NAGKIKINITA hi Rebeca ha kabukiran samtang nagtitikasirom na. Paglabay han pipira ka semana nga pagbiniyahe, nahiara na hiya ha makiwa nga kalakat han kamelyo samtang nakasakay hiya hito. Hirayo na gud hiya tikang ha iya natawhan nga lugar nga mga ginatos ka kilometro ha norte-este. Bangin diri na niya makita utro an iya pamilya. Sigurado nga damu nga pakiana an iya nahunahuna mahitungod han iya kabubuwason, labi na nga hirani na hiya ha iya destinasyon.

Gin-agian na han ira karaban an daku nga bahin han Canaan ngan yana gintatabok na nira an mas makuri nga kabukiran han Negeb. (Genesis 24:62) Bangin nakakita hi Rebeca hin mga karnero. An lugar bangin sobra kakuri ngan uga para ha pag-uma, kondi may igo ito nga pasabsaban. Pamilyar hini nga lugar an lagas nga lalaki nga iya kaupod. Eksayted gud an lagas nga isumat ha iya agaron an maopay nga sumat​—hi Rebeca magigin asawa ni Isaac! Kondi bangin nahunahuna ni Rebeca kon ano an iya magigin kinabuhi dida hito nga lugar. Ano daw la an hitsura han iya maarasawa, hi Isaac? Waray pa gud hira magkita! Maruruyagan daw la hiya niya? Ngan maruruyagan ba liwat niya hiya?

Ha damu nga lugar ha kalibotan yana, diri komon nga an mga kag-anak an nagbubuot kon hin-o an magigin asawa han ira anak. Kondi ha iba nga dapit, komon ito. Pero anoman an imo gindak-an, bangin umuyon ka nga hi Rebeca tisulod ha sitwasyon nga diri hiya maaram han magigin resulta. Kondi ha pagkamatuod, usa hiya nga babaye nga may makatirigamnan nga kaisog ngan pagtoo. Iton duha nga kalidad kinahanglan kon naatubang kita hin mga pagbag-o ha kinabuhi. May iba pa nga mag-opay ngan birilhon nga mga kalidad hi Rebeca tungod han iya pagtoo.

An daku nga pagbag-o ha kinabuhi ni Rebeca nagtikang ha usa ka adlaw nga baga hin ordinaryo la ha iya. Nagtubo hiya ha Haran, usa nga syudad ha Mesopotamia, o ha lugar nga hirani hito. An iya mga kag-anak diri pariho ha kadam-an nga residente didto kay diri hira nagsisingba ha dios han bulan nga hi Sin. Lugod, hi Jehova an ira Dios.​—Genesis 24:50.

Nagdaku hi Rebeca nga mahusay, kondi diri la ito an iya kalidad. Maduruto hiya ngan limpyo ha moral. Riko an iya pamilya ngan may mga surugoon, kondi waray hiya padakua o tratara sugad hin prinsesa; hiara hiya magtrabaho hin mabug-at. Pariho ha iba nga kababayin-an hadto, damu an iya magbug-at nga buruhaton, upod na an pag-alog para ha pamilya. Antes magsirom, nagpapas-an hiya hin tibod ngan nakadto ha atabay.​—Genesis 24:11, 15, 16.

Usa ka gab-i, katapos mapuno ni Rebeca hin tubig an iya tibod, usa nga lagas nga lalaki an nagdadalagan pagtapo ha iya. An lagas nagsiring: “Tagi ako hin pag-inom, ako nanginginyupo ha imo, gutiay la nga tubig han imo tibod.” Simple la ini nga hangyo nga iginyakan ha matinalahuron nga paagi! Nakita ni Rebeca nga hirayo an ginbiyahe han lalaki. Salit iginlusad dayon niya an tibod ha iya sugbong, ngan diri la basta nga ginpadimdim an lalaki kondi iya gud ito ginpainom hin presko ngan mahagkot nga tubig. Nakita niya nga an lalaki may napulo nga kamelyo nga nakaluhod kondi waray tubig an irimnan han mga hayop. Nakita niya nga mapinairon nga gin-iinobserbaran hiya han lalaki, ngan karuyag niya magin mahinatagon tubtob han iya mahihimo. Salit hiya nagsiring: “Ako maalog para han imo mga kamelyo liwat, tubtob ha ira katima panginom.”​—Genesis 24:17-19.

