1. 1. HI SATANAS NGA YAWA. Hi Satanas, an rebelyoso nga anghel, an nangunguna nga hinungdan han kangalas nga aton nakikita yana. Bubungkagon han Dios hi Satanas ngan an ngatanan nga naimpluwensyahan niya nga mangalas liwat.​—Salmo 37:38; Roma 16:20.

2. 2. AN KALIBOTAN NI SATANAS NGA PUNO HIN KANGALAS. Wawad-on han Dios an ngatanan nga karaotan hini nga kalibotan, upod na an korap nga mga politiko ngan mga lider han relihiyon nga nag-aaghat hin kangalas. Wawad-on liwat han Dios an hakog nga komersyo pati na an korapsyon hito ngan an pamentaha ha mga tawo.​—2 Pedro 3:13.

3. 3. AN PAGIN DIRI PERPEKTO HAN TAWO. Iginsasaysay han Biblia nga an ngatanan nga tawo nakapanunod han pagkadiri-perpekto​—an tendensya nga maghunahuna, umabat, ngan magbuhat hin sayop. (Roma 5:12) Usa hito nga makasasala nga mga tendensya amo an pag-abat ngan pagpakita hin kangalas ha iba. Bubuligan han Dios an mga tawo nga mawara an ngatanan nga sayop nga tendensya basi an kangalas mawara na gud ha kadayonan.​—Isaias 54:13.

1. 1. WARAY NA MAG-AANTOS TUNGOD HAN KAWARAY-HUSTISYA. An Ginhadian han Dios an magmamando ha kalibotan. Magmamando ito tikang ha langit, ngan pinaagi hito magkakaada na hustisya ha waray kataposan. (Daniel 2:44) Mawawara na an pagpaurog ngan diskriminasyon. Tatadungon han Dios an ngatanan nga kawaray-hustisya nga naieksperyensyahan han mga tawo yana.—Lucas 18:7.

2. 2. AN NGATANAN MAKAKAEKSPERYENSYA HIN KAMURAYAWAN. Waray na mag-aantos tungod han kamadarahog o girra. (Salmo 46:9) An tuna magigin talwas nga urukyan, ngan an maukoy la hito an mga tawo nga nahigugma ha kamurayawan.​—Salmo 72:7.

3. 3. AN NGATANAN MABUBUHI HA WARAY KATAPOSAN HA PERPEKTO NGA KAHIMTANG. An ngatanan nga naukoy ha tuna magpapakita hin tinuod nga gugma ha usa kag usa. (Mateo 22:39) Waray na mag-aantos bisan tungod ha maraot nga mga panhunahuna o mga hinumdoman. (Isaias 65:17) Kon waray na an kangalas, an mga tawo ‘magmamalipayon hinduro tungod han hura nga kamurayawan.’​—Salmo 37:11.

Karuyag mo ba mabuhi ha sugad hito nga kalibotan? Bisan yana, damu an nag-aaram nga wad-on an kangalas pinaagi ha pag-aplikar han mga prinsipyo ha Biblia. (Salmo 37:8) Ito an ginbubuhat han minilyon nga mga Saksi ni Jehova ha bug-os nga kalibotan. Bisan kon iba-iba an ira kultura ngan gintikangan, nagkakaurosa hira ngan naghihigugmaay ha usa kag usa.​—Isaias 2:2-4.

Malilipay an mga Saksi ni Jehova nga isumat an ira mga nahibaroan mahitungod ha kon paonan-o aatubangon an kawaray-hustisya ngan diskriminasyon. An imo mahibabaroan mabulig ha imo nga hinay-hinay nga masaliwnan hin gugma an kangalas nga imo inaabat. Mahibabaro ka kon paonan-o tatrataron ha buotan nga paagi an ngatanan nga tawo—bisan adton baga hin diri mapasalamaton o nagpapakita hin kangalas. Sugad nga resulta, magigin mas malipayon ka yana ngan magigin mas maopay an imo relasyon ha iba. Labaw ha ngatanan, mahibabaro ka han puydi mo buhaton basi magin sakop han Ginhadian han Dios kon an kangalas mawara na ha kadayonan.​—Salmo 37:29.