Ha panahon hini nga gutom, an Judio nga mga Kristiano nga naukoy ha Judea, nga damu ha ira an posible gud nga pobre, nanginahanglan hin pagkaon ngan iba pa nga mga butang. Han nahibaroan ito han kabugtoan ha Antiokia—upod na an Hentil nga mga Kristiano—nagpadara hira hin “bulig ha kabugtoan nga naukoy ha Judea.” (Buh. 11:29) Nagpakita gud hira hin tinuod nga gugma ha ira kabugtoan!

²³ Ito liwat an ginbubuhat han katawohan han Dios yana. Kon nahibabaro kita nga nanginginahanglan an aton kabugtoan—ha iba man nga nasud o ha aton mismo lugar—namimiling kita hin mga paagi ha pagbulig ha ira. An mga Branch Committee nag-oorganisar dayon hin mga Disaster Relief Committee basi panginanoon an aton  kabugtoan nga bangin naapektohan han mga kalamidad, sugad han mga bagyo, linog, ngan tsunami. Kon ginbubuligan naton an aton kabugtoan nga nanginginahanglan, iginpapakita naton nga tinuod an aton gugma ha ira.—Juan 13:34, 35; 1 Juan 3:17.

24. Paonan-o naton maipapakita nga nasasabtan naton an pagkaimportante han kahulogan han bisyon nga nakarawat ni Pedro?

²⁴ Sugad nga tinuod nga mga Kristiano, nasasabtan naton an pagkaimportante han kahulogan han bisyon nga nakarawat ni Pedro didto ha patag nga atop ha Jope han siyahan nga siglo. An Dios nga aton ginsisingba waray pinaurog. Kaburut-on niya nga magpamatuod kita hin bug-os mahitungod han iya Ginhadian, ngan nag-uupod ito hin pagsangyaw ha iba anoman an ira lahi, gintikangan nga nasud, o estado ha kinabuhi. Salit magin determinado kita nga tagan an ngatanan nga mamamati hin oportunidad nga mahibaro mahitungod han maopay nga sumat.—Roma 10:11-13.