KAHON NGA NAGTUTUTDO 19B
An Sapa Nagin Salog!
Ginsubay ni Ezekiel an sapa nga naawas tikang ha santuaryo ni Jehova ngan milagroso nga nagin hilarom nga salog pag-abot la hin mga dos kilometros! Ha mga ligid hito, nakakita hiya hin marampag nga kakahoyan nga naghahatag hin pagkaon ngan pagtambal. Ano an kahulogan hini?
An Salog Naghahatag hin mga Bendisyon
HADTO: Pakabalik han mga distyero ha ira tuna, inagos ha ira an mga bendisyon samtang nakikigbahin hira ha pagpahiuli han putli nga pagsingba ha templo
MODERNO NGA PANAHON: Han 1919 iginpahiuli an putli nga pagsingba, salit nagin mas makusog an pag-agos han espirituwal nga mga bendisyon ha matinumanon nga mga alagad han Dios
TIARABOT: Katapos han Armagedon, pisikal ngan espirituwal nga mga bendisyon an maagos tikang kan Jehova
Tubig nga Naghahatag hin Kinabuhi
HADTO: Samtang nagdadamu an masinugtanon nga katawohan ni Jehova, hura nga ginbendisyonan niya hira, salit nag-uswag hira ha espirituwal
MODERNO NGA PANAHON: Ha nag-uuswag nga espirituwal nga paraiso, nagtitikadamu an nagpapahimulos han nagtitikahaluag nga agos han espirituwal nga mga bendisyon ni Jehova ngan nagkakaada kinabuhi ha espirituwal nga paagi
TIARABOT: Makakaupod han mga makakatalwas ha Armagedon an damu ka milyon nga mga binanhaw, ngan hura nga bibendisyonan ni Jehova an ngatanan
Mga Kahoy nga Nakakahatag hin Pagkaon Ngan Pagtambal
HADTO: Ha espirituwal nga paagi, ginpakaon ni Jehova an iya matinumanon nga katawohan ha ira naipahiuli nga tuna; gintambal liwat niya an ira maiha na nga sakit ha espirituwal
MODERNO NGA PANAHON: An hura nga suplay hin espirituwal nga pagkaon nabulig ha mga tawo nga malikyan an pagin masakiton ngan gutom ha espirituwal nga komon ha kalibotan yana
TIARABOT: Bubuligan han Kristo ngan han iya 144,000 nga igkasi-magmarando an tanan nga masinugtanon nga katawohan nga magin perpekto ngan magin mahimsog ngan makusog ha kadayonan!
