1, 2. (a) Ano nga kakaiba nga panggios an iginpakita ni Ezekiel? (Kitaa an retrato hini nga pahina.) (b) Ano an igintagna han iya panggios?

 AN SUMAT mahitungod han kakaiba nga panggios ni propeta Ezekiel madagmit nga nagsarang ha distyero nga mga Judio ha Babilonya. Usa ka semana nga nagliningkod hiya nga blangko an hunahuna ngan diri nakikiistorya, pero tigda nga binuhat hiya ngan sinulod ha iya balay ngan waray maggawas-gawas. Samtang nagkikita an iya nagugupong nga mga amyaw, ginawas hiya, pumurot hin briks, iginbutang ito ha iya atubangan, ngan gin-ukitan ito. Katapos, hilom nga naghimo hiya hin gutiay nga pader.​—Ezek. 3:10, 11, 15, 24-26; 4:1, 2.

² Sigurado nga nagtitikadamu na an nagkikita. Bangin naghunahuna hira, ‘Ano an karuyag sidngon hini?’ Ha urhi la nira masasabtan hin bug-os nga an kakaiba nga panggios han propeta usa nga tagna mahitungod han tiarabot nga makaharadlok nga panhitabo nga magpapakita han matadong nga kasina ni Jehova nga Dios. Ano ito nga panhitabo? Paonan-o ito nakaapekto ha kadaan nga nasud han Israel? Ano an kahulogan hito ha putli nga mga magsiringba yana?

3, 4. (a) Ano nga tulo nga bahin han paghukom han Dios an iginpasundayag ni Ezekiel? (b) Paonan-o iginpasundayag ni Ezekiel an paglikos ha Jerusalem?

³ Han mga 613 B.C.E., ginsugo ni Jehova hi Ezekiel nga ipakita pinaagi hin mga tigaman an tulo nga bahin han tiarabot nga paghukom han Dios ha Jerusalem. Ito an paglikos ha syudad, pag-antos han mga umurukoy hito, ngan kabungkagan han syudad ngan han katawohan hito. * Hisgotan naton hin mas detalyado ini nga tulo.

⁴ An paglikos ha Jerusalem. Hi Jehova nagsugo kan Ezekiel: “Kuha hin briks ngan ibutang ito ha imo atubangan. . . . Likusi ito.” (Basaha an Ezekiel 4:1-3.) An briks nagrirepresentar han syudad han Jerusalem ngan hi Ezekiel naman, ha kasundalohan han Babilonya nga gagamiton ni Jehova. Ginsugo liwat hiya nga maghimo hin gutiay nga pader, pan-atake nga bungdo, ngan mga troso nga iburundol, ngan ibubutang niya ito ha palibot han briks. Nagrirepresentar ini ha mga garamiton ha girra nga gagamiton han mga kaaway han Jerusalem ha paglikos ngan pag-atake hito. Basi ipakita an sugad-puthaw nga kusog han kaaway nga mga sundalo, magbubutang hi Ezekiel hin “planudo nga lutoan nga puthaw” butnga niya ngan han syudad. Katapos, iya igin-atubang an iya “nawong kontra” ha syudad. Ito nga mga buhat “tigaman ha panimalay ni Israel” nga mahitatabo na an diri nira ginlalaoman. Magamit hi Jehova hin kaaway nga kasundalohan basi likosan an Jerusalem​—an pinakaimportante nga syudad han katawohan han Dios ngan an hinmumutangan han iya templo!

5. Ihulagway kon paonan-o iginpasundayag ni Ezekiel an mahitatabo ha mga umurukoy han Jerusalem.

⁵ An pag-antos han mga umurukoy han Jerusalem. Ginsugo ni Jehova hi Ezekiel: “Kinahanglan kumuha ka hin trigo, sebada, higlapad nga mga liso, lentihas, dawa, ngan espelta [usa nga klase han trigo] . . . ngan himoon ito nga tinapay,” ngan “magtitimbang ka ngan makaon hin 20 ka sekel nga pagkaon kada adlaw.” Katapos, hi Jehova nagsiring: “Uutdon ko an suplay nga pagkaon.” (Ezek. 4:9-16) Hini nga eksena, diri na an kasundalohan han Babilonya an ginrirepresentaran ni Ezekiel kondi an mga taga-Jerusalem. An ginbuhat han propeta usa nga tagna nga magkukulang an pagkaon ha syudad tungod han tiarabot nga paglikos. Hito nga panahon, an tinapay hihimoon gamit an kakaiba nga kombinasyon han mga sangkap, nga nagpapasabot nga kakaunon han mga tawo an anoman nga ira makita. Mationan-o kagrabe ito nga gutom? Hi Ezekiel, nga sugad hin nakikiistorya ha mga taga-Jerusalem, nagsiring: “An mga tatay dida ha imo makaon han ira mga anak, ngan an mga anak makaon han ira mga tatay.” Ha urhi, damu an mag-aantos tungod han “gutom nga sugad hin makamaratay nga mga pana,” ngan an katawohan “magtitikaluya.”​—Ezek. 4:17; 5:10, 16.

