“O Parapamati han pag-ampo, ha imo madaop an ngatanan nga klase hin tawo.”​—Salmo 65:2.

An iba nag-aampo kay nakakaopay kuno ito han ira pag-abat, bisan kon diri hira natoo nga may namamati ha ira. Pero an pag-ampo diri la kay nakakaopay han aton pag-abat ngan nakakabulig nga malamposan an aton problema. Ginpapasarig kita han Biblia nga “hi Jehova * hirani ha ngatanan nga natawag ha iya, ha ngatanan nga natawag ha iya uyon ha kamatuoran. . . . Namamati hiya han ira pangaraba para hin bulig.”​—Salmo 145:18, 19.

Salit makakasiguro kita nga hi Jehova nga Dios namamati ha pag-ampo han iya mga magsiringba. Hiya nagsiring: “Matawag kamo ha akon ngan madaop ngan mag-aampo ha akon, ngan mamamati ako ha iyo.”​—Jeremias 29:12.

“Magpadayon ha pag-ampo.”​—Roma 12:12.

Gin-aaghat kita han Biblia nga “mag-ampo pirme” ngan ‘padayon nga mag-ampo ha tagsa nga higayon.’ Matin-aw nga karuyag ni Jehova nga Dios nga mag-ampo kita ha iya.​—Lucas 18:1; Efeso 6:18.

Kay ano nga karuyag han Dios nga mag-ampo kita ha iya? Tagda ini: An usa nga kag-anak nalilipay kon an iya gutiay pa nga anak nangangaro hin bulig ha iya. Syempre, bangin maaram na an tatay han panginahanglan o inaabat han iya anak. Pero kon nababatian niya an iya anak nga nangangaro hin bulig ha iya, nagpapakita ito nga natapod ha iya an iya anak ngan duok hira ha usa kag usa. Ha pariho nga paagi, kon nag-aampo kita kan Jehova nga Dios, iginpapakita naton nga natapod kita ha iya ngan karuyag naton nga magin duok ha iya.​—Proberbios 15:8; Santiago 4:8.

‘Ipasa ha iya an ngatanan niyo nga kabaraka, kay nagtatagad hiya ha iyo.’​—1 Pedro 5:7.

Karuyag han Dios nga mag-ampo kita ha iya kay hinigugma kita niya ngan interesado hiya ha aton. Maaram gud hiya han aton mga problema ngan ginkakabarak-an, ngan karuyag niya nga buligan kita.

Ha bug-os niya nga kinabuhi, hi Hadi David nag-ampo kan Jehova nga Dios para hin bulig ngan ginsumatan niya Hiya han iya ginhuhunahuna ngan inaabat. (Salmo 23:1-6) Ano an gin-abat han Dios kan David? Ginhigugma han Dios hi David ngan ginpamatian niya an iya damu nga pag-ampo. (Buhat 13:22) Ha pariho nga paagi, ginpapamatian han Dios an aton mga pag-ampo kay hinigugma kita niya.

Ito an ginsiring han nagsurat han usa han mga salmo ha Biblia. Sigurado hiya nga ginpamatian han Dios an iya mga pag-ampo ngan nakabulig gud ito ha iya. Tungod hito, nagin mas duok hiya ha Dios ngan nagkaada hiya kusog nga makaya an kasakit ngan kasubo nga iya gin-atubang.​—Salmo 116:1-9.

Kon sigurado kita nga ginpapamatian han Dios an aton mga pag-ampo, padayon kita nga makikiistorya ha iya. Tagdon naton an eksperyensya ni Pedro, nga naukoy ha norte han Spain. Namatay an iya 19 ayos nga anak ha aksidente ha dalan. Ha iya kasubo, iginsumat niya ha Dios an iya inaabat ngan pauroutro nga nag-ampo para hin pagliaw ngan bulig. Ano an nagin resulta? “Ginbaton ni Jehova an akon mga pag-ampo pinaagi han pagliaw ngan bulig nga nakarawat namon nga mag-asawa tikang ha amon mga igkasi-Kristiano,” siring ni Pedro.

Bisan kon waray maibalik an kinabuhi han iya anak, daku gud an naibulig han mga pag-ampo kan Pedro ngan ha iya pamilya. An iya asawa, nga hi María Carmen, nagsiring: “An pag-ampo nakabulig ha akon nga mailob an duro nga kasubo. Maaram ako nga nasasabtan ako ni Jehova nga Dios kay kon nag-aampo ako ha iya, nagigin kalmado ako ngan murayaw.”

Matin-aw nga iginpapakita han Biblia ngan han personal nga mga eksperyensya nga namamati an Dios ha mga pag-ampo. Pero klaro liwat nga diri ngatanan nga pag-ampo ginbabaton han Dios. Kay ano nga ginbabaton han Dios an iba nga pag-ampo ngan an iba diri?