An kangalas amo an duro nga pagdiri o duro nga kapungot ha usa nga tawo o usa nga grupo. Diri la ito temporaryo nga kasina, kondi nagpapadayon ito.

Damu an hinungdan nga nangangalas an mga tawo. Kaurogan na nga ginkakangalasan an usa nga grupo hin mga tawo bisan kon waray hira ginbubuhat nga sayop. Bangin ginkakangalasan hira tungod kay an mga tawo naghuhunahuna nga ito nga grupo maraot, peligroso, o diri na magbabag-o. Bangin ginhuhunahuna hira nga ubos, tarhog ha komunidad, o hinungdan han mga problema. An mga naabat hin kangalas ha iba bangin nag-antos hin kamadarahog, kawaray-hustisya, o iba pa nga panhitabo nga nagin hinungdan nga an kapungot makagamot ha ira kasingkasing.

An usa nga tawo puydi mangalas ha iba bisan kon waray pa hira magkita. Pananglitan, bangin diri tinuyo nga masubad han usa nga tawo an panhunahuna han iya kapamilya ngan kasangkayan mahitungod ha usa nga grupo. Salit kon an usa ha pamilya o komunidad nangangalas ha usa nga grupo, diri mag-iiha bangin hira ngatanan mangalas na hito nga grupo.

Kon nasasabtan naton kon kay ano nga madali gud la makaimpluwensya ha iba an kangalas, masasabtan naton kon kay ano nga damu nga tawo an nangangalas. Kondi basi matapos an kangalas ha kalibotan, kinahanglan masabtan naton kon paonan-o nagtikang an kangalas. Mahibabaroan naton ito ha Biblia.

DIRI AN MGA TAWO AN GINTIKANGAN HAN KANGALAS. Nagtikang ito han an usa nga anghel ha langit, nga gintatawag nga Satanas nga Yawa, nagrebelde ha Dios. An Yawa “usa nga parapamatay han nagtikang hiya” magrebelde. Sugad nga ‘buwaon ngan amay han kabuwaan,’ padayon nga igin-aaghat niya an kangalas ngan kapungot. (Juan 8:44; 1 Juan 3:11, 12) An Biblia nasiring nga maraot gud hiya, masisinahon, ngan pungtanon.—Job 2:7; Pahayag 12:9, 12, 17.

AN DIRI PERPEKTO NGA MGA TAWO MASAYON GUD LA MANGALAS. Ginsunod han siyahan nga tawo, nga hi Adan, an maraot nga ginbuhat ni Satanas. Sugad nga resulta, ngatanan nga tawo nakapanunod hin sala ngan pagin diri perpekto. (Roma 5:12) Tungod han kangalas, ginpatay han suhag nga anak ni Adan, nga hi Cain, an iya bugto nga hi Abel. (1 Juan 3:12) Oo, damu nga tawo an nagpapakita hin gugma ngan pagpaid. Pero tungod han napanunod nga sala, damu an nagpapakita han pagin makikalugaringon, kaawa, ngan pagpahitaas—mga kalidad nga nagigin hinungdan nga mangalas.—2 Timoteo 3:1-5.

AN DISKRIMINASYON POSIBLE MAGRESULTA HIN KANGALAS. Igin-aaghat han kalibotan an kangalas pinaagi ha waray kalooy ngan nakakadaot nga panggawi ngan binuhatan. Nagpapadayon an diskriminasyon, pagpaurog, nakakainsulto nga panyakan, pan-bully, ngan bandalismo tungod kay “an bug-os nga kalibotan aada ha gahum han usa nga maraot,” hi Satanas nga Yawa.​—1 Juan 5:19.

Pero diri la an gintikangan han kangalas an ginsusumat han Biblia. Ginsusumat liwat hito an solusyon.