1. Ano an mga kaparihoan han siyahan-siglo nga mga Kristiano ngan han mga Saksi ni Jehova yana?

 MADASIGON hira nga nagpamatuod. Mapainubsanon nga ginkarawat nira an bulig ngan giya han baraan nga espiritu. An pagtimaraot waray makapaundang ha ira pagsangyaw. Ngan hura nga ginbendisyonan hira han Dios. Ini ngatanan nahitabo ha siyahan-siglo nga mga Kristiano, ngan nahitatabo liwat ha mga Saksi ni Jehova yana.

2, 3. Kay ano nga naiiba an libro han Mga Buhat?

² Sigurado nga nadasig ka han makaparig-on ha pagtoo nga mga asoy ha eksayting nga libro han Biblia nga Mga Buhat han mga Apostol! Naiiba ini, kay ini la an giniyahan han Dios nga kasaysayan han siyahan-siglo nga mga Kristiano.

³ An libro han Mga Buhat nag-unabi hin 95 nga ngaran han mga indibiduwal tikang ha 32 nga katunaan, 54 nga syudad, ngan 9 nga isla. Eksayting ini nga istorya mahitungod han mga tawo—ordinaryo nga mga tawo, mapahitas-on nga mga tawo nga nagbubuhat hin buwa nga pagsingba, hambog nga mga politiko, ngan bayolente nga mga paratimaraot. Pero labaw ha ngatanan, mahitungod ini ha imo kabugtoan ha siyahan nga siglo, nga nakaeksperyensya han mga problema ha kinabuhi kondi madasigon la gihapon nga nagsangyaw han maopay nga sumat.

4. Kay ano nga naabat kita nga duok kita kan apostol Pablo, kan Tabita, ngan ha iba pa nga matinumanon nga mga saksi ha kadaan nga panahon?

⁴ Haros 2,000 ka tuig na yana tikang ha panahon han madasigon nga mga apostol nga hira Pedro ngan Pablo, han hinigugma nga doktor nga hi Lucas, han mahinatagon nga hi Bernabe, han maisugon nga hi Esteban, han buotan nga hi Tabita, han maabiabihon nga hi Lydia, ngan han damu gud nga iba pa nga matinumanon nga mga saksi. Pero naabat kita nga duok kita ha ira. Kay ano? Kay pariho ha ira, ginsugo liwat kita nga manhimo hin mga disipulo. (Mat. 28:19, 20) Daku gud nga kadungganan an pakigbahin hito!

5. Diin nagtikang pagsangyaw an siyahan-siglo nga mga sumurunod ni Jesus?

⁵ Hunahunaa an iginsugo ni Jesus ha iya mga sumurunod. “Makarawat kamo hin gahum kon an baraan nga espiritu kumada na ha iyo,”  siring niya, “ngan magigin mga saksi ko kamo ha Jerusalem, ha bug-os nga Judea ngan Samaria, ngan ngadto ha pinakahirayo nga bahin han tuna.” (Buh. 1:8) Siyahan, ha bulig han baraan nga espiritu an mga disipulo nagin mga saksi “ha Jerusalem.” (Buh. 1:1–8:3) Sunod, ha paggiya han espiritu, nagpamatuod hira “ha bug-os nga Judea ngan Samaria.” (Buh. 8:4–13:3) Katapos, nagtikang hira pagsangyaw han maopay nga sumat “ngadto ha pinakahirayo nga bahin han tuna.”—Buh. 13:4–28:31.

6, 7. Ha aton pagministeryo, ano an may-ada kita nga waray an aton mga igkasi-tumuroo ha siyahan nga siglo?

⁶ An imo mga igkasi-tumuroo ha siyahan nga siglo waray han bug-os nga Biblia nga ira magagamit ha ira pagsangyaw. Nagkaada ebanghelyo ni Mateo dida la han mga 41 C.E. An pipira han mga surat ni Pablo ginhimo antes matapos an Mga Buhat, han mga 61 C.E. Pero an siyahan-siglo nga mga Kristiano waray personal nga kopya han bug-os nga Baraan nga Kasuratan o han iba-iba nga publikasyon nga puydi ibilin ha interesado nga mga tawo. Antes magin mga disipulo ni Jesus, an Judio nga mga Kristiano nakabati han Hebreo nga Kasuratan nga ginbabasa ha sinagoga. (2 Cor. 3:14-16) Pero bisan ito nga mga Kristiano kinahanglan magin maduruto nga mga estudyante ngan memoryahon ito nga mga teksto, kay posible hira magkotar tikang hito.

