Para ha imo, makuri ba himoon kon ano an tama?— Damu an naghuhunahuna nga makuri ito. An Biblia nagsusumat ha aton nga nagin makuri para ha usa nga bata nga hi Josia nga himoon kon ano an tama. Pero may mag-opay hiya nga kasangkayan nga binulig ha iya. Aton kilalahon hi Josia ngan an iya kasangkayan.

Hi Amon nga hadi han Juda an tatay ni Josia. Salbahis gud hi Amon ngan nagsisingba ha mga dios-dios. Han namatay hiya, nagin hadi han Juda hi Josia. Pero otso anyos la hiya! Ha imo hunahuna, salbahis ba liwat hiya pariho ha iya tatay?— Diri gud!

Bisan kon bata pa gud hi Josia, karuyag niya nga sundon hi Jehova. Salit nakisangkay la hiya ha mga tawo nga nahigugma kan Jehova. Ngan ginbuligan nira hi Josia nga himoon kon ano an tama. Hin-o an pipira han kasangkayan ni Josia?

Usa han iya sangkay hi Sepania. Hi Sepania usa nga propeta nga nagsumat ha mga tawo ha Juda nga may maraot nga mahitatabo ha ira kon magsingba hira ha mga dios-dios. Namati hi Josia kan Sepania  ngan nagsingba kan Jehova, diri ha mga dios-dios.

Usa pa han sangkay ni Josia hi Jeremias. Haros kaedad niya hi Josia, ngan nagdaku hira nga magkahirani la an ira gin-uukyan. Duok gud hira nga magsangkay kay han namatay hi Josia, nagsurat hi Jeremias hin espesyal nga kanta mahitungod han iya kamingaw kan Josia. Nagbuligay hira Jeremias ngan Josia basi buhaton kon ano an tama ngan sundon hi Jehova.

Ano an imo mahibabaroan mahitungod kan Josia?— Bisan kon bata pa gud hi Josia, karuyag niya nga himoon kon ano an tama. Maaram hiya nga kinahanglan niya makisangkay ha mga tawo nga nahigugma kan Jehova. Pagpili gud hin kasangkayan nga nahigugma kan Jehova ngan makakabulig ha imo nga himoon kon ano an tama!