1, 2. Sumala ha Ezekiel 47:1-12, ano an nakita ngan nahibaroan ni Ezekiel? (Kitaa an retrato hini nga pahina.)

 MAY NAKITA na liwat hi Ezekiel nga urusahon ha iya bisyon mahitungod han templo: Usa nga sapa an naawas tikang ha sagrado nga istraktura! Imadyina hiya nga nagsusubay han gin-aagian hiton matin-aw gud nga tubig. (Basaha an Ezekiel 47:1-12.) Naawas ito tikang ha purtahan han santuaryo; katapos, nagawas ito ha templo hirani ha este nga ganghaan. Gindara hi Ezekiel han anghel pahirayo ha templo, nga ginsusukol an distansya samtang naglalakat hira. Pauroutro nga ginpatabok niya hi Ezekiel ha tubig, ngan naobserbaran han propeta nga madagmit ito magtikahilarom ngan ha urhi nagin salog nga matatabok la kon languyon niya!

² Hinbaroan ni Ezekiel nga an salog naagos ha Dagat nga Patay ngan nakakatambal han maasin ngan waray kinabuhi nga katubigan hito ha mga bahin nga naaabot han tubig han salog, salit nagkakaada ito damu nga isda. Ngan nakita niya an ngatanan nga klase han kahoy nga nanunubo ha mga ligid han salog. Kada bulan, namumunga ito hin masustansya nga mga prutas ngan nananaringsing hin mga dahon nga nakakatambal. Sigurado nga napuno an  kasingkasing ni Ezekiel hin kamurayawan ngan paglaom han nakita niya ini ngatanan. Pero ano an kahulogan hini para ha iya ngan ha iya mga igkasi-distyero? Ngan ano an kahulogan hini para ha aton yana?

3. Kay ano nga waray hunahunaa han mga Judio hadto nga literal an salog ha bisyon ni Ezekiel?

³ Sigurado nga waray hunahunaa han mga Judio hadto nga literal an salog ha bisyon. Lugod, ini nga asoy posible nga nagpahinumdom ha ira han usa pa nga tagna mahitungod han pagpahiuli, nga iginrekord ni propeta Joel bangin sobra duha ka siglo antes pa hito. (Basaha an Joel 3:18.) Han nabasa han mga Judio nga distyero an iya tagna, waray hira maghunahuna nga an kabukiran literal nga “magtuturo hin matam-is nga bino” o an kabungtoran “mag-aawas hin gatas”; waray liwat hira maghunahuna nga may burabod nga maawas “tikang ha balay ni Jehova.” Salit posible nga nasantop liwat nira nga diri literal an salog ha bisyon ni Ezekiel. * Kon sugad, ano an iginpapasabot ni Jehova? An Kasuratan nabulig ha aton nga masabtan an kahulogan han pipira nga bahin hini nga bisyon. Pero ha kabug-osan, hihisgotan naton an tulo nga klaro ngan mahigugmaon nga pasarig nga aton hibabaroan hini nga asoy.

4. (a) Ano nga mga bendisyon ni Jehova an posible nga ginlaoman han mga Judio tungod han salog ha bisyon ni Ezekiel? (b) Paonan-o an paggamit han Biblia han mga pulong nga “salog” ngan “tubig” nagpapasarig ha aton nga bibendisyonan ni Jehova an iya katawohan? (Kitaa an kahon nga “Mga Salog han mga Bendisyon ni Jehova.”)

⁴ Salog han mga bendisyon. Ha Biblia, an salog ngan tubig agsob maghulagway han pag-agos han mga bendisyon ni Jehova nga naghahatag hin kinabuhi. Sugad hito an nakita ni Ezekiel nga salog nga naagos tikang ha templo, salit an bisyon posible nga nakaaghat ha katawohan ni Jehova nga maglaom nga maagos ha ira an iya espirituwal nga mga bendisyon nga naghahatag hin kinabuhi kon magpabilin hira ha putli nga pagsingba. Ano nga mga bendisyon? Makakakarawat na liwat hira hin espirituwal nga instruksyon ha mga saserdote. Ngan tungod kay maghahalad utro ha templo, makakasarig hira nga mapapara an ira mga sala. (Ezek. 44:15, 23; 45:17) Salit magigin limpyo na liwat hira, nga sugad hin ginhugasan ha malimpyo nga tubig tikang ha templo.

