Gindisenyo Kita Para Mabuhi
HIN-O ha aton an nadiri nga magkaada hilawig ngan malipayon nga kinabuhi? Hunahunaa la kon ano kaopay nga mabuhi hin mahimsog ngan malipayon ha waray kataposan! Magkakaada na kita damu nga panahon nga makaupod an aton mga hinigugma, magbiyahe ha bug-os nga kalibotan, magkaada bag-o nga abilidad, magkaada dugang nga kahibaro, ngan pag-adman an mga butang nga aton naruruyagan.
Natural la ba ito nga hingyap? Oo! An Biblia nagsusumat nga ito nga hingyap iginbutang han Dios ha aton kasingkasing. (Eclesiastes 3:11) Nasiring liwat ito nga “an Dios gugma.” (1 Juan 4:8) Makatadunganon ba nga ibutang han usa nga mahigugmaon nga Dios an hingyap nga mabuhi ha waray kataposan pero imposible man ngay-an ito mahitabo?
Matin-aw, waray bisan usa nga naruruyag mamatay. Ngani, an kamatayon iginhuhulagway han Biblia sugad nga “kaaway.” (1 Corinto 15:26) An pipira temprano nga namamatay; an iba naman nabubuhi hin mas maiha. Pero usa la an dadangatan han ngatanan. Para ha damu, diri makalilipay an paghunahuna hito, nahahadlok pa ngani hira. Mapipirde gud ba ini nga kaaway? Posible ba ito?
EBIDENSYA NGA MAY KINABUHI NGA WARAY KATAPOSAN
Maaram ka ba nga diri gud katuyoan han Dios nga mamatay an mga tawo? An libro han Biblia nga Genesis naghahatag hin ebidensya nga katuyoan han Dios nga mabuhi an mga tawo ha waray kataposan dinhi ha tuna. Gin-andam hin maopay ni Jehova nga Dios an tuna basi maukyan han mga tawo. Katapos, iya ginlarang an siyahan nga tawo nga hi Adan, ngan iginbutang hiya ha paraiso, usa nga garden ha Eden. Katapos hito, “nakita han Dios an ngatanan nga iya ginhimo, ngan kitaa! maopay gud ito.”—Genesis 1:26, 31.
Perpekto an pagkalarang han Dios kan Adan. (Deuteronomio 32:4) An asawa ni Adan, hi Eva, perpekto liwat an hunahuna ngan lawas. Hi Jehova nagsiring ha ira: “Manganak ngan magdamu kamo, pun-on niyo an tuna ngan kultibara ito, ngan magkaada kamo awtoridad ha mga isda ha dagat ngan ha nalupad nga mga linarang ha langit ngan ha tagsa nga buhi nga linarang nga nagkikiwa ha tuna.”—Genesis 1:28.
Nagkikinahanglan hin panahon basi mapuno an tuna han ira mga anak. Hi Eva manganganak, ngan an iya mga anak manganganak liwat tubtob nga mapuno an tuna sugad la han katuyoan han Dios. (Isaias 45:18) Makatadunganon ba nga magsaad hito hi Jehova kanda Adan ngan Eva kon halipot man la ngay-an an ira magigin kinabuhi, bangin tubtob la nga makita an ira mga anak ngan posible an ira mga apo, ngan diri nira makikita an katumanan hito nga saad?
Hunahunaa liwat an sugo nga magkaada awtoridad ha mga hayop. Ginsugo hi Adan nga ngaranan an mga hayop, ngan nagkikinahanglan gud ito hin panahon. (Genesis 2:19) Pero basi magkaada awtoridad ha ira, kinahanglan niya mahibaro mahitungod ha ira ngan kon paonan-o hira aatamanon. Ngan nagkikinahanglan ito hin mas hilawig nga panahon.
Salit an sugo han Dios nga pun-on an tuna ngan magkaada awtoridad ha mga hayop nagpapakita nga gindisenyo an siyahan nga mag-asawa basi mabuhi hin hilawig nga panahon. Ha pagkatinuod, nabuhi gud hi Adan hin maiha.
KATUYOAN HAN DIOS NGA MABUHI AN MGA TAWO HA WARAY KATAPOSAN HA PARAISO NGA TUNA
HILAWIG GUD AN IRA KINABUHI
Adan, 930 ka tuig
Matusalem, 969 ka tuig
Noe, 950 ka tuig
Yana, 70-80 ka tuig
Iginpapakita han Biblia nga an mga tawo hadto mas hilawig an kinabuhi kay ha aton yana. Nagsiring ito: “An ngatanan nga adlaw han kinabuhi ni Adan inabot hin 930 ka tuig.” Katapos, gin-unabi hito an unom pa nga kalalakin-an nga nabuhi hin sobra 900 ka tuig! Amo ini hira Set, Enos, Kenan, Jared, Matusalem, ngan Noe. Hira ngatanan nabuhi antes an Baha ha panahon ni Noe—hi Noe nabuhi hin 600 ka tuig antes an Baha. (Genesis 5:5-27; 7:6; 9:29) Kay ano nga sugad kahilawig an ira kinabuhi?
Ito nga kalalakin-an nabuhi ha panahon diin an mga tawo hirani pa ha pagin perpekto. Posible nga usa ito han nangunguna nga rason nga hilawig an ira kinabuhi. Pero ano an koneksyon han pagin perpekto ngan han pagkaada hilawig nga kinabuhi? Ngan paonan-o mapipirde an kamatayon? Basi mabaton ito, kinahanglan anay naton mahibaroan kon kay ano nga nalalagas kita ngan namamatay.