KON PAONAN-O MATATAPOS AN KANGALAS
3 | Wad-a an Kangalas ha Imo Hunahuna
Katutdoan han Biblia:
“Magbag-o kamo pinaagi ha pagbag-o han iyo panhunahuna, basi mapamatud-an niyo ha iyo kalugaringon an maopay ngan kinakarawat ngan hingpit nga kaburut-on han Dios.”—ROMA 12:2.
An Karuyag Sidngon Hito:
Importante ha Dios an paagi han aton paghunahuna. (Jeremias 17:10) Labaw pa an kinahanglan naton buhaton kay ha paglikay la ha pagyakan o pagbuhat hin bisan ano nga nagpapakita hin kangalas. An kangalas nagtitikang ha hunahuna ngan kasingkasing. Salit kinahanglan wad-on naton dayon an bisan ano nga kangalas nga ada ha aton panhunahuna ngan inaabat. Hito la nga paagi tinuod kita nga ‘mababag-o’ ngan matatapos an aton pag-abat hin kangalas.
An Puydi Mo Buhaton:
Tangkod nga usisaha kon ano an imo panhunahuna ngan inaabat mahitungod ha iba—labi na adton iba an lahi o nasyonalidad. Pakianhi an imo kalugaringon: ‘Ano an akon panhunahuna ha ira? An akon ba panhunahuna nakabase ha akon mismo nahibabaroan mahitungod ha ira? O may-ada ba ako ginpapaurog?’ Likyi an social media, mga salida, o kaliawan nga nagpapakita hin kangalas ngan kamadarahog.
An Pulong han Dios makakabulig ha aton nga mawara an kangalas ha aton kasingkasing ngan hunahuna
Diri pirme masayon an pagin tangkod kon gin-uusisa naton an aton mga panhunahuna ngan inaabat. Pero an Pulong han Dios makakabulig ha aton nga ‘matugkad an mga panhunahuna ngan mga intensyon han kasingkasing.’ (Hebreo 4:12) Salit padayon nga usisaha an Biblia. Ikompara an mga katutdoan hito ha imo panhunahuna, ngan himoa an imo pinakamaopay basi maipahiuyon an imo panhunahuna ha igintututdo han Biblia. An Pulong han Dios makakabulig ha aton nga mawara an kangalas nga “marig-on an pagkatindog” ha aton hunahuna ngan kasingkasing.—2 Corinto 10:4, 5.
Bangin Maruyagan Mo Liwat
AN BIBLIA NAKAKAGBAG-O HAN KINABUHI
“Diri Na Ako Bayolente”
Ano an nagpagios kan Sébastien Kayira nga iundang an iya pagin bayolente ngan abusado?
