“Ha adlaw nga kumaon ka han bunga [han kahoy],” siring han Dios kan Adan, “mamamatay ka gud.” (Genesis 2:17) Ito nga sugo magigin waray gamit kon malalagas ngan mamamatay man la hi Adan. Maaram hi Adan nga kon diri hiya kumaon han bunga, diri hiya mamamatay.

Diri kinahanglan kumaon nira Adan ngan Eva tikang hito nga kahoy basi mabuhi​—damu an namumunga nga kahoy ha garden. (Genesis 2:9) Pinaagi han diri pagkaon hito, maipapakita unta han siyahan nga mag-asawa an ira pagin masinugtanon ha Dios nga naghatag ha ira hin kinabuhi. Maipapakita liwat unta hito nga ginkikilala nira an katungod han Dios nga maggiya ha ira.

Basi mahibaroan kon kay ano nga namatay hira Adan ngan Eva, kinahanglan naton usisahon an usa nga pag-istorya nga nakaapekto ha aton ngatanan. Hi Satanas nga Yawa naggamit hin halas basi magyakan hin nakakadaot nga buwa. An Biblia nasiring: “Yana an halas an pinakaalerto ha ngatanan nga ihalas nga hayop ha tuna nga ginhimo ni Jehova nga Dios. Salit nagsiring ito ha babaye: ‘Nagsiring gud ba an Dios nga ayaw kamo pagkaon han bunga han tagsa nga kahoy ha garden?’”​—Genesis 3:1.

Hi Eva binaton: “Puydi kami kumaon han bunga han mga kahoy ha garden. Pero mahitungod han bunga han kahoy nga aada ha butnga han garden, an Dios nagsiring: ‘Ayaw kamo pagkaon han bunga hito, ayaw, ayaw kamo pagkapot hito; kay kon buhaton niyo ito, mamamatay kamo.’” Katapos an halas nagsiring ha iya: “Diri gud kamo mamamatay. Kay maaram an Dios nga ha adlaw mismo nga kumaon kamo han bunga hito, mapupukrat an iyo mga mata ngan magigin pariho kamo ha Dios, mahibabaro kamo han maopay ngan maraot.” Iginpapagawas ni Satanas nga buwaon hi Jehova ngan may maopay nga butang nga diri niya iginhahatag ha siyahan naton nga mga kag-anak.​—Genesis 3:2-5.

Tinoo hi Eva ha iya nabatian. Nagkinita hiya ha kahoy. Makaruruyag gud ito pagkit-on! Gin-abot niya ito, nagkuha hin bunga, ngan ginkaon ito. Sunod, an Biblia nagsiring: “Katapos, han nakaupod niya an iya bana iya liwat gintagan hiya, ngan kinaon hiya hito.”​—Genesis 3:6.

Sigurado nga nasubo gud an Dios han nakita niya nga tinuyo nga nagtalapas ha iya an iya hinigugma nga mga anak! Ano an iya ginbuhat? Hi Jehova  nagsiring kan Adan: ‘Mabalik ka ha tuna, kay ginkuha ka tikang dida. Kay tapotapo ka ngan ha tapotapo ka mabalik.’ (Genesis 3:17-19) Tungod hini, “an ngatanan nga adlaw han kinabuhi ni Adan inabot hin 930 ka tuig, ngan katapos, namatay hiya.” (Genesis 5:5) Hi Adan waray mahingadto ha langit o ha lugar han mga espiritu. Diri hiya naeksister antes hiya larangon ni Jehova tikang ha tapotapo. Salit han namatay hiya, nagin tapotapo hiya utro kay tikang hiya dida. Waray na hiya umeksister. Makasurubo gud!

Tungod han ira tinuyo nga pagtalapas, nawara nira Adan ngan Eva an ira pagin perpekto ngan an paglaom nga mabuhi ha waray kataposan. Nagbag-o an ira pisikal nga kahimtang; nagin diri hira perpekto ngan nagin makasasala. Pero diri la hira an naapektohan han ira pagtalapas. Iginpasa nira an ira pagin makasasala ha ira mga anak. An Roma 5:12 nasiring: “Pinaagi han usa nga tawo [hi Adan] an sala sinulod ha kalibotan ngan an kamatayon pinaagi han sala, tungod hito an kamatayon dinangat ha ngatanan nga tawo kay hira ngatanan nakasala.”

Iginhuhulagway han Biblia an sala ngan kamatayon sugad nga “putos nga nagtatahob ha ngatanan nga mga katawohan ngan an tabon nga ginhablon ha bawbaw han ngatanan nga nasud.” (Isaias 25:7) Ini nga putos nagtatahob ha katawohan sugad hin nakakahilo nga alisngaw nga waray bisan usa nga makakapalagiw. Oo, “tungod kan Adan an ngatanan namamatay.” (1 Corinto 15:22) An pakiana nga nabangon, sugad han ginsiring ni apostol Pablo, amo ini: “Hin-o an magtatalwas ha akon tikang hini nga lawas nga magriresulta han akon kamatayon?” May-ada ba?​—Roma 7:24.