An upat nga mangangabayo baga hin misteryoso ngan makaharadlok, kondi diri naton hira sadang kahadlokan. Kay ano? Tungod kay an Biblia ngan an mga panhitabo yana nabulig ha aton nga mahibaroan hin maopay kon ano an ginrirepresentaran han tagsa nga mangangabayo. Ngan bisan kon an ira paghaguros nagpapasabot hin kasakitan ha tuna, mahimo liwat ito magin maopay nga sumat para ha imo ngan ha imo pamilya. Ha ano nga paagi? Basi mabaton ini, aton anay kilalahon an tagsa nga mangangabayo.

An bisyon nasiring: “Nakita ko an usa nga busag nga kabayo, ngan an nasakay hito may pana; ngan gintagan hiya hin korona, ngan sinulong hiya basi pirdihon an mga kaaway ngan tapuson an iya pakig-away.”—Pahayag 6:2.

Hin-o an sakay han busag nga kabayo? Makikilala hiya pinaagi gihap hito nga libro han Biblia, an Pahayag, nga ha urhi nagpakilala hinin langitnon nga mangangabayo sugad nga “An Pulong han Dios.” (Pahayag 19:11-13) Ito nga titulo gintatag-iya ni Jesu-Kristo tungod kay hiya an tagapagyakan han Dios. (Juan 1:1, 14) Dugang pa, gintatawag hiya nga “Hadi han mga hadi ngan Ginoo han mga ginoo” ngan ginhuhulagway nga “Matinumanon ngan Totoo.” (Pahayag 19:16) Matin-aw, may awtoridad hiya nga gumios sugad nga girriro ngan hadi, ngan diri niya gin-aabuso an iya gahum o gin-gagamit ito ha maraot nga paagi. Kondi may mga pakiana nga nabangon.

Hin-o an naghatag kan Jesus hin awtoridad nga manakop? (Pahayag 6:2) Hi propeta Daniel nakakita hin bisyon diin an Mesias, nga pariho ha “anak han tawo,” gintagan hin ‘kagamhanan, himaya, ngan hin usa nga ginhadian’ han “tigurang ha mga adlaw” nga hi Jehova nga Dios mismo. * (Daniel 7:13, 14) Salit an Dios nga Makagarahum-ha-ngatanan an naghatag kan Jesus han gahum ngan katungod ha pagmando ngan ha pagpadapat hin paghukom. An busag nga kabayo angayan nga simbolo han may hustisya nga girra nga paghihimoon han Anak han Dios tungod kay an kolor nga busag agsob gamiton ha Biblia sugad nga simbolo han pagkamatadong.—Pahayag 3:4; 7:9, 13, 14.

Kakan-o nagtikang humaguros an mga mangangabayo? Tigamni nga an siyahan nga mangangabayo, hi Jesus, nagtikang humaguros han nakarawat niya an korona. (Pahayag 6:2) Kakan-o ginkoronahan hi Jesus sugad nga Hadi ha langit? Diri ito han binalik hiya ha langit katapos han iya kamatayon. Iginpapakita han Biblia nga hito nga takna nagtikang an peryodo ha paghulat. (Hebreo 10:12, 13) Gintagan ni Jesus an iya mga sumurunod hin tigaman kon san-o matatapos ito nga paghulat ngan an tinikangan han iya pagmando ha langit. Nagsiring hiya nga ha tinikangan han iya paghadi, tigda nga magigin mas maraot an kahimtang ha kalibotan. Magkakaada girra, gutom, ngan sakit. (Mateo 24:3, 7; Lucas 21:10, 11) Waray pag-iha han magtikang an Girra ha Kalibotan I han 1914, nagin matin-aw nga inabot na ito nga panahon, an peligroso nga panahon ha tuna nga gintatawag han Biblia nga “kataposan nga mga adlaw.”—2 Timoteo 3:1-5.