5. Paonan-o ginwara han bisyon mahitungod han salog an mga kabaraka kon pirme ba magkakaada igo nga bendisyon para ha ngatanan?

⁵ Pirme daw la magkakaada igo nga bendisyon para ha ngatanan? Ginwara han bisyon an sugad nga kabaraka pinaagi ha pagpakita han milagroso nga paghaluag han katubigan​—an sapa nagin salog pag-abot la hin mga dos kilometros! (Ezek. 47:3-5) Magtikadaku man an populasyon ha napahiuli nga tuna han mga Judio, magtitikadamu liwat an bendisyon ni Jehova basi maihatag an ira panginahanglan. An salog naghuhulagway hin kahuraan!

6. (a) Ano an iginpapasarig han bisyon? (b) Ano liwat an iginpapahamangno han bisyon? (Kitaa an footnote.)

⁶ Tubig nga naghahatag hin kinabuhi. Ha bisyon ni Ezekiel, an salog naagos ha Dagat nga Patay ngan nagbubuhi ha daku nga bahin hito. Tigamni nga tungod han salog nagkaada damu nga klase hin isda nga pariho han makikita ha Daku nga Dagat, o Dagat Mediteraneo.  Nagkaada pa ngani mainuswagon nga mga negosyo han pangisda ha ligid han Dagat nga Patay butnga han duha nga bungto nga posible hirayo ha usa kag usa. An anghel nagsiring: “An ngatanan mabubuhi diin man umagos an salog.” Pero an tubig ba tikang ha balay ni Jehova nakaabot ha ngatanan nga bahin han Dagat nga Patay? Waray. Iginsaysay han anghel nga may hanangon nga mga dapit nga waray maabot han tubig nga naghahatag hin kinabuhi. Ito nga mga lugar ‘igintubyan ha asin.’ * (Ezek. 47:8-11) Salit an bisyon nagpapasarig nga ipapahiuli han putli nga pagsingba an katawohan, ngan mag-uuswag hira. Pero nagpapahamangno liwat ito: Diri ngatanan makarawat han mga bendisyon ni Jehova; diri liwat ngatanan matatambal.

7. Ano nga pasarig an iginhatag ha nadistyero nga mga Judio han mga kahoy ha mga ligid han salog?

⁷ Mga kahoy nga naghahatag hin pagkaon ngan pagtambal. Kumusta man an mga kahoy ha mga ligid han salog? Mas napapatahom hini an bisyon, diri ba? Nakakadugang liwat ini ha kahulogan hito. Sigurado nga nalipay hi Ezekiel ngan an iya mga igkasi-Judio ha paghunahuna han magigin bunga hini nga mga kahoy, magrasa nga prutas kada bulan! Iton makaruruyag nga paghulagway dugang nga nagpasarig ha ira nga pakakaunon hira ni Jehova ha espirituwal. Ngan ano pa? Tigamni nga “magigin tambal” an mga dahon hini. (Ezek. 47:12) Maaram hi Jehova nga espirituwal nga pagtambal an labi nga ginkikinahanglan han mabalik nga mga distyero, ngan nagsaad hiya nga itatagana ito. Ginhisgotan ha iba nga mga tagna mahitungod han pagpahiuli kon paonan-o niya ito ginbuhat, sugad han aton hinbaroan ha Kapitulo 9.

8. Kay ano nga makakasiring kita nga an bisyon ni Ezekiel may mas daku nga katumanan?

⁸ Pero aton liwat nahisgotan ha Kapitulo 9 nga ito nga mga tagna waray matuman hin bug-os ha binalik nga mga distyero. Tungod ito ha ira mismo. Paonan-o man hira bug-os nga bibendisyonan ni Jehova kon an kadam-an ha ira nabalik ha pagbuhat hin maraot, diri masinugtanon, ngan nagpapasibaya han putli nga pagsingba? Nasubo gud an mga matinumanon tungod han panggawi han ira mga igkasi-Judio. Pero maaram an maunungon nga mga magsiringba ni Jehova nga an iya mga saad diri gud napapakyas; pirme ito natutuman. (Basaha an Josue 23:14.) Salit an bisyon ni Ezekiel may mas daku nga katumanan. Pero san-o?

