1, 2. Mangingil-ad gud kita ha ano nga klase hin hostes?

 MAKALOLOOY makita an usa nga hostes. Bangin maghunahuna kita kon kay ano nga nahingada hiya hiton makaarawod nga pagkinabuhi. Ginmaltrato ba hiya o gin-abuso hin kapamilya salit bata pa hiya nga nagin sugad hito? O napiritan ba hiya nga ibaligya an iya kalugaringon tungod ha sobra nga kapobrehan? O napalagiw ba hiya ha bayolente nga bana? Damu an sugad nga eksperyensya dinhi hinin maraot nga kalibotan. Salit diri urusahon nga buotan gud hi Jesus ha pipira nga hostes. Ginpabug-atan niya nga adton nagbasol ngan nagbag-o makakalaom hin mas maopay nga kinabuhi.​—Mat. 21:28-32; Luc. 7:36-50.

² Pero imadyina an iba gud nga klase hin hostes. Hunahunaa an usa nga babaye nga tinuyo nga ginpili an sugad nga pagkinabuhi. Para ha iya diri ito makaarawod kondi angay ipanhambog! Ginlalanat niya an kwarta ngan impluwensya nga naihahatag hito nga propesyon. Mas maraot pa gud, ano man kon may-ada hiya maopay ngan maunungon nga bana pero tinuyo nga gintraydoran niya basi maghostes? Mangingil-ad gud kita ha sugad nga babaye ngan  ha pagkinabuhi nga iya ginpili. Ini nga reaksyon usa nga importante nga rason nga pauroutro nga gin-gamit ni Jehova nga Dios an paghulagway ha hostes basi ipakita an iya inaabat ha buwa nga relihiyon.

3. Ano nga mga asoy an aton hihisgotan hini nga kapitulo?

³ An libro han Ezekiel may duha nga makatirigamnan nga asoy mahitungod han prostitusyon nga nag-iilustrar han duro nga pagkadiri-maunungon han katawohan han Dios ha Israel ngan Juda. (Ezek., kap. 16 ngan 23) Pero antes naton ito usisahon, hisgotan anay naton an usa pa nga simboliko nga hostes. An iya paghostes nagtikang maiha na antes pa han panahon ni Ezekiel​—antes pa ngani umeksister an Israel—​ngan nagpapadayon pa yana. Ini nga hostes iginpakilala ha ultimo nga libro han Biblia, an Pahayag.

4, 5. Ano an “Babilonya nga Gamhanan,” ngan kay ano nga nakasiring kita hito? (Kitaa an retrato ha tinikangan hini nga kapitulo.)

⁴ Ha bisyon nga iginhatag ni Jesus kan apostol Juan ha ikatarapos han siyahan nga siglo C.E., may nakita nga kakaiba nga tawohan. Gintawag hiya nga “gamhanan nga hostes” ngan “Babilonya nga Gamhanan, an iroy han mga hostes.” (Pah. 17:1, 5) Damu ka siglo nga misteryo ha mga lider han relihiyon ngan mga eskolar han Biblia kon hin-o gud hiya. Siring nira nga nagrirepresentar hiya han Babilonya, Roma, o han Iglesia Romana Katolika. Pero damu ka dekada na nga nasabtan han mga Saksi ni Jehova kon hin-o gud inin “gamhanan nga hostes.” Hiya an imperyo han buwa nga relihiyon ha kalibotan. Kay ano nga nakasiring kita hito?

