KAPITULO 7
Pagpasamwak han “Maopay nga Sumat Mahitungod kan Jesus”
Hi Felipe nagpakita hin ehemplo sugad nga ebanghelisador
Iginbase ha Buhat 8:4-40
1, 2. Ano an nagin epekto han nangalimbasog an mga parakontra nga paundangon an pagsangyaw han maopay nga sumat ha siyahan nga siglo?
NAHITATABO na an duro nga pagtimaraot, ngan hi Saul nagtikang ha “mabangis nga pag-atake” ha kongregasyon. (Buh. 8:3) Pinalagiw an mga disipulo, ngan bangin naghunahuna an pipira nga matutuman an katuyoan ni Saul nga wad-on an Kristianidad. Pero an pagsarang han mga Kristiano nagkaada diri ginlalaoman nga mga resulta. Ano ito?
2 An mga nagpatlaag nagtikang ‘magpasamwak han maopay nga sumat han pulong’ ha katunaan nga ira ginkadtoan han pinalagiw hira. (Buh. 8:4) Hunahunaa la ito! Imbes nga mapaundang han pagtimaraot an pagpasamwak han maopay nga sumat, nakabulig lugod ito nga maipasarang an mensahe! Tungod han pagpatlaag han mga disipulo, diri maaram an mga nagtitimaraot nga nakabulig pa hira nga maipasamwak an maopay nga sumat han Ginhadian ha higrayo nga lugar. Sugad han aton mahibabaroan, may puropariho hito nga nahitabo ha aton panahon.
“An mga Nagpatlaag” (Buhat 8:4-8)
3. (a) Hin-o hi Felipe? (b) Kay ano nga an Samaria haros waray pa masangyawi, pero ano an igintagna ni Jesus nga mahitatabo hito nga teritoryo?
3 An usa han “mga nagpatlaag” amo hi Felipe. a (Buh. 8:4; kitaa an kahon nga “ Hi Felipe nga ‘Ebanghelisador.’”) Kinadto hiya ha Samaria, usa nga syudad nga haros waray pa masangyawi, kay hadto hi Jesus nagsugo ha mga apostol: “Ayaw kamo pagsulod ha bisan ano nga syudad han mga Samaritano; lugod, padayon nga kadtoa niyo an nagkawawara nga mga karnero han panimalay ni Israel.” (Mat. 10:5, 6) Pero maaram hi Jesus nga maabot an panahon nga bug-os nga masasangyawan an Samaria, kay antes hiya sumaka ha langit, hiya nagsiring: “Magigin mga saksi ko kamo ha Jerusalem, ha bug-os nga Judea ngan Samaria, ngan ngadto ha pinakahirayo nga bahin han tuna.”—Buh. 1:8.
4. Ano an nagin reaksyon han mga Samaritano ha pagsangyaw ni Felipe, ngan ano an posible nga hinungdan hito?
4 Nakita ni Felipe nga an Samaria ‘busag na ngan andam na ha pangani.’ (Juan 4:35) An iya mensahe nakakarepresko gud ha mga naukoy didto. Kay ano? Kay an mga Judio diri nakikiistorya ha mga Samaritano, ngan nangangalas pa ngani ha ira an damu nga Judio. Ha kabaliktaran, nahibaroan han mga Samaritano nga waray ginpapaurog an mensahe han maopay nga sumat, salit iba gud ito ha panhunahuna han mga Pariseo nga mas labaw hira kay ha iba. Pinaagi ha madasigon ngan waray pinaurog nga pagsangyaw ha mga Samaritano, iginpakita ni Felipe nga waray hiya maimpluwensyahi han diskriminasyon hadton nagmiminos ha ira. Salit diri urusahon nga damu nga Samaritano an “urosa” nga namati kan Felipe.”—Buh. 8:6.
5-7. Paghatag hin mga ehemplo kon paonan-o an pagsarang han mga Kristiano nagresulta ha pagpasamwak han maopay nga sumat.
