18. Kinahanglan Ko ba Igdedikar an Akon Kinabuhi ha Dios Ngan Magpabawtismo?
1 KINAHANGLAN KO BA MAGPABAWTISMO?
“Kitaa! May tubig dinhi. Ano an nakakaulang ha akon ha pagpabawtismo?”—Buhat 8:36
Kay ano nga kinahanglan mo magpabawtismo, ngan paonan-o ka sadang bawtismohan?
An bawtismo nagpapakita nga ginbayaan mo na an imo pagkinabuhi hadto ngan nagtikang ka na hin bag-o nga pagkinabuhi nga nagbubuhat han kaburut-on han Dios.
-
Kinahanglan mo magpabawtismo basi makag-alagad kan Jehova.
-
Pinaagi han bawtismo, iginpapakita mo ha iba nga karuyag mo mag-alagad ha Dios.
-
An imo bug-os nga lawas kinahanglan igpailarom ha tubig, sugad han ginbuhat kan Jesus.
2 HI JEHOVA DIRI GUD NAGLALAOM HIN LABAW HAN IMO MAAAKOS
“An gugma ha Dios nangangahulogan nga tumanon naton an iya mga sugo; ngan an iya mga sugo diri mabug-at.”—1 Juan 5:3
Kay ano nga diri ka sadang mahadlok ha pagdedikar han imo kinabuhi kan Jehova?
-
Diri mo kinahanglan magin perpekto basi mo maidedikar an imo kinabuhi kan Jehova. Bubuligan ka niya nga mabuhat an husto.
-
An imo gugma kan Jehova mabulig ha imo nga malamposan an kahadlok nga diri mo matuman an iya ginlalaoman ha imo.
3 MGA PITAD NGA GINKIKINAHANGLAN PARA HA BAWTISMO
“Nalilipay ako hin pagsugot han imo kaburut-on, Oh Dios nakon; ngan an imo balaud aadi ha sakub han akon kasingkasing.”—Salmos 40:8
Ano an kinahanglan mo buhaton basi maidedikar mo an imo kinabuhi kan Jehova?
-
PAG-ADMI AN PULONG HAN DIOS
Kilalaha hi Jehova ngan hi Jesu-Kristo. Samtang nadudugangan an imo kahibaro mahitungod ha ira, mas hihigugmaon mo hira.
-
KULTIBARA AN IMO PAGTOO
Sarig hin bug-os ha mga saad han Dios ngan ha gahum han halad-lukat ni Jesus ha pagtalwas ha aton tikang ha sala ngan kamatayon.
-
PAGBASOL
Nagpapasabot ini hin duro nga kasubo tungod han ngatanan nga sayop nga imo nabuhat.
PAGBAG-O
Nagpapasabot ini hin pag-undang ha bisan ano nga sayop nga panggawi ngan pagbuhat ha kon ano an husto.
-
IDEDIKAR AN IMO KINABUHI
Igindidedikar mo an imo kinabuhi kan Jehova kon nagsasaad ka ha iya ha pag-ampo nga mag-aalagad ka na ha iya ngan hihimoon mo nga pinakaimportante ha imo kinabuhi an pagbuhat han iya naruruyagan.
