ANO nga butang an may kabug-aton nga 1.4 ka kilo la pero ginhuhulagway nga “pinakakomplikado nga butang nga . . . nadiskobrehan ha aton uniberso”? An utok han tawo. Makatirigamnan gud ito. Samtang mas damu an aton hinbabaroan mahitungod hito, mas naghihilarom an aton apresasyon ha “urusahon” nga mga buhat han Dios. (Sal. 139:14) Hisgotan naton an usa han damu nga nahihimo han aton utok—an imahinasyon. Ano an imahinasyon? Sumala ha usa nga diksyonaryo, ito “an imo abilidad nga maghunahuna hin eksena o ideya nga bag-o ngan makalilipay, o hin mga butang nga waray mo maeksperyensyahi.” Basado hini nga kahulogan, diri ba mauyon ka nga pirme mo gud ginagamit an imo imahinasyon? Pananglitan, nakabasa o nakabati ka na ba mahitungod ha usa nga lugar nga waray mo pa makadtui? Bisan waray ka pa makakadto, diri ba nahahanduraw mo ito? Oo, kon may ginhuhunahuna kita nga diri naton nakikita, nababatian, natitilawan, nakakaptan, o naaamyon, ginagamit naton an aton imahinasyon. An Biblia nasiring nga an tawo gindisenyo ngan ginlarang ha ladawan han Dios. (Gen. 1:26, 27) Diri ba nagpapasabot ito nga hi Jehova mismo may-ada imahinasyon? Tungod kay ginlarang kita niya nga may-ada hini nga abilidad, makatadunganon la nga naglalaom hiya nga gagamiton naton ini basi masabtan an iya kaburut-on. (Ekles. 3:11) Paonan-o naton magagamit hin maaramon an aton imahinasyon basi mahimo ito, ngan ano an diri maaramon nga paggamit han imahinasyon an sadang naton likyan?

(1) Pagpantasya ha sayop nga panahon o mahitungod ha sayop nga butang.

Diri man sayop an pagpantasya. Ngani, may pamatuod nga an pagpantasya mahimo magin mapulsanon. Pero tungod kay an Eklesiastes 3:1 nasiring nga an “tagsa nga butang may-ada usa ka panahon,” posible nga magbuhat kita hin mga butang ha sayop nga panahon. Pananglitan, kon iba an aton ginhihinunahuna durante han mga katirok ha kongregasyon o han aton personal nga pag-aram, an aton ba imahinasyon nakakabulig o nakakaulang? Hi Jesus mismo naghatag hin seryoso nga pahamangno ha peligro ha paghinunahuna hin sayop, sugad han imoral nga mga pantasya. (Mat. 5:28) Bangin maghinunahuna kita hin mga butang nga makakapasubo gud kan Jehova. An imoral nga mga pantasya mahimo magresulta ha pakabuhat hin imoralidad. Magin determinado nga an imo imahinasyon diri magpahirayo ha imo kan Jehova!

(2) Paghunahuna nga an materyal nga karikohan naghahatag hin nagpapadayon nga seguridad.

An materyal nga mga butang kinahanglanon ngan mapulsanon. Pero sigurado nga mapapakyas kita kon huhunahunaon naton nga ito an naghahatag hin tinuod nga seguridad ngan kalipay. An maaramon nga hi Solomon nagsiring: “An kanan riko manggad amo an iya masarig nga syudad, ngan ginhuhunahuna niya ini sugad nga hitaas nga padir.” (Dar. [Prob.] 18:11, Baraan nga  Biblia) Tagda pananglitan an nahitabo han Septyembre 2009. Sobra 80 porsyento han Manila ha Pilipinas an ginbaha tungod han duro nga pag-inuran. Waray ba mabahai an may damu nga panag-iya? Usa nga riko nga lalaki nga nawad-an hin damu nga panag-iya an nagsiring, “An baha waray ginpili; an mga riko ngan pobre pariho nagkuri ngan nag-antos.” Kadam-an an naghuhunahuna nga an materyal nga mga butang naghahatag hin tinuod nga seguridad, pero sayop gud ito.

(3) Sobra nga pagkinabaraka ha mga butang nga bangin diri gud mahitatabo.

Hi Jesus nagsagdon ha aton nga diri sobra nga ‘magkinabaraka.’ (Mat. 6:34) An sobra nga nagkikinabaraka aktibo an imahinasyon. Madali la maubos an aton kusog ha sobra nga pagkinabaraka ha mga problema nga waray pa man mahitabo o bangin diri gud mahitatabo. Iginpapakita han Kasuratan nga an sugad nga kabaraka mahimo magresulta hin panluya ngan depresyon pa ngani. (Prob. 12:25) Mapulsanon gud nga iaplikar an sagdon ni Jesus nga diri sobra nga magkinabaraka ngan an problema la yana nga adlaw an hunahunaon.

(1) Abanse nga paghunahuna han peligroso nga mga sitwasyon ngan likyan ito.

Gin-aaghat kita han Biblia nga magin maaramon ngan abanse nga maghunahuna. (Prob. 22:3) Pinaagi ha paggamit han aton imahinasyon, mahuhunahuna naton an posible nga resulta han aton desisyon. Pananglitan, kon gin-imbitar ka ha usa nga katitirok, paonan-o makakabulig an imo imahinasyon basi makagdesisyon hin maaramon kon matambong ka ba o diri? Katapos tagdon kon hin-o an mga imbitado, kadamu han mga imbitado, ngan kon diin ngan san-o ito nga katitirok, hunahunaa: ‘Ano an posible mahitabo didto?’ Nahahanduraw mo ba nga maopay ito nga katitirok ngan uyon ha mga prinsipyo ha Biblia? Hini nga paagi, mahahanduraw mo an katitirok. An paggamit han imo imahinasyon ha pagdesisyon hin maaramon mabulig ha imo nga malikyan an mga kahimtang nga makakadaot han imo espirituwalidad.