Tigamni nga nagtanyag hi Rebeca diri la ha paghatag hin tubig ha mga kamelyo kondi ha pagpainom  hito tubtob nga makontento. Kon an usa nga kamelyo nauuhaw hinduro, mahimo ito makaubos hin sobra 25 ka galon nga tubig! Kon sugad kauhaw an napulo nga kamelyo, sigurado nga damu ka oras nga mag-iinalog hi Rebeca. Pero baga hin diri man sugad kauhaw an mga hayop. * Kondi maaram ba hito hi Rebeca han magtanyag hiya ha pagpainom ha mga hayop? Diri. Kondi andam hiya ngan karuyag gud niya nga magtrabaho kon kinahanglan basi maipakita an pagkamaabiabihon. Ginkarawat han lagas an iya tanyag. Katapos, gin-inobserbaran hiya han lagas samtang nagbabalik-balik nga nagdidinalagan ha pagbutang hin tubig ha iya tibod ngan paghuwad hito ha irimnan han mga hayop.​—Genesis 24:20, 21.

Maopay nga susbaranan hi Rebeca ha aton yana tungod kay nagkikinabuhi kita ha panahon diin komon an pagin makikalugaringon. Sugad han igintagna, an mga tawo nagigin “mahigugmaon ha ira la kalugaringon,” nadiri pagbulig ha iba. (2 Timoteo 3:1-5) Para ha mga Kristiano nga naruruyag maatohan iton negatibo nga kalidad, maopay nga pamalandungon nira an paghulagway han Biblia kan Rebeca, nga nagdadalagan nga nagbibinalik-balik ngadto ha atabay.

Sigurado nga naobserbaran ni Rebeca an siplat han lalaki. Waray man maraot ha iya siplat; duro la an iya kahipausa, pagdayaw, ngan kalipay. Han matapos hi Rebeca, ginregalohan hiya han lalaki hin marahalon nga mga alahas! Katapos nagpakiana ito: “Kan kanay ka anak? sumati ako, ako nanginginyupo ha imo. May-ada ba lugar ha balay han imo amay nga amon ukyan?” Han nagsumat hi Rebeca mahitungod han iya pamilya, nagduro an kalipay han lagas. Bangin tungod kay natigdaan hi Rebeca ngan naeksayted, hiya nagsiring: “Kami may-ada dinagamian ngan tubong nga damu, ngan lugar nga uukyan”​—usa nga tanyag nga diri la harumamay kay may iba pa nga upod an lalaki. Katapos dinalagan hi Rebeca basi sumatan an iya nanay han nahitabo.​—Genesis 24:22-28, 32.

Matin-aw, gintutdoan hi Rebeca nga magin maabiabihon tikang pa ha kabata. Usa gihap ini nga kalidad nga nagtitikawara na yana, ngan usa pa ini nga rason basi subaron an pagtoo hinin buotan nga daraga. Kon may pagtoo kita ha Dios, magigin maabiabihon kita.  Maabiabihon hi Jehova tungod kay mahinatagon hiya ha tanan, ngan karuyag niya nga subaron hiya han iya magsiringba. Kon maabiabihon kita bisan ha mga waray maibabalos ha aton, mapapalipay naton an aton Amay.​—Mateo 5:44-46; 1 Pedro 4:9.

Hin-o an lalaki ha may atabay? Surugoon hiya ni Abraham, an bugto han lolo ni Rebeca. Salit gin-abiabi hiya ha balay ni Betuel, an tatay ni Rebeca. Bangin Elieser an iya ngaran. * Ginpapakaon hiya han tagbalay, kondi nagdumiri hiya kay waray pa niya maisumat an rason han iya pagbisita. (Genesis 24:31-33) Mahahanduraw naton an iya kalipay samtang nag-iistorya, kay nakita pa la niya nga ginbendisyonan ni Jehova an iya importante nga misyon. Ha ano nga paagi?

