“An mga patay diri maaram han bisan ano.”​—Eklesiastes 9:5

Ano an mahitatabo ha aton kon kita mamatay?

• Salmos 146:3, 4; Eklesiastes 9:6, 10

  Kon mamatay kita, diri na kita makakakita, makakabati, ngan makakaghunahuna.

• Juan 11:11-14

  Iginpariho ni Jesus an kamatayon ha pagkaturog.

“Han kahoy han kinaadman han kaopayan ngan han karautan, diri ka makakakaon: kay ha adlaw nga ikaw kumaon hito, ikaw gud mamamatay.”​—Genesis 2:17

Kay ano nga namamatay kita?

• Genesis 3:1-6

  Nagbuwa hi Satanas kan Eva mahitungod han mahitatabo kan Eva kon supakon niya an sugo han Dios. Han ginsupak nira Adan ngan Eva hi Jehova, nakasala hira ngan ha urhi namatay.

• Genesis 3:19

  Kamatay ni Adan, waray na hiya umeksister.

• Roma 5:12

  An sala pariho hin grabe nga sakit nga napanunod naton ha aton siyahan nga mga kag-anak. Kita ngatanan natawo nga makasasala, salit namamatay kita.

• 1 Corinto 15:26

  Gintatawag han Biblia nga kaaway an kamatayon.

‘Kon in usa ka tawo mamatay, mabubuhi [pa] ba hiya? Maghuhulat ako ngada nga an panahon ha pagbuhii ha akon umabot.’​—Job 14:14

Paonan-o an paghibaro han kamatuoran mahitungod ha kamatayon naghahatag ha aton hin kagawasan tikang ha sayop nga mga katutdoan?

• 1 Juan 4:8

  An katutdoan mahitungod han naglalaga nga impyerno insulto kan Jehova. Diri gud niya tutugotan nga mag-antos an mga tawo ha sugad nga paagi.

• Pahayag 4:11

  Damu nga tawo an nahadlok ha mga patay, salit ha mga patay hira nagsisingba ngan nagpapakita hin kahadlok imbes nga kan Jehova. Hi Jehova an tinuod nga Dios, ngan hiya la an sadang naton singbahon.