1, 2. (a) Ano an ginsiring kan Maria han iya bisita? (b) Kay ano nga kinahanglan maghimo hi Maria hin importante nga desisyon?

HI Maria nahipausa gud han sinulod an bisita ha ira balay. Waray ito mamiling ha iya tatay o nanay. Hiya an tuyo hito! Nakakasiguro hiya nga ito nga bisita diri taga-Nazaret. Gutiay an bungto nga iya gindak-an salit masayon la makilal-an an estranghero. Ngan naiiba gud an dagway hito nga bisita. Nakiistorya ito kan Maria ha paagi nga bag-o gud ha iya: “Maopay nga adlaw Maria, nalilipay gud ha imo hi Jehova, ngan ginbibendisyonan ka.”—Basaha an Lucas 1:26-28.

² Hito nga paagi iginpakilala han Biblia hi Maria nga anak ni Heli, ha bungto han Nazaret ha Galilea. Gin-unabi hiya han Biblia ha panahon nga kinahanglan niya maghimo hin importante nga desisyon. Karaslon na hiya ha panday nga hi Jose—usa nga lalaki nga diri riko kondi may marig-on nga pagtoo ha Dios. Salit an iya kinabuhi baga hin nakaplano na—simple nga kinabuhi kaupod hi Jose ngan an ira magigin pamilya. Kondi yana, kaistorya niya ini nga bisita nga naghatag ha iya hin toka tikang ha Dios, usa nga responsabilidad nga magbabag-o han iya kinabuhi.

3, 4. Basi makilala hi Maria, ano an diri naton hihisgotan, ngan ha ano kita magpupokus?

³ Damu an nahipapausa nga gutiay la an impormasyon ha Biblia mahitungod kan Maria. Gutiay la an ginsisiring hito mahitungod han iya gintikangan ngan personalidad, ngan waray ito gin-uunabi mahitungod han iya hitsura. Kondi, an ginsisiring han Pulong han Dios mahitungod ha iya nagpapakilala gud han iya pagkatawo.

⁴ Basi makilala hi Maria, diri naton kinahanglan usisahon an damu nga opinyon mahitungod ha iya nga igintututdo han mga relihiyon. Salit, diri naton hihisgotan an pagkahulagway ha iya ha damu nga ladawan o imahen. Diri liwat naton hihisgotan an komplikado nga teolohiya ngan doktrina nga naghatag hinin mapainubsanon nga babaye hin hitaas nga mga titulo sugad han “Iroy han Dios” ngan “Rayna han Langit.” Lugod, magpupokus kita ha kon ano an ginsisiring han Biblia. Mabulig ito ha aton nga mahibaro mahitungod ha iya pagtoo ngan kon paonan-o naton ito masusubad.

5. (a) Ano an aton mahibabaroan ha reaksyon ni Maria ha ginsiring ni Gabriel? (b) Ano an igintututdo ha aton han susbaranan ni Maria?

⁵ An bisita ni Maria diri usa nga tawo. Hiya an anghel nga hi Gabriel. Han nagsiring hiya kan Maria nga “nalilipay gud ha imo hi Jehova,” “nagupong gud” ngan nahipausa hini hi Maria. (Luc. 1:29) Ano an karuyag sidngon ha ginsiring han anghel? Diri naglalaom hi Maria nga makakakarawat hiya hin pag-uyon han mga tawo. Pero an gin-uunabi han anghel amo an bendisyon o pag-uyon ni Jehova nga Dios. Ngan ito an importante kan Maria. Bisan pa hito, waray hiya magin mapahitas-on ha paghunahuna nga inuuyonan hiya han Dios. An susbaranan ni Maria nagtututdo ha aton nga sadang kita mangalimbasog nga makarawat an pag-uyon han Dios ngan diri gud kita magin mapahitas-on ha paghunahuna nga inuuyonan na kita Niya. Nangangalas an Dios ha mapahitas-on, kondi nahigugma ngan nabulig hiya ha mapainubsanon.—San. 4:6.

