1, 2. Ano nga pagsari an inatubang ni Jepte ngan han iya anak?

SUGAD hin nagabutan hin tunok an batan-on nga daraga han makita niya nga talwas nga umuli an iya tatay tikang ha pakig-away. Tungod han daku nga kadaogan, malipayon nga gintapo niya an iya tatay pinaagi hin sayaw ngan kanta. Pero imbes nga duyogan hiya, gin-gisi han tatay an kalugaringon nga bado ha pakig-away ngan sininggit: “Pastilan, anak ko! Ginsasamad mo an akon kasingkasing!” Katapos ginsumatan niya an iya anak nga may iginsaad hiya kan Jehova nga makakapabag-o gud ha bug-os nga kinabuhi han iya anak. Ito nga saad nagpapasabot nga ini nga daraga diri puydi mag-asawa o magkaanak. Bisan pa hito, maopay gud an baton han daraga ngan gin-aghat niya an iya tatay nga tumanon an iginsaad kan Jehova. An iya ginsiring nagpapakita nga may-ada hiya daku nga pagtoo. Natapod hiya nga anoman an isugo ha iya ni Jehova, para ito ha iya kaopayan. (Huk. 11:34-37; Maupay nga Sumat) Iginhambog gud han tatay an iya anak kay maaram hiya nga an pagin andam han iya anak  nga suportaran an iya desisyon magriresulta ha pag-uyon ni Jehova.

² Hi Jepte ngan an iya anak bug-os nga sinarig kan Jehova ngan ha Iya mga paagi, bisan kon makuri an paghimo hito. Kombinsido hira nga an pakakarawat han pag-uyon han Dios takos gud han anoman nga pagsakripisyo.

3. Kay ano nga makakabulig ha aton an ehemplo ni Jepte ngan han iya anak?

³ Maaram kita nga diri pirme masayon an pagpabilin nga matinumanon kan Jehova. Kinahanglan naton “makig-away para ha pagtoo.” (Jud. 3) Basi mabuligan kita nga mahimo ini, hisgotan naton an mga pagsari nga nalamposan ni Jepte ngan han iya anak. Paonan-o hira nagpabilin nga matinumanon kan Jehova?

4, 5. (a) Ano an iginsugo ni Jehova ha mga Israelita pagsulod nira ha Tuna nga Iginsaad? (b) Sumala ha Salmo 106, ano an nahitabo ha mga Israelita tungod han ira pagin diri masinugtanon?

⁴ Kada adlaw, hi Jepte ngan an iya anak posible nga napapahinumdoman han maraot nga resulta han pagkadiri-matinumanon han mga Israelita kan Jehova. Mga 300 ka tuig na an naglabay, ginsugo an ira mga kaapoy-apoyan nga poohon an ngatanan nga naukoy ha Tuna nga Iginsaad nga nagsisingba ha buwa nga mga dios. (Deut. 7:1-4) Waray magmasinugtanon an mga Israelita salit nasubad nira an mga taga-Canaan, nga nagsisingba ha buwa nga mga dios ngan nagbubuhat hin maraot.—Basaha an Salmo 106:34-39.

⁵ Tungod hito nga pagrebelde, waray na hira uyuni ni Jehova; waray na niya hira proteksyuni. (Huk. 2:1-3, 11-15; Sal. 106:40-43) Sigurado nga makuri gud para ha mga pamilya nga nahigugma kan Jehova nga magpabilin nga matinumanon hito nga panahon! Bisan pa hini, an Biblia nasiring nga may mga matinumanon sugad kanda Jepte ngan han iya anak, Elkana, Hana, ngan Samuel, nga determinado nga makarawat an pag-uyon ni Jehova.—1 Sam. 1:20-28; 2:26.