⁵ Ini nga hostes ginkondenar tungod ha iya imoral nga relasyon ha “mga hadi ha tuna,” o ha politikal nga mga gahum. Salit klaro nga diri hiya politikal nga gahum. Iginpapakita liwat han Pahayag nga “an mga negosyante ha tuna,” o an sistema han komersyo hini nga kalibotan, nabido ha iya kabungkag. Salit an Babilonya nga Gamhanan diri nagrirepresentar han sistema han komersyo. Kon sugad, ano hiya? Salaan hiya hin “espiritistiko nga mga buhat,” idolatriya, ngan panlimbong. Diri ba haom gud ito nga paghulagway ha magraot nga organisasyon han relihiyon hini nga kalibotan? Tigamni liwat nga ini nga hostes nakasakay, o may impluwensya, ha politikal nga sistema hini nga kalibotan. Iya liwat gintitimaraot an magtinumanon nga alagad ni Jehova nga Dios. (Pah. 17:2, 3; 18:11, 23, 24) Diri ba ito gud an ginbubuhat han buwa nga relihiyon tubtob ha aton panahon?

6. Kay ano nga an Babilonya nga Gamhanan gintawag nga “an iroy han mga hostes”?

⁶ Pero kay ano nga an Babilonya nga Gamhanan gintawag liwat nga “an iroy han mga hostes”? An buwa nga relihiyon may damu hinduro nga grupo. Diri maihap an mga denominasyon, sekta, ngan kulto hito. Tikang han ginsamok an yinaknan ha kadaan nga Babel, o Babilonya, nagsarang an ngatanan nga klase han buwa  nga doktrina, nga nagresulta hin damu gud nga relihiyon. Angayan la nga nakuha han “Babilonya nga Gamhanan” an iya ngaran ha syudad han Babilonya, an gintikangan han buwa nga mga relihiyon! (Gen. 11:1-9) Salit ini ngatanan nga relihiyon masisiring nga “mga anak” han uusa nga organisasyon, usa nga gamhanan nga hostes. Agsob ini gamiton ni Satanas basi lit-agon an mga tawo ha espiritismo, idolatriya, ngan iba pa nga katutdoan ngan kustomre nga nagpapasipara ha Dios. Diri urusahon nga an katawohan han Dios ginpapahamangnoan mahitungod hinin maraot nga bug-os-kalibotan nga organisasyon: “Gawas ha iya, katawohan ko, kon diri niyo karuyag makaangbit ha iya han iya mga sala”!​—Basaha an Pahayag 18:4, 5.

7. Kay ano nga ginsusunod naton an pahamangno nga ‘gumawas’ ha Babilonya nga Gamhanan?

⁷ Ginsusunod mo ba ito nga pahamangno? Hinumdumi nga hi Jehova mismo an naglarang ha tawo nga may “espirituwal nga panginahanglan.” (Mat. 5:3) Matatagbaw la ito pinaagi han putli nga pagsingba ha iya. Syempre, karuyag han mga alagad ni Jehova nga likyan an espirituwal nga prostitusyon. Pero iba an karuyag ni Satanas nga Yawa. Nalilipay hiya nga lit-agon an katawohan han Dios hini nga klase han prostitusyon. Ngan agsob hiya maglampos. Ha panahon ni Ezekiel, an katawohan han Dios may maiha na nga kasaysayan han espirituwal nga prostitusyon. Maopay nga usisahon naton ito nga kasaysayan, kay damu an igintututdo hito mahitungod han mga suruklan, hustisya, ngan kalooy ni Jehova.

8-10. Ano nga ginkikinahanglan ha putli nga pagsingba an nabulig ha aton nga masabtan an inaabat ni Jehova mahitungod ha kahidabi ha buwa nga relihiyon? Iilustrar.

⁸ Ha libro han Ezekiel, gin-gamit ni Jehova an ilustrasyon mahitungod han hostes basi ipakita an iya inabat. Gin-giyahan hi Ezekiel nga irekord an duha nga detalyado nga asoy han inabat ni Jehova nga kasakit ngan pagtraydor tungod han pagkadiri-maunungon ngan imoralidad han iya katawohan. Kay ano nga iginpariho Niya hira ha mga hostes?

