1-3. Paonan-o gintamay han mga taga-Babilonya an mga magsiringba ni Jehova, ngan kay ano?

 IMADYINA nga matinumanon ka nga Judio nga naukoy ha syudad han Babilonya. An iyo katawohan distyero hin tunga ka siglo na o sobra pa. Sugad han imo nahiaraan ha adlaw han Sabbath, makikigkatirok ka ha imo mga igkasi-tumuroo basi magsingba kan Jehova. Pag-agi mo ha matawo nga mga kalye, nalalabyan mo an dagku nga templo ngan an damu gud nga sagrado nga lugar. Damu nga tawo an napakada hito basi maghalad ngan magkanta ha mga dios sugad kan Marduk.

² Hirayo ha kadam-an, nakigkita ka ha iyo gutiay nga grupo han mga igkasi-magsiringba. * Nakabiling kamo hin mamingaw nga lugar​—bangin ha ligid han usa nga salog han syudad—​basi urosa nga mag-ampo, magkanta hin mga salmo, ngan mamalandong ha Pulong han Dios. Samtang nag-aampo kamo, nababatian mo an mahinay nga ragaak han mga baluto nga nakahigot ha ligid han salog. Nalilipay ka nga medyo murayaw dinhi. Naglalaom ka nga waray tuminungnong nga makakita ha iyo ngan samukon an iyo katirok, nga agsob nira buhaton. Kay ano nga ginbubuhat nira ito?

 ³ An Babilonya nagdaog ha damu na nga girra, ngan natoo an mga tawo nga makusog an ira syudad tungod han ira buwa nga mga dios. Para ha ira, an kabungkag han Jerusalem pamatuod nga an ira dios nga hi Marduk mas makusog kan Jehova! Salit ginmiminos nira an imo Dios ngan an iya katawohan. Usahay nakakatamay nga nasiring hira: “Kantahi kami hin usa han mga kanta ha Zion”! (Sal. 137:3) Damu nga salmo an nagdadayaw han mga pagdaog han Zion ha mga kaaway ni Jehova. Bangin ito an paborito tamayon han mga taga-Babilonya. Pero an iba nga salmo mahitungod ha ira mismo. Pananglitan, an usa nasiring: “An Jerusalem ira ginhimo nga tambak han kagubaan. . . . Ginmiminos ngan ginyayaangyaangan kami han mga nakapalibot ha amon.”​—Sal. 79:1, 3, 4.

4, 5. Ano nga paglaom an iginhatag han tagna ni Ezekiel, ngan ano an aton hihisgotan hini nga kapitulo? (Kitaa an retrato ha tinikangan hini nga kapitulo.)

⁴ May apostata liwat nga mga Judio, nga nagtatamay han imo pagtoo kan Jehova ngan ha iya mga propeta. Bisan pa hito, an putli nga pagsingba nakakaliaw ha imo ngan ha imo pamilya. Makalilipay an urosa nga pag-ampo ngan pagkanta. Nakakapakalma an pagbasa han Pulong han Dios. (Sal. 94:19; Roma 15:4) Imadyina nga hini nga adlaw, usa nga igkasi-magsiringba an may espesyal nga dara ha katirok​—linukot nga basahon han tagna ni Ezekiel. Naruruyag ka gud nga mabatian an saad ni Jehova nga ipapahiuli niya an iya katawohan ha ira tuna. Eksayted ka samtang ginbabasa ito nga tagna, ngan ginpapamalandong mo an panahon nga kamo han imo pamilya makakabalik ngan mabulig hiton makalilipay nga pagpahiuli!

⁵ An tagna ni Ezekiel puno hin saad han pagpahiuli. Aton usisahon ito nga tema nga naghahatag hin paglaom. Paonan-o ito natuman ha mga distyero? Ano an kahulogan hito nga mga tagna ha aton panahon? Hihisgotan liwat naton an mga tagna nga may ultimo nga katumanan ha tiarabot.

6. Paonan-o pauroutro nga ginpahamangnoan han Dios an iya rebelyoso nga katawohan?

⁶ Pinaagi kan Ezekiel, ginklaro ni Jehova ha iya katawohan kon paonan-o niya hira sisirotan tungod ha pagin rebelyoso. “Madidistyero hira, magigin bihag hira,” siring ni Jehova. (Ezek. 12:11) Ha Kapitulo 6, aton hinbaroan nga iginpasundayag pa ngani ni Ezekiel ito nga sentensya. Pero diri hiya an siyahan nga naghatag han pahamangno. Haros 1,000 ka tuig antes pa, tikang ha panahon ni Moises ginpahamangnoan na ni Jehova an iya katawohan nga kon magpadayon hira ha pagrebelde, madidistyero hira. (Deut. 28:36, 37) An mga propeta sugad kanda Isaias ngan Jeremias naghatag hin puropariho nga pahamangno.​—Isa. 39:5-7; Jer. 20:3-6.

