Ginlarang han Dios an aton lawas nga may urusahon nga abilidad ha pagtambal ha kalugaringon. Kon an mahimsog nga lawas nasasamad, napapanggasan, o natutusok, “ginpapahinabo dayon hito an usa nga komplikado nga proseso nga gindisenyo basi matambal an samad, anoman an kadaku hito.” (Johns Hopkins Medicine) An lawas naghihimo dayon hin paagi ha pagpaundang han pagdinugo, pagpahaluag han mga ugat, pagtambal han samad, ngan pagparig-on han unod.

TAGDA: Kon gindisenyo han Maglalarang an aton lawas ha pagtambal han aton pisikal nga mga samad, diri ba liwat kita makakasarig han iya iginsaad nga bulig basi makarekober kita tikang ha emosyonal nga mga kasakit? An salmista nagsiring: “Iya gintatambal an mga ruba an kasingkasing; iya ginbubutok an ira mga samad.” (Salmo 147:3) Kondi kon nasasakitan ka tungod hin trumatik nga eksperyensya, paonan-o ka makakasiguro nga bubuligan ka ni Jehova​—yana ngan ha tidaraon?

An Dios nagsasaad: “Ayaw kahadlok, kay kaupod mo ako. Ayaw kabaraka, kay ako an imo Dios. Paririg-unon ko ikaw, oo, bubuligan ko ikaw.” (Isaias 41:10) An usa nga maaram nga hi Jehova nagtatagad ha iya may kamurayawan ha hunahuna ngan kusog ha pag-atubang han magkalain-lain nga pagsari. Gintawag ni apostol Pablo ini nga kamurayawan nga “an kamurayawan han Dios nga labaw ha ngatanan nga pagsabot.” Hiya nagdugang: “Ha ngatanan nga butang may kusog ako pinaagi ha iya nga naghahatag ha akon hin gahum.”​—Filipos 4:4-7, 9, 13.

An Biblia nabulig ha aton nga magkaada pagtoo ha mga saad ni Jehova para ha tidaraon han katawohan. Pananglitan, an Pahayag 21:4, 5 nagsusumat kon ano an iya bubuhaton ngan kon kay ano nga makakasarig kita nga iya ito bubuhaton:

• “Papahiron niya an ngatanan nga luha” ha aton mga mata. Wawad-on ni Jehova an ngatanan naton nga pag-antos ngan kabaraka, bisan adton baga hin diri daku nga butang para ha iba.

• Samtang “nalingkod ha trono” ha langit, gagamiton han Makagarahum-ha-ngatanan nga Hadi an iya gahum ngan awtoridad basi wad-on an pag-antos, ngan ihatag ha aton an ginkikinahanglan nga bulig.

• Gin-gagarantiyahan ni Jehova nga an iya mga saad “matinumanon ngan tinuod.” Karuyag sidngon, igin-gagarantiya niya an iya ngaran ngan reputasyon nga iya tutumanon an iya mga saad.

“‘Papahiron niya an ngatanan nga luha ha ira mga mata, ngan mawawara na an kamatayon, pati an kabidoan, pagtangis, ngan kasakit. An daan nga mga butang naglabay na.’ Ngan an Dios nga nalingkod ha trono nagsiring: ‘Kitaa! Ginhihimo ko nga bag-o an ngatanan nga butang.’ Nasiring liwat hiya: ‘Isurat ini, kay ini nga mga pulong matinumanon ngan tinuod.’”​—Pahayag 21:4, 5.

An pisikal nga uniberso ngan an Biblia nagpapahayag han personalidad ngan kalidad han aton langitnon nga Amay. Bisan kon an mga linarang diri direkta nga nag-iimbitar ha aton nga kilalahon an Dios sugad nga duok nga Sangkay, an Biblia direkta nga nag-aaghat: “Magin duok ha Dios, ngan magigin duok hiya ha iyo.” (Santiago 4:8) An Buhat 17:27 nasiring: “Diri hiya hirayo ha tagsa ha aton.”

Samtang naggagahin ka hin panahon ha pagkilala ha Dios, mas makukombinse ka nga “nagtatagad hiya” ha imo. (1 Pedro 5:7) Ano an praktikal nga mga kapulsanan han sugad nga pagsarig kan Jehova?

Tagda an eksperyensya ni Toru nga taga-Japan. Nagdaku hiya kaupod han iya Kristiano nga nanay, kondi nahidabi hiya ha madarahog nga yakuza, an Japanese Mafia. Hiya nagsiring: “Hito nga panahon, natoo ako nga nangangalas ha akon an Dios, ngan inabat ko nga an kamatay han mga tawo nga duok ha akon, labi na han akon mga hinigugma, sirot ha akon.” Nagsiring hi Toru nga inin madarahog nga palibot ngan panhunahuna, nakahimo ha iya nga magin “waray gugma ngan waray pagpaid.” Makausa hiya nag-ambisyon: “Karuyag ko makapatay hin usa nga mas sikat ha akon ngan mamatay nga bata pa basi magin sikat ako.”

 Kondi han gin-adman ni Toru ngan han iya asawa nga hi Hannah an Biblia, naghimo hi Toru hin daku nga pagbag-o ha iya kinabuhi. “Nakita ko mismo an mga pagbag-o han akon bana,” siring ni Hannah. Yana, may kompyansa nga nasiring hi Toru: “May-ada gud Dios nga nagtatagad ha kada tagsa ha aton. Diri niya karuyag nga mamatay an bisan hin-o, ngan andam hiya magpasaylo hadton tinuod nga nagbabasol han ira mga sala. Namamati hiya bisan ha mga butang nga diri naton naisusumat ha iba labot la ha iya, ngan bisan ha mga butang nga diri nasasabtan han iba. Ha diri maiha, tatapuson na ni Jehova an tanan nga problema, pag-antos, ngan kasakit. Bisan yana, ginbubuligan kita niya ha diri ginlalaoman nga mga paagi. Nagtatagad hiya ha aton ngan nabulig hiya kon nagsasakit kita.”​—Salmo 136:23.

Sugad han makikita ha eksperyensya ni Toru, an paghibaro nga ha diri maiha tatapuson na han Dios an tanan nga trahedya ngan papahiron niya an mga luha, naghahatag ha aton diri la hin paglaom ha tidaraon, kondi nabulig liwat ito ha aton nga magin malipayon yana. Oo, bisan ha kalibotan nga puno hin pag-antos mahimo ka makapahimulos han mahigugmaon nga pagtagad han Dios.