5 Pariho ha siyahan nga siglo, an pagtimaraot ha katawohan han Dios yana waray makapaundang ha ira pagsangyaw. Pauroutro nga ginpirit an mga Kristiano nga bumalhin ha iba nga lugar—ha prisohan man o ha iba nga nasud—pero nakabulig la lugod ito basi mas damu nga tawo an makabati han mensahe han Ginhadian. Pananglitan, han Girra ha Kalibotan II, an mga Saksi ni Jehova nakagsangyaw hin maopay ha mga concentration camp han mga Nazi. Usa nga Judio nga may nakilala nga mga Saksi didto an nagsiring: “An karig-on han mga bilanggo nga mga Saksi ni Jehova nakakombinse ha akon nga an ira pagtoo iginbasar ha Kasuratan—ngan nagin Saksi ako mismo.”
6 Ha pipira nga kahimtang, bisan an mga nagtitimaraot nasangyawan ngan kinarawat hito. Pananglitan, han an Saksi nga hi Franz Desch iginbalhin ngadto ha Gusen nga concentration camp ha Austria, nadumarahan niya hin pag-aram ha Biblia an usa nga opisyal han SS. Imadyina la an kalipay hinin duha nga lalaki han paglabay hin mga tuig nagkita hira utro ha usa nga kombensyon han mga Saksi ni Jehova ngan pariho na hira mga parasamwak han maopay nga sumat!
7 May puropariho hito nga nahitabo han an mga Kristiano pinalagiw ngadto ha iba nga nasud tungod han pagtimaraot. Pananglitan, han dekada han 1970, nasangyawan hin maopay an Mozambique han napiritan nga pumalagiw ngadto an mga Saksi nga taga-Malawi. Bisan kon ha urhi nagkaada pagkontra ha Mozambique, nagpadayon an pagsangyaw nga buruhaton. “Oo, an iba ha amon damu ka beses nga gin-aresto tungod han amon pagsangyaw nga buruhaton,” siring ni Francisco Coana. “Pero han damu an kinarawat han mensahe han Ginhadian, kombinsido kami nga ginbubuligan kami han Dios, sugad la nga ginbuligan niya an mga Kristiano ha siyahan nga siglo.”
8. Ano an nagin epekto ha pagsangyaw nga buruhaton han mga pagbag-o ha politika ngan ekonomiya?
8 Syempre, diri la an pagtimaraot an hinungdan han pag-uswag han Kristianidad ha iba nga mga nasud. Hinin naglabay nga mga dekada, an mga pagbag-o ha politika ngan ekonomiya nag-abri liwat hin mga oportunidad basi maipasamwak an mensahe han Ginhadian ha mga tawo nga iba-iba an yinaknan ngan nasyonalidad. An iba nga naukoy ha mga lugar nga may girra ngan makuri an ekonomiya pinalagiw ngadto ha mga lugar nga mas maopay an kahimtang ngan nagtikang mag-aram han Biblia didto. Tungod han pagkaabot hini nga mga refugee, nagkaada panginahanglan nga sangyawan hira ha ira kalugaringon nga yinaknan. Nangangalimbasog ka ba nga masangyawan an mga tawo “tikang ha ngatanan nga nasud ngan mga tribo ngan mga katawohan ngan mga pinulongan” ha iyo teritoryo?—Pah. 7:9.
“Tagi Liwat Ako Hini nga Awtoridad” (Buhat 8:9-25)
“Yana han nakita ni Simon nga iginhatag an espiritu pinaagi ha pagtungbaw han mga kamot han mga apostol, gintanyagan niya hira hin kwarta.”—Buhat 8:18
9. Hin-o hi Simon, ngan ano an posible nga hinungdan nga nagin interesado hiya ha ginbuhat ni Felipe?
9 Hi Felipe naghimo hin damu nga tigaman ha Samaria. Pananglitan, gintambal niya an mga baldado ngan nagpagawas pa ngani hin magraot nga espiritu. (Buh. 8:6-8) May usa nga lalaki nga naimpres gud ha abilidad ni Felipe ha paghimo hin mga milagro. Hiya hi Simon, usa nga madyikero nga ginrirespeto gud salit ini an siring han mga tawo parte ha iya: “Ini nga tawo amo an Gahum han Dios.” Yana nakita mismo ni Simon an tinuod nga gahum han Dios, nga iginpapakita han mga milagro nga ginhimo ni Felipe, ngan hi Simon nagin tumuroo. (Buh. 8:9-13) Pero ha urhi, nasarihan an mga motibo ni Simon. Paonan-o?