7. Ha ano nga mga paagi ginsirotan ni Jehova an iya katawohan?

⁷ Pero makasurubo nga kadam-an an waray mamati. Ha urhi, nasakitan gud hi Jehova ha pagrebelde, idolatriya, pagkadiri-matinumanon, ngan karaotan han iya katawohan tungod han impluwensya  han magraot nga paraataman. Salit gintugotan niya nga mag-antos hira hin gutom​—usa nga kadaot ngan kaarawdan, kay hadto an ira tuna “nag-aawas hin gatas ngan dugos.” (Ezek. 20:6, 7) Katapos, sugad han maiha na nga igintagna ni Jehova, gintugotan niya nga madistyero an iya sarawayon nga katawohan. Han 607 B.C.E., ginbungkag ni Nabucodonosor han Babilonya an Jerusalem ngan an templo. Yinukot han nakatalwas nga Judio an gindistyero ha Babilonya. Didto nag-antos hira han pagtamay ngan pagkontra nga iginhulagway ha tinikangan hini nga kapitulo.

8, 9. Paonan-o ginpahamangnoan han Dios an Kristiano nga kongregasyon kontra ha apostasya?

⁸ Nahitabo ba ha Kristiano nga kongregasyon an puropariho han pagkadistyero ha Babilonya? Oo! Pariho ha mga Judio hadto, an mga sumurunod han Kristo abanse nga ginpahamangnoan. Ha tinikangan han ministeryo ni Jesus, hiya nagsiring: “Pagbantay kamo ha buwa nga mga propeta nga nadaop ha iyo nga nakasul-ot hin barahibo han karnero, pero ha pagkamatuod mga gutom gud hira nga mga lobo.” (Mat. 7:15) Paglabay hin mga tuig, hi apostol Pablo gin-giyahan ha paghatag hin puropariho nga pahamangno: “Maaram ako nga pagbaya ko, masulod ngada ha iyo an magpintas nga mga lobo ngan diri nira tatrataron hin malumo an panon, ngan tikang mismo ha iyo may mga tawo nga mabangon ngan magyayakan hin baliko nga mga butang basi ipahirayo an mga disipulo ngan pasundon ha ira.”​—Buh. 20:29, 30.

⁹ An mga Kristiano gintutdoan kon paonan-o makikilala ngan malilikyan an sugad nga peligroso nga mga tawo. An Kristiano nga mga tigurang ginsugo nga paiwason ha kongregasyon an mga apostata. (1 Tim. 1:19; 2 Tim. 2:16-19; 2 Ped. 2:1-3; 2 Juan 10) Pero pariho ha Israel ngan Juda, damu nga Kristiano an hinay-hinay nga nagbalewaray ha mahigugmaon nga mga pahamangno. Ha ikatarapos han siyahan nga siglo, an apostasya nakagamot na ha kongregasyon. Hi Juan, an ultimo nga apostol nga buhi pa ha ikatarapos han siyahan nga siglo C.E., nakaobserbar nga an kongregasyon apektado na gud han sugad nga karaotan ngan kalyap nga pagrebelde. Hiya na la an nakakapugong han pagtikagrabe hito. (2 Tes. 2:6-8; 1 Juan 2:18) Ano an nahitabo kamatay niya?

10, 11. Paonan-o an parabola ni Jesus mahitungod han trigo ngan mga banwa natuman tikang ha ikaduha ka siglo C.E.?

¹⁰ Kamatay ni Juan, nagtikang matuman an parabola ni Jesus mahitungod han trigo ngan mga banwa. (Basaha an Mateo 13:24-30.) Sugad han igintagna ni Jesus, ginsabwagan ni Satanas an kongregasyon hin “mga banwa,” o peke nga mga Kristiano, ngan madagmit nga nadaot an kongregasyon. Sigurado nga nasubo gud hi Jehova nga an kongregasyon nga gin-establisar han iya Anak nahugawan han idolatriya, pagano nga mga selebrasyon ngan buhat, ngan buwa nga mga doktrina han waray Dios nga mga pilosopo ngan han sataniko nga mga relihiyon! Ano an ginbuhat ni Jehova? Gintugotan niya nga madistyero an iya katawohan, pariho ha diri  matinumanon nga Israel. Tikang ha ikaduha ka siglo C.E., an mga sugad-trigo makuri na mabilngan butnga han peke nga mga Kristiano. An tinuod nga Kristiano nga kongregasyon nadistyero ha Babilonya nga Gamhanan​—an imperyo han buwa nga relihiyon ha kalibotan—​pero an peke nga mga Kristiano nagin bahin hiton maraot nga imperyo. Han nagdamu an peke nga mga Kristiano, naporma an Kakristianohan.