⁷ Yana, kadam-an ha aton may-ada personal nga kopya han Biblia ngan damu nga literatura nga nakabase ha Biblia. Nanhihimo kita hin mga disipulo pinaagi ha pagpasamwak han maopay nga sumat ha 240 nga katunaan ngan ha damu nga yinaknan.

8, 9. (a) Ano an nahimo han mga disipulo ni Jesus ha bulig han baraan nga espiritu? (b) Ano an ginhihimo han matinumanon nga uripon ha bulig han espiritu han Dios?

⁸ Han ginsugo ni Jesus an iya mga disipulo nga magin mga saksi, ginsidngan niya hira: “Makarawat kamo hin gahum kon an baraan nga espiritu kumada na ha iyo.” Ha paggiya han espiritu, o aktibo nga pwersa han Dios, ha urhi an mga sumurunod ni Jesus magigin mga saksi ha bug-os nga tuna. Pinaagi han baraan nga espiritu, hira Pedro ngan Pablo nagtambal hin mga may sakit, nagpagawas hin mga demonyo, ngan nagbuhi pa ngani hin mga patay! Pero an gahum nga nakarawat pinaagi han baraan nga espiritu may-ada mas importante nga katuyoan. Pinaagi hito an mga apostol ngan an iba pa nga mga disipulo nakabulig ha iba nga magkaada husto nga kahibaro nga nangangahulogan hin kinabuhi nga waray kataposan.—Juan 17:3.

⁹ Ha adlaw han Pentekostes 33 C.E., an mga disipulo ni Jesus nagyakan “hin iba-iba nga mga yinaknan, sugad la han iginhatag ha ira han espiritu nga abilidad ha pagyakan.” Salit nagpamatuod hira mahitungod han “urusahon  nga mga buhat han Dios.” (Buh. 2:1-4, 11) Yana, diri kita nagyayakan hin iba-iba nga linggwahe ha milagroso nga paagi. Pero ha bulig han espiritu han Dios, an matinumanon nga uripon naghihimo hin mga literatura nga nakabase ha Biblia ha damu nga yinaknan. Pananglitan, minilyon nga kopya han An Barantayan ngan Pagpamata! an gin-iimprinta kada bulan, ngan an aton website nga jw.org may mga publikasyon ngan video nga nakabase ha Biblia ha sobra 1,000 nga yinaknan. Ini ngatanan nakakabulig ha aton nga maipasamwak an “urusahon nga mga buhat han Dios” ha mga tawo ha ngatanan nga nasud, tribo, ngan pinulongan.—Pah. 7:9.

10. Tikang han 1989, ano na an nahimo may kalabotan ha paghubad han Biblia?

¹⁰ Tikang han 1989, ginpokusan han matinumanon nga uripon an paghubad han Bag-o nga Kalibotan nga Hubad han Baraan nga Kasuratan ha damu nga yinaknan. Ini nga Biblia naihubad na ha sobra 200 nga yinaknan, ngan tinagnapuplo ka milyon nga kopya hini an naimprinta na, ngan damu pa an gin-iimprinta. Ini nga mga paningkamot naglalampos la ha bulig han Dios ngan han iya espiritu.

11. Ano na an nahimo may kalabotan ha paghubad han mga publikasyon han mga Saksi?

¹¹ An paghubad ginhihimo han yinukot nga Kristiano nga mga boluntaryo ha sobra 150 nga nasud ngan katunaan. Diri kita dapat mahipausa hini, kay waray iba nga organisasyon ha tuna an gin-gigiyahan han baraan nga espiritu ha “pagpamatuod hin bug-os” ha bug-os nga kalibotan mahitungod kan Jehova nga Dios, ha iya Mesianiko nga Hadi, ngan ha naestablisar nga Ginhadian ha langit!—Buh. 28:23.