6. Ano an mga impluwensya ha kalibotan yana, ngan ano an kinahanglan naton buhaton?

⁶ Nagkikinabuhi kita ha kalibotan nga an mga tawo naghuhunahuna ngan nagios pariho ha mga taga-Canaan hadto—nakapokus hira ha sekso, kamadarahog, ngan materyalismo. Pero pariho han ginbuhat ni Jehova ha mga Israelita hadto, gintatagan kita niya yana hin matin-aw nga mga pahamangno basi panalipdan kita kontra hito nga mga impluwensya. Ano an aton hibabaroan tikang ha sayop han mga Israelita? (1 Cor. 10:6-11) Kinahanglan mangalimbasog kita nga wad-on an bisan ano nga panhunahuna nga pariho ha mga taga-Canaan. (Roma 12:2) Nangangalimbasog ba kita ha pagbuhat hito?

7. (a) Ano an ginbuhat kan Jepte han iya mga igkasi-Israelita? (b) Ano an ginbuhat ni Jepte?

⁷ Ha panahon ni Jepte, an pagkadiri-masinugtanon han mga Israelita nagresulta ha ira pagkauripon ha mga Pilisteohanon ngan Amonitanhon. (Huk. 10:7, 8) Pero an naeksperyensyahan ni Jepte nga mga pagsari diri la tikang ha kaaway nga mga nasud kondi tikang liwat ha iya kabugtoan ngan ha mga lider han Israel. Tungod han kaawa ngan kangalas han iya kabugtoan ha tatay, ginpaiwas nira hiya ngan waray ihatag an iya panurundon sugad nga suhag. (Huk. 11:1-3) Waray magpaapekto hi Jepte han maraot nga ginbuhat han iya kabugtoan. Han nakimalooy an mga tigurang nga buligan an nasud, waray niya hira igbalewaray basi makabulos, lugod ginbuligan niya hira. (Huk. 11:4-11) Ano an nakabulig kan Jepte nga gumios sugad nga espirituwal nga tawo?

8, 9. (a) Ano nga mga prinsipyo ha Mosaiko nga Balaud an posible nga nakabulig kan Jepte? (b) Ano an mas importante kan Jepte?

⁸ Hi Jepte diri la maisugon nga girriro kondi  maaram liwat hiya kon paonan-o gintratar ni Jehova an mga Israelita. Pamilyar gud hi Jepte ha kasaysayan han Israel salit nasabtan gud niya kon ano an husto ngan sayop ha mga mata ni Jehova. (Huk. 11:12-27) An mga prinsipyo han Dios nga ginbasaran han Mosaiko nga Balaud amo an naggiya han iya hunahuna ngan kasingkasing. Maaram hiya nga karuyag ni Jehova nga maghigugmaay an iya katawohan imbes nga magdumot. An Balaud nagtututdo liwat nga diri sadang igbalewaray an panginahanglan han usa, bisan kon ito nga tawo “nangangalas” ha iya.—Basaha an Eksodo 23:5; Lebitiko 19:17, 18.

⁹ An ehemplo ni Jose, nga nalooy ha iya kabugtoan bisan kon “hira nagdumot ha iya,” posible nga naggiya liwat ha ginbuhat ni Jepte. (Gen. 37:4; 45:4, 5) An pagpamalandong hini nga ehemplo posible nga nakabulig kan Jepte nga gumios ha paagi nga nakakapalipay kan Jehova. Sigurado nga nasakitan gud hiya ha ginbuhat han iya kabugtoan, pero waray ito makaulang ha iya pag-alagad kan Jehova ngan pagbulig ha Iya katawohan. (Huk. 11:9) Mas importante kan Jepte an pakig-away basi depensahan an ngaran ni Jehova kay han iya mga pagbati. Determinado hiya nga magpabilin nga matinumanon kan Jehova, salit ginbendisyonan hiya pati na an mga Israelita.—Heb. 11:32, 33.

10. Paonan-o an mga prinsipyo nga tikang ha Dios nabulig ha aton yana nga gumios sugad nga mga Kristiano?

¹⁰ Ano an aton hibabaroan ha ehemplo ni Jepte? Bangin ginpakyas kita o gintratar hin maraot han kabugtoan. Kon mahitabo ini ha aton, diri kita sadang umundang pagtambong ha mga katirok o pag-alagad kan Jehova ngan ha pakig-upod ha kongregasyon. Pariho kan Jepte, magpagiya kita ha mga prinsipyo han Dios basi malamposan naton an magkuri nga kahimtang ngan magin maopay kita nga susbaranan.—Roma 12:20, 21; Col. 3:13.