10. (a) Ano an ginbuhat nira Pedro ngan Juan ha Samaria? (b) Ano an ginbuhat ni Simon han nakita niya nga nakarawat han bag-o nga mga disipulo an baraan nga espiritu han igintungbaw nira Pedro ngan Juan an ira mga kamot ngada ha ira?
10 Han nahibaroan han mga apostol nga nagtitikadamu an nagigin mga Kristiano ha Samaria, ira ginpakadto hira Pedro ngan Juan. (Kitaa an kahon nga “ Gin-gamit ni Pedro an ‘mga Yawi han Ginhadian.’”) Pag-abot didto han duha nga apostol, igintungbaw nira an ira mga kamot ha bag-o nga mga disipulo, salit an kada tagsa nakakarawat han baraan nga espiritu. b Han nakita ini ni Simon, nagin interesado gud hiya. Nagsiring hiya ha mga apostol: “Tagi liwat ako hini nga awtoridad, basi an bisan hin-o nga tungbawan ko han akon mga kamot makakarawat han baraan nga espiritu.” Gintanyagan pa ngani hira ni Simon hin kwarta, kay naglalaom hiya nga mapapalit niya inin sagrado nga pribilehiyo!—Buh. 8:14-19.
11. Ano nga mapwersa nga sagdon an iginhatag ni Pedro kan Simon, ngan ano an reaksyon ni Simon?
11 Mapwersa an baton ni Pedro kan Simon. “Mawara unta an imo kwarta upod ha imo,” siring han apostol, “kay naghunahuna ka nga pinaagi han kwarta makukuha mo an waray bayad nga regalo han Dios. Waray ka bahín o malon hini nga butang, kay an imo kasingkasing diri sinsero ha atubangan han Dios.” Katapos, gin-aghat ni Pedro hi Simon nga magbasol ngan mag-ampo para hin kapasayloan. “Pangamuyo kan Jehova,” siring ni Pedro, “nga kon posible, mapasaylo ka ha maraot nga intensyon han imo kasingkasing.” Klaro nga diri maraot nga tawo hi Simon; karuyag niya buhaton an tama, pero hito nga takna, ginsunod niya an iya magraot nga hingyap. Salit nakimalooy hiya ha mga apostol: “Pangamuyo kamo kan Jehova para ha akon basi waray bisan usa han mga butang nga iyo ginsiring an mahitabo ha akon.”—Buh. 8:20-24.
12. Ano kakomon an pagpalit o pagbaligya hin mga posisyon ha Kakristianohan?
12 An pagsaway ni Pedro kan Simon usa nga pahamangno ha mga Kristiano yana. Ha pagkamatuod, ha pipira nga yinaknan, an pulong nga ginagamit para ha pagpalit o pagbaligya hin mga posisyon, labi na may kalabotan ha relihiyon, nahimo tungod hini nga insidente. Ha kasaysayan han apostata nga Kakristianohan, komon gud ini nga ginbubuhat. Ngani, an ikasiyam nga edisyon han The Encyclopædia Britannica (1878) nagsiring nga an bisan hin-o nga nag-aaram han kasaysayan han pagpili hin mga Papa makukombinse nga waray pa gud nahitabo nga eleksyon diin waray palita ini nga posisyon, ngan ha damu nga kahimtang, dayag gud ito nga ginbubuhat ngan diri iginkakaawod.