⁹ Basi masabtan an baton, hinumdoman anay naton an usa nga ginkikinahanglan ha putli nga pagsingba nga ginhisgotan naton ha Kapitulo 5. Ha Balaud ha Israel, hi Jehova nagsiring: “Ayaw pagkaada hin iba nga mga dios labot ha akon [o, “kontra ha akon,” ftn.]. . . . Ako, hi Jehova nga imo Dios, usa nga Dios nga nagsusugo nga ihatag ha akon an eksklusibo nga debosyon.” (Ex. 20:3, 5) Ha urhi, ginpabug-atan niya ini nga kamatuoran hini nga paagi: “Ayaw pagyukbo ha iba nga dios, kay hi Jehova kilala nga nagsusugo nga ihatag ha iya an eksklusibo nga debosyon. Oo, hiya usa nga Dios nga nagsusugo nga ihatag ha iya an eksklusibo nga debosyon.” (Ex. 34:14) Ginklaro gud ni Jehova an punto. Kakarawaton la niya an aton pagsingba kon hiya gud la an aton sisingbahon.

 ¹⁰ Maipapariho ini ha pag-asawa. An bana ngan asawa may katungod nga laoman nga magigin maunungon an ira padis. Kon an usa ha ira magpakita hin romantiko o seksuwal nga interes ha iba, husto la nga an iya padis mangabugho ngan umabat nga gintraydoran. (Basaha an Hebreo 13:4.) Ha pagsingba liwat, husto la nga inabat ni Jehova nga gintraydoran hiya han an iya katawohan, nga ha iya gud la dedikado, nagsingba ha buwa nga mga dios. Mapwersa nga iginpahayag niya ito ha Ezekiel kapitulo 16.

11. Ano an iginsumat ni Jehova mahitungod han Jerusalem ngan han gintikangan hito?

¹¹ Mababasa ha Ezekiel kapitulo 16 an pinakahilaba nga iginyakan ni Jehova hito nga libro​—ngan usa han pinakahilaba niya nga mga tagna ha Hebreo nga Kasuratan. Nagpokus hi Jehova ha syudad han Jerusalem nga nagrirepresentar han diri matinumanon nga Juda. Iginsumat Niya an makasurubo ngan mangil-ad nga istorya han iya gintikangan ngan pagtraydor. Ha tinikangan, sugad hiya hin waray mahihimo nga minasus-an, nga mahugaw ngan ginpabay-an. An pagano nga mga Canaanita an iya mga kag-anak. Ngani, an Jerusalem maiha nga kontrolado han mga Jebusita, usa nga tribo ha Canaan, han waray pa ito masakop ni David. Nalooy hi Jehova ha iya, ginlimpyohan hiya ngan igintagana an iya panginahanglan. Inabot an panahon nga nagin sugad hin asawa Niya hiya. Ngani, an mga Israelita nga ha urhi inukoy hito nga syudad may kasabotan kan Jehova, nga kinaburut-on nga gin-uyonan nira ha panahon pa ni Moises. (Ex. 24:7, 8) Han an Jerusalem nagin kapital han nasud, ginbendisyonan, ginpariko, ngan ginpahusay hiya ni Jehova, pariho hin asawa nga gintatagan han iya riko ngan maimpluwensya nga bana hin makaruruyag nga mga pan-adorno.​—Ezek. 16:1-14.

12. Paonan-o nakasulod ha Jerusalem an pagkadiri-maunungon?

¹² Tagda an sunod nga nahitabo. Hi Jehova nagsiring: “Nagtikang ka pagsarig ha imo kahusay, ngan nagin hostes ka tungod han imo kabantogan. Nagpatakas ka ha pagbuhat hin prostitusyon ha tagsa nga nalabay, ngan nagin iya an imo kahusay.” (Ezek. 16:15) Ha panahon ni Solomon, ginbendisyonan gud ngan ginpariko ni Jehova an iya katawohan salit an Jerusalem nagin an pinakamatahom nga syudad ha kadaan nga panahon. (1 Hadi 10:23, 27) Pero hinay-hinay nga nakasulod an buwa nga pagsingba. Hi Solomon, nga karuyag lipayon an iya damu nga asawa nga taga-iba nga nasud, nagtikang paghugaw ha Jerusalem pinaagi han pagsingba ha pagano nga mga dios. (1 Hadi 11:1-8) Ngan mas maraot pa an ginbuhat han iba nga hadi sunod ha iya; ira ginhugawan an bug-os nga nasud han buwa nga pagsingba. Ano an inabat ni Jehova hito nga prostitusyon ngan pagtraydor? Hiya nagsiring: “An sugad nga mga butang diri angay buhaton, ngan diri gud ito angay mahitabo.” (Ezek. 16:16) Pero an iya sarawayon nga katawohan nagtikaraot pa gud!

