1-3. (a) Paonan-o iginpapakita han mga Kristiano nga karuyag gud nira tumambong ha mga katirok? (Kitaa an retrato hini nga pahina.) (b) Ano an aton hihisgotan hini nga artikulo?

HAN 17 anyos pa la hi Corrina, an iya nanay gin-aresto ngan gindistyero ha usa nga prisohan ha Unyon Sobyet. Ha urhi, hi Corinna gindistyero liwat ha Siberia, yinukot ka kilometro tikang ha ira balay. Gintratar hiya nga uripon ngan usahay ginpupuwersa pagtrabaho ha gawas bisan kon matugnaw hinduro ngan waray hiya bado nga panhagkot. Bisan pa hito nga makuri nga kahimtang, hi Corinna ngan an usa pa nga sister determinado pagtambong ha katirok han kongregasyon.

² Hiya nagsiring: “Gab-i kami bumaya ha amon trabaho, ngan nagbaktas ngadto ha usa nga estasyon han tren nga 25 ka kilometro an kahirayo. An tren linarga ha alas dos han kaagahon, ngan nagbiyahe kami hin unom ka oras ngan katapos nagbaktas hin napulo ka kilometro tikadto ha katirokan.” Bawi ba an ira sakripisyo? Hi Corinna nagsiring: “Ha katirok, nag-aram kami han Barantayan ngan nagkanta hin mga karantahon para ha Ginhadian. Nalipay ngan naparig-on gud kami hito  nga katirok.” Bisan kon tulo ka adlaw antes hira nakabalik ha ira trabaho, waray mahibaroi han nanginginano han farm nga bumaya hi Corinna ngan an iya kaupod.

³ Ginpapabilhan gud han katawohan ni Jehova an mga higayon nga magkatirok. Katapos gud la maestablisar an Kristiano nga kongregasyon, an mga sumurunod ni Jesus ‘nagpadayon pagpamati hin maopay ha igintututdo han mga apostol, ngan kada adlaw urosa nga nagkakatirok hira ha templo.’ (Buh. 2:42, 46) Pariho ha ira, posible nga hingyap mo liwat nga regular nga tumambong ha mga katirok. Pero, an ngatanan nga Kristiano naatubang hin mga ulang. An sekular nga trabaho, pagin okupado, ngan duro nga kakapoy tungod han adlaw-adlaw nga mga buruhaton bangin magpakuri ha aton nga tumambong. Ano an magpapagios ha aton nga malamposan ito nga mga ulang basi regular nga makatambong? ^[1] Paonan-o naton mabubuligan an aton mga estudyante ha Biblia nga masantop nira an pagkaimportante han pagtambong? Hihisgotan hini nga artikulo kon kay ano nga an pagtambong ha mga katirok (1) mapulsanon para ha aton, (2) makakabulig ha iba, ngan (3) magpapalipay kan Jehova. ^[2]

4. Paonan-o an mga katirok nabulig ha aton nga mahibaro mahitungod kan Jehova?

⁴ An mga katirok nagtututdo ha aton. An ngatanan nga katirok ha kongregasyon nabulig ha aton nga mahibaro mahitungod ha aton Dios, hi Jehova. Pananglitan, ha sulod hin mga duha ka tuig, kadam-an han mga kongregasyon an nag-aram han libro nga Magin Duok kan Jehova durante ha Pag-aram ha Biblia han Kongregasyon. Diri ba an pag-aram ha mga kalidad han Dios, ngan an kinasingkasing nga komento han kabugtoan, nagparig-on han imo gugma ha imo langitnon nga Amay? Nag-uuswag liwat an aton kahibaro ha Pulong han Dios samtang namamati kita hin maopay ha mga pahayag, pasundayag, ngan pagbasa ha Biblia. (Neh. 8:8) Pananglitan, hunahunaa la an espirituwal nga mga bahandi nga imo hinbabaroan kada semana samtang nag-aandam ngan namamati ka ha importante nga mga punto tikang ha nakaeskedyol nga pagbasa ha Biblia!

5. Paonan-o an mga katirok nakabulig ha imo nga iaplikar an imo mga hinbaroan ha Biblia ngan mapauswag an imo paagi ha pagsangyaw?

