Handurawa ini nga sitwasyon: Samtang nag-uuyag kaupod han iya kasangkayan, naigo ni Tim hin bola an bintana han ira amyaw.

Kon ikaw hi Tim, ano an imo bubuhaton?

MAY-ADA KA TULO NGA OPSYON:

1. Dalagan.

2. Basola an iba.

3. Sumati an iyo amyaw han nahitabo, ngan sumati nga babaydan mo an danyos.

Bangin pilion mo an Opsyon A. Pero may maopay nga hinungdan nga karawaton an sayop—may kalabotan man ito ha pakabuong hin bintana o iba pa.

1. Ito an husto.

   An Biblia nasiring: “Karuyag namon gumawi hin tangkod ha ngatanan nga butang.”—Hebreo 13:18.

2. Mas nagpapasaylo an mga tawo hadton nakarawat han ira mga sayop.

   An Biblia nasiring: “Hiya nga nagtatabon han iya mga pagtalapas diri mauswag; kondi bisan hin-o nga magsumat ngan bumaya hini makakakuha hin kalooy.”—Proberbios 28:13.

3. An pinakaimportante, nakakalipay ito ha Dios.

   An Biblia nasiring: “An malinarisnon mangil-ad kan Jehova; kondi an iya pakigsangkay aada ha matadong.”—Proberbios 3:32.

Hi Karina, nga 20 anyos, gintiketan han pulis tungod han malaksi nga pagdrayb, pero igintago niya ito ha iya papa. Kondi diri niya ito maitatago ha kadayonan. Hi Karina nagsiring: “Paglabay hin haros usa ka tuig, nakita ito ni Papa. Nagkaproblema gud ako!”

Ano an leksyon nga hinbaroan ni Karina? Hiya nagsiring: “An pagtago hin sayop mas makakaraot la han kahimtang. Aanihon mo la gihap an maraot nga resulta hito ha urhi!”

An Biblia nasiring: “Kita ngatanan damu ka beses nga nagsasayop.” (Santiago 3:2) Ngan sugad han aton nahibaroan, tigaman han pagin mapainubsanon ngan pagin hamtong an pagsumat han imo sala—ngan ha pagbuhat hito dayon.

An sunod nga pitad amo an paghibaro tikang ha imo sayop. An batan-on nga hi Vera nagsiring: “Ginkikita ko an tagsa ko nga sayop sugad nga leksyon nga mabulig ha akon nga magin mas maopay nga tawo, ngan maatubang ko an mga sitwasyon ha iba nga paagi.” Aton kitaon kon paonan-o mo ito bubuhaton.

Ginhuram mo an bisikleta han imo papa ngan naguba ito. Ano an imo bubuhaton?

• Diri magsumat ngan maglaom nga diri ito makita han imo papa.

• Isumat ha imo papa an eksakto nga nahitabo.

• Isumat ha imo papa an nahitabo ngan basola an iba.

Waray ka makapasar han eksamin tungod kay waray ka mag-aram. Ano an imo bubuhaton?

• Basola an eksamin.

• Karawata nga ikaw an may baratunon ha diri mo pakapasar.

• Basola an titser sugad nga may pagdumot ha imo.

 Kitaa utro an sitwasyon, ngan handurawa nga ikaw an (1) imo papa ngan an (2) imo titser. Ano daw la an ira huhunahunaon ha imo kon kakarawaton mo dayon an imo sayop? Ano daw la an ira huhunahunaon ha imo kon tatabonan mo an imo sayop?

Hunahunaa an usa nga sayop nga imo nahimo han naglabay nga tuig ngan batona an masunod.

Ano an sayop nga imo nahimo? Ano an imo ginbuhat basi maatubang ito?

• Gintabonan ko an akon sayop.

• Ginbasol ko an iba.

• Ginkarawat ko dayon nga ako an nakasayop.

Han waray mo karawata an imo sayop, ano an imo inabat?

• Okey la. Waray hibaroi an akon sayop!

• Nakonsensya. Iginsumat ko unta an tinuod.

Ano unta an mas maopay nga imo ginbuhat?

Ano nga leksyon an imo hinbaroan tikang ha imo sayop?

Kay ano nga may mga tawo nga nadiri pagkarawat han ira sayop?

Kon pirme mo gintatabonan an imo sayop, ano daw la an huhunahunaon han iba ha imo? Kondi ano liwat an ira huhunahunaon kon maaram hira nga ginkakarawat mo an imo sayop?—Lucas 16:10.