9. San-o an mas daku nga katumanan han bisyon ni Ezekiel mahitungod han templo?

⁹ Ha Kapitulo 14, aton hinbaroan nga an bisyon ni Ezekiel mahitungod han templo may mas daku nga katumanan “ha ultimo nga bahin han mga adlaw,” diin an putli nga pagsingba mas ginpapahitaas labaw kay ha kakan-o pa man. (Isa. 2:2) Paonan-o natutuman yana ini nga bahin han bisyon?

10, 11. (a) Ano nga mga bendisyon nga pariho hin salog an naagos ha aton yana? (b) Paonan-o nagtitikahaluag an agos han mga bendisyon ni Jehova basi maihatag an nagtitikadaku nga panginahanglan ha kataposan nga mga adlaw?

¹⁰ Salog han mga bendisyon. Ano nga mga bendisyon yana an iginpapahinumdom han tubig nga naagos tikang ha balay ni Jehova?  Iginpapahinumdom hito an tanan nga nakakapahimsog ha aton ha espirituwal. An nangunguna hito amo an halad-lukat han Kristo nga may gahum ha paglimpyo, salit nagin posible nga mapasaylo an aton mga sala. An mga kamatuoran ha Pulong han Dios iginpariho liwat ha tubig nga nakakalimpyo ngan naghahatag hin kinabuhi. (Efe. 5:25-27) Paonan-o naagos ito nga mga bendisyon ha aton panahon?

¹¹ Han 1919 pipira ka yukot la an mga alagad ni Jehova, ngan nalipay gud hira ha pagkarawat han espirituwal nga pagkaon nga ira ginkikinahanglan. Han sumunod nga mga dekada, padayon hira nga nagtikadamu. Yana, sobra walo ka milyon na an katawohan han Dios. Nagin masulog ba an agos han limpyo nga tubig han kamatuoran? Oo! Damu gud nga kamatuoran ha Biblia an iginsasaysay ha aton. Binilyon nga Biblia, libro, magasin, brosyur, ngan tract an inagos ha katawohan han Dios ha naglabay nga siglo. Pariho han salog nga nakita ni Ezekiel, an agos han mga kamatuoran madagmit nga nagtitikahaluag basi maihatag an nagtitikadaku nga panginahanglan han mga tawo nga uhaw ha espirituwal ha bug-os nga kalibotan. Maiha na nga mababasa an inimprinta nga mga publikasyon nga basado ha Biblia. Ngan yana, pinaagi han website nga jw.org, ito nga mga publikasyon available na ha sobra 900 nga yinaknan! Ano an epekto hito ha sinsero nga mga tawo?

12. (a) Paonan-o an mensahe han kamatuoran naghahatag hin kinabuhi ngan espirituwal nga kahimsog ha mga tawo? (b) Ano an napapanahon nga pahamangno han bisyon? (Kitaa liwat an footnote.)

¹² Tubig nga naghahatag hin kinabuhi. Ginsidngan hi Ezekiel: “An ngatanan mabubuhi diin man umagos an salog.” Hunahunaa kon paonan-o an mga kamatuoran ha Biblia naagos ha tanan nga nasulod ha aton iginpahiuli nga espirituwal nga tuna. Naghahatag ito hin kinabuhi ngan espirituwal nga kahimsog ha minilyon nga makinarawaton an kasingkasing. Pero may napapanahon liwat nga pahamangno an bisyon: Diri ngatanan padayon nga nakarawat han kamatuoran. Pariho han hanangon nga mga dapit han Dagat nga Patay ha bisyon, an iba diri na nagigin makinarawaton; nadiri hira pag-aplikar han kamatuoran. * Hinaot diri ito mahitabo ha aton!​—Basaha an Deuteronomio 10:16-18.

