1, 2. (a) Ano nga desisyon an kinahanglan naton himoon? (b) Ano an reaksyon han matinumanon nga anghel han sisingbahon na unta hiya?

 KINAHANGLAN batunon han tagsa ha aton inin importante nga pakiana: Hin-o an akon sisingbahon? Bangin damu an sumiring nga komplikado ini nga isyu ngan nakakawurok kon hin-o an pipilion. Pero an tinuod, klaro ngan simple an baton​—hi Jehova nga Dios an aton sisingbahon o hi Satanas nga Yawa.

² Karuyag gud ni Satanas nga singbahon hiya. Nagin klaro ito han ginsulay niya hi Jesus. Sugad han ginhisgotan ha Kapitulo 1, talagsahon an iya igintanyag kan Jesus​—awtoridad ha tanan nga ginhadian ha tuna. Ano an karuyag han Yawa nga kabalyo? “[Paghimo] hin usa nga buhat han pagsingba ha akon,” gin-aghat niya hi Jesus. (Mat. 4:9) Ha kabaliktaran, an anghel nga nagpakita han mga bisyon kan apostol Juan nagdumiri nga singbahon. (Basaha an Pahayag 22:8, 9.) Han nagsari hiya nga singbahon an anghel, iton mapainubsanon nga anak han Dios nagsiring: “Ayaw ito buhata!” Imbes nga magyakan, ‘Singbaha ako,’ an anghel nagsiring, “Singbaha an Dios.”

3. (a) Ano an katuyoan hini nga publikasyon? (b) Ano an aton hihisgotan yana?

³ Katuyoan hini nga publikasyon nga parig-unon an aton determinasyon  nga buhaton an iginsugo hito nga anghel​—hi Jehova nga Dios gud la an singbahon. (Deut. 10:20; Mat. 4:10) Repasuhon naton an aton hinbaroan mahitungod han putli nga pagsingba ha mga tagna ngan mga bisyon ni Ezekiel. Ngan ha bulig han Kasuratan, hisgotan naton an maabot nga panahon diin an tagsa nga tawo maatubang ha ultimo nga pagsari​—pagsari nga magigin basihan kon hin-o an mabubuhi basi makita an bug-os nga pagpahiuli han putli nga pagsingba kan Jehova ha kadayonan.

4. Ano an tulo nga tema nga ginpapabug-atan ha libro han Ezekiel?

⁴ Igintututdo han libro han Ezekiel nga an putli nga pagsingba diri pagbuhat hin mga rituwal. Nag-oobligar ito ha aton nga (1) ihatag kan Jehova an eksklusibo nga debosyon, (2) magpabilin nga nagkakaurosa ha limpyo nga pagsingba, ngan (3) magpakita hin gugma ha iba. Tigamni kon paonan-o an mga tagna ngan mga bisyon nga ginhisgotan hini nga publikasyon nagpapabug-at hinin tulo nga tema.

5-9. Ano an aton hinbaroan mahitungod han paghatag kan Jehova han eksklusibo nga debosyon?

⁵ Kapitulo 3: * An urusahon nga bisyon nga hi Jehova napapalibotan hin balangaw ngan aada ha igbaw han gamhanan nga espiritu nga mga linarang nagtututdo hin importante nga kamatuoran​—an Makagarahum-ha-ngatanan gud la an angay naton singbahon.​—Ezek. 1:4, 15-28.

⁶ Kapitulo 5: Makangingirhat gud makita an bisyon parte ha paghugaw han templo ni Jehova! Iginpapakita hito nga waray natatago kan Jehova. Nakikita niya an diri maunungon nga mga buhat, sugad han pagsingba han iya katawohan ha mga idolo, bisan kon diri ito nakikita han iba. Nasasakitan gud hiya ngan ginsisirotan an mga nagbubuhat hito.​—Ezek. 8:1-18.

⁷ Kapitulo 7: An mga paghukom kontra ha nakapalibot nga mga nasud nga ‘duro nga nagtamay’ ha Israel nagpapakita nga pababaydon ni Jehova adton nagmamaltrato han iya katawohan. (Ezek. 25:6) Pero may hinbaroan liwat kita ha pakig-upod han Israel hito nga mga nasud​—kinahanglan magin maunungon kita kan Jehova labaw ha ngatanan. Diri gud naton isasakripisyo an aton mga suruklan para la uyonan han mga paryente nga diri nagsisingba kan Jehova; diri liwat kita masarig ha karikohan o magkukompromiso han aton neutralidad pinaagi ha paghatag ha mga gobyerno han tawo han pagkamaunungon nga para gud la kan Jehova.