(2) Pagrehers ha hunahuna kon paonan-o aatubangon an magkuri nga problema.

An imahinasyon nangangahulogan liwat hin “abilidad ha pag-atubang ngan paglampos ha problema.” Pananglitan nagkaada kamo diri pagsinabtanay han imo kakongregasyon. Ano an imo bubuhaton basi makigmurayaw hito nga bugto? Damu nga butang an sadang mo tagdon. Paonan-o hiya nakikigkomunikar? San-o an pinakamaopay nga panahon nga pag-istoryahan an problema? Ano an pinakamaopay nga isiring  ngan paonan-o ito isisiring? Pinaagi ha paggamit han imo imahinasyon, marirehers mo an iba-iba nga paagi ha pag-atubang han sitwasyon ngan mapipili mo an pinakaepektibo. (Prob. 15:28) An abanse nga paghunahuna kon paonan-o aatubangon an makuri nga sitwasyon mabulig nga matipigan an kamurayawan ha kongregasyon. Maopay gud ito nga paggamit han imahinasyon.

(3) Pagpauswag han kalidad han imo personal nga pagbasa ngan pag-aram ha Biblia.

Importante an pagbasa ha Biblia kada adlaw. Pero labaw pa hito an ginkikinahanglan. Kinahanglan naton sabton an praktikal nga mga leksyon ha Biblia ngan iaplikar ito ha aton kinabuhi. An aton apresasyon ha mga paagi ni Jehova kinahanglan pahilarumon pinaagi han aton pagbasa ha Biblia. Makakabulig an aton imahinasyon basi mahimo ito. Paonan-o? Tagda an libro nga Subara an Ira Pagtoo. An pagbasa ha mga asoy hini nga libro magpapagios ha aton nga gamiton an aton imahinasyon pinaagi ha paghanduraw han mga eksena ngan gintikangan han tagsa nga tawohan han Biblia. Ginbubuligan kita hito nga makita an ira nakita, mabatian an ira nabatian, maamyon an ira naamyon, ngan abaton an ira inabat. Salit nakikita naton an mag-opay nga leksyon ngan makaparig-on nga mga impormasyon ha mga asoy ha Biblia nga bangin ginhuhunahuna naton nga maaram na kita. An paggamit han aton imahinasyon hini nga paagi durante han aton personal nga pagbasa ngan pag-aram ha Biblia mabulig nga magin mapulsanon gud ito.

(4) Pagkultibar ngan pagpakita hin empatiya.

An empatiya maopay nga kalidad nga ginhuhulagway sugad nga pag-abat han kasakit han iba ha aton kasingkasing. Tungod kay hi Jehova ngan hi Jesus nagpakita hin empatiya, maopay gud nga subaron naton hira. (Eks. 3:7; Sal. 72:13) Paonan-o naton makukultibar ini nga kalidad? Usa han pinakamaopay nga paagi amo an paggamit han aton imahinasyon. Bangin waray pa gud naton maeksperyensyahi an problema han aton igkasi-tumuroo. Pero mahimo mo pakianhan an imo kalugaringon: ‘Kon ako an aada ha iya kahimtang, ano an akon aabaton? Ano an akon kinahanglan?’ An paghunahuna han baton hini nga mga pakiana mabulig ha aton nga mas maipakita an empatiya. Oo, mag-uuswag kita ha ngatanan nga bahin han aton pagkinabuhi sugad nga Kristiano kon magpapakita kita hin empatiya, pati na ha aton ministeryo ngan ha aton relasyon ha kabugtoan.

(5) Paghanduraw han aton magigin kinabuhi ha bag-o nga kalibotan.

Mababasa ha Kasuratan an damu, matin-aw, ngan detalyado nga paghulagway han magigin kinabuhi ha bag-o nga kalibotan nga iginsaad han Dios. (Isa. 35:5-7; 65:21-25; Pah. 21:3, 4) Makikita ha aton mga publikasyon an makaruruyag nga mga retrato nga naghuhulagway hito. Kay ano? An mga retrato nag-aaghat ha aton imahinasyon ngan nabulig ha aton nga mahanduraw an aton kalugaringon nga nagpapahimulos hito nga mga bendisyon. Hi Jehova, an naglarang han imahinasyon, maaram gud kon mationan-o ini kaepektibo. Kon gagamiton naton ini ha paghanduraw han iya mga saad, magpaparig-on ini han aton pagsarig nga matutuman gud ito ngan mabulig ini ha aton nga magpabilin nga matinumanon bisan kon nag-aantos kita yana hin mga pagsari.

Mahigugmaon nga iginhatag ha aton ni Jehova inin urusahon nga abilidad nga imahinasyon. Mabulig gud ini ha aton nga bug-os nga makag-alagad ha iya ha adlaw-adlaw nga pagkinabuhi. Hinaot ipakita naton nga mapasalamaton gud kita ha Humaratag hinin makaruruyag nga regalo pinaagi ha maaramon nga paggamit hini kada adlaw.