Bangin umabat kita nga baga hin waray kita mahihimo kon an usa ta nga sangkay nag-aantos hin sakit ha hunahuna. Pero maipapakita naton nga hinigugma gud naton an aton sangkay pinaagi ha pagbulig ha iya nga makaya an usa nga makuri nga problema ha mental nga kahimsog. Paonan-o?

“Magin alisto ha pagpamati.”—SANTIAGO 1:19.

Usa han pinakamaopay nga paagi ha pagbulig ha imo sangkay amo an pagpamati kon karuyag niya mag-istorya. Ayaw hunahunaa nga kinahanglan mo bumaton ha ngatanan niya nga ginsisiring. Ipaabat nga namamati ngan napaid ka ha iya. Pangalimbasog nga maintindihan an iya inaabat, ngan likyi nga maghimo dayon hin konklusyon o maghukom. Hinumdumi nga bangin may mayakan hiya nga diri amo an iya karuyag sidngon ngan ha urhi iya pagbasolan.—Job 6:2, 3.

‘Liawa an mga nasusubo.’—1 TESALONICA 5:14.

Bangin sobra nga nababaraka an imo sangkay, o bangin nakukurian hiya tungod ha pag-abat hin kawaray-pulos. Kon papasarigon mo hiya nga hinigugma mo hiya, maliliaw ngan madadasig mo hiya, bisan kon diri ka maaram han eksakto nga iyayakan.

“An tinuod nga sangkay nahigugma ha ngatanan nga panahon.”—PROBERBIOS 17:17.

Pagtanyag hin praktikal nga bulig. Imbes nga maghunahuna nga maaram ka na kon paonan-o ka  makakabulig, pagpakiana kon ano an mahimo mo buhaton. Kon an imo sangkay nakukurian pagsumat han iya ginkikinahanglan, mahimo ka magsuhestyon hin praktikal nga butang nga puydi niyo buhaton nga magkaupod, sugad han pamasyada. O mahimo ka magtanyag nga updan hiya pamalit, buligan hiya ha panlimpyo, o ha iba pa nga buruhaton.—Galacia 6:2.

“Magin pasensyoso.”—1 TESALONICA 5:14.

Bangin may panahon nga an imo sangkay diri naruruyag pakiistorya. Pasariga hiya nga malilipay ka pamati kon karuyag na niya makiistorya. Tungod han iya sakit, bangin may mayakan o mabuhat hiya nga makasakit ha imo. Bangin diri niya idayon an iyo mga plano o maaringit hiya. Magin pasensyoso ngan masinabuton samtang gintatanyag mo an bulig nga iya ginkikinahanglan.—Proberbios 18:24.

“Ginsisiguro ko nga usa ako nga sangkay nga aada pirme para ha iya. Bisan kon waray ako solusyon ha iya mga problema, pirme ako naniningkamot nga mamati han iya isisiring. Usahay an iya la ginkikinahanglan usa nga mamamati ha iya, ngan katapos, nagigin mas maopay na an iya pag-abat.”—Hi Farrah, a nga may sangkay nga nag-aantos tungod hin eating ngan anxiety disorder ngan clinical depression.

“May sangkay ako nga buotan gud ngan positibo. Gin-imbitar niya ako ha ira balay para mangaon. Mahigugmaon gud hiya, salit waray ako mag-alang nga isumat an akon inaabat. Nadasig gud ako hito!”—Hi Ha-eun, nga nag-aantos tungod han clinical depression.

“Importante gud an pagin pasensyoso. Kon an akon asawa may nabubuhat nga nakakapasina ha akon, ginpapahinumdoman ko an akon kalugaringon nga nabuhat niya ito tungod ha iya sakit. Nabulig ini ha akon nga diri masina ngan magin mas makonsiderasyon ha iya.”—Hi Jacob, nga an asawa nag-aantos tungod han clinical depression.

“An akon asawa daku gud nga bulig ha akon ngan ginliliaw gud niya ako. Kon inaabat ko nga nadadaog ako han sobra nga kabaraka, diri gud niya ako ginpipirit nga buhaton an bisan ano nga diri ko karuyag. Usahay tungod hito, diri niya nabubuhat an usa nga butang nga karuyag gud unta niya buhaton. Espesyal hinduro hiya ha akon kay mahinatagon gud hiya ngan diri makikalugaringon.”—Hi Enrico, nga nag-aantos tungod hin anxiety disorder.