12. Paonan-o nakagpamatuod hi Pablo ngan an iba nga mga Kristiano?

¹² Han nagpamatuod hi Pablo ha mga Judio ngan mga Hentil ha Antiokia han Pisidia, an mga “may husto nga disposisyon basi magkaada kinabuhi nga waray kataposan nagin mga tumuroo.” (Buh. 13:48) Ha kataposan han libro han Mga Buhat, hi Lucas nagsurat nga hi Pablo ‘nagsasangyaw han Ginhadian han Dios nga may daku gud nga kagawasan ha pagyakan, nga waray kaulangan.’ (Buh. 28:31) Diin nagsasangyaw ini nga apostol? Ha Roma—an kapital han usa nga gamhanan nga nasud ha kalibotan! Pinaagi man hin mga pahayag o han iba nga mga paagi, an mga sumurunod ni Jesus ha siyahan nga siglo nagpamatuod ha bulig ngan giya han baraan nga espiritu.

13. Kay ano nga dapat kita mag-ampo kon nakakaeksperyensya hin pagtimaraot?

¹³ Han an mga disipulo ni Jesus ha siyahan nga siglo nakaeksperyensya hin pagtimaraot, naghangyo hira kan Jehova nga tagan hira hin kaisog. Ano an resulta? Napuno hira han baraan nga espiritu ngan nagkaada gahum basi maisugon nga iyakan an pulong han Dios. (Buh. 4:18-31) Kita liwat nag-aampo para hin kinaadman ngan kusog basi makapadayon  ha pagsangyaw bisan pa han pagtimaraot. (San. 1:2-8) Tungod han bendisyon han Dios ngan han bulig han iya espiritu, nagpapadayon kita ha pagsangyaw han Ginhadian. Waray nakakapaundang han buruhaton nga pagpamatuod—duro man nga pagkontra o bayolente nga pagtimaraot. Kon gintitimaraot kita, kinahanglan gud kita mag-ampo para hin baraan nga espiritu ngan hin kinaadman ngan kaisog basi maipasamwak an maopay nga sumat.—Luc. 11:13.

14, 15. (a) Ano an nahitabo sugad nga resulta han “kasakitan nga nahitabo katapos han ginbuhat kan Esteban”? (b) Ha aton panahon, paonan-o an damu nga tawo ha Siberia nahibaro han kamatuoran?

¹⁴ Hi Esteban maisugon nga nagpamatuod antes hiya patayon han iya mga kaaway. (Buh. 6:5; 7:54-60) Tungod han “duro nga pagtimaraot” nga nahitabo hito nga panahon, an ngatanan nga disipulo, labot la han mga apostol, nagpatsarang ngadto ha bug-os nga Judea ngan Samaria. Pero waray ito makapaundang ha buruhaton nga pagpamatuod. Hi Felipe kinadto ha Samaria basi ‘magsangyaw mahitungod han Kristo,’ ngan nagkaada ito mag-opay gud nga resulta. (Buh. 8:1-8, 14, 15, 25) Dugang pa, ini an ginsusumat ha aton: “An mga nagpatlaag tungod han kasakitan nga nahitabo katapos han ginbuhat kan Esteban nakaabot tubtob ha Fenicia, Ciprus, ngan Antiokia, pero ha mga Judio la nira iginsusumat an mensahe. Kondi an pipira ha ira nga tikang ha Ciprus ngan Cirene kinadto ha Antiokia ngan nagtikang pakiistorya ha mga tawo nga nagyayakan hin Griego, nga iginpapasamwak an maopay nga sumat mahitungod han Ginoo nga hi Jesus.” (Buh. 11:19, 20) Hito nga panahon, nagsarang an mensahe han Ginhadian tungod han pagtimaraot.

¹⁵ Ha aton panahon, may puropariho nga nahitabo ha gintatawag hadto nga Soviet Union. Yinukot nga mga Saksi ni Jehova an gindistyero ha Siberia, labi na han dekada han 1950. Tungod kay nagsarang hira ha iba-iba nga lugar, an maopay nga sumat padayon nga nagsarang hito nga haluag nga tuna. Imposible gud nga an sugad kadamu nga Saksi magkakaada hin kwarta nga ginkikinahanglan basi makabiyahe hin mga 10,000 ka kilometro para ipasamwak an maopay nga sumat! Pero an gobyerno mismo an nagpakadto ha ira ha iba-iba nga bahin han nasud. Usa nga brother an nagsiring: “Tungod han ginhimo han mga awtoridad, yinukot nga sinsero nga mga tawo ha Siberia an nahibaro han kamatuoran.”