13. Ano an mga leksyon para ha aton han mga kahoy ha bisyon?

¹³ Mga kahoy nga naghahatag hin pagkaon ngan pagtambal. May makapadasig ba nga mga leksyon para ha aton an mga kahoy ha mga ligid han salog? May-ada! Hinumdumi nga namumunga ito hin magrasa nga prutas kada bulan, ngan an mga dahon hito nakakatambal. (Ezek. 47:12) Salit nagpapahinumdom ito nga nag-aalagad kita ha Dios nga hura nga nagpapakaon ha aton ngan nagtatagana han pinakaimportante nga pagtambal​—ha espirituwal. An kalibotan yana masakiton ngan gutom ha espirituwal. Pero hunahunaa an igintatagana ni Jehova. Pananglitan, katapos mo magbasa hin artikulo ha aton magasin, magkanta han ultimo nga kanta ha asembleya o kombensyon, o magkita han usa han aton mga video, inabat  mo ba nga bendisyon gud an pagkaada hito nga espirituwal nga pagkaon? Ginpapakaon gud kita hin maopay. (Isa. 65:13, 14) Nagpaparig-on ba han pagtoo an aton espirituwal nga pagkaon? An maopay nga sagdon nga aton nakakarawat, nga basado gud ha Pulong han Dios, nabulig ha aton nga malikyan an mga sala sugad han imoralidad, kahakog, ngan kawaray-pagtoo. May kahikayan liwat hi Jehova nga buligan an mga Kristiano nga matambal ha espirituwal nga sakit nga resulta han seryoso nga sala. (Basaha an Santiago 5:14.) Ginbibendisyonan gud kita, sugad han iginpapasabot han mga kahoy ha bisyon.

14, 15. (a) Ano an aton mahibabaroan ha hanangon nga mga lugar nga waray matambal? (b) Paonan-o kita nagpapahimulos ha salog nga nakita ni Ezekiel ha bisyon?

¹⁴ May mahibabaroan liwat kita ha hanangon nga mga lugar nga waray matambal. Diri gud naton karuyag pugngan an pag-agos han mga bendisyon ni Jehova ha aton kinabuhi. Delikado kon diri kita matambal, pariho han damu nga tawo hinin masakiton nga kalibotan. (Mat. 13:15) Lugod, nalilipay kita pagpahimulos ha salog han mga bendisyon. Kon malipayon nga nainom kita han limpyo nga tubig han kamatuoran ha Pulong han Dios, kon iginsasangyaw naton ha iba ito nga mga kamatuoran, kon mahigugmaon kita nga gin-gigiyahan, ginliliaw, ngan ginbubuligan han mga tigurang nga ginbansay han matinumanon nga uripon, bangin mahunahuna naton an salog ha bisyon ni Ezekiel. An salog nagsusustinir han kinabuhi ngan nakakatambal diin man ito naagos!

¹⁵ Pero ano an katumanan hini nga salog ha maabot nga panahon? Sugad han aton hibabaroan, an pinakamakusog nga pag-agos hini mahitatabo ha Paraiso.

16, 17. (a) Ha ano nga paagi an tubig han kinabuhi magigin mas haluag gud ha Paraiso? (b) Paonan-o kita magpapahimulos ha salog han mga bendisyon ha Paraiso?

¹⁶ Naiimadyin mo ba nga aadto ka ha Paraiso, upod an imo kasangkayan ngan kapamilya, ngan nag-i-enjoy gud ha kinabuhi? Magigin mas klaro ha imo ito nga paglaom kon pag-adman mo an bisyon mahitungod han salog. Kay ano? Hisgotan naton utro an tulo nga matin-aw ngan mahigugmaon nga bahin han bisyon.

¹⁷ Salog han mga bendisyon. An simboliko nga salog masisiring nga magigin mas haluag gud ha Paraiso, kay an mga kapulsanan hito diri la espirituwal kondi pisikal liwat. Ha Milenyo nga Pagmando ni Jesus, bubuligan han Ginhadian han Dios an mga matinumanon nga magpahimulos pa gud ha lukat. Hinay-hinay nga magigin perpekto hira! Waray na sakit, doktor, nars, hospital, ngan health insurance! An tubig han kinabuhi maagos ha minilyon nga maluluwas ha Armagedon, “usa nga daku nga grupo” nga makakatalwas ha “daku nga kasakitan.” (Pah. 7:9, 14) Pero iton makusog nga pag-agos han mga bendisyon gutiay la kon ikukompara ha mahitatabo ha urhi. Pariho han nakita ni Ezekiel, an salog maghahaluag basi maihatag an mas daku nga panginahanglan han mga tawo.

18. Ha ano nga paagi magigin mas masulog pa gud an “salog han tubig han kinabuhi” ha Milenyo?

 ¹⁸ Tubig nga naghahatag hin kinabuhi. Ha Milenyo, magigin mas masulog pa gud an “salog han tubig han kinabuhi.” (Pah. 22:1) Minilyon, binilyon pa ngani, an babanhawon ngan tatagan hin higayon nga mabuhi ha waray kataposan ha Paraiso! Upod han mga bendisyon ni Jehova pinaagi han Ginhadian an pagbuhi ha damu gud nga patay, mga tawo nga maiha na nga nagin tapotapo. (Isa. 26:19) Pero an tanan ba nga babanhawon mabubuhi ha waray kataposan?