¹¹ Ha madulom nga mga siglo han pagdominar han Kakristianohan, may pipira nga tinuod nga Kristiano, an “trigo” ha parabola ni Jesus. Pariho han nadistyero nga mga Judio ha Ezekiel 6:9, nahinumdoman nira an tinuod nga Dios. Maisugon nga ginkontra han iba ha ira an buwa nga mga doktrina han Kakristianohan. Gintamay hira ngan gintimaraot. Papabay-an ba ni Jehova an iya katawohan nga magpabilin hiton espirituwal nga kasisidman? Diri! Pariho ha Israel hadto, an kasina ni Jehova iginpahayag ha husto nga sukol ngan ha husto nga kahilawig han panahon. (Jer. 46:28) Dugang pa, diri kay waray niya hira tagi hin paglaom. Balikon naton an Judio nga mga distyero ha Babilonya ngan kitaon kon paonan-o hira gintagan ni Jehova hin paglaom nga matatapos an ira pagkabihag.

12, 13. Kay ano nga mawawara an kasina ni Jehova ha iya distyero nga katawohan ha panahon ni Ezekiel?

¹² Prangka hi Jehova ha iya matadong nga kasina ha iya katawohan, pero ginpasarig liwat niya hira nga diri ito magpapabilin ha kadayonan. Pananglitan, tagda ini nga mga pulong: “Matatapos an akon kasina, ngan mawawara an akon kapungot ha ira, ngan matatagbaw ako. Ngan kon matapos ko na buhian kontra ha ira an akon kapungot, makikilala gud nira nga ako, hi Jehova, an nagyakan hini tungod han akon pag-obligar hin eksklusibo nga debosyon.” (Ezek. 5:13) Kay ano nga mawawara an kapungot ni Jehova?

¹³ Upod ha mga bihag an magtinumanon nga Judio nga gindistyero kaupod han diri magtinumanon. Dugang pa, pinaagi kan Ezekiel, igintagna han Dios nga an pipira han Iya katawohan magbabasol samtang distyero. Isusumat hini nga mga nagbasol an makaarawod nga mga butang nga ira ginbuhat ha pagrebelde kan Jehova, ngan manginginyupo hira ha iya nga pasayloon ngan kaloy-an hira. (Ezek. 6:8-10; 12:16) Hi Ezekiel usa hito nga magtinumanon, pati na hi propeta Daniel ngan an iya tulo nga kaupod. Ngani, nakita ni Daniel an tinikangan ngan kataposan han pagkadistyero. An iya kinasingkasing nga pag-ampo han pagbasol tungod ha mga sala han  Israel mababasa ha Daniel kapitulo 9. Sigurado nga sugad liwat hito an inabat han yinukot nga distyero nga naghingyap nga pasayloon ngan bendisyonan utro ni Jehova. Salit makalilipay gud an giniyahan nga mga saad ni Ezekiel mahitungod han kagawasan ngan pagpahiuli!

14. Kay ano nga ipapahiuli ni Jehova an iya katawohan ha ira tuna?

¹⁴ Pero may mas importante nga rason ha pagpagawas ngan pagpahiuli han katawohan ni Jehova. An ira maiha nga kadistyero matatapos, diri tungod kay angay hira talwason, kondi panahon na nga baraanon utro ni Jehova an iya ngaran ha atubangan han ngatanan nga nasud. (Ezek. 36:22) Hibabaroan han mga taga-Babilonya nga an ira sugad-demonyo nga mga dios, sugad kan Marduk, waray darag-an kan Jehova nga Soberano nga Ginoo! Tagdon naton an lima nga saad nga iginpasumat ni Jehova kan Ezekiel ha iya mga igkasi-distyero. Aton anay hisgotan an kahulogan han tagsa nga saad para hiton matinumanon nga katawohan. Katapos, usisahon naton kon paonan-o nahitabo an mas daku nga katumanan hito nga mga saad.

