Kay Ano nga Kinahanglan Naton an Ginhadian han Dios?
Ha tinikangan han kasaysayan han tawo, hi Jehova la nga aton Maglalarang an Magmarando. Mahigugmaon an iya pagmando. Naghimo hiya hin maopay nga garden didto ha Eden basi ukyan han mga tawo. Nagtagana liwat hiya ha ira hin damu nga pagkaon. Dugang pa, gintagan niya an mga tawo hin importante nga buruhaton. (Genesis 1:28, 29; 2:8, 15) Murayaw unta yana an mga tawo kon padayon hira nga nagpasakop ha mahigugmaon nga pagmando han Dios.
Iginsalikway han siyahan nga mga tawo an Dios sugad nga ira Magmarando
Iginsusumat han Biblia nga usa nga rebelde nga anghel, nga ha urhi gintawag nga Satanas nga Yawa, an nag-ayat han katungod han Dios ha pagmando. Ginpagawas niya nga mas magigin malipayon an mga tawo kon waray an paggiya ngan pagmando han Dios. Makasurubo, ginsunod han aton siyahan nga mga kag-anak nga hira Adan ngan Eva hi Satanas ngan nagrebelde ha Dios.—Genesis 3:1-6; Pahayag 12:9.
Tungod kay iginsalikway nira Adan ngan Eva an Dios sugad nga ira Magmarando, waray na hira makaukoy ha Paraiso ngan nawara nira an paglaom nga mabuhi ha kadayonan nga may perpekto nga kahimsog. (Genesis 3:17-19) An ira ginbuhat nakaapekto liwat ha ira nagin mga anak. An Biblia nasiring nga tungod kan Adan, “an sala sinulod ha kalibotan ngan an kamatayon pinaagi han sala.” (Roma 5:12) An sala may usa pa nga maraot nga resulta: “Ginmamandoan han tawo an iya igkasi-tawo ha iya ikakadaot.” (Eclesiastes 8:9) Karuyag sidngon, kon tawo an magmamando ha iya igkasi-tawo, diri mawawara an problema.
NAGTIKANG AN PAGMANDO HAN TAWO
Hi Nimrod nagrebelde kan Jehova
An siyahan nga magmarando nga tawo nga gin-unabi ha Biblia amo hi Nimrod. Ngan nagrebelde hiya ha pagmando ni Jehova. Tikang ha iya panahon, gin-aabuso na han gamhanan nga mga tawo an ira awtoridad. Mga 3,000 ka tuig na an naglabay, hi Hadi Solomon nagsurat: “Nakita ko an mga luha han mga gintatalumpigos, ngan waray nagliliaw ha ira. Ngan an mga nagtatalumpigos ha ira may gahum.”—Eclesiastes 4:1.
Ito liwat an nahitatabo yana. Han 2009, usa nga publikasyon han United Nations an nagsiring nga an maraot nga pagmando ginhuhunahuna nga “usa han nangunguna nga hinungdan han ngatanan nga karaotan ha kalibotan.”
PANAHON NA PARA GUMIOS!
An mga tawo nagkikinahanglan hin mas maopay nga magmarando ngan mas maopay nga pan-gobyernohan. Ngan ito an iginsasaad han Dios!
Bisan an pinakamaopay nga tawhanon nga mga gobyerno waray maglampos ha pagsulbad ha magkuri nga problema han mga tawo
An Dios nag-establisar hin Ginhadian, o gobyerno, nga masaliwan ha ngatanan nga tawhanon nga gobyerno, ngan “ini gud la an magpapadayon ha kadayonan.” (Daniel 2:44) Ini an Ginhadian nga gin-iinampo han minilyon nga tawo. (Mateo 6:9, 10) Pero diri an Dios an magmamando hini nga gobyerno. Lugod, nagtoka hiya hin usa nga nabuhi hadto sugad nga tawo basi magin Magmarando. Hin-o ito nga ginpili han Dios?
Bangin Maruyagan Mo Liwat
BATON HA MGA PAKIANA MAHITUNGOD HA BIBLIA
Kamurayawan ha Tuna—Paonan-o Magkakaada Hito?
Hibaroi an saad han Dios nga magpapahinabo hiya hin kamurayawan ha kalibotan pinaagi han iya Ginhadian.
BATON HA MGA PAKIANA MAHITUNGOD HA BIBLIA
An Ginhadian han Dios ba Aada La ha Imo Kasingkasing?
Ano an karuyag sidngon han Biblia han nagsiring ito nga “aada ha sakob niyo an Ginhadian han Dyos”?