Handurawa nga nag-iistorya hi Elieser samtang namamati hin maopay an tatay ni Rebeca nga hi Betuel, ngan an bugto ni Rebeca nga hi Laban. Ginsumatan hira ni Elieser nga ginbendisyonan gud ni Jehova hi Abraham ha Canaan ngan hira Abraham ngan Sarah may anak, hi Isaac, nga amo an makakapanunod han ngatanan. Ini nga surugoon gintagan ni Abraham hin importante nga sugo: An pagpamiling hin asawa para kan Isaac tikang ha mga paryente ni Abraham ha Haran.​—Genesis 24:34-38.

Ginpasumpa ni Abraham hi Elieser nga diri kumuha hin maarasawa para kan Isaac tikang ha mga babaye ha Canaan. Kay ano? Tungod kay an mga taga-Canaan diri natahod o nasingba kan Jehova. Maaram hi Abraham nga ha itinanda nga panahon ni Jehova, Iya sisirotan ito nga mga tawo tungod han ira maraot nga binuhatan. Diri karuyag ni Abraham nga an iya hinigugma nga hi Isaac, magkaada koneksyon hito nga mga tawo ngan ha ira imoral nga paagi. Maaram liwat hiya nga an iya anak may-ada importante nga bahin ha katumanan han mga saad han Dios.​—Genesis 15:16; 17:19; 24:2-4.

Iginsumat liwat ni Elieser nga nag-ampo hiya kan Jehova pag-abot niya ha atabay nga hirani ha Haran. Sugad hin ginhangyo niya hi Jehova nga pilion an daraga nga mapapangasawa ni Isaac. Paonan-o? Gin-ampo ni Elieser ha Dios nga kumadto ha atabay an babaye nga karuyag Niya magin asawa ni Isaac. Ngan kon aroan hin maiinom, sadang magboluntaryo an babaye paghatag diri la kan Elieser kondi pati ha mga kamelyo. (Genesis 24:12-14) Ngan hin-o an umabot ngan nagbuhat hito? Hi Rebeca! Handurawa an mahimo abaton ni Rebeca kon iya hinbatian an iginsumat ni Elieser ha iya pamilya!

Hira Betuel ngan Laban nabantad han iginsumat ni Elieser. Hira nagsiring: ‘Ini nga bagay tikang kan Jehova.’ Sugad han kustomre hadto, naghimo hira hin kasabotan ha paghatag kan Rebeca basi magin asawa ni Isaac. (Genesis 24:50-54) Pero nagpapasabot ba ini nga diri na puydi magdesisyon hi Rebeca?

Pipira ka semana antes hito, hi Elieser nagpakiana kan Abraham: “Ano man kon diri umupod ha akon an babaye?” Bumaton hi Abraham: “Mahigagawas ka han imo sumpa.” (Genesis 24:39, 41, Maupay nga Sumat) Ha panimalay liwat ni Betuel, gintatagad an opinyon ni Rebeca. Nalipay gud hi Elieser kay naglampos an iya misyon, salit kinabuwasan naghangyo hiya nga bumalik dayon ha Canaan upod hi Rebeca. Kondi, karuyag han pamilya ni Rebeca nga makaupod pa hiya bisan la hin napulo ka adlaw. Basi masolusyonan ito, hira nagsiring: “Amon tatawagon an daraga, ngan hibaroan namon ha iya baba.”​—Genesis 24:57.

Hini nga takna, aada hi Rebeca ha sitwasyon nga kinahanglan niya magdesisyon. Ano an iya isisiring? Kukuhaon ba niya an simpatiya han iya tatay ngan bugto, ngan makikimalooy nga diri hiya paupdon hini nga biyahe? O tatagdon ba niya nga pribilehiyo an pagkaada bahin ha panhitabo nga matin-aw nga gin-gigiyahan ni Jehova? Han bumaton hiya, iginpakita niya an iya inaabat mahitungod hinin tigda ngan bangin daku nga pagbag-o ha iya kinabuhi. Hiya nagsiring: “Ako maupod.”​—Genesis 24:58.