15. Ano an mababag-o ha mga buhat han binalik nga mga Judio may kalabotan ha relihiyon?

¹⁵ SAAD 1. Mawawara na an idolatriya ngan iba pa nga mangil-ad nga buhat nga konektado ha buwa nga relihiyon. (Basaha an Ezekiel 11:18; 12:24.) Ginhisgotan ha Kapitulo 5 nga an Jerusalem ngan an templo nahugawan han mga buhat han buwa nga relihiyon, sugad han idolatriya. Salit an mga tawo nagin maraot ngan nahibulag kan Jehova. Pinaagi kan Ezekiel, igintagna ni Jehova nga an mga distyero may pamumulaton nga panahon nga makikigbahin hira utro ha limpyo nga pagsingba. An iba pa nga bendisyon han pagpahiuli nakadepende hinin importante nga butang: an pagpahiuli han kahikayan han Dios ha putli nga pagsingba.

16. Ano an iginsaad ni Jehova may kalabotan ha tuna han iya katawohan?

¹⁶ SAAD 2. Mabalik hira ha ira tuna. “Ihahatag ko ha iyo an tuna han Israel,” siring ni Jehova ha mga distyero. (Ezek. 11:17) Urusahon ini nga saad, kay sigurado nga an mga taga-Babilonya, nga  nagtatamay han bihag nga katawohan han Dios, waray gud maghatag ha ira hin paglaom nga makabalik ha ira hinigugma nga tuna. (Isa. 14:4, 17) Dugang pa, kon an binalik nga katawohan magpabilin nga matinumanon, an tuna magigin matambok ngan mabungahon salit magkakaada hira hin pagkaon ngan mapulsanon nga trabaho. An kaarawdan ngan kakurian tungod han gutom mawawara na.​—Basaha an Ezekiel 36:30.

17. Ano an mahitatabo may kalabotan ha mga halad kan Jehova?

¹⁷ SAAD 3. Maghahalad utro ha halaran ni Jehova. Ginhisgotan ha Kapitulo 2 nga ilarom han Balaud, an mga halad importante nga bahin han putli nga pagsingba. Kon an binalik nga mga distyero magpabilin nga masinugtanon ngan limpyo ha espirituwal, kakarawaton ni Jehova an ira mga halad. Salit mapapasaylo an ira mga sala ngan magpapabilin hira nga duok ha ira Dios. Hi Jehova nagsaad: “An bug-os nga panimalay ni Israel, hira ngatanan, mag-aalagad ha akon hito nga tuna. Malilipay ako ha ira didto, ngan ig-oobligar ko an iyo mga kontribusyon ngan an siyahan nga mga bunga han iyo mga halad, an ngatanan niyo nga baraan nga butang.” (Ezek. 20:40) An putli nga pagsingba ipapahiuli gud ngan magriresulta hin mga bendisyon ha katawohan han Dios.

18. Paonan-o aatamanon ni Jehova an iya katawohan?

¹⁸ SAAD 4. Tatanggalon an magraot nga paraataman. Usa nga daku nga rason nga nakasala hin seryoso an katawohan han Dios amo an impluwensya han magraot nga kalalakin-an nga nanguna ha ira. Nagsaad hi Jehova nga bag-uhon an kahimtang. Mahitungod hiton magraot nga paraataman, hiya nagsaad: “Diri ko na hira tutuinan ha pagpakaon ha akon mga karnero . . . Tatalwason ko an akon mga karnero tikang ha ira baba.” Ginpasarig liwat ni Jehova an iya matinumanon nga katawohan: “Mamangnoan ko an akon mga karnero.” (Ezek. 34:10, 12) Paonan-o niya ito bubuhaton? Magamit hiya hin matinumanon ngan maunungon nga kalalakin-an sugad nga mga paraataman.

19. Ano an iginsaad ni Jehova may kalabotan ha pagkaurosa?

 ¹⁹ SAAD 5. Magkakaurosa an mga magsiringba ni Jehova. Hunahunaa an kasubo han magtinumanon nga magsiringba ha pagkabahin-bahin han katawohan han Dios antes han pagkadistyero. Tungod han impluwensya han buwa nga mga propeta ngan magraot nga paraataman, an katawohan nagrebelde ha magtinumanon nga propeta nga nagrirepresentar kan Jehova; nagkaada pa ngani magkakontra nga mga grupo. Salit usa han pinakamakaruruyag nga bahin han pagpahiuli amo ini nga saad pinaagi kan Ezekiel: “Tatagan ko hira hin nagkakaurosa nga kasingkasing, ngan bubutangan ko hira hin bag-o nga disposisyon.” (Ezek. 11:19) Kon an binalik nga mga Judio magpabilin nga kahiusa ni Jehova nga Dios ngan nagkakaurosa, waray kaaway nga makakapirde ha ira. Sugad nga nasud, mahihimaya nira utro hi Jehova imbes nga pasiparahan ngan pakaalohan hiya.