6. (a) Ano nga duha nga papel an dungan nga iginpasundayag ni Ezekiel? (b) Ano an iginpapasabot han sugo han Dios nga “timbangon ngan bahin-bahinon an mga buhok”?

⁶ An kabungkagan han Jerusalem ngan han katawohan hito. Hini nga bahin han tagna, duha nga papel an dungan nga iginpasundayag ni Ezekiel. Siyahan, iginpasundayag niya an bubuhaton ni Jehova. Ginsugo hiya ni Jehova: “Kuha hin matarom nga espada  nga imo gagamiton sugad nga labaha hin barbero.” (Basaha an Ezekiel 5:1, 2.) An kamot ni Ezekiel nga nakapot han espada nagrirepresentar han kamot ni Jehova, han iya paghukom, pinaagi han kasundalohan han Babilonya. Ikaduha, iginpasundayag ni Ezekiel an maieksperyensyahan han mga Judio. Ginsidngan hiya ni Jehova: “Ahiti an imo ulo ngan an imo bungot.” An pag-ahit ha iya ulo nagrirepresentar ha paagi han pag-atake ngan pagpoo ha mga Judio. Dugang pa, an sugo nga ‘kumuha hin timbangan basi timbangon ngan bahin-bahinon an mga buhok’ nagpapasabot nga an pagpadapat han paghukom ni Jehova ha Jerusalem, diri paturapak la, kondi tinuyo ngan pulido.

7. Kay ano nga ginsugo ni Jehova hi Ezekiel nga bahinon ha tulo an buhok ngan iba-iba an buhaton ha tagsa hito?

 ⁷ Kay ano nga ginsugo ni Jehova hi Ezekiel nga bahinon ha tulo an iya gin-ahit nga buhok ngan iba-iba an buhaton ha tagsa hito? (Basaha an Ezekiel 5:7-12.) An usa nga bahin ginsunog ni Ezekiel “ha sulod han syudad” basi ipasabot ha mga nagkikita nga an iba nga taga-Jerusalem mamamatay ha sulod han syudad. An usa naman nga bahin gintigbas niya hin espada “ha bug-os nga palibot han syudad” basi ipasabot nga an iba nga umurukoy pamamatayon ha gawas han syudad. An ikatulo nga bahin iya iginsabrag ha hangin basi ipasabot nga an iba pa nga umurukoy magsasarang ha mga nasud, pero ‘lalanaton’ hira “hin espada.” Salit diin man umukoy an mga nakatalwas, diri hira magigin murayaw.

8. (a) Ano nga paglaom an nahiuupod ha iginpasundayag ni Ezekiel? (b) Paonan-o natuman an tagna mahitungod han “pipira nga buhok”?

⁸ Kondi an tagna nga iginpasundayag ni Ezekiel nag-uupod liwat hin paglaom. May kalabotan ha buhok nga gin-ahit ni Ezekiel, ginsugo hiya ni Jehova: ‘Kuha hin pipira nga buhok ngan putsa ito ha mga pilo han imo bado.’ (Ezek. 5:3) Iginpapasabot hito nga an pipira nga Judio nga magsasarang ha mga nasud titipigan nga buhi. An iba hiton “pipira nga buhok” magigin bahin han mga distyero nga mabalik ha Jerusalem katapos han 70 ka tuig nga pagkabihag ha Babilonya. (Ezek. 6:8, 9; 11:17) Natuman ba ito? Oo. Damu ka tuig kahuman han pagkabihag, hi propeta Hagai nagsiring nga an pipira han nagsarang nga mga Judio binalik gud man ha Jerusalem. Hira “an lagas nga kalalakin-an nga nakakita han balay hadto,” karuyag sidngon, an templo ni Solomon. (Ezra 3:12; Hag. 2:1-3) Ginsiguro ni Jehova nga matipigan an putli nga pagsingba, sugad han iya iginsaad. Hihisgotan ha Kapitulo 9 an dugang nga detalye mahitungod hito nga pagpahiuli.​—Ezek. 11:17-20.

