Pagsabot hadto: An tagsa han upat nga nawong han buhi nga mga linarang, o mga kerubin, nagrirepresentar han usa han upat nga nangunguna nga kalidad ni Jehova.

Bag-o nga pagsaysay: Bisan kon an tagsa han upat nga nawong han buhi nga mga linarang nagrirepresentar han usa han upat nga nangunguna nga kalidad ni Jehova, kon kikitaon ha kabug-osan an upat nga nawong nagrirepresentar han ngatanan niya nga kalidad. Sugad man, an upat nga nawong nagtututdo ha aton han diri matupngan nga himaya ngan gahum ni Jehova.

Rason han pagbag-o: Ha Pulong han Dios, an numero kwatro agsob gamiton basi ipasabot an pagin kompleto, nga nag-uupod han ngatanan. Salit kon an upat nga nawong kikitaon ha kabug-osan, diri la ito kay nagrirepresentar hin upat nga kalidad​—ito an pundasyon han urusahon gud nga personalidad ni Jehova. Dugang pa, an mga nawong kanan leon, todo nga baka, agila, ngan tawo—mga linarang nga nagsisimbolo hin pagkaharangdon, kusog, ngan pagin gamhanan. Bisan pa hito, inin upat nga gamhanan nga linarang, nga makikita ha upat nga nawong han tagsa nga kerubin, aada ha ubos han trono ni Jehova. Ginpapabug-atan hito nga hi Jehova an Supremo nga Magmarando han ngatanan.

Pagsabot hadto: An lalaki nga may surudlan hin tinta nagrirepresentar ha nabibilin nga mga dinihogan. Pinaagi han pagsangyaw ngan paghimo hin disipulo, simboliko nga ginmamarkahan nira an mga agtang han mga nagigin kaapi han “daku nga grupo.”​—Pah. 7:9.

Bag-o nga pagsaysay: An lalaki nga may surudlan hin tinta nagrirepresentar kan Jesu-Kristo. Mamarkahan niya an daku nga grupo kon hukman na hira sugad nga mga karnero ha “daku nga kasakitan.”​—Mat. 24:21.

Rason han pagbag-o: Igintapod ni Jehova ha iya Anak an paghukom. (Juan 5:22, 23) Sumala ha Mateo 25:31-33, hi Jesus an maghuhukom kon hin-o an “mga karnero” ngan kon hin-o an “mga kanding.”

Pagsabot hadto: An magurang nga hi Ohola (Samaria, nga kapital han Israel) nagsisimbolo han Katoliko nga relihiyon; an manghod nga hi Oholiba (Jerusalem, nga kapital han Juda) nagsisimbolo han Protestante nga relihiyon.

Bag-o nga pagsaysay: Inin magbugto nga hostes diri nagsisimbolo ha bisan ano nga bahin han Kakristianohan. Lugod, igintututdo han asoy mahitungod ha ira an inaabat ni Jehova kon an iya katawohan nga maunungon hadto nagbubuhat hin espirituwal nga prostitusyon. Ito liwat an iya inaabat ha ngatanan nga buwa nga relihiyon.

Rason han pagbag-o: Waray mababasa ha Kasuratan nga nagpapasabot nga hira Ohola ngan Oholiba nagsisimbolo ha Kakristianohan. An Israel ngan Juda pariho hin maunungon hadto nga mga asawa ni Jehova, pero an Kakristianohan waray gud magkaada sugad hito nga relasyon ha iya. Dugang pa, han an diri maunungon nga katawohan han Dios iginpariho ha mga hostes ha Ezekiel kapitulo 16 ngan 23, gintagan hira hin paglaom nga magbag-o ngan mapahiuli. An Kakristianohan, nga bahin han Babilonya nga Gamhanan, waray sugad hito nga paglaom.

Pagsabot hadto: An diri matinumanon nga Jerusalem nagsisimbolo ha Kakristianohan. Salit an kabungkag han Jerusalem nagpapasabot nga mabubungkag liwat an Kakristianohan.