11, 12. Ano an saad ni Jepte, ngan ano an kahulogan hini?

¹¹ Maaram hi Jepte nga kinahanglan niya an bulig han Dios basi matalwas an mga Israelita tikang ha mga Amonitanhon. Nagsaad hiya kan Jehova nga kon padaugon hiya, ihahatag niya kan Jehova sugad nga “halad nga sinunog” an siyahan nga magawas ha iya balay pagbalik niya tikang ha pakig-away. (Huk. 11:30, 31) Ano an kahulogan hini?

¹² An paghalad hin tawo ginkakangalasan ni Jehova. Salit sigurado nga diri literal nga paghalad an ginhuhunahuna ni Jepte. (Deut. 18:9, 10) Ha Mosaiko nga Balaud, an halad nga sinunog espesyal nga regalo nga bug-os nga iginhahatag kan Jehova. Salit karuyag sidngon ni Jepte nga an tawo nga ihahatag niya kan Jehova mag-aalagad ha tabernakulo ha bug-os nga kinabuhi. Ginpamatian ni Jehova hi Jepte ngan ginbendisyonan hiya hin daku nga kadaogan. (Huk. 11:32, 33) Pero hin-o an ihahatag ha Dios sugad nga “halad nga sinunog”?

13, 14. Ano an iginpapakita han ginsiring ni Jepte ha Hukom 11:35 mahitungod han iya pagtoo?

¹³ Hunahunaa an eksena nga iginhulagway ha tinikangan hini nga artikulo. Pag-uli ni Jepte tikang ha pakig-away, an siyahan nga tumapo ha iya amo an iya hinigugma nga anak, an iya uusa la nga anak! Yana, tutumanon ba niya an iya saad? Ihahatag ba niya an iya anak basi mag-alagad ha tabernakulo ha bug-os nga kinabuhi?

¹⁴ Sigurado nga an mga prinsipyo han Dios an naggiya utro kan Jepte basi makahimo hin husto nga desisyon. Posible nga nahinumdoman niya an Eksodo 23:19, nga nagsusugo ha katawohan han Dios nga magin andam paghatag han pinakamaopay kan Jehova. An Balaud nasiring liwat nga kon magsaad an usa nga tawo, kinahanglan niya ito tumanon. Ito  nasiring: “Kon an usa nga lalaki magsaad hin usa nga saad kan Jehova . . . , diri niya pagtalapason an iya pulong; iya buhaton sumala han ngatanan nga ginawas ha iya baba.” (Num. 30:2) Pariho han matinumanon nga hi Hana, nga posible nga kadungandungan ni Jepte, kinahanglan tumanon ni Jepte an iya saad bisan kon maaram hiya kon ano an magigin resulta hito para ha iya ngan ha iya anak. Tungod kay an iya anak mag-aalagad ha tabernakulo, diri hiya magkakaanak. Salit waray magigin katulinan hi Jepte ngan waray makakakarawat han iya panurundon. (Huk. 11:34) Bisan pa hini, ha Hukom 11:35 hi Jepte nagsiring: “Binungat ko an akon baba ngadto kan Jehova, ngan diri ako makakabakwi.” An pagkamatinumanon ni Jepte bisan pa kon daku an kinahanglan niya isakripisyo, gin-uyonan ngan ginbendisyonan han Dios. Sugad ba liwat hito an imo bubuhaton?

15. Ano nga saad an ginhimo han damu ha aton, ngan paonan-o naton maipapakita an pagkamatinumanon?

¹⁵ Han nagdedikar kita kan Jehova, nagsaad kita nga bubuhaton naton an iya kaburut-on anoman an mahitabo. Maaram kita nga basi matuman naton ito nga saad, kinahanglan naton magsakripisyo. Pero an aton pagin andam magsakripisyo nasasarihan labi na kon ginsusugo kita nga buhaton an mga butang nga diri naton karuyag. Kon nagsasakripisyo kita ngan nag-aalagad ha Dios bisan kon diri masayon an pagbuhat hito, ginpapamatud-an naton nga matinumanon kita. Bisan kon masakit para ha aton an aton ginhihimo nga mga sakripisyo, mas damu pirme an mga bendisyon nga aton nakakarawat tikang kan Jehova. (Mal. 3:10) Hisgotan naman naton an anak ni Jepte.

