Pananglitan, hi Sally * nga taga-Estados Unidos, nga nawad-an han kadam-an niya nga panag-iya tungod hin bagyo, nagsiring: “Diri ako maaram kon makakailob pa ako. Damu ka adlaw nga gin-abat ko nga diri ko na kaya.”

O ano man kon namatyan ka hin hinigugma? Hi Janice, nga taga-Australia, nagsiring: “Han namatay an akon duha nga anak, an akon kinabuhi sugad-sugad hin butang nga nabuong ngan kinahanglan ko himoon an pinakamaopay basi mabug-os ito utro. Nanginyupo ako ha Dios: ‘Dios ko, diri ko na kaya! Unta mamatay na la ako, diri ko na karuyag mabuhi.’”

Ha pariho nga paagi, nasubo hinduro hi Daniel han waray magin maunungon an iya asawa. Hiya nagsiring: “Han nagsumat an akon asawa nga waray hiya magin maunungon, sugad hin ginbuno hin kutsilyo an akon kasingkasing. Pauroutro nga gin-abat ko ito nga kaul-ol ngan nagpadayon ito hin pipira ka bulan.”

Hihisgotan hini nga isyu han An Barantayan kon kay ano nga mahimo la gihap magin mapulsanon an kinabuhi bisan kon

• Nakaeksperyensya ka hin kalamidad

• Namatyan ka hin hinigugma

• Nagin diri maunungon an imo padis

• May-ada ka grabe nga sakit

• Diri mo na maiilob an kinabuhi

Salit, siyahan, ano an makakabulig ha aton kon nakaeksperyensya kita hin kalamidad?