Pero imbes nga magin maopay, kay ano nga mas nagtikaraot an kahimtang ha tuna tikang han maghadi hi Jesus han 1914? Kay hito nga takna nagtikang magmando hi Jesus ha langit, diri ha tuna. Tungod hito nagkaada girra ha langit, ngan iginlabog ha tuna han bag-o nga Hadi, hi Jesus nga kilala nga Miguel, hi Satanas ngan an iya mga demonyo. (Pahayag 12:7-9, 12) Daku gud an kasina ni Satanas tikang hito nga takna kay maaram hiya nga halipot na la an iya panahon. Oo, diri na maiha nga tutumanon han Dios an iya kaburut-on kontra kan Satanas dinhi ha tuna. (Mateo 6:10) Yana, aton kitaon kon paonan-o an tulo nga iba pa nga mangangabayo nagpapamatuod nga nagkikinabuhi na gud kita ha masamok nga “kataposan nga mga adlaw.” Diri pariho ha siyahan  nga mangangabayo nga klaro nga nagrirepresentar hin espisipiko nga indibiduwal, inin tulo nga mangangabayo nagrirepresentar hin mga kahimtang ha bug-os nga kalibotan nga nagpapakuri ha mga tawo.

“Ginawas an usa nga kabayo nga pula an kolor; ngan an nasakay hito gintagan hin awtoridad ha pagkuha han kamurayawan ha tuna basi hira magparaptayay; ngan gintagan hiya hin daku nga espada.”—Pahayag 6:4.

Ini nga mangangabayo nagrirepresentar han girra. Tigamni nga iya ginkukuha an kamurayawan diri la han pipira nga nasud kondi han bug-os nga kalibotan. Han 1914, nagkaada girra ha bug-os nga kalibotan ha siyahan nga higayon. Ginsundan ito han ikaduha nga girra ha kalibotan diin mas damu an nadaot ngan namatay. May mga pagbanabana nga sobra 100 ka milyon an namatay ha girra ngan araway tikang han 1914! Ngan damu nga iba pa an nag-antos ha pisikal.

Mationan-o kakalyap an girra hinin presente nga panahon? Ha siyahan nga higayon ha kasaysayan, an katawohan baga hin nagkaada kapas ha pagpatay ha tanan nga tawo. Bisan an mga organisasyon nga ginsisiring nga nagtitipig hin kamurayawan, sugad han Nagkakaurosa nga mga Nasud, diri nakakapugong han sakay han pula nga kabayo.

“Nakita ko an usa nga itom nga kabayo, ngan an nasakay hito may ginkakaptan nga timbangan. Ngan nabatian ko nga may tingog tikang ha butnga han upat nga kerubin nga nasiring: ‘Mga usa ka kilo nga trigo para ha usa ka denaryo, ngan tulo ka kilo nga sebada para ha usa ka denaryo; ngan ayaw pabay-i nga maubos an lana han olibo ngan an bino.’”—Pahayag 6:5, 6.

Ini nga mangangabayo nagrirepresentar han gutom. Makikita naton dinhi an hulagway han duro nga gutom diin an mga usa ka kilo nga trigo nagkakantidad hin usa ka denaryo, an usa ka adlaw nga sweldo ha siyahan nga siglo! (Mateo 20:2) An usa gihap ka denaryo makakapalit hin tulo ka kilo hin lugas nga sebada nga gintatagad nga minos nga klase kay ha trigo. Mationan-o kaiha ito makakasustiner ha usa nga daku nga pamilya? Ginpapahamangnoan an mga tawo nga diri magkinarag bisan ha pan-adlaw-adlaw nga pagkaon, nga angayan nga iginhuhulagway han komon nga mga pagkaon hito nga panahon sugad han lana han olibo ngan bino.