9, 10. Ano nga importante nga tiarabot nga mga panhitabo nga igintagna an iginpapahinumdom ha aton han mga iginpasundayag ni Ezekiel?

⁹ Iginpapahinumdom ha aton han mga panhitabo nga iginpasundayag ni Ezekiel an importante nga tiarabot nga mga panhitabo nga igintagna han Pulong han Dios. Ano an pipira hito? Pariho ha nahitabo ha kadaan nga Jerusalem, hi Jehova magamit hin politikal nga mga pwersa basi buhaton an diri ginlalaoman han mga tawo ​—atakehon an ngatanan nga buwa nga relihiyon. (Pah. 17:16-18) Sugad la nga an kabungkag han Jerusalem “usa nga naiiba nga kadaot,” an “daku nga kasakitan” upod an girra han Armagedon magigin usa nga panhitabo nga “waray pa mahitabo” hadto.​—Ezek. 5:9; 7:5; Mat. 24:21.

¹⁰ Iginpapakita han Biblia nga an mga indibiduwal nga nasuporta ha buwa nga mga relihiyon makakatalwas ha kabungkagan hito. Tungod ha kahadlok, maupod hira ha ngatanan nga klase han tawo nga mamimiling hin matatagoan. (Zac. 13:4-6; Pah. 6:15-17) An ira kahimtang nagpapahinumdom ha aton han nahitabo hadto ha mga taga-Jerusalem nga nakatalwas ha kabungkag hito ngan sugad hin iginsabrag “ha hangin.” Nahisgotan naton ha  parapo 7 nga bisan kon nakatalwas hira hito nga panahon, naghulbot hi Jehova “hin espada basi lanaton” hira. (Ezek. 5:2) Ha pariho nga paagi, an bisan ano nga tatagoan han mga makakatalwas ha pag-atake ha relihiyon diri makakapanalipod ha ira ha espada ni Jehova. Ha Armagedon, pamamatayon hira, upod han tanan nga iba pa nga sugad-kanding nga mga tawo.​—Ezek. 7:4; Mat. 25:33, 41, 46; Pah. 19:15, 18.

11, 12. (a) Paonan-o an pagsabot ha tagna ni Ezekiel mahitungod han paglikos ha Jerusalem nakakaapekto ha aton panhunahuna ha ministeryo yana? (b) Ano nga pagbag-o an bangin mahitabo ha aton pagsangyaw ngan mensahe?

¹¹ Paonan-o an pagsabot hini nga tagna nakakaapekto han aton panhunahuna ha ministeryo ngan ha pagkaapurado hito? Iginpapasilsil hini nga kinahanglan buhaton naton an aton bug-os nga mahihimo ha pagbulig ha mga tawo nga magin mga alagad ni Jehova. Kay ano? Gutiay na la an nabibilin nga panahon ha ‘panhimo hin mga disipulo ha mga tawo han ngatanan nga nasud.’ (Mat. 28:19, 20; Ezek. 33:14-16) Kon an “tungkod” (politikal nga mga pwersa) magtikang na pag-atake ha relihiyon, diri na kita magsasangyaw hin mensahe han katalwasan. (Ezek. 7:10) May kalabotan ha pagsangyaw han maopay nga sumat, “mangungula” kita, sugad la nga nangula hi Ezekiel, o inundang pagpasamwak han iya mga mensahe, ha pipira nga bahin han iya ministeryo. (Ezek. 3:26, 27; 33:21, 22) Oo, kahuman mabungkag an buwa nga relihiyon, an mga tawo desperado nga “mamimiling hin bisyon tikang ha usa nga propeta,” pero waray instruksyon para ha katalwasan nga ihahatag ha ira. (Ezek. 7:26) Tapos na an panahon ha pagkarawat hito nga instruksyon ngan magin disipulo han Kristo.

¹² Pero an aton pagsangyaw diri maundang. Kay ano? Ha daku nga kasakitan, bangin magpasamwak kita hin mensahe han paghukom nga pariho hin peste nga uran nga yelo. Magigin klaro ito nga tigaman nga tiabot na gud ha katawohan an kataposan hinin maraot nga kalibotan.​—Pah. 16:21.

