1, 2. (a) Ano an iginsugo ni Jehova kan Ezekiel? (b) Ano nga mga pakiana an aton hihisgotan?

 NAKAKITA pa la hi Ezekiel hin bisyon nga sigurado nga nagpahinumdom ha iya han panahon ni Moises ngan ni Josue haros 900 ka tuig na an naglabay. Hito nga panahon, iginsumat ni Jehova kan Moises an mga tubtoban han Tuna nga Iginsaad ngan ha urhi iginsumat kan Josue kon paonan-o ito babahinbahinon ha mga tribo han Israel. (Num. 34:1-15; Jos. 13:7; 22:4, 9) Pero han 593 B.C.E., ginsugo ni Jehova hi Ezekiel ngan an iya mga igkasi-distyero nga bahin-bahinon utro an Tuna nga Iginsaad ha mga tribo han Israel!​—Ezek. 45:1; 47:14; 48:29.

² Ano an mensahe hini nga bisyon para kan Ezekiel ngan ha iya mga igkasi-distyero? Kay ano nga ini nga bisyon makapadasig ha katawohan han Dios yana? May mas daku ba ini nga katumanan ha tiarabot?

3, 4. (a) Ano an upat nga pasarig nga iginhatag han ultimo nga bisyon ni Ezekiel ha mga distyero? (b) Hini nga kapitulo, ano nga pasarig an aton uusisahon?

³ An ultimo nga bisyon nga nakarawat ni Ezekiel mababasa ha siyam nga kapitulo han iya libro. (Ezek. 40:1–48:35) Naghatag  ito ha mga distyero hin upat nga makalilipay nga pasarig mahitungod han napahiuli nga nasud han Israel. Ano ito nga mga pasarig? Siyahan, an putli nga pagsingba ipapahiuli ha templo han Dios. Ikaduha, pangungunahan han magtadong nga saserdote ngan mga paraataman an napahiuli nga nasud. Ikatulo, an ngatanan nga mabalik ha Israel tatagan hin tuna nga panurundon. Ngan ikaupat, hi Jehova makakaupod nira ngan maukoy utro ha butnga nira.

⁴ Ginhisgotan ha Kapitulo 13 ngan 14 hini nga publikasyon kon paonan-o matutuman an siyahan nga duha nga pasarig​—an pagpahiuli han tinuod nga pagsingba ngan an pagpanguna han magtadong nga paraataman. Hini nga kapitulo, magpupokus kita ha ikatulo nga pasarig, an saad nga an ngatanan makakapanunod hin tuna. Ha sunod nga kapitulo, hihisgotan naton an saad mahitungod han presensya ni Jehova.​—Ezek. 47:13-21; 48:1-7, 23-29.

5, 6. (a) Ha bisyon ni Ezekiel, ano nga teritoryo an ihahatag? (Kitaa an retrato ha tinikangan hini nga kapitulo.) (b) Ano an katuyoan han bisyon mahitungod han pagbahin-bahin han tuna?

⁵ Basaha an Ezekiel 47:14. Ha bisyon, iginpakita ni Jehova kan Ezekiel an usa nga tuna nga hirani na magin pariho han “garden han Eden.” (Ezek. 36:35) Katapos, hi Jehova nagsiring: “Ini an teritoryo nga iyo ihahatag ha 12 nga tribo han Israel sugad nga tuna nga panurundon.” (Ezek. 47:13) “An teritoryo” nga ihahatag amo an napahiuli nga tuna han Israel nga babalikan han mga distyero. Sunod, gindetalye ni Jehova an eksakto nga mga tubtoban hiton bug-os nga tuna, sugad han nakarekord ha Ezekiel 47:15-21.

⁶ Ano an katuyoan hini nga bisyon mahitungod han pagbahin-bahin han tuna? An paghulagway han mga tubtoban nga may eksakto nga sukol nagpasarig kan Ezekiel ngan ha iya mga igkasi-distyero nga ipapahiuli gud an ira hinigugma nga tuna. Imadyina an kalipay nga inabat han mga distyero tungod hiton detalyado ngan klaro nga pasarig ni Jehova! Nakakarawat gud ba hin tuna nga panurundon an katawohan han Dios ha kadaan nga panahon? Oo.

7. (a) Ano nga mga hitabo an nagtikang han 537 B.C.E., ngan ano an iginpapahinumdom hito ha aton? (b) Ano nga pakiana an babatunon anay naton?