Tikang han 1914, may nakita na ba kita nga ebidensya han paghaguros han sakay han itom nga kabayo? Oo! Mga 70 ka milyon an namatay ha gutom durante han ika-20 ka siglo. Usa nga organisasyon an nagbanabana nga “805 ka milyon—mga usa ha kada siyam ha populasyon han kalibotan—an maiha na nga nag-aantos hin malnutrisyon han 2012-14.” Usa pa nga report an nagsiring: “Mas damu an namamatay ha gutom kada tuig kay han gintarampo nga namamatay ha AIDS, malarya, ngan TB.” Bisan pa han damu nga sinsero nga pangalimbasog nga mapakaon an nagugutom, padayon nga nahaguros an sakay han itom nga kabayo.

“Nakita ko an usa nga kabayo nga duason, ngan an nasakay hito may ngaran nga Kamatayon. Nagsisinunod hirani ha iya an Hades. Ngan gintagan hira hin awtoridad ha ikaupat nga bahin han tuna, ha pagpatay pinaagi hin hilaba nga espada, gutom, makamaratay nga sakit ngan mapintas nga mga hayop ha tuna.”—Pahayag 6:8.

An ikaupat nga mangangabayo nagrirepresentar han kamatayon tungod han sakit ngan iba pa nga hinungdan. Waray pag-iha katapos han 1914, mga 500 ka milyon an nagkaada trangkaso Espanyola, mga 1 ha kada 3 ka tawo! Ngan minilyon an namatay tungod hito.

Kondi tinikangan pa la an trangkaso Espanyola. Ginbabanabana han mga eksperto nga ginatos ka milyon an namatay tungod han hangga durante han ika-20 ka siglo. Tubtob yana, damu an bata pa nga namamatay tungod han AIDS, TB, ngan malarya, bisan pa han duro nga pagsaliksik han medisina.

Girra man, gutom, o sakit an hinungdan, usa la an resulta—kamatayon. Waray undang nga nagtitirok an  Lubnganan hin mga biktima ngan diri ito naghahatag hin paglaom.

Inin makuri nga panahon hirani na gud matapos. Tigamni ini: “Sinulong” hi Jesus han 1914 ‘basi pirdihon an kaaway.’ Iya iginlabog hi Satanas dinhi ha tuna, pero waray niya taposa an iya pakig-away. (Pahayag 6:2; 12:9, 12) Diri na maiha, durante han Armagedon, wawad-on ni Jesus an impluwensya ni Satanas ngan bubungkagon an mga tawo nga nasuporta ha Yawa. (Pahayag 20:1-3) Diri la papaundangon ni Jesus an paghaguros han tulo nga mangangabayo kondi iya liwat babaliktaron an epekto han ira nakakadaot nga paghaguros. Ha ano nga paagi? Tagda an mga saad han Biblia.

Imbes nga girra, kamurayawan. ‘Pauukyon [ni Jehova] an mga araway tubtub ha katapusan han tuna; iya babarion an pana, ngan uutdon an bankaw.’ (Salmos 46:9) Ngan para ha mamurayawon nga mga tawo, “maglilipay hira tungud han kahuraan han kamurayaw.”—Salmos 37:11.

Imbes nga gutom, hura nga pagkaon. “Magkakaada kahura-an hin lugas ha tuna ha bawbaw han mga bukid.”—Salmos 72:16.

Imbes nga sakit ngan kamatayon, perpekto nga kahimsog ngan kinabuhi nga dayon para ha tanan. “Papahiron [han Dios] an mga luha ha ira mga mata, ngan mawawara na an kamatayon, pati an kabido, pagtangis, ngan kasakit.”—Pahayag 21:4.

Han nakanhi hi Jesus ha tuna, iginpakita niya kon ano an magigin kahimtang ilarom han iya pagmando. Iya igin-aghat an kamurayawan, milagroso nga nagpakaon hin yinukot, nagtambal hin may sakit, ngan nagbanhaw pa ngani hin mga patay.—Mateo 12:15; 14:19-21; 26:52; Juan 11:43, 44.

Malilipay an mga Saksi ni Jehova nga ipakita ha imo gamit an imo Biblia kon paonan-o ka mahimo magin andam kon matapos na an paghaguros hito nga mga mangangabayo. Karuyag mo ba mahibaro hin dugang?