13. Kay ano nga ginsugo ni Jehova hi Ezekiel nga humigda nga natakilid ha iya wala ngan katapos ha iya too?

¹³ Labot han pagtagna kon paonan-o mabubungkag an Jerusalem, iginpasundayag liwat ni Ezekiel kon san-o ito mahitatabo. Ginsugo  hiya ni Jehova nga humigda nga natakilid ha iya wala hin 390 ka adlaw ngan ha iya too hin 40 ka adlaw. An tagsa nga adlaw katugbang hin usa ka tuig. (Basaha an Ezekiel 4:4-6; Num. 14:34) Ito nga pasundayag, nga bangin ginbuhat ni Ezekiel hin pipira la ka oras kada adlaw, nagtutudlok ha eksakto nga tuig han kabungkagan han Jerusalem. An 390 ka tuig nga pakasala han Israel matin-aw nga nagtikang han 997 B.C.E., an tuig nga nabahin an 12-ka-tribo nga ginhadian. (1 Hadi 12:12-20) An 40 ka tuig nga pakasala han Juda posible nga nagtikang han 647 B.C.E., an tuig nga igintoka hi Jeremias sugad nga propeta basi prangka nga pahamangnoan an ginhadian han Juda mahitungod han tiarabot nga kabungkagan hito. (Jer. 1:1, 2, 17-19; 19:3, 4) Salit an duha nga peryodo matatapos ha 607 B.C.E., an eksakto nga tuig nga ginsakop ngan ginbungkag an Jerusalem, sugad han igintagna ni Jehova. *

14. (a) Paonan-o iginpakita ni Ezekiel an iya pagsarig nga magios hi Jehova ha eksakto nga panahon? (b) Ano an mahitatabo antes han kabungkagan han Jerusalem?

¹⁴ Han nakarawat ni Ezekiel an tagna mahitungod han 390 ka adlaw ngan han 40 ka adlaw, bangin diri pa hiya maaram han eksakto  nga tuig nga mabubungkag an Jerusalem. Bisan pa hini, ha mga tuig antes han kabungkagan hito, pauroutro nga ginpahamangnoan niya an mga Judio nga tiabot na an paghukom ni Jehova. Nagsiring hiya: “An kataposan aada na ha imo yana.” (Basaha an Ezekiel 7:3, 5-10.) Sigurado hi Ezekiel nga magios hi Jehova ha eksakto nga panahon. (Isa. 46:10) Igintagna liwat han propeta an mga mahitatabo antes han kabungkagan han Jerusalem: “Maabot an sunod-sunod nga kadaot.” Ngan ito nga mga panhitabo magriresulta ha kadaot han sosiedad, relihiyon, ngan gobyerno.​—Ezek. 7:11-13, 25-27.

15. Ano nga mga bahin han tagna ni Ezekiel an natuman tikang han 609 B.C.E.?

¹⁵ Pipira ka tuig katapos ipasamwak ni Ezekiel an pagsakop ha Jerusalem, an tagna nagtikang matuman. Han 609 B.C.E., hinbaroan niya nga nagtikang na an pag-atake ha Jerusalem. Hito nga panahon, an tunog han trumpeta nanawagan ha mga umurukoy nga depensahan an ira syudad, kondi sugad han igintagna ni Ezekiel, “waray bisan usa nga napakadto ha pakiggirra.” (Ezek. 7:14) An mga taga-Jerusalem waray mag-urosa ha pagdepensa hito ngan ha pakig-away ha nasulong nga mga taga-Babilonya. Bangin ginhunahuna han iba nga mga Judio nga tatalwason hira ni Jehova. Ginbuhat niya ito hadto han nagtarhog an mga Asiryano nga sakupon an Jerusalem; ginpamatay han usa nga anghel ni Jehova an kadam-an han ira kasundalohan. (2 Hadi 19:32) Pero hini nga higayon, waray anghel nga binulig. Waray pag-iha, an ginlikosan nga syudad nagin puropariho hin “kaldero” nga ‘iginsun-ad ha kalayo,’ ngan an mga umurukoy hito waray na makagawas sugad hin “tiniros nga mga karne” ha sulod han kaldero. (Ezek. 24:1-10) Kahuman han makuri nga 18 ka bulan nga paglikusi, nabungkag an Jerusalem.

