KAHON NGA NAGTUTUTDO 14A
Mga Leksyon Tikang ha Bisyon ni Ezekiel Mahitungod han Templo
An Putli nga Pagsingba Iginpahitaas Ngan Ginpanalipdan
An templo ha bisyon iginbutang ha “hitaas gud nga bukid” (1). Iginpapahitaas ba naton an putli nga pagsingba, nga ginhihimo ito nga nangunguna nga prayoridad ha aton kinabuhi?
An nakapalibot nga pader (2) han templo nga aada ha butnga han haluag nga espasyo (3) nagpapahinumdom ha aton nga diri gud naton angay tugotan an bisan ano nga makahugaw han aton pagsingba kan Jehova. Kon an mga butang para ha “diri baraan” nga paggamit kinahanglan ipahirayo ha putli nga pagsingba, labi na gud nga kinahanglan likyan han magsiringba ni Jehova yana an mahugaw o imoral nga panggawi!—Ezek. 42:20.
Waray Kataposan nga mga Bendisyon
May sapa nga naawas tikang ha santuaryo han templo ngan nagigin salog nga naghahatag hin kinabuhi ngan pagkamabungahon ha tuna (4). Ini nga mga bendisyon hihisgotan ha Kapitulo 19.
Mga Suruklan nga Para ha Ngatanan
An higtaas nga gawas nga mga ganghaan (5) ngan sulod nga mga ganghaan (9) nagpapahinumdom ha aton nga hi Jehova may higtaas nga suruklan ha panggawi para ha ngatanan nga makikigbahin ha putli nga pagsingba. Tigamni nga an gawas ngan sulod nga mga ganghaan parapriho an kabug-osan nga sukol. Angayan ini, kay parapriho an magtadong nga suruklan ni Jehova ha ngatanan niya nga alagad, anoman an ira pribilehiyo o responsabilidad.
Pangaon ha Lamesa ni Jehova
An mga kwarto nga pangaonan (8) nagpapahinumdom ha aton nga hadto mahimo kaunon han mga tawo an pipira nga halad nga ira gindara ha templo, nga sugad hin nakaon hira kaupod ni Jehova. Iba an kahimtang ha espirituwal nga templo diin nagsisingba an mga Kristiano yana, kay an “usa nga halad” naihalad na. (Heb. 10:12) Pero naghahalad gihap kita hin mga halad han pagdayaw.—Heb. 13:15.
Garantiya han Dios
Bangin mawurok ka ha ngatanan nga detalyado nga sukol ha bisyon. Pero nagtututdo ito hin importante nga punto: Naggagarantiya ito nga an katuyoan ni Jehova ha pagpahiuli han putli nga pagsingba sigurado ngan diri magbabag-o, sugad la nga ito nga mga sukol eksakto ngan diri nababag-o. Bisan kon waray mag-unabi hi Ezekiel nga nakakita hiya hin tawo ha iya bisyon, iginsurat niya an marig-on nga sagdon ni Jehova para ha mga saserdote, mga lider, ngan ha katawohan. Kinahanglan sundon han ngatanan nga alagad han Dios an Iya magtadong nga suruklan.
