1, 2. Ano an plano nga buhaton ni Saul ha Damasco?

 USA nga grupo hin kalalakin-an an hirani na ha Damasco, ngan karuyag nira buhaton didto an ira maraot nga plano. An ginkakangalasan nga mga disipulo ni Jesus pwersado nga igagawas nira ha ira mga balay, gagapuson, papakaalohan, ngan dadanason ngadto ha Jerusalem basi sirotan han Sanhedrin.

² An lider hini nga grupo amo hi Saul, ngan nahidabi na hiya ha pagpatay hin usa nga tawo. a Diri pa la maiha, nagkinita hiya ngan inuyon samtang an matinumanon nga disipulo ni Jesus nga hi Esteban ginbabato tubtob nga mamatay han iba nga panatiko nga mga Judio. (Buh. 7:57–8:1) Tungod kay waray makontento hi Saul ha pagtimaraot ha mga sumurunod ni Jesus ha Jerusalem, nagin sugad hiya hin sulô nga andam magpalarab han kalayo han pagtimaraot. Karuyag niya nga bug-os nga bungkagon an peligroso nga sekta nga gintatawag nga an “Dalan.”—Buh. 9:1, 2; kitaa an kahon nga “ An Awtoridad ni Saul ha Damasco.”

3, 4. (a) Ano an nahitabo kan Saul? (b) Ano nga mga pakiana an aton hihisgotan?

³ Tigda la nga nagkaada masilaw nga lamrag ha palibot ni Saul. Nakita ito han iya mga kaupod, pero nakalasan hira ngan waray makatingog. Tungod hito nga lamrag, nabuta hi Saul ngan natumba. Hi Saul, nga diri na nakakakita, nakabati hin tingog tikang ha langit nga nasiring: “Saul, Saul, kay ano nga gintitimaraot mo ako?” Nakalasan hiya ngan nagpakiana: “Hin-o ka, Ginoo?” Sigurado nga nahipausa gud hi Saul han baton: “Ako hi Jesus, nga imo gintitimaraot.”—Buh. 9:3-5; 22:9.

⁴ Ano an aton mahibabaroan ha siyahan nga ginsiring ni Jesus kan Saul? Ano an kapulsanan ha aton han pagrepaso han mga panhitabo ha panahon nga nakombirte hi Saul? Ngan ano nga mga leksyon an  aton mahibabaroan ha kon paonan-o gin-gamit han kongregasyon an panahon han kamurayawan katapos han kakombirte ni Saul?

5, 6. Ano an aton mahibabaroan ha ginsiring ni Jesus kan Saul?

⁵ Han ginpaundang ni Jesus hi Saul ha dalan tipakadto ha Damasco, waray Hiya magpakiana: “Kay ano nga gintitimaraot mo an akon mga disipulo?” Sugad han gin-unabi na, nagsiring hiya: “Kay ano nga gintitimaraot mo ako?” (Buh. 9:4) Oo, kon an mga sumurunod ni Jesus nakakaeksperyensya hin mga pagsari, inaabat liwat ni Jesus an ira pag-antos.—Mat. 25:34-40, 45.

⁶ Kon gintatalumpigos ka tungod han imo pagtoo ha Kristo, sarig nga hi Jehova ngan hi Jesus maaram han imo sitwasyon. (Mat. 10:22, 28-31) Ha pagkayana, bangin diri anay wad-on an pagsari. Hinumdumi nga nakita ni Jesus an pagsuporta ni Saul ha pagpatay kan Esteban ngan an kan Saul pagdanas ha matinumanon nga mga disipulo tikang ha ira mga balay ha Jerusalem. (Buh. 8:3) Pero waray paundanga ni Jesus an pagtimaraot hito nga panahon. Bisan pa hito, hi Jehova, pinaagi han Kristo, naghatag kan Esteban ngan ha iba pa nga mga disipulo han kusog nga ira ginkikinahanglan basi makapabilin nga matinumanon.

7. Ano an kinahanglan mo buhaton basi mailob an pagtimaraot?

⁷ Maiilob mo liwat an pagtimaraot kon buhaton mo an masunod: (1) Magin determinado nga magpabilin nga maunungon anoman an mahitabo. (2) Pangaro hin bulig kan Jehova. (Fil. 4:6, 7) (3) Tuguti nga hi Jehova an bumulos. (Roma 12:17-21) (4) Sarig nga tatagan ka ni Jehova hin kusog basi makailob tubtob nga wad-on na niya an pagsari.—Fil. 4:12, 13.

