Hinigugma nga Parasamwak han Ginhadian:

Imadyina nga usa ka han mga apostol nga natindog ha Bukid han mga Olibo. Nagpakita hi Jesus ha iyo atubangan. Antes gud hiya sumaka ha langit, nagsiring hiya: “Makarawat kamo hin gahum kon an baraan nga espiritu kumada na ha iyo, ngan magigin mga saksi ko kamo ha Jerusalem, ha bug-os nga Judea ngan Samaria, ngan ngadto ha pinakahirayo nga bahin han tuna.” (Buh. 1:8) Ano an imo magigin reaksyon?

Bangin umabat ka nga imposible matuman ito nga toka. Bangin maghunahuna ka, ‘Gutiay la kami nga mga disipulo, salit paonan-o kami makakasangyaw ngadto ha “pinakahirayo nga bahin han tuna”?’ Bangin mahinumdoman mo an iginpahamangno ni Jesus ha gab-i antes hiya mamatay: “An uripon diri labaw ha iya agaron. Kon gintimaraot nira ako, pagtitimarauton liwat nira kamo; kon gintuman nira an akon pulong, tutumanon liwat nira an iyo pulong. Kondi bubuhaton nira ini ngatanan nga butang kontra ha iyo tungod ha akon ngaran, kay diri hira nakilala ha Iya nga nagsugo ha akon.” (Juan 15:20, 21) Kon ginhuhunahuna mo ito nga mga pulong, bangin magpakiana ka ha imo kalugaringon, ‘Paonan-o ako makakagpamatuod hin bug-os bisan pa han sugad nga pagkontra ngan pagtimaraot?’

Puropariho hito an aton sitwasyon yana. Sugad nga mga Saksi ni Jehova, kinahanglan liwat kita magpamatuod hin bug-os ngadto ha “pinakahirayo nga bahin han tuna,” ha “mga tawo han ngatanan nga nasud.” (Mat. 28:19, 20) Paonan-o matutuman ini nga buruhaton, labi na kay igintagna nga kukontrahon kita?

An Mga Buhat han mga Apostol usa nga eksayting nga rekord kon paonan-o natuman han mga apostol ngan han ira mga igkasi-Kristiano ha siyahan nga siglo C.E. an ira toka ha bulig ni Jehova. An libro nga imo ginbabasa yana gindisenyo basi buligan ka nga mausisa ito nga rekord ngan magin eksayted pariho ha ira tungod han kadagmit han pag-uswag han pagsangyaw nga buruhaton. Mahipapausa ka ha kadamu han kaparihoan han mga surugoon han Dios ha siyahan nga siglo ngan han iya katawohan yana. Makikita mo nga diri la an aton buruhaton an magkapariho kondi pati liwat an paagi han pagkaorganisar ha aton ha pagbuhat hito. An pagpamalandong hini nga mga kaparihoan sigurado nga magpaparig-on han imo pagtoo nga hi Jehova nga Dios padayon nga naggigiya ha tunan-on nga bahin han iya organisasyon.

Naglalaom kami ngan igin-aampo namon nga an pag-usisa ha libro han Mga Buhat magpaparig-on han imo pagsarig nga bubuligan ka ni Jehova ngan gagamiton niya an iya baraan nga espiritu basi tagan ka hin kusog nga makailob. Hinaot madasig ka nga padayon nga ‘magpamatuod hin bug-os’ mahitungod han Ginhadian han Dios ngan buligan an iba nga maglakat ha dalan ngadto ha katalwasan.—Buh. 28:23; 1 Tim. 4:16.