6. Ano nga pribilehiyo an iginsumat han anghel kan Maria?

⁶ Kinahanglan ni Maria an sugad nga pagpaubos kay waray kapariho an pribilehiyo nga iginsumat ha iya han anghel. Nagsiring ito nga igbuburod niya an bata nga magigin an pinakaimportante ha ngatanan nga tawo. Hi Gabriel nagsiring: “Ihahatag ha iya ni Jehova nga Dios an trono ni David nga iya amay, ngan magmamando hiya ha kadayonan sugad nga Hadi ha panimalay ni Jacob, ngan waray kataposan an iya Ginhadian.” (Luc. 1:32, 33) Sigurado nga maaram hi Maria han saad han Dios kan David sobra usa ka yukot ka tuig na an naglabay—nga usa han iya tulin an magmamando ha waray kataposan. (2 Sam. 7:12, 13) Salit an iya anak an magigin Mesias nga damu ka siglo na nga ginpapamulat han katawohan han Dios!

7. (a) Ano an iginpakita han pakiana ni Maria mahitungod ha iya? (b) Ano an mahibabaroan han mga batan-on yana kan Maria?

⁷ Dugang pa, ginsidngan hi Maria han anghel nga an iya anak “tatawagon nga Anak han Gihitaasi.” Paonan-o an tawhanon nga babaye mag-aanak han Anak han Dios? Ngan, paonan-o hiya magkakaanak nga hito nga takna daraga pa man hiya? Salit prangka nga nagpakiana hiya: “Uray ngan putli ako. Uunanhon man hin kahimo hini?” (Luc. 1:34, Maopay nga Sumat) Tigamni nga waray ikaawod ni Maria an iya pagin birhen, lugod iya ito ginpabilhan. Yana, damu nga batan-on an diri nagpapabili han ira pagkabirhen ngan gintatamay pa ngani an mga birhen pa. Matin-aw nga nagbag-o na an kalibotan. Kondi waray magbag-o hi Jehova. (Mal. 3:6) Pariho ha panahon ni  Maria, Iya ginpapabilhan adton nagkikinabuhi uyon ha Iya mga suruklan ha moral.—Basaha an Hebreo 13:4.

8. Bisan kon diri hingpit, paonan-o hi Maria magkakaada hingpit nga anak?

⁸ Bisan kon matinumanon nga surugoon han Dios hi Maria, diri hiya hingpit. Kon sugad, paonan-o hiya magkakaada hingpit nga anak, an Anak han Dios? Hi Gabriel nagsiring: “An baraan nga espiritu maabot ha imo ngan an gahum han Gihitaasi malandong ha imo. Tungod hito, ini nga matatawo tatawagon nga baraan ngan Anak han Dios.” (Luc. 1:35) An pagin baraan nangangahulogan hin pagin “limpyo,” “putli,” ngan “sagrado.” Ha normal nga kahimtang, naipapasa han mga kag-anak an ira pagin diri hingpit ha ira mga anak. Kondi hini nga kahimtang, maghihimo hi Jehova hin naiiba nga milagro. Iya ibabalhin an kinabuhi han Iya Anak tikang ha langit ngadto ha tagoangkan ni Maria, katapos Iya gagamiton an aktibo nga pwersa, o baraan nga espiritu ha ‘paglandong’ kan Maria, nga magpapanalipod ha bata ha bisan ano nga sala. Tinoo ba hi Maria ha ginsiring han anghel? Ano an iya ginbuhat?

9. (a) Kay ano nga sayop an pagruhaduha han damu ha asoy mahitungod kan Maria? (b) Paonan-o ginparig-on ni Gabriel an pagtoo ni Maria?

⁹ Damu an nagruruhaduha, pati na an pipira nga teologo han Kakristianohan, nga mahimo manganak an usa nga birhen. Bisan pa han ira edukasyon, diri nira masabtan an simple nga kamatuoran. Sugad han ginsiring ni Gabriel, “waray kapahayagan han Dios nga diri matutuman.” (Luc. 1:37) Ginkarawat ni Maria sugad nga kamatuoran an ginsiring ni Gabriel tungod kay may-ada hiya daku nga pagtoo. Kondi diri hiya basta natoo la nga waray basihan. Pariho hin makatadunganon nga tawo, nagkinahanglan hiya hin ebidensya basi basaran han iya pagtoo. Ngan andam hi Gabriel maghatag hin dugang nga ebidensya. Ginsumatan hiya hito mahitungod han iya edaran na nga patod nga hi Elizabeth nga maiha na nga baog. Kondi yana, milagroso nga ginpahinabo han Dios nga magburod hiya!

