AN ATON ministeryo importante ngan mapulsanon. Pero diri ngatanan nga aton ginsasangyawan nag-aapresyar hini. Bisan kon an mga tawo interesado ha mensahe han Biblia, bangin diri nira nasasabtan nga importante an pag-aram ha Pulong han Dios kaupod naton.

Tagda pananglitan hi Gavin, nga natambong ha mga katirok pero nadiri nga dumarahan hin pag-aram ha Biblia. Nagsiring hiya nga gutiay la an iya hinbabaroan ha Biblia, ngan naaawod hiya nga masabtan ito han iba. Nadiri hiya nga mauwat ngan paapihon ha usa nga relihiyon. Para ha imo, diri na gud ba hi Gavin magpapadumara hin pag-aram ha Biblia? Kon ito an imo ginhuhunahuna, tagda an maopay nga epekto han katutdoan han Biblia nga mahimo makarawat han usa nga tawo. Ginsidngan ni Jehova an iya katawohan hadto: “An akon yakan matunaw [o, “maturo,” Maupay nga Sumat] sugad han tun-og, sugad han taligsik ngada han huboy nga banwa.” (Deut. 31:19, 30; 32:2) An mga butang nga aton hibabaroan mahitungod ha tun-og nag-iilustrar kon paonan-o naton epektibo nga mabubuligan an “ngatanan nga klase hin tawo” ha ministeryo.—1 Tim. 2:3, 4.

An tun-og nakakapakalma. An tun-og hinay-hinay nga nabubug-os samtang an alisngaw han tubig nagigin gudtiay nga turo. Paonan-o an mga pulong ni Jehova tinuro “sugad han tun-og”? Nagyakan hiya ha iya katawohan ha buotan, kalmado, ngan makonsiderasyon nga paagi. Ginsusubad naton hiya kon ginrirespeto naton an panhunahuna han iba. Gin-aaghat naton an mga tawo nga maghunahuna ngan magdesisyon. Kon makonsiderasyon kita, mas kakarawaton an aton ginsisiring ngan magigin mas epektibo an aton ministeryo.

An tun-og nakakarepresko. An aton ministeryo nakakarepresko ha iba kon ginhuhunahuna naton an pinakamaopay nga paagi ha pagkultibar han ira interes. An bugto nga hi Chris, nga siyahan nga nagtanyag kan Gavin hin pag-aram ha Biblia, waray magpirit kan Gavin nga karawaton ito. Lugod, gumamit hiya hin iba-iba nga paagi basi magin mas komportable hi Gavin ha pakighisgot mahitungod ha Biblia. Iginsaysay ni Chris ha iya nga may tema an Biblia ngan an paghibaro hito mabulig ha iya nga mas maintindihan an ginhihisgotan ha mga katirok. Katapos, nagsiring hi Chris nga an mga tagna ha Biblia an nakakombinse ha iya nga tinuod an Biblia. Nagresulta ini hin damu pa paghisgot mahitungod han katumanan han mga tagna ha Biblia. Narepreskohan hi Gavin hini nga pag-istorya salit ginkarawat niya an pag-aram ha Biblia.

An tun-og nakakasustinir han kinabuhi. Durante han katpaso ha Israel, usahay diri nauran ha sulod hin pipira ka bulan. Kon waray an tun-og, malalaya ngan mamamatay an mga tanom. Yana, nahitatabo an espirituwal nga huraw sugad han igintagna ni Jehova. (Amos 8:11) Nagsaad hiya nga an mga dinihogan magigin “sugad hin tun-og tikang kan Jehova” samtang ira iginpapasamwak an mensahe han Ginhadian, nga ginsusuportaran han “iba nga mga karnero.” (Mika 5:7; Juan 10:16) Ginpapabilhan ba naton an mensahe han Ginhadian sugad nga bahin han tagana ni Jehova ha pagsustinir han kinabuhi hadton nauuhaw han kamatuoran?

An tun-og bendisyon ni Jehova. (Deut. 33:13) An aton ministeryo mahimo magin bendisyon hadton nakarawat hito. An pag-aram ha Biblia nagin bendisyon kan Gavin kay nabaton hito an ngatanan niya nga pakiana. Waray pag-iha nabawtismohan hiya, ngan yana kaupod han iya asawa nga hi Joyce, malipayon gud hira nga nakikigbahin ha pagsangyaw han mensahe han Ginhadian.

Kon ginhuhunahuna naton nga an aton ministeryo pariho han tun-og, madadasig kita nga pabilhan an aton pakigbahin hito. Paonan-o? An usa nga turo gutiay la an nahihimo, pero an minilyon nga turo nakakahulos han bug-os nga tuna. Ha pariho nga paagi, bangin para ha aton gutiay gud la an aton nahihimo ha ministeryo. Pero an urosa nga pangalimbasog han ngatanan nga surugoon ni Jehova nakakabulig nga masangyawan an “ngatanan nga nasud.” (Mat. 24:14) An aton ba ministeryo bendisyon ni Jehova ha mga tawo? Magigin bendisyon ito kon an mensahe nga aton iginsasangyaw pariho han tun-og—nakakapakalma, nakakarepresko, ngan nakakasustinir han kinabuhi!