⁵ An mga katirok nagtututdo ha aton nga iaplikar an mga prinsipyo ha Biblia ha ngatanan nga bahin han aton kinabuhi. (1 Tes. 4:9, 10) Pananglitan, an Pag-aram ha Barantayan iginpapahiuyon ha mga panginahanglan han katawohan han Dios. Napagios ka na ba han usa nga Pag-aram ha Barantayan nga usisahon utro an imo mga tumong, pasayloon an imo igkasi-tumuroo, ngan pauswagon an kalidad han imo pag-ampo? An aton midweek nga katirok nagtututdo ha aton ha pagministeryo. Nahibabaro kita kon paonan-o isasangyaw an maopay nga sumat ngan kon paonan-o epektibo nga itututdo an mga prinsipyo ha Kasuratan.—Mat. 28:19, 20.

6. Paonan-o an mga katirok nagdadasig ha aton ngan nabulig nga magpabilin kita nga marig-on?

⁶ An mga katirok nagdadasig ha aton. Ini nga kalibotan ni Satanas nagpapaluya ha aton ha mental, emosyonal, ngan espirituwal. Ha kabaliktaran, an mga katirok nagdadasig ngan nagpaparig-on ha aton. (Basaha an Buhat 15:30-32.) Kasagaran nga ginhihisgotan ha aton mga katirok an katumanan han mga tagna ha Biblia. Salit, mas nagririg-on an aton pagtoo nga matutuman an mga saad ni Jehova para ha tidaraon. Syempre, diri la adton may bahin ha entablado an nagdadasig ha aton. An aton mga igkasi-tumuroo nga nagkukomento ngan kinasingkasing nga nagkakanta nagpaparig-on liwat ha aton. (1 Cor. 14:26) Ngan kon nakikiistorya kita ha aton kabugtoan antes ngan katapos han katirok, inaabat naton nga damu an aton kasangkayan nga nahigugma ha aton, ngan narirepreskohan gud kita.—1 Cor. 16:17, 18.

7. Kay ano nga importante gud tumambong kita ha mga katirok?

⁷ Nakakarawat naton an bulig han baraan nga espiritu durante han mga katirok. An ginhimaya nga hi  Jesu-Kristo nagsiring: “An may talinga sadang mamati ha ginsisiring han espiritu ha mga kongregasyon.” (Pah. 2:7) Oo, ginigiyahan ni Jesus an kongregasyon pinaagi han baraan nga espiritu. Kinahanglan naton an bulig han baraan nga espiritu basi maatohan an mga pagsulay, magkaada kompyansa, magin andam gud ha ministeryo, ngan makahimo hin maaramon nga mga desisyon. Diri ba sadang naton salingabuton an ngatanan nga tagana upod na an mga katirok ha kongregasyon basi makarawat naton ito nga espiritu?

8. Kon nakikita kita han kabugtoan ha mga katirok ngan kon nagkukomento ngan nagkakanta kita, paonan-o ini nakakabulig ha ira? (Kitaa liwat an kahon nga “Pirme Magaan an Iya Pag-abat Katapos han Katirok.”)

⁸ An mga katirok naghahatag ha aton hin higayon basi maipakita nga hinigugma naton an kabugtoan. Hunahunaa an mga problema nga naieksperyensyahan han mga kabugtoan ha imo kongregasyon. Diri urusahon nga nagsurat hi apostol Pablo: “Tagan naton hin atensyon an usa kag usa”! Katapos, iginsaysay ni Pablo nga maipapakita naton nga gintatagad naton an kabugtoan kon ‘diri naton papabay-an an aton pagkatirok.’ (Heb. 10:24, 25) An aton pagtambong ha mga katirok nagpapakita nga karuyag gud naton makaupod an aton kabugtoan, makiistorya ha ira, ngan interesado kita ha ira pagbati. An imo kinasingkasing nga komento ngan pagkanta nagdadasig liwat ha imo mga igkasi-tumuroo.—Col. 3:16.

9, 10. (a) Isaysay kon kay ano nga an ginsiring ni Jesus ha Juan 10:16 nabulig ha aton nga masabtan an pagkaimportante han pakigkatirok ha kabugtoan. (b) Kon regular kita nga natambong ha mga katirok, paonan-o kita mahimo makabulig ha usa nga iginsalikway han iya pamilya?

