Handurawa ini nga sitwasyon: Han nangingespiho hi Julia, matambok nga babaye an iya nakikita. “Kinahanglan ko gumasa,” siring niya ha iya kalugaringon—bisan kon an iya mga kag-anak ngan kasangkayan nasiring nga “magasa hiya sugad hin gihay.”

Diri pa la maiha, naghunahuna hi Julia hin pamaagi basi makaiban hin “bisan la pipira ka kilo.” Diri la hiya makaon hin pipira ka adlaw . . .

Kon pariho kan Julia an imo inaabat, ano an imo bubuhaton?

Diri sayop nga mabaraka ha imo hitsura. Ngani, an Biblia positibo nga nagkomento mahitungod han hitsura han pipira nga kababayin-an ngan kalalakin-an, upod na kanda Sarah, Raquel, Abigail, Jose, ngan David. Nagsiring liwat ito nga “maanyag hinduro” an babaye nga hi Abisag.—1 Hadi 1:4.

Pero damu nga batan-on an sobra nga nababaraka ha ira hitsura. Mahimo ito magresulta ha seryoso nga problema. Tagda:

• Ha usa nga surbey, 58 porsyento nga daragita an nasiring nga matambok hira, pero ha pagkamatuod, 17 porsyento la an tinuod nga matambok.

• Ha lain nga surbey, 45 porsyento nga kababayin-an nga magasa hinduro an naghuhunahuna nga matambok hira!

• Tungod han duro nga hingyap nga gumasa, may mga tin-edyer nga nagkaada anorexia—makamaratay nga sakit diin gin-gugutom han usa an iya kalugaringon.

 Kon may sintomas ka han anorexia o bisan ano nga problema ha pagkaon, pangaro hin bulig. Pagtikang pinaagi ha pagsumat ha usa nga kag-anak o ha usa nga imo gintataporan nga adulto. An Biblia nasiring: “An sangkay nahigugma ha ngatanan nga panahon; ngan an usa nga bugto natawo para ha kakurian.”—Proberbios 17:17.

An tinuod nga pagkatawo an nakakahimo ha usa nga magin makaruruyag o diri. Hunahunaa an anak ni Hadi David nga hi Absalon. An Biblia nasiring:

“Waray gindadayaw hinduro sugad kan Absalon tungod han iya kaanyag . . . waray gud kasurusnan ha iya.”—2 Samuel 14:25.

Pero ini nga batan-on hambog, ambisyoso, ngan traydor! Salit, diri maopay an paghulagway ha iya han Biblia; lugod ginhulagway hiya hito sugad nga diri maunungon, pungtanon, ngan parapamatay.

Salit, may maopay nga hinungdan nga ginsasagdonan kita han Biblia:

“Isul-ot niyo an bag-o nga personalidad.”—Colosas 3:10.

“An iyo pagpahusay kinahanglan diri ha gawas la . . . , lugod an iyo pagpahusay sadang magin ha kasingkasing, nga amo an iyo sulod nga pagkatawo.”—1 Pedro 3:3, 4.

Bisan kon diri sayop an paghingyap nga magin mahusay o gwapo, kondi an imo personalidad mas importante kay ha imo hitsura. Ha urhi, an mag-opay nga kalidad an mas maruruyagan han iba ha imo, diri an imo maskulado o maopay nga lawas! An batan-on nga hi Phylicia nagsiring: “An kahusay masayon makakuha hin atensyon, kondi an imo tinuod nga pagkatawo ngan an imo mag-opay nga kalidad an mas mahinunumdoman gud mahitungod ha imo.”

Nadiri ka ba han imo hitsura?

Naghunahuna ka na ba nga magpaopera o sobra nga magdayet basi magin mahusay o gwapo?

Kon mahihimo mo, ano an imo babag-uhon ha imo hitsura? (Pilia an imo baton.)

• KAHITAAS

• TIMBANG

• BUHOK

• PIGURA HAN LAWAS

• NAWONG

• KOLOR HAN PANIT

Kon oo an imo baton ha siyahan nga duha nga pakiana ngan tulo o sobra pa an imo ginpili ha ikatulo nga pakiana, hunahunaa ini: Posible gud nga diri negatibo an pagkita han iba ha imo, pariho han imo pagkita ha imo kalugaringon. Masayon la nga magin sobra kakritiko ngan mabaraka gud ha imo hitsura.—1 Samuel 16:7.