An Ginsisiring han Iba Mahitungod ha Pag-ampo
“Kon nag-aampo ako, inaabat ko nga kaupod ko an Dios, ginkakaptan niya an akon kamot, ngan ginbubuligan ako kon diri ako maaram han hihimoon.”—MARÍA.
“Namatay an akon asawa tungod han kanser nga 13 ka tuig niya nga gin-inantos. Nahinunumdoman ko nga nag-aampo ako ha Dios kada adlaw ngan inaabat ko namamati gud hiya ha akon. Tungod hito, nagin murayaw ako.”—RAÚL.
“An pag-ampo usa nga maopay nga regalo han Dios ha mga tawo.”—ARNE.
Para kanda María, Raúl, Arne, ngan iba pa, an pag-ampo usa nga espesyal nga regalo. Inaabat nira nga pinaagi hito, makakaistorya nira an Dios, mapapasalamatan, ngan maaaroan hin bulig. Kombinsido gud hira nga tinuod ini nga ginsisiring han Biblia mahitungod ha pag-ampo ha Dios: “May-ada kita hini nga pagsarig ngadto ha iya, nga anoman an aton aroon uyon ha iya kaburut-on, namamati hiya ha aton.”—1 Juan 5:14.
Ha kabaliktaran, damu an diri natoo ha ginsisiring han Biblia mahitungod ha pag-ampo. Iginsumat ni Steve kon ano an iya gin-abat mahitungod ha pag-ampo: “Han 17 anyos ako, tulo han akon sangkay an namatay ha duha nga magkaiba nga aksidente. An usa namatay ha aksidente ha awto, ngan an duha nalumos.” Ano an ginbuhat ni Steve? “Nagpakiana ako ha Dios kon kay ano nga nahitabo ito ngatanan, pero waray niya ako batona. Salit nagsiring ako ha akon kalugaringon, ‘Kay ano nga mag-aampo pa man ako?’” Para ha damu, diri ginbabaton an ira mga pag-ampo, salit naghunahuna hira nga waray pulos an ira pag-inampo.
May iba pa nga rason kon kay ano nga inaabat han pipira nga diri nakakabulig ha ira an pag-ampo. May mga nasiring nga tungod kay hinbabaroan han Dios an ngatanan nga butang, maaram na hiya han aton mga panginahanglan o mga problema, salit diri na naton hiya kinahanglan sumatan mahitungod hito.
An iba natoo nga diri ginpapamatian han Dios an ira mga pag-ampo tungod han ira mga sayop ha naglabay. “An akon pinakadaku nga problema,” siring ni Jenny, “inaabat ko nga waray gud ako pulos. Ha naglabay, nakahimo ako hin dagku nga mga sayop salit ginkukombinse ko an akon kalugaringon nga diri ako angay pamatian han Dios.”
Kumusta ka man? Kon inaabat mo liwat nga diri ginpapamatian an imo pag-ampo, maliliaw ka ha paghibaro nga an Biblia may baton ha mga pakiana mahitungod ha pag-ampo. Makakasarig kita ha ginsisiring han Biblia mahitungod ha pag-ampo; * ginbabaton hito an mga pakiana sugad han:
-
Ginpapamatian gud ba han Dios an aton mga pag-ampo?
-
Kay ano nga may mga pag-ampo nga diri ginbabaton?
-
Paonan-o ka mag-aampo nga papamatian han Dios?
-
Ano an mahihimo ha imo han pag-ampo?
^ par. 9 Mababasa ha Biblia an mga pag-ampo han damu nga surugoon han Dios, upod na an kan Jesu-Kristo. An Hebreo nga Kasuratan, nga gintatawag liwat nga Daan nga Tugon, may-ada sobra 150 nga pag-ampo.
Bangin Maruyagan Mo Liwat
BATON HA MGA PAKIANA MAHITUNGOD HA BIBLIA
Kay Ano nga Kinahanglan Mag-ampo? Babatunon ba Ako han Dios?
Nakadepende ha imo kon babatunon ba han Dios an imo mga pag-ampo.
PAKIANA HAN MGA BATAN-ON
Kay Ano nga Dapat Ako Mag-ampo?
An pag-ampo ba usa la nga paagi para magmaopay an akon pag-abat, o mas labaw pa hito?
