Hi Rose nagsiring: “May problema ako ha kahimsog tikang pa han akon kabata, salit naabat ako pirme hin kaul-ol. Nawarayan ako kalipay ha kinabuhi.” Usa han iya daku nga problema amo an diri pakapokus usahay ha iya pag-aram ha Biblia ngan ha mga butang may kalabotan ha iya pag-alagad. Pero nabuligan gud hiya han mga pulong ni Jesus ha Mateo 19:26: “Ha Dios an ngatanan posible.” Hinbaroan ni Rose nga may iba pa nga paagi ha pag-aram. Tungod han kaul-ol nga iya inaabat, usahay nakukurian hiya pagbasa salit namamati na la hiya ha mga rekording han Biblia ngan mga publikasyon nga basado ha Biblia. * “Kon waray ito nga mga probisyon, diri ako maaram kon paonan-o ko titipigan an akon espirituwalidad,” siring niya.

Kon nasusubo hi Rose tungod kay diri na niya nahihimo an iya mga nabubuhat hadto, nakakakuha hiya hin pagliaw tikang ha 2 Corinto 8:12: “Labi nga makalilipay kon an tawo disidido gud maghatag, depende ha iya gintatag-iya, diri depende ha diri niya gintatag-iya.” Ini nga mga pulong nagpapahinumdom kan Rose nga nalilipay an Dios ha kon ano an iya nahihimo tungod kay ginbubuhat niya an iya mahihimo bisan pa han iya limitasyon.

Hi Delphine nga gin-unabi kanina, nagsiring: “Han  namatay an akon 18 anyos nga anak, duro gud an akon kasakit ngan kahuna ko nga diri na ako makakapadayon ha kinabuhi. Iba na gud an ngatanan.” Kondi nakakuha hiya hin pagliaw ha Salmos 94:19, diin an salmista nagsiring ha Dios: “Ha kadam-an ha akon pamurobuut [o, kabaraka] ha sulud ko, an imo mga pagli-aw nakalipay ha akon kalag.” Hiya nagsiring: “Nag-ampo ako kan Jehova nga buligan ako makabiling hin mga buruhaton nga makakabulig nga maibanan an akon kasakit.”

Nagin sagipo hiya ha mapulsanon nga pagboluntaryo nga buruhaton. Ha urhi, iginpariho niya an iya kalugaringon ha krayola—bisan an utod-utod na nagagamit la gihap ha pagkolor. Sugad man, bisan kon masurub-on hiya, nakita niya nga puydi la gihap hiya makabulig ha iba. Hiya nagsiring: “Nakita ko nga kon ginagamit ko an mga prinsipyo ha Biblia ngan an mga paagi ha paghunahuna uyon hito ha pagbulig ha akon mga gindudumarahan hin pag-aram, ito an paagi han pagbulig ngan pagliaw ha akon ni Jehova.” Naglista hiya hin mga tawohan ha Biblia nga nag-agi liwat hin duro nga kasubo. Hiya nagsiring, “Waray ruhaduha, hira ngatanan mainampoon nga mga tawo.” Hinbaroan liwat niya nga “malalamposan la an mga problema pinaagi ha pagbasa han Biblia.”

An pag-aram han Biblia nagtutdo liwat kan Delphine nga magpokus ha unhan, diri ha naglabay. An paglaom nga gin-unabi ha Buhat 24:15 nakakaliaw ha iya: “May pagkabanhaw han mga matadong ngan mga diri-matadong.” Mationan-o hiya kasigurado nga babanhawon ni Jehova an iya anak? Hi Delphine binaton: “Nakikita ko an akon anak ha tidaraon. Nakaeskedyol na an amon ‘date,’ nga sugad hin nakabutang ito ha kalendaryo han akon Amay. Nahahanduraw ko nga kaupod ko hiya ha amon garden sugad la nga klaro nga nakita ko hiya ngan ginhigugma ha adlaw nga igin-anak ko hiya.”