⁹ An mga katirok nabulig ha aton nga makighiusa ha mga igkasi-tumuroo. (Basaha an Juan 10:16.) Iginpariho ni Jesus an iya kalugaringon ha paraataman hin karnero, ngan an iya mga sumurunod ha panon han mga karnero. Hunahunaa: Kon may duha nga karnero nga aadto ha bungtod, an duha liwat aadto ha walog, ngan an usa pa nananabsab ha iba nga dapit, matatawag ba naton ito nga lima nga karnero sugad nga panon? Kasagaran nga an panon han mga karnero urosa nga nasunod ha paraataman. Sugad man, diri kita makakasunod ha aton Paraataman kon tinuyo nga ibubulag naton an aton kalugaringon. Kinahanglan naton makigkatirok ha aton kabugtoan basi magin bahin kita han “usa nga panon nga may usa nga paraataman.”

¹⁰ Kon natambong kita ha mga katirok, nakakabulig kita ha pagkaurosa han aton espirituwal nga pamilya. (Sal. 133:1) An pipira han aton igkasi-tumuroo iginsalikway han ira mga kag-anak ngan kabugtoan. Pero, nagsaad hi Jesus nga magkakaada hira hin espirituwal nga pamilya nga maghihigugma ngan magmamangno ha ira. (Mar. 10:29, 30) Kon regular nga natambong ka ha mga katirok, mahimo ka magin sugad hin tatay, nanay, bugto nga lalaki, o bugto nga babaye ha usa hinin hinigugma nga kabugtoan! Diri ba nagpapagios ini  ha aton nga mangalimbasog gud nga tumambong pirme ha ngatanan naton nga katirok?

11. Paonan-o an pagtambong ha mga katirok nabulig ha aton nga ihatag kan Jehova an takos para ha iya?

¹¹ Kon natambong kita ha mga katirok, iginhahatag naton kan Jehova an takos para ha iya. Sugad nga aton Maglalarang, hi Jehova takos dayawon, himayaon, pasalamatan, ngan pasidunggan. (Basaha an Pahayag 7:12.) Kon nag-aampo kita, nagkakanta, ngan nagyayakan mahitungod kan Jehova ha mga katirok, iginhahatag naton ha iya an takos gud para ha iya—an aton pagsingba. Ginpapabilhan naton an pribilehiyo nga pasidunggan an Usa nga damu gud an ginhimo para ha aton.

12. Ano an inaabat ni Jehova kon ginsusugot naton an iya sugo nga tumambong ha mga katirok?

¹² Hi Jehova takos liwat han aton pagsugot. Ginsusugo niya kita nga diri pabay-an an aton pagkatirok, labi na durante hinin panahon han kataposan. Kon kinaburut-on nga ginsusugot naton ito nga sugo, nalilipay hi Jehova. (1 Juan 3:22) Nakikita ngan ginpapabilhan niya an aton pangalimbasog nga makatambong ha tagsa nga katirok.—Heb. 6:10.

13, 14. Paonan-o kita nagigin duok kan Jehova ngan ha iya Anak durante han mga katirok?

¹³ Kon natambong kita ha mga katirok, iginpapakita naton kan Jehova nga karuyag naton magin duok ha iya ngan ha iya Anak. Ha aton mga katirok, gin-gigiyahan kita han aton Daku nga Magturutdo pinaagi han iya Pulong, an Biblia. (Isa. 30:20, 21) Bisan an mga diri-tumuroo nga natambong ha aton mga katirok nakakasiring: “An Dios aada gud ha iyo.” (1 Cor. 14:23-25) Ginbibendisyonan ni Jehova an aton mga katirok pinaagi han iya baraan nga espiritu ngan ginigiyahan gud kita niya pinaagi han mga katutdoan tikang ha Kasuratan. Salit kon natambong kita ha mga katirok, namamati kita ha tingog ni Jehova, inaabat naton an iya gugma, ngan nagigin duok kita ha iya.