16. Ano an ginbuhat han anak ni Jepte may kalabotan han saad han iya tatay? (Kitaa an retrato ha tinikangan hini nga artikulo.)

¹⁶ Posible nga diri masayon para ha anak ni Jepte nga karawaton an mga resulta han saad han iya tatay. Diri ini pariho ha saad ni Hana nga naghatag han iya anak nga hi Samuel para mag-alagad ha tabernakulo sugad  nga Nasareo. (1 Sam. 1:11) An Nasareo puydi mag-asawa ngan magpamilya. Pero an anak ni Jepte ihahatag sugad nga bug-os nga “halad nga sinunog,” salit diri hiya mag-aasawa ngan mag-aanak. (Huk. 11:37-40) Posible unta hiya makaasawa han pinakamaopay nga lalaki ha nasud tungod kay anak hiya han madaugon nga lider han Israel. Pero yana magigin surugoon hiya ha tabernakulo. Ano an iya ginbuhat? Iginpakita niya nga prayoridad niya an iya pag-alagad kan Jehova. Hiya nagsiring: “Amay ko, binungat mo an imo baba ngadto kan Jehova; buhata ha akon sumala hadto nga ginowa tikang ha imo baba.” (Huk. 11:36) Iginsakripisyo niya an iya hingyap nga mag-asawa ngan magkaanak basi masuportaran an tinuod nga pagsingba. Paonan-o naton masusubad an iya pagin andam magsakripisyo?

17. (a) Paonan-o naton masusubad an pagtoo ni Jepte ngan han iya anak? (b) Paonan-o an Hebreo 6:10-12 nag-aaghat ha imo nga magin andam ha pagsakripisyo?

¹⁷ Yinukot nga Kristiano nga mga batan-on an andam magsakripisyo nga diri mag-asawa o magkaanak—ha pagkayana—basi bug-os nga makag-alagad kan Jehova. May mga edaran liwat nga iginsasakripisyo an panahon nga makaupod an ira mga anak ngan apo basi magboluntaryo ha teokratiko nga mga proyekto han pagpanukod o umiskwela ha School for Kingdom Evangelizers ngan mag-alagad ha mga lugar nga mas daku an panginahanglan hin magwarali. Gindudugangan liwat han iba an ira pakigbahin ha ministeryo ha panahon han Memoryal. Ini nga kinasingkasing nga pag-alagad nakakapalipay gud kan Jehova, ngan diri gud niya hingangalimtan an ira mga buhat ngan gugma para ha iya. (Basaha an Hebreo 6:10-12.) Puydi mo ba dugangan an imo mga pagsakripisyo basi bug-os nga makag-alagad kan Jehova?

18, 19. Ano an aton hibabaroan ha asoy han Biblia mahitungod kan Jepte ngan han iya anak, ngan paonan-o naton hira masusubad?

¹⁸ Bisan kon puno hin pagsari an kinabuhi ni Jepte, nagdesisyon hiya uyon ha panhunahuna ni Jehova. Waray hiya magpaimpluwensya ha mga tawo ha iya palibot. Nagpabilin hiya nga matinumanon bisan pa kon ginpakyas hiya han iba. Ginbendisyonan ni Jehova hi Jepte ngan an iya anak tungod han ira pagin andam magsakripisyo, ngan pariho hira gin-gamit ni Jehova ha pagsuporta ha tinuod nga pagsingba. Han iginsalikway han iba an mga suruklan han Dios, hi Jepte ngan an iya anak padayon nga nagsunod hito.

¹⁹ Gin-aaghat kita han Biblia nga “magsubad . . . ha mga nakakarawat han mga saad tungod han pagtoo ngan pagpailob.” (Heb. 6:12) Hinaot subaron naton hi Jepte ngan an iya anak pinaagi ha pagkinabuhi uyon hini nga importante nga kamatuoran nga ira iginpakita: An pagkamatinumanon nagriresulta ha pag-uyon han Dios.