⁸ Kapitulo 13 ngan 14: Igintututdo han bisyon parte ha templo ha hitaas nga bukid nga kinahanglan sundon naton an higtaas nga  suruklan ni Jehova, ginkikilala nga labaw hiya ha ngatanan nga dios.​—Ezek. 40:1–48:35.

⁹ Kapitulo 15: An paghulagway han Israel ngan Juda sugad nga mga hostes nagpapahinumdom ha aton nga mangil-ad gud kan Jehova an espirituwal nga pag-adulteryo.​—Ezek., kap. 16, 23.

10-14. Paonan-o ginpabug-atan nga kinahanglan naton magpabilin nga nagkakaurosa ha limpyo nga pagsingba?

¹⁰ Kapitulo 8: An mga saad ni Jehova nga maghahatag hiya hin “usa nga paraataman” nga mag-aataman ha Iya katawohan nagpapabug-at nga kinahanglan magbuhat kita nga urosa ngan mamurayawon ilarom ha pagpanguna ni Jesus.​—Ezek. 34:23, 24; 37:24-28.

¹¹ Kapitulo 9: An mga tagna ni Ezekiel parte ha pagpagawas han katawohan han Dios ha pagkabihag ha Babilonya ngan pagpabalik ha ira ngadto ha ira tuna may mensahe para hadton naruruyag nga lipayon hi Jehova yana. An limpyo nga mga magsiringba ni Jehova kinahanglan bumulag ngan magpabilin nga bulag ha nakakahugaw nga impluwensya han buwa nga relihiyon. Bisan kon iba-iba an aton gintikangan nga relihiyon, kahimtang ha pinansyal, ngan lahi, kinahanglan tipigan naton an pagkaurosa nga nagpapakilala ha aton sugad nga katawohan han Dios.​—Ezek. 11:17, 18; 12:24; Juan 17:20-23.

¹² Kapitulo 10: An tema parte ha pagkaurosa ginpabug-atan ha bisyon parte ha uga nga mga tul-an nga nabuhi. Pribilehiyo gud naton nga magin bahin han napahiuli nga grupo han nalimpyohan nga mga magsiringba nga nagbubuhat nga urosa!​—Ezek. 37:1-14.

¹³ Kapitulo 12: Labi nga ginpabug-atan an pagkaurosa ha tagna parte ha duha nga istik nga nagin usa. Makaparig-on gud ha pagtoo nga makita nga natutuman ito ha mga dinihogan ngan iba nga mga karnero! Bisan kon naukoy kita ha kalibotan nga nagkakabahin-bahin tungod han relihiyon ngan politika, padayon kita nga nagkakaurosa tungod han gugma ngan pagkamaunungon.​—Ezek. 37:15-23.

¹⁴ Kapitulo 16: An bisyon parte ha lalaki nga may surudlan hin tinta ngan han mga lalaki nga may armas para ha pagdugmok may seryoso nga pahamangno​—adton nagpapabilin la nga putli nga mga magsiringba pag-abot han “daku nga kasakitan” an mamarkahan para ha katalwasan.​—Mat. 24:21; Ezek. 9:1-11.

15-18. Kay ano nga kinahanglan padayon nga ipakita naton an gugma, ngan paonan-o naton ito mahihimo?

¹⁵ Kapitulo 4: An bisyon parte ha upat nga buhi nga linarang nagtutdo ha aton han mga kalidad hi Jehova, nga an nangunguna amo an gugma. Kon mahigugmaon kita ha aton panyakan ngan panggios,  iginpapakita naton nga hi Jehova an aton Dios.​—Ezek. 1:5-14; 1 Juan 4:8.

¹⁶ Kapitulo 6 ngan 11: Tungod han gugma han Dios nagtoka hiya hin mga bantay, sugad kan Ezekiel. An Dios gugma, salit diri niya karuyag mabungkag an bisan hin-o kon tapuson na niya an pagmando ni Satanas ha tuna. (2 Ped. 3:9) Pribilehiyo naton nga ipakita an gugma han Dios pinaagi ha pagtuman han aton responsabilidad nga suportaran an buruhaton han moderno nga panahon nga bantay.​—Ezek. 33:1-9.