10. Kay ano nga diri naton sadang hunahunaon nga masayon la an toka ni Maria?

¹⁰ Yana, ano an bubuhaton ni Maria? Gintagan hiya hin toka ngan may ebidensya nga tutumanon han Dios an ngatanan nga ginsiring ni Gabriel. Kondi diri naton sadang hunahunaon nga masayon la ito. Siyahan, karaslon na hiya kan Jose. Maruruyag pa ba hi Jose pagpakasal kon hibaroan hito nga burod hiya? Ikaduha, an toka mismo baga hin daku na nga responsabilidad. Igbuburod niya an pinakapresyoso nga linarang han Dios—an Iya hinigugma nga Anak! Kinahanglan niya atamanon an waray mahihimo nga minasus-an ngan panalipdan ito ha maraot nga kalibotan. Mabug-at gud ito nga responsabilidad!

11, 12. (a) Ano an gin-abat han pipira nga matinumanon ngan may marig-on nga pagtoo nga kalalakin-an ha ira makuri nga toka tikang ha Dios? (b) Ano an iginpapakita mahitungod kan Maria han iya baton kan Gabriel?

 ¹¹ Iginpapakita han Biblia nga bisan an matinumanon ngan may marig-on nga pagtoo nga kalalakin-an nag-alang usahay ha pagkarawat hin magkuri nga toka tikang ha Dios. Nagsiring hi Moises nga diri hiya maabtik magyakan salit diri hiya mahimo magin tagapagyakan han Dios. (Eks. 4:10) Hi Jeremias nagbaribad ha toka nga iginhatag ha iya han Dios kay siring niya, “bata” pa hiya hinduro para hito. (Jer. 1:6) Ngan hi Jonas pinalagiw ha iya toka! (Jon. 1:3) Kumusta man hi Maria?

¹² Tubtob yana, hinbabaroan han damu an iya mapainubsanon ngan masinugtanon nga baton. Hiya nagsiring kan Gabriel: “Iini ako, an kan Jehova uripon nga babaye! Matuman unta ha akon an imo ginsiring.” (Luc. 1:38) An uripon nga babaye amo an pinakaubos ha mga surugoon; an iya kinabuhi nakadepende gud ha iya agaron. Ito an pagtagad ni Maria ha iya kalugaringon ngan bug-os nga nasarig hiya ha iya Agaron, hi Jehova. Maaram hiya nga talwas hiya ha mga kamot ni Jehova, nga maunungon Hiya ha mga tawo nga maunungon ha Iya, ngan bibendisyonan hiya samtang iya ginhihimo an ngatanan para hinin makuri nga toka.—Sal. 18:25.

13. Kon baga hin makuri o imposible pa ngani an iginpapabuhat ha aton han Dios, paonan-o mabulig ha aton an susbaranan ni Maria?

¹³ Usahay may iginpapabuhat ha aton an Dios nga baga hin makuri o imposible pa ngani. Kondi, an iya Pulong naghahatag ha aton hin damu nga hinungdan nga bug-os nga sumarig ha iya, pariho han ginbuhat ni Maria. (Prob. 3:5, 6) Masarig ba kita kan Jehova? Kon oo, babalosan kita niya, ngan maghahatag ito ha aton hin mga hinungdan nga maparig-on pa an aton pagtoo ha iya.

14, 15. (a) Paonan-o ginbalosan ni Jehova hi Maria han binisita hiya kanda Elizabeth ngan Sakarias? (b) Ano an iginpapakita mahitungod kan Maria han iya ginsiring nga nakarekord ha Lucas 1:46-55?