20, 21. Paonan-o natuman an mga tagna han Dios ha mga distyero nga binalik?

²⁰ Natuman ba iton lima nga saad ha Judio nga mga distyero nga binalik? Hinumdoman naton an ginsiring han matinumanon nga hi Josue: “Waray bisan usa nga pulong ha ngatanan nga mag-opay nga saad nga ginsiring ha iyo ni Jehova nga iyo Dios an napakyas.  Natuman ito ngatanan para ha iyo. Waray bisan usa hito nga pulong an napakyas.” (Jos. 23:14) Pariho ha panahon ni Josue, matutuman liwat ito ha mga distyero nga binalik ha ira tuna.

²¹ Ginbayaan han mga Judio an idolatriya ngan iba pa nga mangil-ad nga buhat han buwa nga relihiyon nga nagbulag ha ira kan Jehova. Bisan kon baga hin imposible, inukoy hira utro ha ira tuna, nagkultibar hito, ngan nagkinabuhi hin malipayon. Usa han siyahan nga ginbuhat nira amo an paghimo utro han halaran ni Jehova ha Jerusalem ngan paghalad dida hito hin mga halad nga kinakarawat niya. (Ezra 3:2-6) Ginbendisyonan hira ni Jehova hin mag-opay nga espirituwal nga paraataman sugad han matinumanon nga saserdote ngan parakopya nga hi Ezra, han mga gobernador nga hira Nehemias ngan Zerubabel, han hitaas nga saserdote nga hi Josue, ngan han maisugon nga mga propeta nga hira Hagai, Zacarias, ngan Malakias. Han ginsunod han katawohan an instruksyon ngan giya ni Jehova, nagpahimulos hira hin pagkaurosa nga maiha na nga waray nira maeksperyensyahi.​—Isa. 61:1-4; basaha an Jeremias 3:15.

22. Kay ano nga nakasiring kita nga an siyahan nga katumanan han mga tagna mahitungod ha pagpahiuli may mas daku nga katumanan?

 ²² Makapadasig gud an siyahan nga katumanan han mga saad ni Jehova mahitungod ha pagpahiuli! Pero may-ada pa ito mas daku nga katumanan. Kay ano nga nakasiring kita hito? Kay an mga saad may kondisyon; tutumanon la ito ni Jehova kon an katawohan magpabilin nga masinugtanon ngan matinumanon. Ha urhi, an mga Judio nagin matinalapason ngan rebelyoso utro. Pero sugad han siring ni Josue, an pulong ni Jehova pirme natutuman. Salit an mga saad may mas daku ngan nagpapadayon nga katumanan. Kitaon naton kon paonan-o ito nahitabo.

23, 24. Kakan-o ngan paonan-o nagtikang an “mga panahon han pagpahiuli han ngatanan nga butang”?

²³ Sugad nga mga estudyante han Biblia, maaram kita nga an kataposan nga mga adlaw hinin maraot nga sistema nagtikang han 1914. Pero para ha mga alagad ni Jehova, diri ito makasurubo. Ngani, iginpapakita han Biblia nga han 1914 nagtikang an eksayting nga panahon​—an “mga panahon han pagpahiuli han ngatanan nga butang.” (Buh. 3:21) Kay ano nga nakasiring kita hito? Ano an nahitabo ha langit han 1914? Hi Jesu-Kristo ginhimo nga Mesianiko nga Hadi! Kay ano nga pagpahiuli ito? Tigamni nga hi Jehova nagsaad kan Hadi David nga an pagkahadi han iya tulin magpapabilin ha kadayonan. (1 Cron. 17:11-14) Ito nga pagkahadi temporaryo nga naundang han 607 B.C.E. han ginbungkag han mga taga-Babilonya an Jerusalem ngan gintapos an pagmando han mga hadi ha tulin ni David.

²⁴ Sugad nga “Anak han tawo,” hi Jesus tulin ni David salit hiya an nagin legal nga manurunod han pagkahadi ni David. (Mat. 1:1; 16:13-16; Luc. 1:32, 33) Han iginhatag ni Jehova kan Jesus an pagkahadi ha langit han 1914, nagtikang an “mga panahon han pagpahiuli han ngatanan nga butang”! Panahon na nga gamiton ni Jehova inin perpekto nga Hadi basi ipadayon an buruhaton ha pagpahiuli.