Makatirigamnan gud an iya disposisyon! Yana, iba na gud an kustomre ha pag-asawa, kondi damu la gihap an aton mahibabaroan tikang kan Rebeca. An pinakaimportante para ha iya, diri an iya karuyag, kondi an karuyag han iya Dios, hi Jehova. May kalabotan ha pag-asawa, an Pulong han Dios la gihap an naghahatag han pinakamaopay nga giya ha pagpili han maarasawa, ngan kon paonan-o magigin maopay nga  bana o asawa. (2 Corinto 6:14, 15; Efeso 5:28-33) Maopay gud nga subaron an ehemplo ni Rebeca ngan buhaton an mga butang uyon ha pamaagi han Dios.

Ginbendisyonan han pamilya ni Betuel an ira hinigugma nga hi Rebeca. Katapos, hi Rebeca, hi Debora nga nagmangno ha iya tikang ha kabata, ngan an iya pipira nga surugoon nga babaye, inupod kan Elieser ngan han iya mga surugoon. (Genesis 24:59-61; 35:8) Waray pag-iha, hirayo na hira ha Haran. Hirayo ito nga biyahe, mga 800 ka kilometro, ngan bangin umabot ito hin tulo ka semana. Posible nga diri ito komportable nga biyahe. Hi Rebeca pirme nakakakita hin kamelyo, kondi diri naton masisiring nga hiara hiya ha pagsakay hito. Iginhuhulagway han Biblia an iya pamilya sugad nga paraataman hin karnero, diri negosyante nga may karaban hin kamelyo. (Genesis 29:10) An diri hiara sumakay hin kamelyo kasagaran nga nareklamo nga diri komportable an pagsakay hito bisan kon madaliay la!

Bisan pa hito, puno hin paglaom hi Rebeca, waray ruhaduha nga nangalimbasog hiya nga hibaroan kan Elieser an mahitungod kan Isaac ngan han iya pamilya. Handurawa samtang an lagas nagsusumat ha iya, ha atubangan han ginpasiga nga mga sungo ha gab-i, mahitungod han saad ni Jehova ha Iya sangkay nga hi Abraham. Magpapabangon an Dios tikang ha tulin ni Abraham hin usa nga magdadara hin bendisyon ha katawohan. Hunahunaa la an kahipausa ni Rebeca han hinbaroan niya nga an saad ni Jehova matutuman pinaagi han iya maarasawa, hi Isaac​—ngan pinaagi liwat ha iya!—​Genesis 22:15-18.

Ha kataposan, inabot na an adlaw nga ginhuhulagway ha tinikangan hini nga artikulo. Samtang an karaban naagi ha Negeb ngan nagtitikasirom na, hinkit-an ni Rebeca an usa nga lalaki nga naglalakat ha kapatagan. Baga hin hilarom an iya ginhuhunahuna. Aton mababasa: “Hiya [Rebeca] linugas ha kamelyo,” posible nga waray na niya hulata nga lumuhod ito. Ngan hiya nagpakiana: “Hin-o ito nga tawo nga naglalakat ha uma pagtapo ha aton?” Han hinbaroan niya nga hi Isaac ito, gintabonan niya hin pandong an iya ulo. (Genesis 24:62-65) Kay ano? Matin-aw nga tigaman ito hin pagtahod ha iya magigin bana. Bangin may maghunahuna yana nga kadaan na an sugad nga pagpasakop. Kondi, kita ngatanan, lalaki man o babaye, may mahibabaroan ha pagkamapainubsanon ni Rebeca, tungod kay kinahanglan naton iton makaruruyag nga kalidad.

Hi Isaac nga mga 40 anyos, nagtataguminatay la gihap tungod han kamatay han iya nanay, hi Sarah, tulo ka tuig na an naglabay. Masisiring naton nga mahigugmaon ngan mapinairon hi Isaac. Daku gud nga bendisyon para ha iya an pagkaada asawa nga maduruto, maabiabihon, ngan mapainubsanon! Ano an sunod nga nahitabo? An Biblia nasiring: “Hiya [Isaac] nahigugma ha iya.”​—Genesis 24:67; 26:8.

Mga 3,900 ka tuig na an naglabay, kondi masayon la gihapon higugmaon hi Rebeca. Hin-o ba an diri magdadayaw han iya kaisog, pagkamaduruto, pagkamaabiabihon, ngan pagkamapainubsanon? Maopay nga subaron naton ngatanan​—bata ngan lagas, lalaki ngan babaye, inasaw-an ngan solo—​an iya pagtoo!