¹⁴ Daku gud an epekto kan Maria han iginsumat ni Gabriel mahitungod kan Elizabeth. Ha ngatanan nga babaye ha kalibotan, hin-o an mas makakasabot han iya kahimtang? Hi Maria nagdagmit pagkadto ha kabukiran nga bahin han Juda, nga bangin ginbibiyahe hin tulo o upat ka adlaw. Han sinulod hiya ha balay nira Elizabeth ngan Sakarias nga saserdote, gintagan hiya ni Jehova hin dugang nga ebidensya nga magpaparig-on han iya pagtoo. Hinbatian ni Elizabeth an tingog ni Maria ngan tigda nga inabat niya nga an bata ha iya tiyan linukso  ha kalipay. Napuno hiya han baraan nga espiritu ngan gintawag hi Maria nga an “nanay han akon Ginoo.” Iginpahibaro han Dios kan Elizabeth nga an anak ni Maria magigin iya Ginoo, an Mesias. Dugang pa, tungod han pagkamatinumanon ngan pagkamasinugtanon ni Maria, gin-giyahan hi Elizabeth ha paghatag hin kumendasyon: “Malipayon liwat hiya nga natoo.” (Luc. 1:39-45) Oo, matutuman an ngatanan nga iginsaad ni Jehova kan Maria!

¹⁵ Katapos, hi Maria nagyakan. An iya mga pulong gintipigan gud ha Biblia. (Basaha an Lucas 1:46-55.) Ito an pinakahilaba nga ginyakan ni Maria nga nakarekord ha Biblia, ngan damu an iginsusumat hito mahitungod ha iya. Iginpapakita hito an iya pagin mapasalamaton kan Jehova ha pagbendisyon ha iya han pribilehiyo sugad nga iroy han Mesias. Iginpapakita liwat hito an kahilarom han iya pagtoo  samtang gin-uunabi niya an pag-ubós ni Jehova ha mga mapahitas-on ngan gamhanan ngan an Iya pagbulig ha mga ubos ngan kablas nga nangangalimbasog ha pag-alagad ha Iya. Iginpapakita liwat hito an kahilarom han iya kahibaro. Ha usa nga pagbanabana, sobra 20 ka beses hiya nga nagkotar ha Hebreo nga Kasuratan! *

16, 17. (a) Paonan-o nagpakita hi Maria ngan an iya anak hin disposisyon nga sadang naton subaron? (b) Ano nga bendisyon an iginpapahinumdom ha aton han pagbisita ni Maria kan Elizabeth?

¹⁶ Matin-aw nga hi Maria may hilarom nga pagsabot ha Pulong han Dios. Bisan pa hito, nagpabilin hiya nga mapainubsanon pinaagi ha paggamit han Kasuratan imbes nga ipahayag an iya opinyon. An bata nga nagtutubo ha iya tagoangkan magpapakita hin pariho nga disposisyon kay ha urhi ito siniring: “An akon igintututdo diri akon, kondi tikang ha iya nga nagsugo ha akon.” (Juan 7:16) Maopay nga pakianhan naton an aton kalugaringon: ‘Nagpapakita ba ako hin sugad nga pagtahod ha Pulong han Dios? O mas karuyag ko ipahayag an akon kalugaringon nga mga ideya ngan katutdoan?’ Matin-aw nga husto an disposisyon ni Maria hini nga bahin.

¹⁷ Hi Maria nagpabilin kan Elizabeth hin mga tulo ka bulan, ngan sigurado nga naparig-on nira an usa kag usa. (Luc. 1:56) Ginpapahinumdom ha aton hini nga pagbisita nga bendisyon gud an pagkamagsangkay. Kon namimiling kita hin kasangkayan nga nahigugma gud kan Jehova, magigin mas marig-on an aton relasyon ha Iya. (Prob. 13:20) Inabot an panahon nga kinahanglan na umuli hi Maria. Ano daw la an magigin reaksyon ni Jose kon hibaroan niya nga burod an iya uyab?