19. (a) Ano an nagpapakita nga may bag-o nga tubig han kamatuoran tikang ha Dios nga makakarawat ha Paraiso? (b) Ha ano nga paagi an iba ‘igtutubyan ha asin’?

¹⁹ An kada tagsa kinahanglan magpili. Hito nga panahon, may bag-o nga mga linukot nga basahon nga aabrihan. Salit upod ha nakakarepresko nga tubig tikang kan Jehova an mga kamatuoran nga igpapahayag pa la, bag-o nga mga instruksyon. Diri ba makalilipay gud ito? Pero may mga magdudumiri hito nga bendisyon; pipilion nira nga diri sumugot kan Jehova. May mga tawo nga bangin magrebelde ha panahon han Milenyo, pero diri hira tutugotan nga makasamok ha Paraiso. (Isa. 65:20) Bangin mahinumdoman naton an bisyon ni Ezekiel ngan an hanangon nga mga lugar nga waray matambal, ‘igintubyan ha asin.’ Lurong gud adton madiri pag-inom han presyoso nga tubig han kinabuhi! Katapos han Milenyo, may grupo hin mga rebelde nga madapig kan Satanas. An  ngatanan nga nagsasalikway han matadong nga pagmando ni Jehova uusa la an dadangatan: kamatayon ha kadayonan.​—Pah. 20:7-12.

20. Ano nga kahikayan para ha aton kapulsanan ha Milenyo an nagpapahinumdom ha aton han mga kahoy nga nakita ni Ezekiel?

²⁰ Mga kahoy nga naghahatag hin pagkaon ngan pagtambal. Diri karuyag ni Jehova nga may bisan hin-o ha aton nga diri makakarawat han kinabuhi nga waray kataposan. Basi buligan kita nga diri mawad-an hito nga higayon nga iya iginhahatag, sisiguruhon niya utro nga may kahikayan nga pariho han mga kahoy nga nakita ni Ezekiel. Pero ha Paraiso, pisikal ngan espirituwal nga mga bendisyon an ihahatag ni Jehova. Ha langit, hi Jesu-Kristo ngan an iya 144,000 nga igkasi-magmarando maghahadi ha panahon han Milenyo. Sugad nga mga saserdote, ipapadapat han 144,000 an mga kapulsanan han halad-lukat han Kristo basi buligan an magtinumanon nga tawo nga magin perpekto. (Pah. 20:6) Ini nga kahikayan ha pagtambal ha pisikal ngan espirituwal nagpapahinumdom ha aton han mga kahoy nga nakita ni Ezekiel, nga namumunga hin masustansya nga mga prutas ngan may mga dahon nga nakakatambal. An bisyon ni Ezekiel kapariho han makaruruyag nga tagna nga iginrekord ni apostol Juan. (Basaha an Pahayag 22:1, 2.) An mga dahon han mga kahoy nga nakita ni Juan ‘nakakatambal ha mga nasud.’ Minilyon nga matinumanon nga mga tawo an magpapahimulos ha serbisyo han 144,000 nga saserdote.

21. Ano an epekto ha imo han pagpamalandong ha salog ha bisyon ni Ezekiel, ngan ano an sunod naton nga hihisgotan? (Kitaa an kahon nga “An Sapa Nagin Salog!”)

²¹ Samtang ginpapamalandong mo an salog ha bisyon ni Ezekiel, diri ba napupuno an imo kasingkasing hin kamurayawan ngan paglaom? Makaruruyag gud nga panahon an naghuhulat ha aton! Ngan hunahunaa la​—yinukot ka tuig na an naglabay, naghatag hi Jehova hin damu nga tagna nga naghuhulagway hito nga panahon ngan mapailubon nga gin-iimbitar kita nga mahingadto basi makita an daku nga katumanan, an reyalidad nga iginsaad ha mga tagna. Mahingangadto ka ba? Bangin mahunahuna mo kon may lugar ka gud ba ha Paraiso. Hisgotan naton sunod kon paonan-o kita ginpapasarig han kataposan nga mga bahin han tagna ni Ezekiel.