An astrolohiya usa han mga paagi han pagpanagna nga nasiring nga an mga bitoon, bulan, ngan mga planeta nakakaimpluwensya gud ha kinabuhi han tawo. An mga astrologo natoo nga an posisyon han mga linarang ha kawanangan han ipanganak an usa amo an nagmomolde han iya personalidad ngan tidaraon.

Bisan kon an astrolohiya tikang pa ha kadaan nga Babilonya, popular la gihap ito yana. Sumala ha usa ka surbey ha Estados Unidos han 2012, sobra 30 porsyento han mga nakigbahin hito an nagsiring nga an astrolohiya “baga hin uyon ha syensya,” ngan 10 porsyento an nagsiring nga “haom gud ito ha syensya.” Husto ba ito? Diri. Ini an mga rason:

• An mga planeta ngan mga bitoon waray igin-gagawas nga pwersa nga mahimo makaapekto ha tawo sugad han ginsisiring han mga astrologo.

• An mga tagna agsob nga mahimo iaplikar ha bisan hin-o.

• An mga tagna han mga astrologo yana ginhihimo basado ha kadaan nga gintotoohan nga an mga planeta nalibot ha tuna. Pero ha pagkamatuod, an mga planeta nalibot ha adlaw.

• An mga tagna nga ginhimo han iba-iba nga astrologo para ha usa nga indibiduwal diri parapriho.

• Ginkakategoriya han mga astrologo an mga tawo ha usa han 12 nga zodiac sign, uyon ha petsa han iginpanganak hira. Tungod ha mga pagbag-o han posisyon han tuna ha kawanangan ha paglabay han mga siglo, an mga petsa nga gintatagad nga bahin hin usa nga zodiac sign diri na haom ha panahon han pag-agi han adlaw ha mga konstelasyon diin iginngaran ito nga zodiac sign.

An mga zodiac sign gintotoohan nga nagsusumat han magigin pagkatawo han usa. Kondi ha pagkamatuod, bisan an magkapariho an petsa han adlaw han katawo, diri pariho an batasan; an petsa han katawo waray kalabotan ha personalidad han indibiduwal. Imbes nga kitaon an mga tawo kon hin-o gud hira, ginhuhukman han mga astrologo an panggawi ngan pagkatawo han usa sumala ha personalidad nga ira igintanda na nga daan. Diri ba ini usa nga klase hin diskriminasyon?

Tikang pa ha naglabay, an mga tawo nagkukonsulta ha mga parapanigo. An pipira han parapanigo namimiling hin mga sinyales tikang ha mga butang, sugad han tinai han hayop ngan tawo o ha paagi han pagtuktok han sunoy hin lugas. Samtang an iba, nagbabasar han ira pagbanabana tikang ha mga dahon hin semente o ha gin-giling nga kape. Yana, nagamit hira hin tarot card, bola nga kristal, dice, ngan iba pa nga paagi basi “basahon” an tidaraon han usa. Masasarigan ba an panigo basi hibaroan an tidaraon? Diri. Kay ano?

An mga tagna han iba-iba nga paagi han panigo nagkakasumpaki. Bisan an magkapariho nga paagi, naghahatag hin magkaiba nga tagna. Pananglitan, kon an usa magpakiana ha duha nga parapanigo mahitungod han tidaraon basado ha interpretasyon han pariho nga baraha, sadang unta magin pariho an baton. Pero agsob nga diri.

An mga pamaagi o motibo han parapanigo agsob nga ginruruhaduhaan. An mga kritiko nasiring nga an baraha o bola nga kristal props la ngan an parapanigo nagbabasa tikang ha reaksyon han tawo ngan diri tikang ha props. Pananglitan, an makarit nga parapanigo magbabangon hin mga pakiana ngan iya oobserbaran hin maopay an mga pulong ngan paggawi nga mahimo magsumat mahitungod han nagpapatigo. Huhunahunaon nga an parapanigo an may kapas ha paghibaro han mga impormasyon ngan sitwasyon nga ha pagkamatuod waray sabot an nagpapatigo nga hiya an naghatag. Tungod kay nakuha an pagtapod han nagpapatigo, nagriko an iba nga parapanigo.

An pagtoo ha astrolohiya ngan ha panigo sugad-sugad hin pagtoo nga an aton tidaraon itinanda na nga daan. Kondi husto ba ito? An Biblia nasiring nga may-ada kita abilidad ha pagpili kon ano an aton totoohan o kon ano an aton hihimoon, ngan an aton pagpili makakaapekto ha aton tidaraon.—Josue 24:15.

An mga nagsisingba ha Dios may-ada dugang nga rason nga isalikway an astrolohiya ngan panigo tungod kay ginkukondenar han Dios an ngatanan nga klase han espiritismo. An Biblia nasiring: “Kinahanglan waray maagian dida ha iyo nga bisan hin-o . . . nga nagbubuhat hin panigo, bisan hin-o nga nagbubuhat hin madyik, bisan hin-o nga namimiling hin mga tigaman, barangan, bisan hin-o nga paralumay, bisan hin-o nga nakonsulta hin espiritista o hin parapanigo, o bisan hin-o nga napakiana ha patay. Kay an bisan hin-o nga nagbubuhat hini nga mga butang mangil-ad kan Jehova.” a—Deuteronomio 18:10-12.