25, 26. (a) Kakan-o natapos an maiha nga pagkadistyero ha Babilonya nga Gamhanan, ngan kay ano nga nakasiring kita hito? (Kitaa liwat an kahon nga “Kay Ano nga 1919?”) (b) Ano an nagtikang matuman tikang han 1919?

 ²⁵ Usa han siyahan nga ginbuhat han Kristo sugad nga Hadi amo an pagbulig ha iya Amay ha pag-usisa han kahikayan ha putli nga pagsingba dinhi ha tuna. (Mal. 3:1-5) Sugad han igintagna ni Jesus ha iya ilustrasyon han trigo ngan mga banwa, maiha na nga imposible makita an kaibahan han trigo ha mga banwa​—han tinuod nga dinihogan nga mga Kristiano ha mga impostor. * Pero han 1914 inabot an panahon han pangani, ngan klaro na an kaibahan. Ha mga dekada antes hito, iginbubuhayhag na han magtinumanon nga Estudyante han Biblia an dagku nga sayop han Kakristianohan ngan nabulag na hiton maraot nga organisasyon. Panahon na ni Jehova nga bug-os nga ipahiuli hira. Salit temprano han 1919, pipira la ka tuig katapos magtikang an “panahon han pangani,” an katawohan han Dios bug-os nga igin-gawas ha pagkabihag ha Babilonya nga Gamhanan. (Mat. 13:30) Tapos na an pagkadistyero!

²⁶ Nagtikang mahitabo an mas daku nga katumanan han mga tagna ni Ezekiel mahitungod ha pagpahiuli, labaw pa gud ha naeksperyensyahan han katawohan han Dios ha naglabay. Tagdon naton kon paonan-o ito nahitabo ha lima nga saad nga aton ginhisgotan.

27. Paonan-o ginlimpyohan han Dios an iya katawohan tikang ha idolatriya?

²⁷ SAAD 1. Mawawara na an idolatriya ngan iba pa nga mangil-ad nga buhat nga konektado ha relihiyon. Ha ikatarapos han ika-19 ka siglo ngan ha tinikangan han ika-20, an magtinumanon nga Kristiano nagkakatirok na ngan nagtitikang pagbaya ha mga buhat han buwa nga relihiyon. An pagsingba ha Trinidad, pagtoo nga imortal an kalag han tawo, ngan an doktrina han naglalaga nga impyerno iginsalikway sugad nga diri-Kasuratanhon ngan tikang ha buwa nga relihiyon. An paggamit hin imahen ha pagsingba iginbuhayhag sugad nga idolatriya. Hinay-hinay nga nasantop liwat han katawohan han Dios nga idolatriya an paggamit han krus ha pagsingba.​—Ezek. 14:6.

28. Ha ano nga paagi iginpahiuli an katawohan han Dios ha ira tuna?

 ²⁸ SAAD 2. An katawohan han Dios ipapahiuli ha espirituwal nga tuna. Samtang ginbabayaan han magtinumanon nga Kristiano an Babiloniko nga relihiyon, nahingadto hira ha espirituwal nga tuna nga angay ha ira​—usa nga binendisyonan nga kahimtang diin diri na gud hira magugutom ha espirituwal. (Basaha an Ezekiel 34:13, 14.) Ha Kapitulo 19, hibabaroan pa naton nga ginbibendisyonan ni Jehova ito nga tuna hin waray kapariho nga kahuraan hin espirituwal nga pagkaon.​—Ezek. 11:17.

29. Paonan-o nag-uswag an pagsangyaw nga buruhaton han 1919?

²⁹ SAAD 3. Maghahalad utro ha halaran ni Jehova. Han siyahan nga siglo C.E., an mga Kristiano gintutdoan nga maghalad ha Dios, diri hin literal nga mga hayop, kondi hin mas birilhon nga mga regalo​—an ira mga pulong ha pagdayaw kan Jehova ngan pagsangyaw ha iba mahitungod ha iya. (Heb. 13:15) Ha mga siglo han pagkadistyero, waray organisado nga kahikayan han sugad nga paghalad.  Pero ha ikatarapos hito, an katawohan han Dios naghahalad na hin mga pagdayaw. Okupado hira ha pagsangyaw ngan malipayon nga nagdadayaw ha Dios ha ira mga katirok. Tikang han 1919, mas ginpabug-atan han “matinumanon ngan maaramon nga uripon” an pagsangyaw ngan gin-organisar ito hin maopay. (Mat. 24:45-47) Tungod hito, an halaran ni Jehova naglalapwas hin mga halad han nagtitikadamu pa gud nga magdarayaw han iya baraan nga ngaran!