⁷ Han 537 B.C.E., mga 56 ka tuig katapos makarawat ni Ezekiel an bisyon, yinukot nga distyero an nagtikang pagbalik ha tuna han Israel ngan pagtag-iya hito. Iton makatirigamnan nga mga hitabo nagpapahinumdom ha aton han puropariho nga nahitatabo ha katawohan han Dios ha moderno nga panahon. Sugad hin nakakarawat liwat hira hin malon nga tuna. Paonan-o? Gintugotan ni Jehova an iya mga alagad nga sumulod ha espirituwal nga tuna ngan pagtag-iyahon ito. Salit an pagpahiuli han kadaan nga Tuna nga Iginsaad may damu nga leksyon para ha aton mahitungod han pagpahiuli han espirituwal nga tuna han  katawohan han Dios yana. Pero antes naton ito hisgotan, batunon anay naton ini nga pakiana, “Kay ano nga makakasiring kita nga may naeksister gud yana nga espirituwal nga tuna?”

8. (a) Ano nga nasud an iginsaliwan ni Jehova ha literal nga nasud han Israel? (b) Ano an espirituwal nga tuna, o paraiso? (c) Kakan-o ito nagtikang pag-eksister, ngan hin-o an naukoy dida hito?

⁸ Ha nahiuna nga bisyon ni Ezekiel, iginpakita ni Jehova nga mahitatabo an mas daku nga katumanan han mga tagna mahitungod ha pagpahiuli han Israel kon an iya “surugoon nga hi David,” nga amo hi Jesu-Kristo, magmando na sugad nga Hadi. (Ezek. 37:24) Nahitabo ito han 1914 C.E. Hito nga panahon, an literal nga nasud han Israel maiha na nga ginsaliwnan sugad nga katawohan han Dios han espirituwal nga nasud han Israel, an dinihogan nga mga Kristiano. (Basaha an Mateo 21:43; 1 Pedro 2:9.) Pero diri la ito; ginsaliwnan liwat ni Jehova an literal nga tuna han Israel hin espirituwal nga tuna, o paraiso. (Isa. 66:8) Aton hinbaroan ha Kapitulo 17 nga an espirituwal nga tuna amo an kahimtang nga may seguridad ha espirituwal diin an mga dinihogan  nagsisingba kan Jehova tikang han 1919. (Kitaa an kahon 9B, “Kay Ano nga 1919?”) Paglabay han panahon, an “iba nga mga karnero,” nga may tunan-on nga paglaom, nagtikang liwat pag-ukoy hinin espirituwal nga tuna. (Juan 10:16) Padayon nga nag-uuswag ngan nagtitikahaluag yana an espirituwal nga paraiso, pero katapos pa han Armagedon bug-os nga mapapahimulosan an mga bendisyon hito.

9. Ano an detalyado nga sugo ni Jehova mahitungod han pagbahin-bahin han tuna?

⁹ Basaha an Ezekiel 48:1, 28. Katapos igsumat an mga tubtoban han tuna, gindetalye ni Jehova kon paonan-o ito babahinbahinon. Nagsugo hiya nga bahin-bahinon hin patas ngan eksakto an panurundon han 12 nga tribo tikang ha norte ngadto ha sur, tikang ha tribo han Dan ha norte nga kataposan ngadto ha tribo ni Gad ha sur nga tubtoban. An tagsa han 12 nga panurundon pahilaba an kasukol tikang ha este nga tubtoban ngadto ha Daku nga Dagat, o Dagat Mediteraneo, ha weste.​—Ezek. 47:20.

10. Ano nga mga pasarig ha mga distyero an posible nga naihatag hini nga bahin han bisyon?

¹⁰ Ano nga mga pasarig ha mga distyero an posible nga naihatag hini nga bahin han bisyon? An detalyado nga paghulagway ni Ezekiel han pagbahin-bahin han tuna sigurado nga nagtutdo ha ira nga magigin organisado gud ito nga proyekto. Dugang pa, ginpabug-atan han eksakto nga pagbahin-bahin han tuna ha 12 nga tribo nga an tagsa nga distyero nga mabalik magkakaada sigurado nga panurundon ha napahiuli nga tuna. Waray mabalik nga diri magkakaada tuna o urukyan.

11. Ano an makaparig-on nga mga leksyon han bisyon mahitungod han pagbahin-bahin han tuna? (Kitaa an kahon nga “An Pagbahin-bahin han Tuna.”)

¹¹ Ano an makaparig-on nga mga leksyon hini nga bisyon yana? Ha napahiuli nga Tuna nga Iginsaad, diri la an mga saserdote, mga Levita, ngan mga lider an may lugar kondi pati liwat an iba pa nga kaapi han 12 nga tribo. (Ezek. 45:4, 5, 7, 8) Yana liwat, ha espirituwal nga paraiso diri la an nabibilin nga mga dinihogan ngan an mga kaapi han “daku nga grupo” nga may responsabilidad ha pagpanguna an may lugar kondi pati liwat an iba pa nga kaapi han daku nga grupo. * (Pah. 7:9) Anoman kaguti an aton papel ha organisasyon, may-ada kita sigurado nga lugar ngan mapulsanon nga toka ha espirituwal nga tuna. Makalilipay gud ini nga pasarig!