13. An katawohan han Dios ha Jerusalem salaan hin ano nga karaotan?

 ¹³ Imadyina an kasakit ngan kangalas ni Jehova han iya iginbuhayhag an karaotan han iya pinili nga katawohan: “Imo ginkuha an imo mga anak nga lalaki ngan an imo mga anak nga babaye nga mga anak mo ha akon, ngan imo hira iginhalad ha mga idolo basi lamuyon​—kulang pa ba an imo ginbuhat nga prostitusyon? Imo ginpamatay an akon mga anak, ngan imo hira iginhalad pinaagi ha pagsunog ha ira ha kalayo.” (Ezek. 16:20, 21) Iton makangingirhat nga mga buhat nagpapakita nga hi Satanas maraot gud. Nalilipay gud hiya paglit-ag ha katawohan ni Jehova nga magbuhat hiton mangil-ad nga mga butang! Pero nakikita ni Jehova an ngatanan. Kaya niya wad-on bisan an pinakagrabe nga sataniko nga mga buhat, ngan magpapadapat hiya hin hustisya.​—Basaha an Job 34:24.

14. Hin-o an duha nga bugto han Jerusalem ha ilustrasyon ni Jehova, ngan hin-o an pinakamaraot ha ira nga tulo?

¹⁴ Pero an Jerusalem waray man la mangirhat ha iya karaotan. Iginpadayon niya an iya prostitusyon. Hi Jehova nagsiring nga mas waray hiya awod kay ha iba nga hostes kay hiya an nabayad ha iba basi magbuhat hin imoralidad upod niya! (Ezek. 16:34) An Dios nagsiring nga supo hiya ha iya “nanay,” an pagano nga mga tribo nga nagkontrol ha iya hadto. (Ezek. 16:44, 45) Ha pagpadayon han ilustrasyon han pamilya, nagsiring Hiya nga an magurang han Jerusalem amo an Samaria, nga nauna ha pagbuhat hin espirituwal nga prostitusyon. Nag-unabi liwat an Dios hin ikaduha nga bugto, an Sodoma, nga gin-gamit dinhi sugad nga puplunganon kay maiha na ito nga ginbungkag tungod han pagin arogante ngan duro nga imoralidad. Karuyag ipasabot ni Jehova nga mas maraot pa an Jerusalem kay han iya mga bugto, an Samaria ngan bisan an Sodoma! (Ezek. 16:46-50) Ginbalewaray han katawohan han Dios an damu gud nga pahamangno ngan nagpadayon ha ira mangil-ad nga pagkinabuhi.

