Damu nga tawo ha bug-os nga kalibotan an nanginginahanglan hin pagkaon ngan urukyan. An iba naman nagkikinahanglan la hin paglaom para ha maopay nga kabubuwason. Paonan-o an pagbulig ha iba magriresulta hin pag-uyon ngan bendisyon han Dios?

“An nagpapakita hin pagkabuotan ha ubos nga tawo, nagpapautang kan Jehova, ngan Iya hiya babaydan tungod han iya ginbubuhat.”​—PROBERBIOS 19:17.

Hi Jesus nag-istorya mahitungod ha usa nga lalaki nga gin-atake hin mga tulisan ngan ginbayaan nga haros patay na. (Lucas 10:29-37) Usa nga estranghero an binulig ha iya bisan kon magkaiba an ira lahi.

Labot la nga ginbuligan hinin buotan nga estranghero nga matambal an lalaki ngan gintagan hiya hin materyal nga bulig, ginliaw liwat niya hiya tikang ha iya makasurubo nga sitwasyon.

Ano nga leksyon an aton mahibabaroan? Gintututdoan kita ni Jesus nga kinahanglan buhaton naton an aton mahihimo ha pagbulig ha nanginginahanglan. (Proberbios 14:31) Iginsusumat han Baraan nga Kasuratan nga diri na maiha wawad-on han Dios an kapobrehan ngan pag-antos. Pero bangin maghunahuna kita, paonan-o ngan san-o ito bubuhaton han Dios? Hihisgotan han masunod nga artikulo an tiarabot nga mga bendisyon nga ihahatag ha imo han mahigugmaon nga Dios.