13. Paonan-o malilikyan han mga Kristiano an sala nga pagpalit o pagbaligya hin mga posisyon ha kongregasyon?
13 Kinahanglan likyan han mga Kristiano an sala nga pagpalit o pagbaligya hin mga posisyon ha kongregasyon. Pananglitan, diri nira dapat pagtinagan hin regalo o sobra nga dayawon an mga may responsabilidad ha kongregasyon para la makaaro hin mga pabor sugad han dugang nga mga pribilehiyo. Ha luyo nga bahin, an mga may responsabilidad dapat maglikay ha pagpakita hin paboritismo ha mga riko. Pariho sayop ito nga duha nga sitwasyon. Ha tinuod la, an ngatanan nga surugoon han Dios dapat gumawi sugad nga mga “ubos” ngan maghulat nga an espiritu ni Jehova an magpili kon hin-o an tatagan hin mga pribilehiyo. (Luc. 9:48) Waray lugar ha organisasyon han Dios an mga naghihingyap han ira “kalugaringon nga kadayawan.”—Prob. 25:27.
“Maaram Ka Gud ba han Imo Ginbabasa?” (Buhat 8:26-40)
14, 15. (a) Hin-o an “yunuko nga taga-Etiopia,” ngan paonan-o hiya nabilngan ni Felipe? (b) Ano an reaksyon han lalaki nga taga-Etiopia ha mensahe ni Felipe, ngan kay ano nga diri dinali-dali nga desisyon an iya pagpabawtismo? (Kitaa an footnote.)
14 Yana ginsugo han anghel ni Jehova hi Felipe nga kumadto ha dalan nga tikang ha Jerusalem ngadto ha Gaza. Kon may mga pakiana man hi Felipe kon kay ano nga ginpapakadto hiya, nabaton ito han nagkita hira han yunuko nga taga-Etiopia nga ‘nagbabasa ha daku nga tingog han sinurat ni propeta Isaias.’ (Kitaa an kahon nga “ Ha Ano nga Paagi Usa nga ‘Yunuko’?”) An baraan nga espiritu ni Jehova nagpagios kan Felipe nga daupon an karuwahe hito nga lalaki. “Maaram ka gud ba han imo ginbabasa?” ginpakianhan niya an taga-Etiopia samtang nadalagan tupad han karuwahe. An taga-Etiopia binaton: “Paonan-o ko man ini mahibabaroan kon waray maggigiya ha akon?”—Buh. 8:26-31.
15 Ginpasakay han taga-Etiopia hi Felipe ha karuwahe. Imadyina la an ira pag-istorya! Maiha na nga misteryo kon hin-o an “karnero,” o “surugoon,” ha tagna ni Isaias. (Isa. 53:1-12) Pero samtang nagbibiyahe hira, iginsaysay ni Felipe ha yunuko nga taga-Etiopia nga ini nga tagna natuman kan Jesu-Kristo. Pariho ha mga nabawtismohan han Pentekostes 33 C.E., an taga-Etiopia—nga usa na nga Judio nga proselita—maaram dayon han iya dapat buhaton. Nagsiring hiya kan Felipe: “Kitaa! May tubig dinhi; ano man an nakakaulang ha akon ha pagpabawtismo?” Ginbawtismohan dayon hiya ni Felipe! c (Kitaa an kahon nga “ Pagbawtismo ha ‘Katubigan.’”) Katapos, an espiritu ni Jehova naggiya kan Felipe ngadto ha bag-o nga toka ha Asdod, diin nagpadayon hiya ha pagpasamwak han maopay nga sumat.—Buh. 8:32-40.
16, 17. Paonan-o nabulig an mga anghel ha pagsangyaw nga buruhaton yana?
16 An mga Kristiano yana may-ada pribilehiyo nga makigbahin ha buruhaton nga pariho han ginbuhat ni Felipe. Kasagaran na nga naisasangyaw nira an mensahe han Ginhadian ha mga nakakaistorya nira ha diri pormal nga paagi, pananglitan kon nagbibiyahe hira. Ha damu nga kahimtang, klaro nga diri kay nahituman la nga nakaistorya nira an usa nga indibiduwal nga tangkod an kasingkasing. Malalaoman ini, kay ginklaro han Biblia nga gin-gigiyahan han mga anghel an pagsangyaw nga buruhaton basi an mensahe makaabot ha “tagsa nga nasud ngan tribo ngan pinulongan ngan katawohan.” (Pah. 14:6) An paggiya han mga anghel ha pagsangyaw nga buruhaton igintagna gud ni Jesus. Ha ilustrasyon ni Jesus parte ha mga trigo ngan mga banwa, siring niya nga ha panahon han pangani—ha ikatarapos han sistema han mga butang—“an mga mag-arani amo an mga anghel.” Nagsiring liwat hiya nga “titirukon [hini nga espiritu nga mga linarang] tikang ha iya Ginhadian an ngatanan nga butang nga nagigin hinungdan han kahipakdol ngan an mga tawo nga matinalapason.” (Mat. 13:37-41) Hito gihapon nga panahon, titirukon han mga anghel an mga may paglaom nga magin mga manurunod han Ginhadian ha langit—ngan ha urhi an “usa nga daku nga grupo” han “iba nga mga karnero”—nga karuyag ni Jehova nga makasulod ha iya organisasyon.—Pah. 7:9; Juan 6:44, 65; 10:16.