8, 9. Ano an posible nga gin-abat ni Ananias ha iya toka?

⁸ Katapos batunon an pakiana ni Saul nga, “Hin-o ka, Ginoo?” hi Jesus nagsiring ha iya: “Buhát ngan sulod ha syudad, ngan didto isusumat ha imo kon ano an imo kinahanglan buhaton.” (Buh. 9:6) An diri na nakakakita nga hi Saul gintugwayan ngadto ha iya uukyan ha Damasco, diin nagpuasa hiya ngan nag-ampo hin tulo ka adlaw. Hito liwat nga panahon, gin-istorya ni Jesus an mahitungod kan Saul ha usa nga disipulo dida hito nga syudad nga hi Ananias, nga “maopay an ginsisiring mahitungod ha iya han ngatanan nga Judio” nga naukoy ha Damasco.—Buh. 22:12.

⁹ Hunahunaa an iba-iba nga emosyon nga posible gud nga gin-abat ni Ananias! An Ulo han kongregasyon, an binanhaw nga hi Jesu-Kristo, nakikiistorya  ha iya ngan ginpili hiya para ha usa nga espesyal nga toka. Daku gud ito nga kadungganan, pero diri gud harumamay an toka! Han ginsumatan hi Ananias nga kinahanglan makiistorya hiya kan Saul, hiya binaton: “Ginoo, nabatian ko ha damu nga tawo an mahitungod hini nga tawo, an mahitungod han ngatanan niya nga ginbuhat nga nakakadaot ha imo mga baraan ha Jerusalem. Ngan dinhi may awtoridad hiya tikang ha punoan nga mga saserdote ha pag-aresto han ngatanan nga natawag han imo ngaran.”—Buh. 9:13, 14.

10. Ano an aton mahibabaroan mahitungod kan Jesus ha iya pagtratar kan Ananias?

¹⁰ Hi Ananias waray sawaya ni Jesus han iya iginpahayag an iya nababarak-an. Lugod, gintagan hiya ni Jesus hin klaro nga instruksyon. Ngan gintagan hiya ni Jesus hin konsiderasyon pinaagi ha pagsumat ha iya han rason kon kay ano nga karuyag Niya ipabuhat inin talagsahon nga toka. Mahitungod kan Saul, hi Jesus nagsiring: “Ini nga tawo usa nga pinili ko nga surudlan nga magdadara han akon ngaran ngadto ha mga nasud pati ha mga hadi ngan ha mga anak ni Israel. Kay ipapakita ko ha iya hin klaro kon ano kadamu an kinahanglan niya antuson tungod ha akon ngaran.” (Buh. 9:15, 16) Hi Ananias sinugot dayon kan Jesus. Ginkadto niya an paratimaraot nga hi Saul ngan nagsiring ha iya: “Saul, bugto, ginsugo ako nganhi han Ginoo nga hi Jesus, nga nagpakita ha imo ha dalan han tipakanhi ka, basi makakita ka utro ngan mapuno han baraan nga espiritu.”—Buh. 9:17.

11, 12. Ano an aton mahibabaroan ha mga panhitabo may kalabotan kan Jesus, kan Ananias, ngan kan Saul?

¹¹ Damu an aton mahibabaroan ha mga panhitabo may kalabotan kan Jesus, kan Ananias, ngan kan Saul. Pananglitan, gin-gigiyahan ni Jesus an pagsangyaw nga buruhaton, sugad han iya iginsaad. (Mat. 28:20) Bisan kon hi Jesus diri na direkta nga nakikiistorya ha mga indibiduwal yana, gin-gigiyahan niya an pagsangyaw  nga buruhaton pinaagi han matinumanon nga uripon, an iya gintokahan yana ha pagmangno ha iya mga surugoon ha panimalay. (Mat. 24:45-47) Ha paggiya han Nagmamando nga Lawas, ginbibiling han mga magwarali ngan mga payunir an mga naruruyag mahibaro hin dugang pa mahitungod han Kristo. Sugad han gin-unabi ha nahiuna nga kapitulo, damu han mga sugad ha ira an nag-ampo para hin giya ngan waray pag-iha ginsangyawan han mga Saksi ni Jehova.—Buh. 9:11.