¹⁴ Hi Jesus nagsiring: “Kon may duha o tulo nga nagkakatirok ha akon ngaran, aada ako ha butnga nira.” (Mat. 18:20) Ini nga iya pulong aplikado ha aton mga katirok. Sugad nga ulo han kongregasyon, an Kristo “naglalakat ha butnga” han kongregasyon han katawohan han Dios. (Pah. 1:20–2:1) Hunahunaa la ito! Hi Jehova ngan hi Jesus kaupod gud naton ngan ginpaparig-on kita nira ha aton mga katirok. Ano daw la an inaabat ni Jehova kon nakikita niya nga karuyag gud naton nga magin duok ha iya ngan ha iya Anak?

15. Paonan-o an pagtambong ha mga katirok nagpapakita nga karuyag naton sugton an Dios?

¹⁵ Kon natambong kita ha mga katirok, iginpapakita naton nga ginsusuportaran naton an pagkasoberano han Dios. Bisan kon ginsusugo kita ni Jehova nga tumambong ha mga katirok, diri kita niya ginpipirit. (Isa. 43:23) Salit kon pipilion naton nga sugton an iya sugo, iginpapakita naton nga hinigugma naton hiya ngan ginsusuportaran naton an iya pagkasoberano. (Roma 6:17) Pananglitan, bangin piriton kita han aton boss nga magtrabaho nga tungod hito diri na kita regular nga makakatambong ha mga katirok. Bangin kontrahon kita han gobyerno ngan tarhugon nga papagmultahon kita, piprisuhon, ngan sisirotan pa ngani kon magkakatirok kita. O bangin masulay kita nga magpahalibway imbes nga tumambong ha mga katirok. Hini nga mga kahimtang, kinahanglan naton pumili: Hin-o an aton susugton? (Buh. 5:29) Kon pipilion naton nga suportaran an pagkasoberano ni Jehova, mapapalipay naton an iya kasingkasing.—Prob. 27:11.

16, 17. (a) Paonan-o kita nahibaro nga importante gud an mga katirok para ha siyahan-siglo nga mga Kristiano? (b) Ano an inabat ni Brother George Gangas may kalabotan ha Kristiano nga mga katirok?

¹⁶ Katapos han urusahon nga nahitabo han Pentekostes 33 C.E., an mga Kristiano regular nga nagkatirok para magsingba kan Jehova. ‘Nagpadayon hira pagpamati hin maopay ha igintututdo han mga apostol, ngan kada adlaw urosa nga nagkakatirok hira ha templo.’ (Buh. 2:42, 46) An Griego nga pulong nga iginhubad nga  “nagpadayon” nagpapasabot hin pagpailob nga may duro nga pangalimbasog. Tungod ha pagkontra han gobyerno han Roma ngan han Judio nga mga lider han relihiyon, makuri para hito nga mga Kristiano an pagtambong ha mga katirok. Bisan pa hito, padayon hira nga nagkatirok.

¹⁷ Damu han mga surugoon ni Jehova yana an nagpapakita hin hilarom nga apresasyon ha Kristiano nga mga katirok. Hi George Gangas, nga nag-alagad sugad nga membro han Nagmamando nga Lawas ha sulod hin 22 ka tuig, nagsiring: “Para ha akon, an pakigkatirok ha kabugtoan usa han pinakamakalilipay nga bahin han akon kinabuhi ngan makapadasig gud ito. Karuyag ko nga usa ako han siyahan nga naabot ha Kingdom Hall ngan kataposan nga nabaya, kon mahihimo. Nalilipay ako kon kaistorya ko an katawohan han Dios. Kon kaupod ko hira, sugad hin kaupod ko an akon pamilya, inaabat ko nga aada ako ha espirituwal nga paraiso.” Hiya nagdugang: “Sugad la nga an kompas pirme natudlok tipanorte, an akon liwat ginhuhunahuna ngan ginhihingyap amo an pirme pagtambong ha mga katirok.”

18. Ano an imo inaabat may kalabotan ha aton mga katirok, ngan ano an imo determinasyon?

¹⁸ Ito ba liwat an imo inaabat may kalabotan ha pagtambong ha mga katirok basi magsingba kan Jehova? Kon oo, magin determinado nga magpadayon ngan magpailob basi regular nga makatambong ha mga katirok. Ha sugad nga paagi maipapakita mo nga nauyon ka ha ginsiring ni Hadi David: “Jehova, nahigugma ako hiton balay nga imo inuukyan.”—Sal. 26:8.