15. Kay ano nga nagpadapat hi Jehova hin paghukom ha Jerusalem, ngan ano nga paglaom an iya iginhatag?

¹⁵ Ano an bubuhaton ni Jehova? Nagsaad hiya ha Jerusalem: “Titirukon ko an ngatanan mo nga karelasyon nga imo ginpalipay” ngan, “Itutubyan ko ikaw ha ira kamot.” Bubungkagon hiya han iya pagano nga mga kaalyado hadto ngan huhukasan han iya kahusay ngan presyoso nga mga butang. “Babatuhon ka nira ngan papatayon pinaagi han ira mga espada,” siring Niya. Kay ano nga ipapadapat ni Jehova ini nga paghukom? Diri para poohon an iya katawohan. Lugod, nagsiring hiya: “Pauundangon ko an imo pagbuhat hin prostitusyon.” Hiya nagdugang: “Dida la mawawara an akon kapungot ha imo, ngan an akon kasina mabaya ha imo; ngan magigin kalmado ako ngan diri na masisina.” Sugad han ginhisgotan ha Kapitulo 9, katuyoan ni Jehova nga ipahiuli an iya katawohan katapos han ira pagkadistyero. Kay ano? Hiya nagsiring: “Dudumdumon ko mismo an kasabotan nga akon ginhimo ha imo ha mga adlaw han imo pagkabatan-on.” (Ezek. 16:37-42, 60)  Diri pariho ha iya katawohan, hi Jehova magigin maunungon gud!​—Basaha an Pahayag 15:4.

16, 17. (a) Kay ano nga diri na kita nasiring nga hira Ohola ngan Oholiba nagsisimbolo ha Kakristianohan? (Kitaa an kahon nga “An Magbugto nga Hostes.”) (b) Ano nga mga leksyon an aton hibabaroan ha Ezekiel kapitulo 16 ngan 23?

¹⁶ Pinaagi han hilaba ngan mapwersa nga ginyakan ni Jehova ha Ezekiel kapitulo 16, damu an iya igintututdo mahitungod han iya magtadong nga suruklan, hustisya, ngan daku nga kalooy. Ito liwat an masisiring ha Ezekiel kapitulo 23. Ginsiseryoso han tinuod nga mga Kristiano yana an klaro nga mga mensahe ni Jehova mahitungod han prostitusyon han iya katawohan. Diri gud naton hiya karuyag pasakitan sugad han ginbuhat han Juda ngan Jerusalem! Salit karuyag naton likyan an ngatanan nga klase han idolatriya, upod na an kahakog ngan materyalismo. (Mat. 6:24; Col. 3:5) Karuyag naton pirme magin mapasalamaton nga iginpahiuli ni Jehova an putli nga pagsingba hinin kataposan nga mga adlaw tungod han iya kalooy ngan diri gud niya itutugot nga mahugawan ito utro! Naghimo hiya hin “permanente nga kasabotan” ha espirituwal nga Israel, ngan diri gud ito mawawara tungod han pagkadiri-maunungon o prostitusyon. (Ezek. 16:60) Salit pabilhan naton an aton pribilehiyo nga magin bahin han limpyo nga katawohan ni Jehova yana.

¹⁷ Pero ano an igintututdo ha aton han ginyakan ni Jehova kontra ha mga hostes nga iginhulagway ha Ezekiel mahitungod han “gamhanan nga hostes,” an Babilonya nga Gamhanan? Aton kitaon.

18, 19. Ano an mga kaparihoan han mga hostes nga iginhulagway ha Ezekiel ngan han hostes ha libro han Pahayag?

¹⁸ Hi Jehova diri nagbabag-o. (San. 1:17) An iya inaabat ha buwa nga relihiyon waray magbag-o ha bug-os nga kasaysayan hiton gamhanan nga hostes. Salit diri kita nahipapausa nga damu an kaparihoan han iya paghukom ha mga hostes ha libro han Ezekiel ngan han dadangatan han “gamhanan nga hostes” nga iginhulagway ha libro han Pahayag.

¹⁹ Pananglitan, tigamni nga an sirot ha mga hostes ha mga tagna ni Ezekiel diri direkta nga tikang kan Jehova kondi tikang ha mga nasud mismo nga nagin karelasyon han iya diri maunungon nga katawohan. Ha pariho nga paagi, an imperyo han buwa nga relihiyon ha kalibotan ginkondenar ha pagbuhat han sugad nga imoralidad upod han “mga hadi ha tuna.” Ngan diin magtitikang an iya sirot? Mababasa naton nga inin politikal nga sistema “mangangalas ha hostes ngan kukuhaon an ngatanan niya nga panag-iya ngan paghuhuboan, ngan ira uubuson pagkaon an iya unod ngan uugtangon hiya ha kalayo.” Kay ano nga bubuhaton han mga gobyerno hini nga kalibotan iton diri ginlalaoman nga butang? Kay ‘ibubutang ito han Dios ha ira kasingkasing basi buhaton an iya panhunahuna.’—Pah. 17:1-3, 15-17.