Bag-o nga pagsaysay: An mga kahimtang ha diri matinumanon nga Jerusalem—sugad han idolatriya ngan kalyap nga karaotan—nagpapahinumdom ha aton han Kakristianohan, pero diri na kita nasiring nga an Kakristianohan an ginsisimbolohan han Jerusalem.

Rason han pagbag-o: Waray klaro nga basihan ha Kasuratan ha paghatag han sugad nga simboliko nga kahulogan. Diri pariho han kadaan nga Jerusalem, an Kakristianohan waray gud magbuhat hin putli nga pagsingba. Ngan an Jerusalem ginpasaylo ni Jehova hin pipira ka panahon, pero an Kakristianohan waray paglaom nga mapasaylo.

Pagsabot hadto: Han 1918 an gintimaraot nga mga dinihogan nagin bihag han Babilonya nga Gamhanan ngan nakaeksperyensya hin sugad-patay nga kahimtang, nga haros waray na nahihimo. Iton halipot nga pagkabihag natapos han 1919 han iginpahiuli hira ni Jehova sugad nga mga parasamwak han Ginhadian.

Bag-o nga pagsaysay: Nag-iha gud an sugad-patay nga kahimtang ha pagin bihag ha espirituwal ngan nagtikang ito maiha pa antes han 1918. Nagtikang ito han ikaduha ka siglo C.E. ngan natapos han 1919 C.E.—katugbang han maiha nga panahon han pagtubo han trigo ngan mga banwa ha parabola ni Jesus.

Rason han pagbag-o: Nag-iha an pagkabihag han kadaan nga Israel, tikang ha 740 B.C.E. tubtob 537 B.C.E. Ha tagna ni Ezekiel, an mga tul-an iginhuhulagway nga “uga” o “uga gud,” nga nagpapasabot nga an ginrirepresentaran han mga tul-an maiha na hinduro nga patay. Ngan an pagpahiuli hito hinay-hinay nga proseso nga nagkikinahanglan hin panahon.

Pagsabot hadto: Katapos han halipot nga panahon han pagkabahin-bahin ha panahon han Girra ha Kalibotan I, an matinumanon nga mga kaapi han nabibilin nga mga dinihogan nagkaurosa utro han 1919.

Bag-o nga pagsaysay: Ginpapabug-atan han tagna nga pahihinaboon ni Jehova nga magkaurosa an iya mga magsiringba. Katapos han 1919, ha paglabay han panahon, an nabibilin nga mga dinihogan gin-updan han nagtitikadamu nga may tunan-on nga paglaom. Inin duha nga grupo urosa nga nagsisingba kan Jehova sugad nga usa nga katawohan.

Rason han pagbag-o: An tagna diri naghuhulagway hin usa nga istik nga gintunga ngan ha urhi gintampo. Salit an tagna diri naghuhulagway hin usa nga grupo nga mababahin ngan ha urhi magkakaurosa utro. Lugod, iginhuhulagway hito kon paonan-o magkakaurosa an duha nga grupo.

Pagsabot hadto: An ngaran nga Gog han Magog nagtutudlok kan Satanas katapos hiya paiwason ha langit.

Bag-o nga pagsaysay: Hi Gog han Magog nagtutudlok ha grupo, o alyansa, han mga nasud nga maatake ha putli nga mga magsiringba ha daku nga kasakitan.

Rason han pagbag-o: An mga paghulagway kan Gog​—nga ipapakaon hiya ha mga tamsi nga mandaragit ngan tatagan hin lubnganan ha tuna—​nagpapasabot nga diri hiya espiritu. Dugang pa, an pag-atake ni Gog puropariho han ginsisiring han mga libro han Daniel ngan Pahayag mahitungod han pag-atake han mga nasud ha katawohan han Dios.​—Dan. 11:40, 44, 45; Pah. 17:14; 19:19.