12, 13. Ano an espisipiko nga instruksyon ni Jehova mahitungod han paghatag ha mga tribo hin mga bahín ha tuna?

¹² Bangin nawurok hi Ezekiel ha pipira nga instruksyon ni Jehova mahitungod han pagbahin-bahin han tuna kay iba ito ha Iya instruksyon kan Moises. Tagda an duha nga kaibahan. An usa parte ha tuna, ngan an usa parte ha mga umurukoy hito.

 ¹³ Siyahan, an tuna. Ginsugo hi Moises nga tagan hin mas daku nga tuna an mas dagku nga tribo kay han mas gudti nga tribo. (Num. 26:52-54) Pero ha bisyon ni Ezekiel, espisipiko nga nagsugo hi Jehova nga tagan an ngatanan nga tribo hin “parapriho nga bahín [“an kada tagsa pariho han iya bugto,” ftn.].” (Ezek. 47:14) Salit kinahanglan parapriho an sukol han bahín han tagsa han 12 nga tribo, tikang ha norte nga giutan ngadto ha sur nga giutan. An ngatanan nga Israelita​—anoman an ira tribo—​parapriho makakapahimulos han kahuraan han Tuna nga Iginsaad nga abunda hin tubig.

14. Kay ano nga an instruksyon ni Jehova mahitungod han dayo nga mga residente iba gud ha ginsiring ha Mosaiko nga Balaud?

¹⁴ Ikaduha, an mga umurukoy. Ginproteksyonan han Mosaiko nga Balaud an mga dayo ngan gintugotan hira nga makigbahin ha pagsingba kan Jehova, kondi waray hira bahín ha tuna. (Lev. 19:33, 34) Pero an iginsugo ni Jehova kan Ezekiel iba gud ha Iya ginsiring dida hito nga Balaud. Hi Jehova nagsugo ha iya: “An dayo nga residente sadang niyo tagan hin panurundon ha teritoryo han tribo diin hiya naukoy.” Pinaagi hito nga sugo, gintanggal ni Jehova an daku nga kaibahan han mga Israelita ngan han dayo nga mga residente ha ira tuna. (Ezek. 47:22, 23) Ha napahiuli  nga tuna nga nakita ni Ezekiel, naobserbaran niya ha mga umurukoy an pagkaparapriho ngan pagkaurosa ha pagsingba.​—Lev. 25:23.

15. Ano nga diri nababag-o nga kamatuoran mahitungod kan Jehova an ginpabug-atan han iya mga instruksyon parte ha tuna ngan ha mga umurukoy hito?

¹⁵ Iton duha nga naiiba nga instruksyon kan Ezekiel parte ha tuna ngan ha mga umurukoy hito sigurado nga nakapasarig ha mga distyero. Maaram hira nga tatagan hira ni Jehova hin parapriho nga bahín, Israelita man hira o dayo nga nagsisingba kan Jehova. (Ezra 8:20; Neh. 3:26; 7:6, 25; Isa. 56:3, 8) Ginpabug-atan liwat hito nga mga instruksyon an makaparig-on ngan diri nababag-o nga kamatuoran nga presyoso kan Jehova an ngatanan niya nga alagad. (Basaha an Hagai 2:7.) Yana, langitnon man o tunan-on an aton paglaom, gin-aapresyar naton ito nga kamatuoran.

16, 17. (a) Kay ano nga mapulsanon ha aton an paghisgot han mga detalye parte ha tuna ngan ha mga umurukoy hito? (b) Ano an aton hihisgotan ha sunod nga kapitulo?

¹⁶ Kay ano nga mapulsanon ha aton an paghisgot hini nga mga detalye parte ha tuna ngan ha mga umurukoy hito? Napapahinumdoman kita nga kinahanglan makita gud ha aton bug-os-kalibotan nga pagminagburugto yana an pagkaparapriho ngan pagkaurosa. Hi Jehova waray pinaurog. Angay naton pakianhan an aton kalugaringon: ‘Ginsusubad ko ba an pagin waray pinaurog ni Jehova? Sinsero ba nga ginrirespeto ko an akon igkasi-magsiringba, anoman an iya lahi o kahimtang ha kinabuhi?’ (Roma 12:10) Nalilipay gud kita nga hi Jehova naghatag ha aton ngatanan hin parapriho nga higayon nga magin bahin han espirituwal nga paraiso, diin bug-os-kalag nga naghahatag kita hin sagrado nga pag-alagad ha aton langitnon nga Amay ngan nagpapahimulos han iya mga bendisyon.​—Gal. 3:26-29; Pah. 7:9.

¹⁷ Hisgotan naton yana an ikaupat nga pasarig nga iginhatag han kataposan nga bahin han ultimo nga bisyon ni Ezekiel​—an saad nga hi Jehova makakaupod han mga distyero. Ano nga mga leksyon an igintututdo hito nga saad? Hibabaroan naton an baton ha sunod nga kapitulo.