Hi Gail, nga gin-unabi kanina, nagruruhaduha kon mawawara pa ba an sakit nga iya inaabat tungod han kamatay han iya bana, hi Rob. Kondi naglalaom hiya nga makita utro an iya bana ha bag-o nga kalibotan nga iginsaad han Dios. Hiya nagsiring: “An akon paborito nga teksto amo an Pahayag 21:3, 4.” Ito nasiring: “An Dios mismo makakaupod nira. Papahiron niya an mga luha ha ira mga mata, ngan mawawara na an kamatayon, pati an kabido, pagtangis, ngan kasakit. An daan nga mga butang naglabay na.”

Hi Gail nagsiring: “Maopay gud ini nga saad. Napaid gud ako ha mga namatayan nga diri maaram han paglaom nga makikita nira utro an ira hinigugma.” Tungod han iya gintotoohan, nagboluntaryo hiya nga magin bug-os-panahon nga ebanghelisador basi makigbahin ha pagsangyaw han saad han Dios nga ha tidaraon “mawawara na an kamatayon.”

‘Imposible ito!’ bangin magsiring ka. Pero tagda hi Job. Nagkaada hiya grabe nga sakit. (Job 2:7) Bisan kon naghingyap nga mamatay, nasarig hiya nga mahimo hiya banhawon han Dios dinhi ha tuna: “O nga imo pa unta ako tagoon didto ha Sheol, . . . Ikaw magtatawag, ngan ako mabaton ha imo: Ikaw mamamay-ada kahidlaw han buhat han imo mga kamot.” (Job 14:13, 15) Nasarig gud hi Job nga mahihidlaw an Dios ha iya ngan babanhawon hiya.

Ha diri na maiha, babanhawon han Dios hi Job ngan an damu nga iba pa nga patay kon ini nga tuna magin paraiso na. (Lucas 23:42, 43) “May pagkabanhaw,” an siring han Biblia ha Buhat 24:15. Hi Jesus nagpapasarig: “Ayaw kamo kahipausa hini, kay maabot an oras nga an ngatanan nga aadto ha handumanan nga mga lubnganan makakabati han iya tingog ngan mababanhaw.” (Juan 5:28, 29) Makikita ni Job an katumanan hito nga saad. Magkakaada hiya paglaom nga maibalik an iya “pagkabatan-on,” ngan an iya unod “malalabi hin kapuraw kay han kanan bata” tubtob ha waray kataposan. (Job 33:24, 25) Ito liwat an maieksperyensyahan han ngatanan nga nag-aapresyar han maloloy-on nga tagana han Dios nga pagkabanhaw dinhi ha tuna.

Kon namatayan ka hin hinigugma, ini nga impormasyon bangin diri man bug-os nga makagwara han kasakit nga imo inaabat. Pero kon papamalandungon mo an mga saad han Dios ha Biblia, magkakaada ka tinuod nga paglaom ngan kusog basi makapadayon.​—1 Tesalonica 4:13.

Karuyag mo ba dugang nga mahibaro kon paonan-o aatubangon an pagtaguminatay? O may-ada ka ba pakiana nga puropariho han “Kay ano nga gintutugotan han Dios an karaotan ngan pag-antos?” Alayon kitaa an amon website nga jw.org/war basi hibaroan an nakakaliaw ngan praktikal nga baton han Biblia.