An Prinsipyo Para ha Kristiano nga Pagkinabuhi mabulig basi madali mabilngan an mga teksto ha Biblia nga imo ginkikinahanglan ha adlaw-adlaw nga pagkinabuhi. Mabulig liwat ito ha imo nga mabilngan an angayan nga mga teksto ha Biblia ha pagdasig ha iba ngan ha pagbulig ha ira nga makahimo hin desisyon nga magpapasidungog kan Jehova. Pilia an topiko nga imo ginkikinahanglan ngan makikita mo an mga pakiana ngan halipot nga pagsaysay han mga teksto parte hito. (Kitaa an kahon nga “ Kon Paonan-o Gagamiton Ini nga Publikasyon.”) Mabibilngan mo an mapulsanon nga sagdon, giya, ngan pagliaw tikang ha Pulong han Dios. Mabibilngan mo liwat an mapulsanon nga mga prinsipyo tikang ha Biblia nga magagamit mo ha pagbulig ngan pagdasig ha iba.

Diri nakalista hini nga publikasyon an ngatanan nga teksto para ha usa nga topiko. Pero maopay gud ini nga garamiton para ha pag-research. (Pr 2:​1-6) Para ha dugang nga impormasyon, gamita an mga marginal reference ngan study note han Bag-o nga Kalibotan nga Hubad han Baraan nga Kasuratan ha available nga linggwahe nga imo nasasabtan. Gamita an Tulong sa Pag-aaral ng mga Saksi ni Jehova o an Watch Tower Publications Index basi mas masabtan an kahulogan han usa nga teksto o an aplikasyon hito. Iginpapakita hito nga mga garamiton an mga publikasyon nga naipublikar na parte hito nga teksto. An pinakabag-o nga mga reperensya nagsusumat han pinakabag-o nga pagsabot mahitungod hito nga teksto.

Hinaot mabuligan ka han Prinsipyo Para ha Kristiano nga Pagkinabuhi nga makita an kinaadman, kahibaro, ngan pagsabot nga aada ha Baraan nga Kasuratan. Samtang ginagamit mo ini nga publikasyon, magigin mas kombinsido ka nga “an pulong han Dios buhi ngan gamhanan.”—Heb 4:12.