30. Ano an ginbuhat ni Jesus basi maitagana an panginahanglan han iya katawohan hin mag-opay nga paraataman?

³⁰ SAAD 4. Tatanggalon an magraot nga paraataman. Ginsalbar han Kristo an katawohan han Dios tikang ha maglimbong ngan makikalugaringon nga buwa nga mga paraataman han Kakristianohan. Ha panon han Kristo, gintangtang an mga paraataman nga nagawi pariho ha ira. (Ezek. 20:38) Sugad nga Maopay nga Paraataman, ginsiguro ni Jesus nga naaataman an iya panon. Han 1919 gintokahan niya an iya matinumanon ngan maaramon nga uripon. Iton gutiay nga grupo han maunungon nga dinihogan nga mga Kristiano nanguna ha pagtagana hin espirituwal nga pagkaon, salit an katawohan han Dios naaataman gud. Ha urhi, an mga tigurang ginbansay nga bumulig ha pag-ataman ha “panon han Dios.” (1 Ped. 5:1, 2) An paghulagway ha Ezekiel 34:15, 16 agsob gamiton basi ipahinumdom ha Kristiano nga mga paraataman an suruklan ni Jehova nga Dios ngan ni Jesu-Kristo.

31. Paonan-o gintuman ni Jehova an tagna ha Ezekiel 11:19?

³¹ SAAD 5. Magkakaurosa an mga magsiringba ni Jehova. Ha paglabay han mga siglo, an Kakristianohan nagkabahin-bahin ha yinukot nga denominasyon, upod na an damu gud nga magkakontra nga mga grupo ngan sekta. Ha kabaliktaran, hi Jehova may milagroso nga ginbuhat ha iya iginpahiuli nga katawohan. Natuman gud an iya saad pinaagi kan Ezekiel: “Tatagan ko hira hin nagkakaurosa nga kasingkasing.” (Ezek. 11:19) Ha bug-os nga kalibotan, an Kristo may minilyon nga sumurunod nga iba-iba an gintikangan nga lahi, relihiyon, ngan kahimtang ha pinansyal ngan ha sosiedad. Pero an ngatanan gintututdoan han pariho nga mga kamatuoran ngan urosa nga nagbubuhat han pariho nga buruhaton. Ha ultimo nga gab-i han kinabuhi ni Jesus ha tuna, nanginyupo hiya ha iya Amay nga magkaurosa an iya mga sumurunod. (Basaha an Juan 17:11, 20-23.) Ha aton panahon, ginbabaton ito ni Jehova ha pinakamaopay nga paagi.

32. Ano an imo inaabat ha katumanan han mga tagna mahitungod ha pagpahiuli? (Kitaa liwat an kahon nga “Mga Tagna Mahitungod ha Pagkabihag Ngan Pagpahiuli.”)

³² Diri ka ba nalilipay nga mabuhi hinin eksayting nga panahon han pagpahiuli? Nakikita naton an katumanan han mga tagna ni Ezekiel ha ngatanan nga bahin han aton pagsingba. Makakasarig kita nga yana gin-uuyonan ni Jehova an iya katawohan, sugad han iya igintagna pinaagi kan Ezekiel: “Malilipay ako ha iyo.” (Ezek. 20:41) Nasasantop mo ba nga pribilehiyo gud nga magin bahin han nagkakaurosa ngan napapakaon hin maopay nga katawohan nga  nagdadayaw kan Jehova ha bug-os nga kalibotan​—an katawohan nga igin-gawas katapos han mga siglo nga kadistyero ha espirituwal? Pero an pipira nga tagna ni Ezekiel mahitungod ha pagpahiuli may mas daku pa nga katumanan.

33-35. (a) Ano an kahulogan han tagna ha Ezekiel 36:35 para ha Judio nga mga distyero? (b) Ano an kahulogan hito nga tagna para ha katawohan ni Jehova yana? (Kitaa liwat an kahon nga “An ‘mga Panahon han Pagpahiuli han Ngatanan nga Butang.’”)

³³ Aton hinbaroan nga an “mga panahon han pagpahiuli han ngatanan nga butang” nagtikang han iginpahiuli an pagkahadi ha tulin ni David han nahitrono hi Jesus han 1914. (Ezek. 37:24) Sunod, gintagan ni Jehova an Kristo hin gahum nga ipahiuli an putli nga pagsingba han Iya katawohan katapos han maiha gud nga kadistyero ha espirituwal. Natapos ba dida an pagpahiuli nga buruhaton han Kristo? Waray! Magpapadayon ito ha urusahon nga paagi ha tiarabot​—ngan an mga tagna ni Ezekiel naghahatag hin eksayting nga mga detalye.