¹² Masinugtanon nga ginkarawat ni Ananias an toka ngan ginbendisyonan hiya. Ginsusugot mo ba an sugo nga magpamatuod hin bug-os, bisan kon nababaraka ka tungod hito? An iba nababaraka ha pagbalay-balay ngan pakiistorya ha mga diri nira kilala. An iba naman nakukurian  pagsangyaw ha mga tawo ha mga lugar han negosyo, ha kalsada, o pinaagi hin telepono o mga surat. Nalamposan ni Ananias an iya kahadlok ngan nagkaada pribilehiyo nga buligan hi Saul nga makarawat an baraan nga espiritu. b Nagin malampuson hi Ananias kay sinarig hiya kan Jesus ngan ginhunahuna niya hi Saul sugad nga iya bugto. Malalamposan naton an aton kahadlok kon pariho kan Ananias, nasarig kita nga hi Jesus an naggigiya han pagsangyaw nga buruhaton, may empatiya kita ha mga tawo, ngan ginhuhunahuna naton nga puydi naton magin bugto bisan an pinakamakaharadlok nga mga tawo.—Mat. 9:36.

13, 14. Kon nag-aaram ka han Biblia pero diri pa bawtismado, ano an imo mahibabaroan ha ehemplo ni Saul?

¹³ Ginios dayon hi Saul uyon ha iya nahibaroan. Katambal niya, nagpabawtismo hiya ngan nakig-upod ha mga disipulo ha Damasco. Pero diri la ito an iya ginbuhat. “Ha mga sinagoga nagtikang dayon hiya pagsangyaw mahitungod kan Jesus, nga hiya an Anak han Dios.”—Buh. 9:20.

¹⁴ Kon nag-aaram ka han Biblia pero diri pa bawtismado, susubdon mo ba hi Saul ngan magios dayon uyon ha imo nahibabaroan? Oo, hi Saul nakakita hin milagro nga ginhimo han Kristo, ngan sigurado nga nakabulig ito ha iya nga gumios. Pero an iba nakakita liwat hin mga milagro nga ginhimo ni Jesus. Pananglitan, usa nga grupo hin mga Pariseo an nagkita han gintambal ni Jesus an uga nga kamot han usa nga lalaki, ngan damu nga Judio an maaram nga hi Lazaro ginbuhi ni Jesus tikang ha mga patay. Pero damu ha ira an nagpabilin nga diri interesado ngan nakontra pa ngani. (Mar. 3:1-6; Juan 12:9, 10) Ha kabaliktaran, hi Saul nagbag-o. Kay ano nga hi Saul ginios pero an iba waray? Kay mas nahadlok hiya ha Dios kay ha tawo ngan gin-apresyar gud niya an kalooy nga iginpakita ha iya han Kristo. (Fil. 3:8) Kon ito liwat an imo bubuhaton, diri mo tutugotan an bisan ano nga makapugong ha imo ha pakigbahin ha pagsangyaw nga buruhaton ngan ha pagin kwalipikado ha bawtismo.

15, 16. Ano an ginbuhat ni Saul ha mga sinagoga, ngan ano an reaksyon han mga Judio ha Damasco?

¹⁵ Naiimadyin mo ba an kahipausa ngan kasina han mga tawo han  nagtikang hi Saul pagsangyaw mahitungod kan Jesus ha mga sinagoga? “Diri ba ini an tawo nga mabangis nga nag-atake ha mga aadto ha Jerusalem nga natawag hini nga ngaran?” hira nagpakiana. (Buh. 9:21) Han iginsaysay ni Saul kon kay ano nga nagbag-o an iya panhunahuna mahitungod kan Jesus, ‘ginpamatud-an niya ha lohikal nga paagi nga ini an Kristo.’ (Buh. 9:22) Pero an lohikal nga pagsaysay diri makakakombinse ha ngatanan. Diri hito mababag-o an panhunahuna han mga tawo nga nagkikinabuhi uyon ha tradisyon o han mga tawo nga mapahitas-on. Bisan pa hito, waray umundang hi Saul.

¹⁶ Paglabay hin tulo ka tuig, ginkukontra la gihapon hi Saul han mga Judio ha Damasco. Ha kataposan, nagplano hira nga patayon hiya. (Buh. 9:23; 2 Cor. 11:32, 33; Gal. 1:13-18) Han nahibaroan ini nga plano, maaramon nga nagdesisyon hi Saul nga bumaya ha syudad ngan sumige hiya nga igtunton ha bintana ha pader han syudad pinaagi hin alat. Sumala kan Lucas, an mga binulig kan Saul nga makapalagiw hito nga gab-i “iya [kan Saul] mga disipulo.” (Buh. 9:25) Baga hin iginpapakita hini nga mga pulong nga may pipira nga nakabati han pagsangyaw ni Saul ha Damasco nga nagbag-o ngan nagin mga sumurunod han Kristo.

