Nahuhunahuna mo ba an kinabuhi dinhi ha tuna kon waray adlaw? An adlaw naghahatag hin enerhiya para an mga puno magkaada mga dahon, bukad, bunga, ngan mga liso. Nabulig liwat ito basi an mga puno makakuha hin tubig tikang ha tuna pinaagi han mga gamot, ngan an tubig nasaka ngadto ha mga dahon, katapos nahingangadto ito ha hangin sugad nga alisngaw.

An uran usa nga regalo tikang ha Dios. Nabulig ito ha tuna nga makahatag hin pagkaon para ha aton. An Dios naghahatag hin uran ngan hin mga panahon nga abunda an ani, tungod hito nagkakaada kita hura nga pagkaon ngan an aton kasingkasing napupuno hin kalipay.

Damu nga tatay an nababaraka kon paonan-o hira makakagtagana hin igo nga pagkaon ngan bado para ha ira pamilya. Tagda an siring han Kasuratan: “Obserbari hin maopay an mga tamsi ha langit; diri hira nagsasabwag hin binhi o nag-aani o nagtitirok han mga inani ngadto ha mga bodega, pero ginpapakaon hira han iyo Amay ha langit. Diri ba mas birilhon kamo kay ha ira?”​—Mateo 6:25, 26.

“Mahibaro kamo hin leksyon tikang ha mga bukad nga liryo ha kapatagan, kon paonan-o hira natubo . . . ; pero susumatan ko kamo nga bisan hi [Hadi] Solomon ha bug-os niya nga pagkaharangdon waray makagbado hin sugad kaopay hini nga mga liryo. Kon ginbabadoan han Dios an mga tanom ha kapatagan . . . , diri ba mas babadoan gud niya kamo?”​—Mateo 6:28-30.

An Dios makakagtagana ha aton hin makakaon ngan maisusul-ot, salit sigurado nga mabubuligan liwat kita niya nga magkaada han iba pa naton nga panginahanglan. Kon bubuhaton naton an kaburut-on han Dios, mahimo niya bendisyonan an aton mga pangalimbasog ha pagtanom basi makakaon o ha pamiling hin trabaho basi mapalit an aton mga panginahanglan.​—Mateo 6:32, 33.

Oo, may maopay gud kita nga mga rason nga higugmaon an Dios kon ginhuhunahuna naton an adlaw, uran, mga tamsi, ngan mga bukad. Hihisgotan han masunod nga artikulo kon paonan-o an Dios nakikigkomunikar ha katawohan.