AN USA nga espesyal nga regalo sadang mag-aghat ha aton ha pagpakita hin apresasyon. Ginpabug-atan ni Jesus ito nga leksyon han iya gintambal an napulo nga lalaki nga may grabe nga sakit nga waray pa tambal hito nga panahon. An usa han napulo “binalik . . . ngan gindayaw an Dios ha daku nga tingog.” Hi Jesus nagsiring: “Napulo an natambal, diri ba? Hain man an siyam?” (Lucas 17:12-17) Ano an leksyon? Masayon kita mangalimot han ginbubuhat han iba para ha aton!

An lukat diri pariho ha iba nga regalo. Ito an pinakapresyoso nga regalo nga iginhatag. Kon sugad, paonan-o ka magios ha ginbuhat han Dios para ha imo?

• Kilalaha an Naghatag. Diri awtomatiko nga ginpapahinabo han lukat nga magkaada kinabuhi nga waray kataposan an tanan nga tawo. Lugod, hi Jesus nagsiring ha usa nga pag-ampo: “Nangangahulogan ini hin kinabuhi nga waray kataposan, an ira pagkilala ha imo, an amo la nga totoo nga Dios, ngan ha imo ginsugo, hi Jesu-Kristo.” (Juan 17:3) Kon may magsumat nga may nagluwas ha imo han bata ka pa, diri ka ba magigin interesado ha paghibaro mahitungod hito nga tawo ngan kon kay ano nga gintalwas ka  niya? Hi Jehova nga Dios nga naghatag han regalo nga lukat nga nagtatalwas han kinabuhi, diri la naruruyag nga makilala mo hiya, kondi naruruyag liwat nga magin duok ka ha iya. “Magin duok kamo ha Dios,” siring han Biblia, “ngan magigin duok hiya ha iyo.”—Santiago 4:8.

• Magpakita hin pagtoo ha lukat. “An nagpapakita hin pagtoo ha Anak may kinabuhi nga waray kataposan.” (Juan 3:36) Ano an karuyag sidngon ha pagpakita hin pagtoo? Nangangahulogan ito hin paggios. (Santiago 2:17) Ano nga klase hin paggios? An usa nga regalo magigin imo la kon mangangalimbasog ka ngan kakarawaton ito. Salit kinahanglan gumios ka ngan karawaton an lukat. Paonan-o? Hibaroi kon ano nga klase hin pagkinabuhi an karuyag han Dios, ngan gumios uyon hito. * Pag-ampo ha Dios para hin kapasayloan ngan limpyo nga konsensya. Daop ha iya nga may bug-os nga pagsarig nga an lukat naggagarantiya hin murayaw, may seguridad, ngan malipayon nga kabubuwason para ha ngatanan nga natoo hito.—Hebreo 11:1.

• Tambong ha Memoryal han kamatayon ni Jesus. Gintikangan ni Jesus an usa nga tinuig nga okasyon basi pahinumduman kita han tagana han lukat. May kalabotan ha pagsaurog hito, hiya nagsiring: “Padayon nga buhata niyo ini sugad nga hinumdoman ha akon.” (Lucas 22:19) Sasaurugon han mga Saksi ni Jehova an Memoryal han kamatayon ni Jesus ha Martes, Abril 11, 2017, pagtunod han adlaw. Inin mausa ka oras nga programa nag-uupod hin pahayag nga nagsasaysay han pagkaimportante han kamatayon ni Jesus, ngan kon paonan-o ginpapahinabo hito nga makarawat naton an kapulsanan yana ngan ha tidaraon. Han naglabay nga tuig, mga 20 ka milyon an tinambong han Memoryal ha bug-os nga kalibotan. Gin-iimbitar kamo namon basi ipakita an apresasyon ha pinakabirilhon nga regalo han Dios.