17. (a) Ano an mga reaksyon han mga tawo ha kamatuoran ha Biblia? (b) Ano an dapat padayon naton nga buhaton, ngan kay ano?

¹⁷ Han siyahan nga nagsumat ka ha imo pamilya, kasangkayan, ngan ha iba pa mahitungod han mag-opay nga butang nga imo nahibabaroan, bangin naglaom ka nga kakarawaton han ngatanan an kamatuoran ha Biblia kay lohikal ito. Bangin ginkarawat ito han iba, pero damu an waray kumarawat. Ngani, bangin gintratar ka nga kaaway han imo mismo mga kapamilya. (Mat. 10:32-38) Pero kon padayon nga pauuswagon mo an imo abilidad ha pangatadongan tikang ha Kasuratan ngan kon titipigan mo an imo Kristiano nga panggawi, bisan an mga nakontra ha imo bangin ha urhi magbag-o an hunahuna.—Buh. 17:2; 1 Ped. 2:12; 3:1, 2, 7.

18, 19. (a) Ano an nagin resulta han ginkompirma ni Bernabe nga disipulo na hi Saul? (b) Paonan-o naton masusubad hi Bernabe ngan hi Saul?

¹⁸ Han hi Saul sinulod ha Jerusalem, natural la nga an mga disipulo waray tumoo han nagsiring hiya nga disipulo na hiya. Pero han ginkompirma ni Bernabe nga disipulo na hi Saul, ginkarawat hiya han mga apostol, ngan nagpabilin hiya kaupod nira hin pipira ka panahon. (Buh. 9:26-28) Nagin maikmat hi Saul, pero waray niya ikaawod an maopay nga sumat. (Roma 1:16) Maisugon nga nagsangyaw hiya ha Jerusalem, ha lugar mismo diin gintikangan niya an mabangis nga pagtimaraot ha mga disipulo ni Jesu-Kristo. Nasina gud an mga Judio ha Jerusalem han nasantop nira nga gintalikdan na hira han ira ginhuhunahuna nga mangunguna ha pagpoo han mga Kristiano, ngan yana karuyag nira nga patayon hiya. “Han hinbaroan ini han kabugtoan,” siring han  asoy, “gindara nira [hi Saul] ha Cesarea ngan ginpakadto hiya ha Tarso.” (Buh. 9:30) Ginsunod ni Saul an instruksyon ni Jesus nga iginhatag pinaagi han kongregasyon. Salit nagpahimulos hi Saul ngan an kongregasyon.

¹⁹ Pansina nga kinaburut-on nga binulig hi Bernabe kan Saul. Sigurado nga inin mahigugmaon nga buhat nakabulig nga magin maopay nga magsangkay inin madasigon nga mga surugoon ni Jehova. Pariho kan Bernabe, kinaburut-on ba nga nabulig ka ha mga bag-ohan ha kongregasyon pinaagi ha pakig-upod ha ira ha ministeryo ngan pagbulig ha ira nga mag-uswag ha espirituwal? Kon bubuhaton mo ito, damu nga bendisyon an imo makakarawat. Kon bag-o ka pa la nga magwarali han maopay nga sumat, pariho kan Saul, ginkakarawat mo ba an bulig han iba? Pinaagi ha pakig-upod ha mas eksperyensyado nga mga magwarali, mapapauswag mo an imo abilidad ha ministeryo, magigin mas malipayon ka, ngan magkakaada ka duok ngan maunungon nga kasangkayan.

20, 21. Paonan-o gin-gamit hin maopay han mga surugoon han Dios hadto ngan yana an mga “panahon han kamurayawan”?

