An sagdon han Biblia: “Mahigawas ha paghigugma ha kwarta an iyo pagkinabuhi, samtang kontento na kamo ha mga butang nga aada.”​—Hebreo 13:5.

Yana, ginpapauranan kita hin damu nga produkto ngan serbisyo nga kinahanglan kuno naton. Pero an Biblia nasiring nga puydi kita magin “kontento” ha kon ano an may-ada kita. Paonan-o?

Likayi an “gugma ha kwarta.” Iginbabalyo han mga tawo an ira kahimsog, pamilya, pagkamagsangkay, prinsipyo, ngan bisan an ira dignidad​—tungod la han “gugma ha kwarta.” (1 Timoteo 6:10) Kamakasurubo gud! Ha urhi an nahigugma ha bahandi “diri gud makukontento.”​—Eclesiastes 5:10.

Tagi hin importansya an mga tawo, diri an mga butang. Oo, daku an naibubulig han materyal nga mga butang. Pero diri ito makakahigugma o makakaapresyar ha aton; an mga tawo la an makakabuhat hito. An pagkaada “tinuod nga sangkay” nabulig ha aton nga magin kontento.​—Proberbios 17:17.

An sagdon han Biblia: “An malipayon nga kasingkasing maopay nga bulong.”​—Proberbios 17:22.

Sugad han “maopay nga bulong,” an kalipay nakakabulig ha aton nga mailob an sakit. Pero paonan-o kita magigin malipayon kon nag-aantos kita hin sakit?

Magin mapasalamaton. Kon pirme naton huhunahunaon an problema, “an ngatanan nga adlaw” naton magigin maraot. (Proberbios 15:15) Lugod, “ipakita an iyo pagkamapasalamaton,” siring han Biblia. (Colosas 3:15) Apresyara an mag-opay nga butang ha kinabuhi, anoman ito kagutiay. An pagtunod han adlaw, an harupoy han hangin, an hiyom han imo hinigugma​—ini nga mga butang nakakapalipay ha aton.

Magin mabinuligon. Bisan kon may sakit kita, “mas daku an kalipay ha paghatag kay ha pagkarawat.” (Buhat 20:35) Kon gin-aapresyar han iba an aton ginbubuhat, naabat kita hin kalipay ngan diri naton sobra nga nahuhunahuna an aton mga problema. Nagigin mas malipayon kita kon ginbubuligan naton an iba nga magin malipayon.

An sagdon han Biblia: ‘Siguroha niyo an mas importante nga mga butang.’​—Filipos 1:10.

An mga mag-asawa nga gutiay la an panahon ha kada tagsa namimeligro nga madaot an relasyon. Salit angay tagan hin prayoridad han mga mag-asawa an ira pag-asawa​—usa han pinakaimportante nga butang ha kinabuhi.

Buhata an mga butang nga magkaupod. Imbes nga maglugaring ha pagbuhat han mga butang nga imo naruruyagan, kay ano nga diri magplano nga buhaton ito nga magkaupod? “An duha mas maopay kay ha usa,” siring han Biblia. (Eclesiastes 4:9) Puydi kamo magkaupod ha pagluto, pag-ehersisyo, pagrelaks, o ha iba pa nga butang nga makapainteres ha iyo.

Ipahayag an imo gugma. Gin-aaghat han Biblia an mga mag-asawa nga higugmaon ngan respetuhon nira an kada tagsa. (Efeso 5:28, 33) An sinsero nga hiyom, hangkop, o gutiay nga regalo daku an naibubulig basi maparig-on an pag-asawa. Syempre, an ira seksuwal nga relasyon kinahanglan para la ha ira nga duha.​—Hebreo 13:4.