16, 17. Ha libro han Mga Buhat, ano nga ebidensya an aton makikita han bendisyon ni Jehova ha buruhaton nga pagpamatuod?

¹⁶ Klaro nga ginbendisyonan ni Jehova an siyahan-siglo nga mga Kristiano. Hi Pablo ngan an iba pa an nagtanom ngan nagsaribo, “kondi an Dios an padayon nga nagpapatubo hito.” (1 Cor. 3:5, 6) An mga asoy ha libro han Mga Buhat naghahatag hin ebidensya han sugad nga pag-uswag tungod han bendisyon ni Jehova ha buruhaton nga pagpamatuod. Pananglitan,  “an pulong han Dios padayon nga nagsarang, ngan an mga disipulo padayon nga nagdamu gud ha Jerusalem.” (Buh. 6:7) Samtang nagsasarang an pagsangyaw nga buruhaton, “an kongregasyon ha bug-os nga Judea ngan Galilea ngan Samaria nakaeksperyensya hin panahon han kamurayawan ngan naparig-on; ngan samtang nagkikinabuhi hira nga may [matinalahuron nga] kahadlok kan Jehova ngan uyon ha pagliaw han baraan nga espiritu, padayon hira nga nagtikadamu.”—Buh. 9:31.

¹⁷ Ha Antiokia han Syria, an mga Judio ngan an mga tawo nga nagyayakan hin Griego nakabati han kamatuoran tikang ha maisugon nga mga saksi. “Dugang pa,” siring han asoy, “an kamot ni Jehova nakada ha ira, ngan damu an nagin mga tumuroo ngan nakombirte ngadto ha Ginoo.” (Buh. 11:21) Mahitungod han dugang nga pag-uswag dida hito nga syudad, ini an aton mababasa: “An pulong ni Jehova padayon nga nag-uswag ngan nagsarang.” (Buh. 12:24) Ngan tungod han bug-os nga pagpamatuod ni Pablo ngan han iba pa ngadto ha mga Hentil, “ha gamhanan nga paagi an pulong ni Jehova padayon nga nag-uswag ngan nagin madaugon.”—Buh. 19:20.

18, 19. (a) Kay ano nga maaram kita nga “an kamot ni Jehova” aadi ha aton? (b) Paghatag hin ehemplo nga nagpapakita nga ginsusuportaran ni Jehova an iya katawohan.

¹⁸ Klaro nga “an kamot ni Jehova” aadi liwat ha aton yana. Ito an rason kon kay ano nga damu gud an nagigin mga tumuroo ngan ginsisimbolohan an ira dedikasyon ha Dios pinaagi ha pagpabawtismo. Dugang pa, tungod la han bulig ngan bendisyon han Dios naiilob ta an duro nga pagkontra—usahay, an duro nga pagtimaraot—ngan malampuson nga natutuman an aton ministeryo, pariho han ginbuhat ni Pablo ngan han iba pa nga mga Kristiano ha siyahan nga siglo. (Buh. 14:19-21) Hi Jehova nga Dios pirme aada para ha aton. An iya “waray kataposan nga mga butkon” pirme nasuporta ha aton ha ngatanan nga pagsari nga aton gin-aatubang. (Deut. 33:27) Hinumdoman ta liwat nga tungod ha iya harangdon nga ngaran, diri gud ginbabayaan ni Jehova an iya katawohan.—1 Sam. 12:22; Sal. 94:14.