²⁰ Katapos makombirte hi Saul ngan talwas nga makagawas ha Jerusalem, “an kongregasyon ha bug-os nga Judea ngan Galilea ngan Samaria nakaeksperyensya hin panahon han kamurayawan.” (Buh. 9:31) Paonan-o gin-gamit han mga disipulo inin maopay nga panahon? (2 Tim. 4:2) An asoy nagsiring nga “naparig-on” hira. Ginparig-on han mga apostol ngan han iba pa nga may responsabilidad nga kabugtoan an pagtoo han mga disipulo ngan nanguna samtang an kongregasyon ‘nagkikinabuhi nga may kahadlok kan Jehova ngan uyon ha pagliaw han baraan nga espiritu.’ Pananglitan, gin-gamit ni Pedro ito nga panahon ha pagparig-on han mga disipulo ha bungto han Lida ha Kapatagan han Saron. Tungod han iya mga pangalimbasog, damu han mga naukoy hito nga lugar an nakombirte “ngadto ha Ginoo.” (Buh. 9:32-35) An mga disipulo waray magpaulang ha iba nga mga buruhaton, lugod nangalimbasog hira nga atamanon an usa kag usa ngan magsangyaw han maopay nga sumat. Sugad nga resulta, an kongregasyon ‘padayon nga nagtikadamu.’

²¹ Ha ikatarapos han ika-20 ka siglo, an mga Saksi ni Jehova ha damu nga nasud nakaeksperyensya liwat hin “panahon han kamurayawan.” An mga rehimen nga nagtalumpigos han katawohan han Dios hin mga dekada tigda nga natapos, ngan an pipira nga pagdiri ha pagsangyaw nga buruhaton naibanan o nawara. Ginsalingabot han tinagnapuplo ka yukot nga mga Saksi an oportunidad nga magsangyaw ha publiko, ngan nagkaada ito maopay gud nga resulta.

22. Paonan-o mo magagamit hin maopay an imo kagawasan?

 ²² Ginagamit mo ba hin maopay an imo kagawasan? Kon naukoy ka ha nasud nga may kagawasan ha relihiyon, karuyag gud ni Satanas nga mangalimbasog ka ha pagpamiling hin karikohan imbes nga magpokus ha Ginhadian. (Mat. 13:22) Ayaw tuguti nga mawara an imo pokus. Gamita hin maaramon an panahon han kamurayawan nga bangin napapahimulosan mo yana. Hunahunaa ito sugad nga mga higayon ha pagpamatuod hin bug-os ngan ha pagparig-on han kongregasyon. Hinumdumi nga puydi tigda nga magbag-o an imo kahimtang.

23, 24. (a) Ano nga mga punto an aton mahibabaroan ha asoy mahitungod kan Tabita? (b) Ano an dapat naton magin determinasyon?

²³ Pansina an nahitabo ha disipulo nga hi Tabita, o Dorcas. Naukoy hiya ha Jope, usa nga bungto nga hirani ha Lida. Maaramon nga gin-gamit hinin matinumanon nga bugto an iya panahon ngan panag-iya; damu an iya “mag-opay nga mga buhat ngan mga regalo tungod ha kalooy.” Pero tigda la nga nagkasakit hiya ngan namatay. c Tungod han iya kamatay, nasubo gud an mga disipulo ha Jope, labi na an mga balo nga iya ginpakitaan hin pagkabuotan. Pag-abot ni Pedro ha balay diin igin-aandam an patay nga lawas ni Tabita para ha paglubong, naghimo hi Pedro hin milagro nga waray pa gud mahimo han iba nga mga apostol ni Jesu-Kristo. Nag-ampo hi Pedro ngan ginbuhi hi Tabita tikang ha mga patay! Naiimadyin mo ba an kalipay han mga balo ngan han iba pa nga mga disipulo han ginpabalik hira ni Pedro ha kwarto ngan iginpakita ha ira nga buhi na hi Tabita? Sigurado nga ini nga mga panhitabo nagparig-on gud ha ira para ha tiarabot nga mga pagsari! Natural la nga ini nga milagro ‘nahibantog ha bug-os nga Jope, ngan damu an nagin mga tumuroo ha Ginoo.’—Buh. 9:36-42.

²⁴ Mahibabaroan naton an duha nga importante nga punto tikang hini nga asoy mahitungod kan Tabita. (1) Halipot la an kinabuhi. Salit importante gud nga maghimo kita hin maopay nga ngaran ha Dios samtang kaya pa naton! (Ecles. 7:1) (2) Sigurado an paglaom nga pagkabanhaw. Napansin ni Jehova an damu nga pagpakita hin pagkabuotan ni Tabita ngan ginbalosan hiya. Hinunumdoman Niya an aton pagin maduruto ngan babanhawon kita  kon mamatay kita antes han Armagedon. (Heb. 6:10) Salit nag-iilob man kita yana hin “magkuri nga mga panahon” o nagpapahimulos hin “panahon han kamurayawan,” padayon kita nga magpamatuod hin bug-os mahitungod han Kristo.—2 Tim. 4:2.