18. Ano an iginsumat ni Maria kan Jose, ngan ano an reaksyon ni Jose?

¹⁸ Waray na hulata ni Maria nga dumaku pa an iya tiyan antes magsumat kan Jose. Kinahanglan na gud niya makiistorya ha iya. Kondi antes hito, posible nga nahunahuna niya kon ano an magigin reaksyon hinin desente ngan may kahadlok ha Dios nga lalaki. Bisan pa hito, iya ginsumatan an iya uyab han ngatanan nga nahitabo. Sugad han bangin mahunahuna mo, nagupong gud hi Jose. Karuyag niya toohan an iya hinigugma, kondi baga hin waray ito magin maunungon ha iya. An Biblia waray mag-unabi kon ano an iya ginhunahuna o kon paonan-o hiya nangatadongan. Kondi nagsiring ito nga nagdesisyon hi Jose pakigdiborsyo kan Maria, kay hito nga panahon an mag-uyab gintatagad nga mag-asawa na. Pero diri niya karuyag pakaalohan hi Maria ha publiko, salit nagdesisyon hiya nga sekreto nga makigdiborsyo. (Mat. 1:18, 19) Sigurado nga nasubo gud hi Maria nga makita an iya buotan nga uyab nga namumroblema hinin  naiiba nga sitwasyon. Kondi waray hiya mabido nga waray tumoo hi Jose ha iya.

19. Paonan-o ginbuligan ni Jehova hi Jose nga buhaton an husto?

¹⁹ Ginbuligan ni Jehova hi Jose nga buhaton an husto. Pinaagi hin inop, ginsidngan hiya han anghel han Dios nga milagroso an pagburod ni Maria. Sigurado nga sugad hin nagabotan hiya hin tunok! Katapos, ginbuhat ni Jose an karuyag ni Jehova nga buhaton niya. Iya ginkuha hi Maria sugad nga asawa, ngan gin-andam an iya kalugaringon para hinin waray kapariho nga responsabilidad ha pag-ataman han Anak ni Jehova.—Mat. 1:20-24.

20, 21. Ano an mahibabaroan han mga mag-asawa ngan hadton nagpaplano mag-asawa tikang kanda Maria ngan Jose?

²⁰ May maopay nga leksyon nga mahibabaroan an mga mag-asawa—ngan adton nagpaplano mag-asawa—hinin batan-on nga magpadis 2,000 ka tuig na an naglabay. Samtang nakikita ni Jose nga gintutuman han iya batan-on nga asawa an responsabilidad ngan obligasyon han pagin iroy, sigurado nga nalipay hiya nga gin-giyahan hiya han anghel ni Jehova. Sigurado nga nasantop ni Jose nga importante an pagsarig kan Jehova kon naghihimo hin dagku nga desisyon. (Sal. 37:5; Prob. 18:13) Waray ruhaduha nga nagpabilin hiya nga maikmat ngan matinagaron ha pagdesisyon sugad nga ulo han pamilya.

²¹ Ha luyo nga bahin, ano an aton mahibabaroan ha pagin andam ni Maria nga pakasalan hi Jose? Bisan kon ha siyahan bangin waray masabti ni Jose an iya gin-istorya, naghulat hiya ngan padayon nga sinarig kan Jose sugad nga magigin ulo han pamilya. Sigurado nga nasantop niya nga importante an pagin mapailubon, ngan maopay ito nga leksyon para ha Kristiano nga kababayin-an yana. Ha urhi, ini nga panhitabo posible nga daku gud an naitutdo kanda Jose ngan Maria mahitungod han bili han tangkod ngan abrido nga komunikasyon.—Basaha an Proberbios 15:22.

22. Ano an pundasyon han pag-asawa nira Jose ngan Maria, ngan ano pa an ira maieksperyensyahan?

²² Sigurado nga ha tinikangan pa la, maopay gud an pundasyon han pag-asawa hinin batan-on nga magpadis. Hinigugma gud nira hi Jehova nga Dios ngan naghingyap nga mapalipay hiya pinaagi ha pagin responsable ngan mahigugmaon nga mga kag-anak. Syempre, makakaeksperyensya hira hin damu pa nga bendisyon ngan hin mas magkuri nga sitwasyon. Diri mag-iiha, responsabilidad nira nga atamanon hi Jesus, an magigin pinakabantogan nga tawo ha kalibotan.