Natawo ako ha Mulhouse ha norte-este han Fransia, ha usa nga pobre nga bungto nga kilala ha krimen. Puro araway la han mga pamilya an akon nahinunumdoman han akon kabata. Ha amon pamilya, hamubo an pagkita ha kababayin-an ngan haros diri gintatagad an ira opinyon. Nagdaku ako nga an kababayin-an pankusina la ngan nag-aasikaso han ira bana ngan mga anak.

Diri masayon an akon gin-agian han bata pa ako. Han dyes anyos ako, namatay hi Tatay tungod han pag-ininom. Paglabay hin lima ka tuig, nag-unay an akon usa nga magurang. Hito gihap nga tuig, nakakita ako hin pagpatay tungod hin away ha pamilya. Na-shock gud ako. Gintutdoan ako han akon mga kapamilya ha paggamit hin kutsilyo ngan pusil ngan ha pag-ato kon ginkikinahanglan. Tungod ha kagupong, nagpatato ako ha bug-os nga lawas ngan nagtikang pag-ininom.

Ha edad nga 16, nakakaubos na ako hin 10 tubtob 15 ka botilya nga beer kada adlaw, ngan waray pag-iha, nagdroga ako. Basi maipadayon ko an akon bisyo, namamaligya ako hin iskrap nga puthaw ngan nangangawat. Han 17 anyos ako, napriso ako. Ha kabug-osan, 18 nga sentensya an akon nakarawat tungod ha pangawat ngan pagin bayolente.

Nagtikaraot pa gud an akon sitwasyon han mag-20 anyos ako. Nakakaubos ako hin 20 ka istik hin marijuana ha usa ka adlaw labot la han heroin ngan iba pa nga droga. Pipira ka beses nga hapit na ako mamatay tungod han overdose. Nagbaligya liwat ako hin droga, salit may dara ako pirme nga kutsilyo ngan pusil. Makausa ginpusil ko an usa nga lalaki, kondi maopay na la nga an buckle han iya paha an naigo! Han 24 anyos ako, namatay hi Nanay salit nagin mas bayolente ako. Kon nakikita ako ha kalsada, nahahadlok an akon mga iginkakatapo salit nalikay hira. Tungod hin mga away, agsob nga ha presinto o ha hospital ako nakikita kon Sabado o Domingo.

Ha edad nga 28, nag-asawa ako. Sugad han ginlalaoman, diri ko ginrirespeto an akon asawa. Gin-iinsulto ko hiya ngan ginkakastigo. Waray kami ginhimo nga magkaupod sugad nga mag-asawa. Kahuna ko nga igo na nga pauranan hiya hin kinawat nga mga alahas. Kondi may nahitabo nga diri ko ginlalaoman. Nagtikang hiya mag-aram han Biblia kaupod han mga Saksi ni Jehova. Ha siyahan nga pag-aram pa la, inundang na hiya pagsigarilyo, waray na kumarawat hin kinawat nga kwarta, ngan igin-uli ha akon an mga alahas. Nasina gud ako. Ginkontra ko an iya pag-aram ha Biblia ngan ginbubugahan ko an iya nawong  hin aso han sigarilyo. Ginpakaalohan ko liwat hiya ha atubangan han damu nga tawo.

Usa ka gab-i, tungod han duro nga kahubog, ginsunog ko an amon apartment. Gintalwas ako han akon asawa, pati an amon singko anyos nga anak. Han nahawhawan ako, nakonsensya ako hinduro. Inabat ko nga diri gud ako mapapasaylo han Dios. Nahinumdoman ko an siring han usa nga padi nga an magraot mahingangadto ha impyerno. Bisan an akon psychiatrist nagsiring: “Waray na ako mahihimo! Imposible ka na magbag-o.”

Katapos han sunog, linungon kami ha akon ugangan. Han bumisita an mga Saksi ha akon asawa, nagpakiana ako, “Mapapasaylo pa ba ako han Dios bisan pa han ngatanan ko nga sala?” Iginpabasa nira ha akon an 1 Corinto 6:9-11. Nakalista dida an mga buhat nga ginkukondenar han Dios, kondi ito nagdugang: “Sugad hito an iba ha iyo hadto.” Nagpasarig ito ha akon nga puydi ako magbag-o. Katapos iginpabasa nira ha akon an 1 Juan 4:8 ngan ginpatapod nga hinigugma ako han Dios. Nadasig ako salit naghangyo ako nga dumarahan hin pag-aram ha Biblia duha ka beses kada semana. Ngan nagtikang ako tumambong ha ira katirok. Tikang hito, pirme na ako nag-aampo kan Jehova.

Ha sulod hin usa ka bulan, inundang na ako ha pagdroga ngan pag-ininom. Nagtikang ako makaabat nga baga hin may nag-aaway ha sulod han akon lawas! Nagkaada ako magpakaharadlok nga inop, nasakit an akon ulo, naninig-a an akon kaunoran, ngan nakaeksperyensya hin iba pa nga magraot nga pag-abat tungod ha pag-undang han bisyo. Pero sugad hin ginkakaptan ni Jehova an akon kamot ngan ginpaparig-on ako. Inabat ko an inabat ni apostol Pablo han nakarawat niya an bulig han Dios: “Ha ngatanan nga butang may kusog ako pinaagi ha iya nga naghahatag ha akon hin gahum.” (Filipos 4:13) Paglabay han panahon, nakaundang liwat ako ha paggamit hin tabako.​—2 Corinto 7:1.

Gawas la han bulig ha akon nga magkaada kontrol ha akon kinabuhi, nakabulig liwat an Biblia nga mapauswag an amon relasyon sugad nga pamilya. Nagbag-o an akon pagtratar ha akon asawa. Gintatahod ko na hiya ngan nasiring na ako hin “alayon” ngan “salamat.” Nagin maopay na ako nga tatay ha akon anak. Katapos hin usa ka tuig nga pag-aram ha Biblia, igindedikar ko an akon kinabuhi kan Jehova ngan nagpabawtismo sugad han ginhimo han akon asawa.

Kombinsido ako nga an mga prinsipyo han Biblia nakatalwas han akon kinabuhi. Bisan an akon mga paryente nga diri Saksi nasiring nga posible nga namatay ako tungod ha droga o ha away kon waray an Biblia.

Nagbag-o gud an amon kinabuhi sugad nga pamilya tungod han mga prinsipyo ha Biblia nga nagtutdo ha akon han akon mga responsabilidad sugad nga bana ngan tatay. (Efeso 5:25; 6:4) Magkaupod nga nagbubuhat na kami sugad nga pamilya. Yana, imbes nga itago la an akon asawa ha kusina, ginsusuportaran ko hiya ha iya bug-os-panahon nga pag-ebanghelyo. Ngan malipayon liwat hiya ha pagsuporta ha akon buruhaton sugad nga tigurang ha kongregasyon.

Daku gud an naibulig han gugma ngan kalooy ni Jehova nga Dios ha akon kinabuhi. Karuyag ko isumat an iya mga kalidad ha mga tawo nga baga hin waray na paglaom nga magbag-o, kay sugad liwat hito an pagkita ha akon han damu hadto. Sigurado ako nga an Biblia may gahum ha pagbulig ha bisan hin-o nga magkaada limpyo ngan may katuyoan nga kinabuhi. An Biblia nagtutdo ha akon diri la ha pagrespeto ha iba, lalaki ngan babaye, kondi pati liwat ha pagrespeto ha akon kalugaringon.