¹⁷ Kapitulo 17 ngan 18: Maaram hi Jehova nga damu an magdudumiri han iya kalooy ngan magsasari pagpoo ha iya maunungon nga mga magsiringba. Tungod han iya gugma, didepensahan niya an iya katawohan kon atakehon na hira ni “Gog ha tuna han Magog.” An aton gugma ha iba nag-aaghat ha aton nga pahamangnoan an mas damu pa nga bubungkagon ni Jehova adton nagtatalumpigos ha iya katawohan.​—Ezek. 38:1–39:20; 2 Tes. 1:6, 7.

¹⁸ Kapitulo 19, 20, ngan 21: An gugma ni Jehova ha katawohan klaro nga nakikita ha bisyon parte ha sapa nga naghahatag hin kinabuhi ngan ha pagbahin-bahin han tuna. Iginhuhulagway hito an resulta han pinakadaku nga pagpakita ni Jehova han iya gugma, an paghatag han kinabuhi han iya Anak basi mapasaylo kita ngan magkaada perpekto nga kinabuhi sugad nga bahin han iya pamilya. Usa han pinakamaopay nga pagpakita han aton gugma amo an pagsumat ha mga tawo han makalilipay nga kabubuwason nga igin-andam ni Jehova para hadton nagpapakita hin pagtoo ha iya Anak.​—Ezek. 45:1-7; 47:1–48:35; Pah. 21:1-4; 22:17.

19. Ano an bubuhaton ni Jesus ha Milenyo nga Pagmando? (Kitaa an kahon nga “Pag-atubang ha Ultimo nga Pagsari.”)

¹⁹ Ha Milenyo nga Pagmando, babanhawon ni Jesus an binilyon nga tawo ngan wawad-on an kasakit nga dara han aton “kaaway, an kamatayon.” (1 Cor. 15:26; Mar. 5:38-42; Buh. 24:15) An kasaysayan han tawo puno hin kasubo ngan trahedya. Pero kon banhawon na an tagsa nga henerasyon, paparaon ni Jesus an ira makasurubo nga naglabay ngan tatagan hira hin higayon nga magkaada makalilipay nga istorya ha kinabuhi. Pinaagi han halad-lukat, kukuhaon niya an ngatanan nga epekto han sakit, girra, ngan gutom. Labaw pa hito, bubuligan kita niya nga wad-on an surok han aton kasubo​—an sala nga napanunod naton kan Adan. (Roma 5:18, 19) Bug-os nga ‘wawad-on [ni Jesus] an mga buhat han Yawa.’ (1 Juan 3:8) Ano an sunod nga mahitatabo?

20. Paonan-o hi Jesus ngan an 144,000 magpapakita hin makatirigamnan nga pagpaubos? Isaysay. (Kitaa an retrato ha tinikangan hini nga kapitulo.)

²⁰ Basaha an 1 Corinto 15:24-28. Kon perpekto na an ngatanan nga tawo, kon an tuna Paraiso na sugad han orihinal nga katuyoan ni Jehova, hi Jesus ngan an 144,000 nga iya igkasi-magmarando  magpapakita hin makatirigamnan nga pagpaubos; ira ig-iintrigo kan Jehova an Ginhadian. Kinaburut-on ngan mamurayawon nga itutubyan nira an awtoridad nga nakada ha ira ha sulod han 1,000 ka tuig. An ngatanan nga nahimo han Ginhadian magpapadayon ha waray kataposan.

21, 22. (a) Ano an magigin kahimtang han kalibotan ha kataposan han 1,000 ka tuig? (b) Kay ano nga bubuhian ni Jehova hi Satanas ngan an mga demonyo?

²¹ Katapos, may bubuhaton hi Jehova nga urusahon gud, nga magpapakita han iya daku nga pagsarig ha iya mga sakop ha tuna. Magsusugo hiya nga buhian hi Satanas ngan an mga demonyo tikang ha kahiladman diin ginpriso hira hin 1,000 ka tuig. (Basaha an Pahayag 20:1-3.) An kalibotan nga ira makikita iba gud ha kalibotan nga ira nahiaraan. Antes han Armagedon, an kadam-an nga tawo nalimbongan ni Satanas ngan nagkabahin-bahin an katawohan tungod han kangalas ngan diskriminasyon. (Pah. 12:9) Pero ha kataposan han 1,000 ka tuig, an ngatanan nga tawo nagsisingba na  kan Jehova sugad nga pamilya nga nagkakaurosa ngan naghihigugmaay. An tuna magigin murayaw nga Paraiso.

