Ha Biblia, an Hebreo nga berbo nga na·vaʼʹ, nga iginhuhubad nga “pagtagna,” nagtutudlok siyahan ha pagpahayag hin giniyahan nga mensahe, paghukom, katutdoan ha moral, o sugo tikang ha Dios. Mahimo liwat ito magtudlok ha pagpasamwak hin mensahe han Dios mahitungod hin butang nga mahitatabo pa la. An mga tagna ni Ezekiel nag-uupod hito ngatanan nga klase han kapahayagan han Dios.​—Ezek. 3:10, 11; 11:4-8; 14:6, 7; 37:9, 10; 38:1-4.

• BISYON

• ILUSTRASYON

• PASUNDAYAG

Mababasa ha libro han Ezekiel an mga bisyon, ilustrasyon, parabola, ngan pasundayag han mga tagna.

An mga tagna ni Ezekiel usahay diri la usa an katumanan. Pananglitan, an mga tagna mahitungod ha pagpahiuli nagkaada gutiay nga katumanan han an katawohan han Dios binalik ha Tuna nga Iginsaad. Pero sugad han hihisgotan ha Kapitulo 9 hini nga publikasyon, damu hito an natutuman yana ngan matutuman pa la.

Ha naglabay, ginhunahuna naton nga an pipira nga bahin han tagna ni Ezekiel may tipiko ngan antitipiko nga katumanan, o may simboliko nga kahulogan. Pero ini nga publikasyon diri naghuhulagway nga an usa nga tawo, butang, lugar, o panhitabo may simboliko nga kahulogan ha moderno nga panahon labot la kon may klaro nga basihan ha Kasuratan. * Lugod, hihisgotan hini an mas daku nga katumanan han damu han mga tagna ni Ezekiel. Uusisahon liwat hini an mga leksyon ha mensahe ni Ezekiel ngan ha mga tawo, lugar, ngan panhitabo nga iya gin-unabi.