16. Paonan-o naton maipapakita yana an aton pagsarig nga magios hi Jehova ha eksakto nga panahon?

¹⁶ Ano an aton hibabaroan hini nga bahin han tagna ni Ezekiel? May koneksyon ba ini ha mensahe nga aton iginsasangyaw ngan ha reaksyon han aton mga ginsasangyawan? Nagdesisyon na hi Jehova kon san-o bubungkagon an buwa nga relihiyon​—ngan magios na liwat hiya ha eksakto nga panahon. (2 Ped. 3:9, 10; Pah. 7:1-3) Diri kita maaram han eksakto nga petsa hito. Pero pariho kan Ezekiel, padayon nga gintutuman naton an sugo ni Jehova nga pauroutro nga pahamangnoan an mga tawo: “An kataposan aada na ha [iyo] yana.” Kay ano nga kinahanglan uroutruhon naton ito? Pariho gihapon ha rason ni Ezekiel. * Kadam-an han iya ginsumatan han tagna han Dios mahitungod han kabungkagan han Jerusalem an waray tumoo. (Ezek. 12:27, 28) Pero ha urhi, may distyero nga mga Judio ha Babilonya nga nagpakita hin matadong nga kasingkasing, ngan binalik hira ha ira natawohan nga tuna. (Isa. 49:8) Ha pariho nga paagi, damu yana an diri natoo nga matatapos ini nga kalibotan.  (2 Ped. 3:3, 4) Bisan pa hito, samtang may panahon pa an mga tawo nga karawaton an mensahe han Dios, karuyag naton buligan an sinsero nga mga indibiduwal nga mabilngan an dalan tipakadto ha kinabuhi.​—Mat. 7:13, 14; 2 Cor. 6:2.

17. Ano nga mga kahimtang ngan panhitabo an aton makikita ha tiarabot nga daku nga kasakitan?

¹⁷ An tagna ni Ezekiel nagpapahinumdom liwat ha aton nga kon atakehon na an mga relihiyon, an mga membro hito diri ‘mapakadto ha pakiggirra’ basi depensahan ito. Lugod, samtang nasasantop nira nga an ira pangaraba hin bulig nga “Ginoo, Ginoo,” diri ginbabaton, an ira mga “kamot mawawad-an hin kusog” ngan ‘mangungurog’ hira. (Ezek. 7:3, 14, 17, 18; Mat. 7:21-23) Ano pa an ira bubuhaton? (Basaha an Ezekiel 7:19-21.) Hi Jehova nagsiring: “An ira silber ilalabog nira ha mga kalye.” Ini nga mga pulong mahitungod ha mga umurukoy ha kadaan nga Jerusalem naghuhulagway liwat han mahitatabo ha daku nga kasakitan. Hito nga panahon, masasantop han mga tawo nga an kwarta diri makakatalwas ha ira ha tiarabot nga kabungkagan.

18. Ano nga leksyon mahitungod ha pagkaada mga prayoridad an igintututdo ha aton han tagna ni Ezekiel?

 ¹⁸ Ano an leksyon para ha aton hini nga bahin han tagna ni Ezekiel? Kinahanglan magkaada kita tama nga mga prayoridad. Hunahunaa ini: Katapos la masantop han mga taga-Jerusalem nga mabubungkag na an ira syudad ngan magkakamatay na hira ngan diri hira matatalwas han ira materyal nga mga butang, dida la nira ginbag-o an ira mga prayoridad. Iginlabog nira an ira mga panag-iya ngan ‘namiling hin bisyon tikang ha usa nga propeta’​—pero urhi na an ira pagbag-o. (Ezek. 7:26) Ha kabaliktaran, maaram na kita nga hirani na an kabungkagan hinin maraot nga kalibotan. Tungod han aton pagtoo ha mga saad han Dios, nagkaada kita tama nga mga prayoridad. Salit okupado kita ha pagtirok hin espirituwal nga mga bahandi, nga may nagpapadayon nga bili ngan diri gud ilalabog “ha mga kalye.”​—Basaha an Mateo 6:19-21, 24.

19. Paonan-o nakakaapekto ha aton an mga tagna nga iginpasamwak ni Ezekiel?

¹⁹ Ha pagsumaryo, paonan-o nakakaapekto ha aton yana an mga tagna ni Ezekiel mahitungod ha kabungkagan han Jerusalem? Iginpapahinumdom hito nga gutiay na la an nabibilin nga panahon ha pagbulig ha iba nga magin mga alagad han Dios. Salit apurado kita ha panhimo hin mga disipulo. Nalilipay gud kita kon an sinsero nga mga indibiduwal nagtitikang pagsingba ha aton Amay nga hi Jehova. Kondi bisan ha mga tawo nga diri nagbubuhat hito, padayon nga iginpapahamangno naton an ginsiring ni Ezekiel ha mga tawo ha iya panahon: “An kataposan aada na ha [iyo] yana.” (Ezek. 3:19, 21; 7:3) Sugad man, determinado kita nga tipigan an aton pagsarig kan Jehova ngan unahon pirme an putli nga pagsingba ha iya.​—Sal. 52:7, 8; Prob. 11:28; Mat. 6:33.