20. Ano an nagpapakita nga magigin permanente na an paghukom ha Babilonya?

 ²⁰ Salit gagamiton ni Jehova an mga nasud ha pagpadapat han iya paghukom ha ngatanan nga buwa nga relihiyon, upod na an mga relihiyon han Kakristianohan. Ini nga paghukom diri na mababag-o; diri na hira papasayloon o tatagan pa hin higayon nga magbag-o. Iginsusumat han Pahayag nga an Babilonya ‘diri na gud hiaagian utro.’ (Pah. 18:21) An mga anghel magrarayhak ha iya kabungkag, nga nasiring: “Dayawa hi Jah! Ngan an aso nga tikang ha iya padayon nga nagtitipaigbaw ha kadayonan, oo ha kadayonan.” (Pah. 19:3) Permanente na ini nga paghukom. Diri na gud tutugotan an bisan ano nga buwa nga relihiyon nga umeksister ngan makahugaw ha putli nga pagsingba. An nagkakalayo nga paghukom ha Babilonya ngan an iya kabungkag simboliko nga magriresulta hin aso nga magtitipaigbaw ha kadayonan.

21. An kabungkag han buwa nga relihiyon tinikangan han ano nga panahon, ngan ano an kataposan hito nga panahon?

²¹ Kon atakehon na han mga gobyerno an Babilonya nga Gamhanan, ipapadapat nira an paghukom han Dios, usa nga daku nga  panhitabo ha katumanan han katuyoan ni Jehova. Ito an tinikangan han daku nga kasakitan, nga panahon han waray kapariho nga kasamok. (Mat. 24:21) An kataposan hito nga kasakitan amo an Armagedon, an girra ni Jehova kontra hinin maraot nga sistema. (Pah. 16:14, 16) Ipapakita ha sunod nga mga kapitulo hini nga publikasyon nga damu an iginsusumat han libro han Ezekiel kon paonan-o mahitatabo an daku nga kasakitan. Ha pagkayana, ano nga mga leksyon ha Ezekiel kapitulo 16 ngan 23 an karuyag mo hinumdoman ngan iaplikar?

22, 23. Ano an mahimo magin epekto ha aton sagrado nga pag-alagad han paghisgot ha mga hostes ha Ezekiel ngan Pahayag?

²² Karuyag gud ni Satanas nga mahugawan adton nagbubuhat han putli nga pagsingba. Nalilipay gud hiya ha oportunidad nga ipahirayo kita ha putli nga pagsingba ngan aghaton kita nga gumawi pariho han mga hostes ha libro han Ezekiel. Salit angay naton hinumdoman nga hi Jehova nadiri nga may kaagaw hiya ngan nangangalas ha pagkadiri-maunungon! (Num. 25:11) Nagpapabilin kita nga hirayo ha buwa nga relihiyon ngan diri ‘nakapot hin bisan ano nga mahugaw’ ha paniplatan han Dios. (Isa. 52:11) Ha pariho nga hinungdan, maunungon nga nagpapabilin kita nga neutral ha mga kasamok ngan araway ha politika hinin nagkakabahin-bahin nga kalibotan. (Juan 15:19) Para ha aton, an nasyonalismo buwa nga relihiyon gihap nga igin-aaghat ni Satanas, ngan diri gud kita nakikigbahin hito.

²³ Labaw ha ngatanan, tigamnan naton nga pribilehiyo gud naton nga singbahon hi Jehova ha iya limpyo ngan putli nga espirituwal nga templo. Ginpapabilhan naton inin baraan nga kahikayan, salit hinaot magin mas determinado kita nga diri makigbahin ha buwa nga relihiyon ngan ha iya prostitusyon!