³⁴ Pananglitan, tagda ini nga mga pulong: “An mga tawo masiring: ‘An binayaan nga tuna nagin pariho na han garden han Eden.’” (Ezek. 36:35) Ano an kahulogan hito nga saad para kan Ezekiel ngan ha iya mga igkasi-distyero? Sigurado nga waray hira maglaom hin bug-os ngan literal nga katumanan​—nga an iginpahiuli nga tuna bangin amo na an orihinal nga garden, o Paraiso, nga igintanom ni Jehova mismo! (Gen. 2:8) Lugod, sigurado nga nasabtan nira nga ginpapasarig hira ni Jehova nga an ira iginpahiuli nga tuna magigin makaruruyag ngan mabungahon.

³⁵ Ano an kahulogan ha aton hito nga saad? Diri kita naglalaom nga literal ito nga matutuman dinhi ha maraot nga kalibotan nga ginmamandoan ni Satanas nga Yawa. Lugod, nasasabtan naton nga may-ada ito espirituwal nga katumanan yana. Sugad nga mga alagad ni Jehova, naukoy kita ha iginpahiuli nga espirituwal nga tuna, usa nga kahimtang diin mabungahon an aton pag-alagad ngan an aton kinabuhi nakasentro ha pagsingba ha iya. Ini nga espirituwal nga tuna padayon nga nagigin mas makaruruyag sugad hin paraiso. Pero kumusta man ha tiarabot?

36, 37. Ano nga mga saad an matutuman ha tiarabot nga Paraiso?

³⁶ Kahuman han girra han Armagedon, ig-aapi ni Jesus ha iya pagpahiuli nga buruhaton an pisikal nga tuna. Ha iya Milenyo nga Pagmando, gigiyahan niya an katawohan nga himoon inin bug-os nga tuna nga garden han Eden​—usa nga paraiso—​uyon ha orihinal nga katuyoan ni Jehova! (Luc. 23:43) An ngatanan nga tawo magkakaurosa ngan hihigugmaon an planeta nga ira urukyan. Waray na peligro o tarhog ha bisan diin. Hunahunaa an panahon nga bisan ini nga saad matutuman: “Maghihimo ako ha ira hin kasabotan para ha kamurayawan, ngan wawad-on ko ha tuna an magpintas nga mga hayop, basi makaukoy hira nga may seguridad ha kamingawan ngan makakaturog ha mga kagurangan.”​—Ezek. 34:25.

 ³⁷ Naiimadyin mo ba ito? Makakakadto ka ha bisan diin hinin haluag nga tuna nga waray ginkakahadlokan. Waray hayop nga maglalabot ha imo. Waray peligro nga magwawara han imo kamurayawan. Makakapasyada ka nga nag-uusahan ha kasuoksuokan han kagurangan ngan mag-i-enjoy ha kahusay hito; makakakaturog ka pa ngani didto nga talwas gud, nakakasiguro nga magmamata ka nga maopay an pag-abat!

38. Ano an imo inaabat ha paglaom nga makita an katumanan han saad ha Ezekiel 28:26?

³⁸ Matutuman liwat ini nga saad: “Maukoy hira [ha tuna] nga may seguridad ngan magtutukod hira hin mga balay ngan magtatanom hin mga urubasan, ngan maukoy hira nga may seguridad kon magpadapat na ako hin paghukom ha ngatanan nga nakapalibot ha ira nga nagtatratar ha ira nga may panginsulto; ngan makikilala gud nira nga ako hi Jehova nga ira Dios.” (Ezek. 28:26) Kawara han ngatanan nga kaaway ni Jehova, magkakaada kita kamurayawan ngan seguridad ha bug-os nga tuna. Samtang gin-aataman an tuna, maaataman liwat naton an aton kalugaringon ngan an aton mga hinigugma; magtutukod kita hin komportable nga mga urukyan ngan magtatanom hin mga urubasan.

39. Kay ano nga makakasiguro ka nga matutuman an mga tagna ni Ezekiel mahitungod ha Paraiso?

³⁹ Para ha imo, inop la ba ini nga mga saad? Kon amo, hinumdumi an imo na nakita hini nga panahon han “pagpahiuli han ngatanan nga butang.” Bisan pa han duro gud nga pagkontra ni Satanas, gintagan hi Jesus hin gahum nga ipahiuli an putli nga pagsingba ha pinakamadulom nga panahon hini nga kalibotan. Marig-on gud ito nga ebidensya nga matutuman an ngatanan nga saad han Dios nga iginrekord ni Ezekiel!