²² Kay ano nga bubuhian ni Jehova an mga kriminal nga hi Satanas ngan an mga demonyo ngada hinin malimpyo nga palibot? Kay an kadam-an han mga buhi ha kataposan han 1,000 ka tuig waray pa masarihi an pagkamaunungon sugad nga mga magsiringba ni Jehova. Kadam-an ha ira an namatay nga waray makakilala ha iya ngan ginbanhaw ha Paraiso. Naghatag hiya ha ira hin kinabuhi ngan han ngatanan nira nga panginahanglan ha pisikal ngan espirituwal. Waray maraot nga impluwensya ha ira, puro la maopay. Napapalibotan hira hin mga tawo nga nahigugma ngan nag-aalagad kan Jehova. Mahimo hira akusaran ni Satanas han iya igin-akusar kan Job​—nga nag-aalagad la hira ha Dios kay ginpapanalipdan ngan ginbibendisyonan niya hira. (Job 1:9, 10) Salit antes igsurat ni Jehova hin permanente an aton ngaran ha libro han kinabuhi, tatagan niya  kita hin higayon nga bug-os nga pamatud-an nga maunungon kita ha iya sugad nga aton Amay ngan Soberano.​—Pah. 20:12, 15.

23. Ano nga isyu an aatubangon han tagsa nga tawo?

²³ Tatagan hi Satanas hin halipot nga higayon nga sulayon an katawohan nga bumaya ha pag-alagad ha Dios. Ano ito nga pagsari? Sigurado nga an tagsa nga tawo maatubang hin isyu nga puropariho han gin-atubang nira Adan ngan Eva​—karawaton an mga suruklan ni Jehova, suportaran an iya pagmando, ngan singbahon hiya o magrebelde ha Dios ngan suportaran hi Satanas.

24. Kay ano nga an mga magrirebelde gintatawag nga Gog ngan Magog?

²⁴ Basaha an Pahayag 20:7-10. Makatirigamnan nga an mga magrirebelde ha kataposan han 1,000 ka tuig gintatawag nga Gog ngan Magog. An ira mga kinaiya puropariho han iginpakita han mga rebelde nga igintagna ni Ezekiel nga maatake ha katawohan han Dios ha daku nga kasakitan. Iton una nga grupo, hi “Gog ha tuna han Magog,” ginkukompwesto han mga nasud nga nakontra ha pagmando ni Jehova. (Ezek. 38:2) Ha pariho nga paagi, an mga magrirebelde ha kataposan han Milenyo nga Pagmando han Kristo gintatawag nga “mga nasud.” Makapainteres gud ini. Kay ano? Kay ha Milenyo nga Pagmando, ginwara na an iba-iba nga nasud; an tanan  nga tawo magigin sakop han usa nga gobyerno, an Ginhadian han Dios. Magigin usa na la kita nga espirituwal nga nasud. Ha pagtawag ha mga rebelde nga Gog ngan Magog ngan pagsiring nga “mga nasud” hira, iginpapakita han tagna nga maglalampos hi Satanas ha pagpahinabo nga magkabahin-bahin an pipira han katawohan han Dios. Waray bisan hin-o nga pipiriton nga dumapig kan Satanas. An tagsa nga perpekto nga tawo an magdidesisyon.

25, 26. Pira kadamu an madapig kan Satanas, ngan ano an mahitatabo ha ira?

²⁵ Pira kadamu an madapig kan Satanas? An ira kadamu “pariho han mga baras ha dagat.” Diri man ini nagpapasabot nga magrirebelde an kadam-an han katawohan. Kay ano nga nakasiring kita hito? Hunahunaa an iginsaad kan Abraham. Hi Jehova nagsiring nga an tulin ni Abraham magigin “sugad kadamu han mga baras ha baybayon.” (Gen. 22:17, 18) Pero an iya tulin ginkompwesto la hin 144,001 nga indibiduwal. (Gal. 3:16, 29) Bisan kon damu ito, gutiay la ito kon ikompara ha kabug-osan nga kadamu han mga tawo. Ha pariho nga paagi, bisan kon damu an dumapig kan Satanas, diri hira magigin sobra kadamu. An mga rebelde diri magigin daku nga tarhog ha maunungon nga mga alagad ni Jehova.

