Marig-on nga iginpapakita han tagna han Biblia ngan han kasaysayan nga hi Jesus nagtikang pagmando sugad nga Hadi ha langit han 1914​—an tigaman han pagtikang han kataposan nga mga adlaw han sistema ni Satanas ha tuna. Ano an ginbuhat ni Jesus han nagin Hadi hiya? Igin-gawas ba dayon niya an iya mga surugoon ha tuna ha pagkabihag ha Babilonya nga Gamhanan? Gintokahan ba niya an iya “matinumanon ngan maaramon nga uripon” han 1914 ngan gintikangan an daku nga buruhaton ha pag-ani?​—Mat. 24:45.

Klaro nga waray. Hinumdumi nga hi apostol Pedro gin-giyahan ha pagsurat nga an paghukom “magtitikang ha balay han Dios.” (1 Ped. 4:17) Sugad man, igintagna ni propeta Malakias an pag-abot ni Jehova ha Iya balay han pagsingba kaupod an “mensahero han kasabotan,” an Anak han Dios. (Mal. 3:1-5) Magigin panahon ito han pagputli ngan pag-usisa. Nauyon ba an kasaysayan hito nga mga tagna?

 Oo! An peryodo han 1914 tubtob ha temprano han 1919 makuri nga panahon han pag-usisa ngan pagputli ha mga Estudyante han Biblia, nga tawag hadto ha mga Saksi ni Jehova. Han 1914 damu han katawohan han Dios an nasubo han waray umabot an ira ginlalaoman nga kataposan han sistema. Han 1916 nadugangan pa ito han namatay hi Charles T. Russell, nga aktibo gud nga nangunguna ha katawohan han Dios. An pipira nga sobra kamaunungon ha iya kinontra gud ha pagpanguna han iya kasaliwan nga hi Joseph F. Rutherford. Nagkaada pagkabahin-bahin ngan haros matunga an organisasyon han 1917. Han 1918, matin-aw nga tungod ha pagsulsol han mga klero, hi Bugto Rutherford ngan an pito han iya mga kaupod ginbista, sayop nga ginsentensyahan, ngan ginpriso. Nagsara an headquarters ha Brooklyn. Klaro nga an katawohan han Dios waray pa igawas ha Babilonya nga Gamhanan!

Pero ano an nahitabo han 1919? Tigda nga nagbag-o an kahimtang! Temprano hito nga tuig, hi Rutherford ngan an iya mga kaupod ginpagawas ha prisohan. Ngan binalik dayon hira ha ira buruhaton! Nagplano dayon hin makasaysayan nga kombensyon, ngan igin-andam an bag-o nga magasin nga The Golden Age (Pagpamata! na yana). Inin bag-o nga magasin gindisenyo para ha mga kampanya ha pagsangyaw ha publiko. Nagtoka liwat hin paramangno ha tagsa nga kongregasyon basi mag-organisar ngan manguna ha ministeryo. Hito liwat nga tuig, iginpublikar an Bulletin (An Aton Kristiano nga Pagkinabuhi Ngan Ministeryo​—Workbook Para ha Katirok na yana) basi makabulig ha pag-organisar han pagsangyaw.

Ano an nahitabo? Klaro nga igin-gawas na han Kristo an iya katawohan ha pagkabihag ha Babilonya nga Gamhanan. Gintokahan na niya an iya matinumanon ngan maaramon nga uripon. Nagtikang na an buruhaton ha pag-ani. Tikang hiton importante nga tuig han 1919, madagmit gud nga nag-uswag an buruhaton.