Handurawa ini nga sitwasyon: Duha ka bulan pa la nga nakikigkita hi Heather kan Mike, kondi para ha iya kilala na gud niya hi Mike. Pirme hira nagti-text, nag-iistorya ha telepono ha sulod hin damu ka oras, ngan natitigo pa ngani nira kon ano an iyayakan han kada tagsa! Kondi yana, labaw pa hito an karuyag ni Mike.

Hinin duha ka bulan, okey la kanda Mike ngan Heather nga magkapotay ngan magharokay hin madaliay. Diri karuyag ni Heather nga magbuhat hin labaw pa hito. Kondi diri liwat niya karuyag nga bulagan hiya ni Mike. Hi Mike la an nagpapaabat ha iya nga duro hiya kahusay ngan espesyal. Nahunahuna niya: ‘Aw, naghihigugmaay man kami ni Mike . . .’

Kon aada ka na ha husto nga edad basi makig-date ngan aada ka ha sitwasyon ni Heather, ano an imo bubuhaton?

Kon kukontrahon mo an usa nga balaud, sugad han balaud han grabidad, mag-aantos ka han resulta hito. Ito liwat an magigin kahimtang kon imo susupakon an balaud ha moral sugad han: “Maglikay ha imoralidad.”—1 Tesalonica 4:3.

Ano an magigin resulta kon imo tatalapason ito nga sugo? An Biblia nasiring: “An nagbubuhat hin imoralidad nakakasala ha iya kalugaringon nga lawas.” (1 Corinto 6:18) Ha ano nga paagi?

 Hinbaroan han mga parasaliksik nga damu nga batan-on nga nagbubuhat hin premarital sex (pag-sex han diri mag-asawa) an nakakaeksperyensya hin usa o sobra pa han masunod nga mga resulta.

• DURO NGA KASAKIT. Damu nga batan-on nga nagbuhat hin premarital sex an nagbasol katapos nira buhaton ito.

• KAWAD-I HIN PAGTAPOD. Katapos mag-sex, an kada tagsa nagtitikang paghunahuna, ‘Hin-o pa daw la an iya naka-sex?’

• KAGUPONG TUNGOD HAN WARAY MATUMAN NGA GINLALAOMAN. Ha pagkatinuod, mas karuyag han damu nga batan-on nga kababayin-an an lalaki nga magpuprotektar ha ira, diri magsasalingabot ha ira. Ngan damu nga batan-on nga kalalakin-an an diri naruruyag ha babaye nga nagpapadara ha ira.

• An importante nga punto: Kon magbubuhat ka hin premarital sex, ginhuhugawan mo an imo kalugaringon pinaagi ha basta la paghatag ha iba hin butang nga presyoso. (Roma 1:24) Presyoso gud an imo lawas basi la ipanhatag ha iba!

Ipakita an imo karig-on nga “maglikay ha imoralidad.” (1 Tesalonica 4:3) Katapos kon mag-asawa ka na, puydi ka na makig-sex. Ngan mahimo mo ito mapabilhan hin bug-os nga waray ginkakabarak-an, ginbabasolan, ngan ginkakahadlokan nga agsob amo an magraot nga resulta han premarital sex.—Proberbios 7:22, 23; 1 Corinto 7:3.

• Dadauton ba hadton tinuod nga nahigugma ha imo an imo pisikal ngan emosyonal nga kaopayan?

• Dadauton ba hadton tinuod nga nagtatagad ha imo an imo relasyon ha Dios?—Hebreo 13:4.