 ²⁶ Adton maapi ha pagrebelde bubungkagon dayon. Kaupod ni Satanas ngan han mga demonyo, diri na hira maeksister, ngan waray na gud paglaom nga mabuhi utro. An mahinunumdoman na la ha kadayonan amo an ira magraot nga desisyon ngan an mga resulta hito.​—Pah. 20:10.

27-29. Ano an malalaoman han mga makakapasar ha ultimo nga pagsari?

²⁷ Ha luyo nga bahin, an mga ngaran hadton makakapasar ha ultimo nga pagsari permanente nga isusurat ha “libro han kinabuhi.” (Pah. 20:15) Katapos, sugad nga nagkakaurosa nga pamilya, an ngatanan nga maunungon nga anak ni Jehova maghahatag ha iya han pagsingba nga para gud la ha iya.

²⁸ Hunahunaa ito nga kabubuwason. Magkakaada ka hin mapulsanon nga buruhaton ngan mag-opay nga kasangkayan. Ikaw ngan an imo mga hinigugma diri na gud mag-aantos. Diri mo na pagkikinahanglanon an halad-lukat ni Jesus basi magin matadong ha atubangan ni Jehova. Waray na makakaulang ha tagsa nga tawo ha pakigsangkay ha Dios. Labaw ha ngatanan, an putli nga pagsingba perpekto na nga bubuhaton ha langit ngan ha tuna. Bug-os gud ito nga pagpahiuli han putli nga pagsingba!

²⁹ Aadto ka ba basi makita iton makalilipay nga panahon? Mahingangadto ka kon padayon nga iaplikar mo an tulo nga importante nga leksyon ha libro han Ezekiel​—ihatag kan Jehova an eksklusibo  nga debosyon, magpabilin nga nagkakaurosa ha limpyo nga pagsingba, ngan magpakita hin gugma ha iba. An mga tagna ni Ezekiel may ultimo ngan importante nga leksyon. Ano ito?

30, 31. Ano an magigin kahulogan han deklarasyon nga “makikilala gud nira nga ako hi Jehova” (a) ha mga kaaway han Dios? (b) ha katawohan han Dios?

³⁰ Ha bug-os nga libro han Ezekiel, pauroutro nga mababasa an deklarasyon nga “makikilala gud nira nga ako hi Jehova.” (Ezek. 6:10; 39:28) Para ha mga kaaway han Dios, mangangahulogan ito hin girra ngan kamatayon. Diri la kay mapipiritan hira nga karawaton nga naeksister hi Jehova. Hibabaroan liwat nira ha makuri nga paagi an kahulogan han iya harangdon nga ngaran​—“Hiya Nagpapahinabo nga Magin.” Hi “Jehova han mga hugpo” magigin “gamhanan nga girriro” nga makikig-away ha ira. (1 Sam. 17:45; Ex. 15:3) Urhi na nga masasabtan nira an importante nga kamatuoran mahitungod kan Jehova: Waray makakapugong ha iya ha pagtuman han iya katuyoan.

³¹ Para ha katawohan han Dios, an deklarasyon nga “makikilala gud nira nga ako hi Jehova” mangangahulogan hin kamurayawan ngan kinabuhi. Pahihinaboon ni Jehova an iya orihinal nga katuyoan para ha aton​—magin mga anak nga perpekto nga nagpapakita han iya mga kalidad. (Gen. 1:26) Hi Jehova mahigugmaon na nga Amay ngan nagpapanalipod nga Paraataman ha aton. Diri mag-iiha, hiya magigin aton madaugon nga Hadi. Antes ito umabot, pamurubuuton gud naton an mensahe ni Ezekiel. Kada adlaw, pamatud-an naton ha pulong ngan buhat nga kilala naton hi Jehova ngan kon ano nga klase hiya nga Dios. Katapos, kon buhian na an nakakabungkag nga mga hangin han daku nga kasakitan, diri kita mahahadlok. Lugod, mahangad kita, kay maaram kita nga an aton katalwasan hirani na. (Luc. 21:28) Samtang waray pa ito, hinaot buligan naton an mga tawo ha bisan diin nga makilala ngan higugmaon an amo la nga Dios nga angay singbahon, an Dios nga may pinakaharangdon nga ngaran​—hi Jehova.​—Ezek. 28:26.