Ha Ano Gud ba Nakadepende an Imo Kabubuwason?
Damu an natoo nga may diri nakikita nga pwersa nga nagkukontrol han ira kabubuwason. Tungod hito, ginsusunod nira an mga buhat nga ira ginhuhunahuna nga makakapaopay han ira kabubuwason.
AN GINTOTOOHAN HAN DAMU
ASTROLOHIYA: May mga natoo nga an ira kabubuwason nakadepende ha posisyon han mga bitoon han natawo hira. Nagbabasa hira hin mga horoscope basi mahibaroan an mahitatabo ha ira ngan nagios uyon hito basi malikayan an kadaot o magin malampuson.
FENG SHUI: An iba natoo nga basi magin malampuson, kinahanglan ipahiuyon nira ha diri nakikita nga mga pwersa ha palibot an disenyo han ira balay. Hi Lo Wing, * nga naukoy ha Hong Kong, nagsiring, “Usa nga eksperto ha feng shui an nagsiring ha akon nga an pagbutang hin espesyal nga kristal ha pinili nga bahin han akon tindahan mabulig nga magin mas daku an akon kità.”
PAGSINGBA HA KAAPOY-APOYAN: An iba naman natoo nga kinahanglan pasidunggan nira an ira namatay nga mga kaapoy-apoyan o an iba-iba nga dios basi makarawat an ira proteksyon ngan bendisyon. Hi Van, nga naukoy ha Vietnam, nagsiring, “Natoo ako nga kon papasidunggan ko an akon mga kaapoy-apoyan, magigin mas maopay an akon kinabuhi yana ngan kami han akon mga anak magkakaada mas maopay nga kabubuwason.”
REINKARNASYON: Damu an natoo nga kon mamatay an usa nga tawo, matatawo hiya utro, ngan pauroutro ito nga nahitatabo. Para ha ira, an maopay o maraot nga nahitatabo ha ira yana resulta han ira mga ginbuhat han nauna nira nga kinabuhi.
Pero damu an naghuhunahuna nga patootoo la ito. Bisan pa hito, nagbubuhat hira hin panhimalad ngan nagamit hin horoscope, Ouija® board, tarot card, ngan puropariho hito. Natoo hira nga bangin man la mabuligan hira hito nga mahibaroan an ira kabubuwason.
ANO AN RESULTA?
An mga tawo ba nga nasarig ha sugad nga mga toloohan ngan buhat nagkaada maopay nga kinabuhi ngan mas maopay nga kabubuwason?
Tagda an eksperyensya ni Hào, nga naukoy ha Vietnam. Nagpagiya hiya ha astrolohiya, feng shui, ngan pagsingba ha kaapoy-apoyan. Nagin malampuson ba hiya? Ini an siring ni Hào, “Nalugi an akon negosyo, nagdamu an akon utang, nagkaproblema an amon pamilya, ngan nadepres ako.”
Hi Qiuming, nga taga-Taiwan, natoo liwat ha astrolohiya, reinkarnasyon, kapalaran, feng shui, ngan pagsingba ha kaapoy-apoyan. Katapos usisahon hin maopay ini nga mga toloohan, nagsiring hiya: “Nasantop ko nga an sugad nga mga katutdoan ngan kustomre diri nagkakauruyon ngan masamok. Napansin ko nga agsob nga sayop an ginsisiring han mga horoscope. May kalabotan ha reinkarnasyon, kon diri ka nahinunumdom han imo nauna nga kinabuhi, paonan-o ka magbabag-o ngan mapaopay an sunod mo nga kinabuhi?”
“Nasantop ko nga an sugad nga mga katutdoan ngan kustomre diri nagkakauruyon ngan masamok.”—QIUMING, TAIWAN
Nahibaroan ni Hào, ni Qiuming, ngan han damu pa nga an aton kabubuwason diri nakadepende ha kapalaran, ha mga bitoon, ha namatay nga mga kaapoy-apoyan, o ha katawo utro. Karuyag sidngon ba nga diri naton kontrolado an aton kabubuwason?
Damu an naghuhunahuna nga an paagi ha paggarantiya hin mas maopay nga kabubuwason amo an paniguro ha pagkaada hitaas nga edukasyon ngan karikohan. Ano an nagin resulta para ha pipira nga nagpili hito?
^ par. 5 Hini nga artikulo ngan ha mga masunod, ginsaliwnan an iba nga ngaran.
^ par. 16 Mababasa ini ha Baraan nga Biblia ha Galacia 6:7. Ini nga ideya iginsasaysay ha popular nga mga puplunganon ha Este sugad han Pagtanom hin melon, ngan magkakaada ka melon; pagtanom hin beans, ngan magkakaada ka beans.
Bangin Maruyagan Mo Liwat
AN BARANTAYAN
Astrolohiya Ngan Panigo—Mga Paagi ha Paghibaro han Tidaraon?
Masasarigan mo ba ini nga klase hin pagtagna?
AN BARANTAYAN
An Ginsisiring han Biblia Mahitungod ha Kinabuhi Ngan Kamatayon
May-ada ba bahin han tawo nga padayon nga nabubuhi kamatay han lawas? May-ada ba kita diri namamatay nga kalag? Hain an mga patay?