¹⁹ Ini an usa nga ehemplo: Tungod kay hi Brother Harald Abt padayon nga nagpamatuod, gindara hiya han mga Nazi ha concentration camp ha Sachsenhausen ha panahon han Girra ha Kalibotan II. Han Mayo 1942, an Gestapo kinadto ha balay han iya asawa nga hi Elsa, ginkuha an ira bata pa nga anak nga babaye, ngan gin-aresto hi Elsa. Ginpadara hiya ha iba-iba nga concentration camp. “Ha mga tuig nga nakadto ako ha mga concentration camp ha Germany, nahibaro ako hin importante gud nga leksyon,” siring ni Sister Abt. “Nahibaroan ko nga mapaparig-on ka gud han espiritu ni Jehova kon nakakaeksperyensya ka hin duro nga pagsari! Antes ako arestuhon, nabasa ko an surat han usa nga sister nga nasiring nga kon nakakaeksperyensya hin duro nga pagsari, an espiritu ni Jehova nabulig ha imo nga magin kalmado. Kahuna ko nga medyo  nagpapasobra hiya. Pero han ako na mismo an nakaeksperyensya hin mga pagsari, nahibaroan ko nga tinuod an iya ginsiring. Ito gud an nahitatabo. Makuri ito hunahunaon, kon waray mo ito maeksperyensyahi. Pero ito gud an nahitabo ha akon.”

20. Ano an ginbuhat ni Pablo samtang priso hiya ha usa nga balay, ngan paonan-o ito makakadasig ha iba naton nga kabugtoan?

²⁰ An kataposan han libro han Mga Buhat nag-uunabi nga hi Pablo madasigon nga ‘nagsasangyaw han Ginhadian han Dios.’ (Buh. 28:31) Tungod kay priso hiya ha usa nga balay, waray hiya kagawasan nga magsangyaw ha balay-balay ha Roma. Bisan pa hito, padayon nga ginsangyawan niya an ngatanan nga napakadto ha iya. Yana, an iba naton nga hinigugma nga kabugtoan aada na la ha balay, bangin naghihinigda na la, o naukoy ha mga nursing home tungod han kalagas, sakit, o maluya nga panlawas. Pero waray gud magluya an ira gugma ha Dios ngan an ira hingyap nga magpamatuod. Igin-aampo naton hira, ngan puydi ta hangyoon an aton langitnon nga Amay nga buligan hira nga makaistorya an mga tawo nga karuyag mahibaro parte ha iya ngan ha iya makaruruyag nga mga katuyoan.

21. Kay ano nga dapat kita magpamatuod nga may pag-abat hin pagkaapurado?

²¹ An kadam-an ha aton mahimo makigbahin ha pagsangyaw ha balay-balay ngan ha iba pa nga mga paagi han panhimo hin disipulo nga buruhaton. Salit buhaton ta an ngatanan nga aton mahihimo ha pagtuman han aton papel sugad nga mga parasamwak han Ginhadian, nga nakikigbahin ha pagpamatuod “ngadto ha pinakahirayo nga bahin han tuna.” Ini nga buruhaton kinahanglan himoon nga may pag-abat hin pagkaapurado, kay klaro nga nakikita naton an “tigaman” han presensya han Kristo. (Mat. 24:3-14) Diri kita dapat magkarag hin panahon. Ha pagkayana, dapat “damu an [aton] ginbubuhat ha buruhaton han Ginoo.”—1 Cor. 15:58.

22. Ano an dapat naton magin determinasyon samtang ginhuhulat ta an adlaw ni Jehova?

²² Samtang ginhuhulat ta nga “umabot an daku ngan urusahon gud nga adlaw ni Jehova,” magin determinado kita nga padayon nga magin maisugon ngan matinumanon ha pagpamatuod. (Joel 2:31) Makakabiling pa kita hin damu nga tawo nga pariho ha mga taga-Berea nga ‘kumarawat han pulong nga may andam gud nga hunahuna.’ (Buh. 17:10, 11) Salit hinaot magpamatuod kita tubtob nga sugad hin mabatian na naton ini nga mga pulong: “Maopay an imo ginbuhat, maopay ngan matinumanon nga uripon!” (Mat. 25:23) Kon madasigon nga bubuhaton ta an aton bahin ha panhimo hin mga disipulo yana ngan padayon nga magigin matinumanon kan Jehova, sigurado nga malilipay kita ha waray kataposan nga nagkaada kita han daku nga kadungganan han “pagpamatuod hin bug-os” mahitungod han Ginhadian han Dios!