17 Sugad nga ebidensya nga nahitatabo ini, an iba nga aton nakakaistorya ha ministeryo nasiring nga nag-iinampo hira para han bulig han Dios. Pananglitan, usa ka adlaw duha nga Saksi an nagsasangyaw ngan may kaupod hira nga gutiay nga bata. Han tikaudto na, maundang na unta ha pagsangyaw an duha nga Saksi, pero karuyag gud han bata nga kumadto pa ha sunod nga balay. Ngani, naglugaring hiya pagkadto ngan nagtuktok ha purtahan! Han gin-abrihan han usa nga batan-on nga babaye an purtahan, dinaop an duha nga adulto nga Saksi basi makiistorya ha iya. Nahipausa hira han nagsiring an babaye nga nag-iinampo pa la hiya nga unta may bumisita ha iya basi buligan hiya nga masabtan an Biblia. Nakagtikang hira hin pag-aram ha Biblia!
“Dios, kon hin-o ka man, alayon buligi ako”
18. Kay ano nga diri gud dapat mawara an aton apresasyon ha aton ministeryo?
18 Sugad nga bahin han Kristiano nga kongregasyon, may-ada ka pribilehiyo nga makaupod ha pagbuhat an mga anghel samtang an pagsangyaw ha aton panahon nakakaabot ha mas damu pa gud nga mga tawo. Ayaw gud tuguti nga mawara an imo apresasyon hini nga pribilehiyo. Pinaagi ha padayon nga pagin madasigon ha pagsangyaw, magkakaada ka daku nga kalipay samtang iginpapasamwak mo “an maopay nga sumat mahitungod kan Jesus.”—Buh. 8:35.
a Diri ini an apostol nga hi Felipe. Lugod, amo ini an Felipe nga ginhisgotan ha Kapitulo 5 hini nga libro nga usa han “pito nga lalaki nga maopay an reputasyon,” nga gintokahan ha pag-organisar han adlaw-adlaw nga panhatag hin pagkaon ha Kristiano nga mga balo ha Jerusalem nga nagyayakan hin Griego ngan nagyayakan hin Hebreo.—Buh. 6:1-6.
b Klaro nga hito nga panahon, an bag-o nga mga disipulo kasagaran na nga gindidihogan, o nakakakarawat, han baraan nga espiritu han ginbawtismohan hira. Salit nagin posible para ha ira nga magkaada paglaom nga magmando sugad nga mga hadi ngan mga saserdote kaupod ni Jesus ha langit. (2 Cor. 1:21, 22; Pah. 5:9, 10; 20:6) Pero hinin partikular nga kahimtang, an bag-o nga mga disipulo waray dihugi han ginbawtismohan hira. Nakarawat la han bag-o nga bawtismado nga mga Kristiano an baraan nga espiritu—ngan an abilidad nga maghimo hin mga milagro nga resulta hito—katapos itungbaw nira Pedro ngan Juan an ira mga kamot ha ira.
c Diri ini dinali-dali nga desisyon. Tungod kay an taga-Etiopia usa nga Judio nga proselita, may-ada na hiya kahibaro ha Kasuratan, upod na an mga tagna parte ha Mesias. Yana nga maaram na hiya han papel ni Jesus ha katuyoan han Dios, puydi na dayon hiya magpabawtismo.
